☉ Ugao
Txosnak jarriko dituzte berriz Ugaoko jaietan: aurten, AXAko parkingean
AXAko parkingean egongo dira bi urtez eta ondoren Parke Berdera lekualdatuko dira, beste bi urtez. Udalaren eta Txosna Batzordearen arteko akordioak lau urteko iraupena izango du.
Ugaoko Txosna Baztordearen eta Udalaren arteko negoziaketen ondotik, txosnagunea jarriko dute berriz Ugaoko jaietan. AXAko parkingean egongo dira bi urtez eta ondoren Parke Berdera lekualdatuko dira, beste bi urtez. Akordioak lau urteko iraupena du eta adostutakoa berresteko hitzarmena sinatuko dute bi aldeek, Udalak eta Txosna Batzordeak.
Gogoratu iaz ez zela txosnagunerik izan Ugaon, bi aldeek zituzten kokapenaren inguruko desadostasunen ondorioz. Txosna Batzordeak herrigunean kokatu nahi zituen txosnak, Parke Berdean hain zuzen ere, baina Udalak ez zuen eskaera onartu “jaietan zehar zarata karga handia pilatzen baitu toki horrek”, eta txosnagunerik gabe ospatu ziren iazko jaiak. Aurten, negoziaketa luzeen ondotik, AXAko parkingaren eta Parke Berdearen arteko errotazio sistema adostu dute Udalak eta Txosna Batzordeak.
Adostasunera heltzeko, proposamenak moldatu behar izan dituzte alde biek. Udalak Insititutuko parkingean kokatu nahi zituen txosnak, “urte askotan hala izan da, oso ondo funtzionatu du, ez da kexarik izan eta Txosna Batzordekoak ere pozik zeuden hasiera batean”. Txosna Batzordetik onartu dute lekuak ondo funtzionatzen duela txosnaguneari dagokionez, “baina iaz tabernariekin analisi soziala egin eta gero, ondorioztatu genuen kokapen horrek ‘hilik’ uzten duela herrigunea eta ez zitzaiela ostalariei mesederik egiten. Herritarren eta tabernarien iritziak jaso eta gero, lekurik egokiena Parke Berdea zela ondorioztatu genuen”.
Foro Sozialaren eraketa
Otsailean elkartu ziren lehendabizikoz Udala eta Txosna Batzordea, iazko egoera ekiditeko asmoz. Biak bat zetozen txosnagunea “ezinbestekoa dela” jaietan. Bertan, Foro Soziala antolatzea adostu zuten eta herritarrak, tabernariak, eragileak eta Ugao osatzen duten pertsona fisiko zein juridiko guztiak gonbidatu zituzten. Foro horretan 50 biztanle inguru bildu ziren eta han batutakoen ondorio nagusia txosnek leku finkoa (errotaziorik ez) izan behar zutela eta jaien erdigunean kokatu behar zirela (Parke Berdea) izan zen. Udalarekin izandako hurrengo bileran, ordea, “leku horretan pilatzen den zarata kargak” atzera bota zuen proposamena. “Parke Berdean eszenatoki nagusia dago: kontzertuak, soinu frogak eta ekintza gehiago egiten dira hor. Ondorioz, auzokideek jaietako egun guztietan zarata karga garrantzitsua jasaten dute eta txosnak bertan kokatzea karga horri zama gehitzea litzateke”, diote Udaletik.
Txosna Batzordeak bigarren proposamena luzatu zuen orduan, hainbat aldaketekin: Parke Berdean bizi diren auzokideekin batera kontzientziazio eta errespetu kanpaina bat abiatzea Ugaoko jaietan, “auzokideen atsedena bermatzeko asmoz. Txosnen ordutegiak ordu bateko murrizketa izango luke ere”. Bigarren proposamen honekin ere ez ziren akordio batera heldu. Udala AXAko parkingaren, Insitutuko Parkingaren eta Parke Berdearen arteko errotazio sistemaren aldekoa zen eta Txosna Batzordea Parke Berdean finkatzearen aldekoa.
Ugaoko Txosna Batzordea, iazko agerraldi batean // Txosna Batzordea
Txosna Batzordetik hirugarren proposamen bat jarri zen mahaigainean: AXA eta Parke Berdearen artean errotazioa egitea, bi urterik behin aldatuz. AXAn txosnak jartzean ostiral eta larunbat gauetan (00:00-3:00) Parke Berdean barra txiki bat jartzea proposatzen zuten ere, “bertan kontzertuak ikusten dagoen jendeak edateko aukera izan dezan, izan ere, Parke Berdean ez dago tabernarik”. Azken proposamen hau da aurrera atera dena, baina Parke Berdean barrarik jarri gabe. Lau urterako sinatuko dute akordioa Udalak eta Txosna Batzordeak.
“Bai Udalak eta bai Txosna Batzordeak etsi egin dugu zenbait puntutan. Gure proposamena txosnak Institutuko parkingean kokatzea zen, urte askotan hor egon baitira eta inoiz ez delako arazorik izan. Hori baztertuta, hiru tokiren arteko errotazioa proposatzen genuen. Azkenean AXA eta Parke Berdearen arteko errotazioa gailendu da, bi urterik behin”, dio Ekaitz Mentxaka Ugaoko alkateak. “Ez da guk gehien nahiko genukena, txosnagunearen toki finkoaren aldekoak baikara, baina positiboa da akordioa. Txosnaguneko giroa herrigunetik hurbilen kokatu nahi genuen, eta akordio honekin hori lortu dugula uste dugu”, diote Txosna Batzordetik.
Lau urte barru berriz elkartuko dira bi aldeak, eta sistema berri honen inguruko ebaluaketa egitea elkarlanean egitea da ideia, sistemarekin aurrera egin edo ez erabakitzeko.
☉ Ugao
Ugaoko kultur ondarea ezagutzeko otsailaren 11n ibilbide gidatua egingo dute
Jarduera parte-hartzailea izango da eta helburua herriaren memoria eta nortasuna gertutik ezagutzea izango da
Ugaoko Udalak, AEKrekin elkarlanean eta Bizkaiko Foru Aldundiaren babesarekin, hiribilduaren kultur ondarea ezagutzeko ibilbide gidatua antolatu du beste urte batez ‘Praktikatu eta bizi’ programaren barruan. “Herriko kultur ondarea ezagutzeko aukera izango dugu aditu baten eskutik”, iragarri dute.
“Ibilbide gidatuan, Ugaoko hainbat leku esanguratsu bisitatuko ditugu, haien historia, erabilera eta garrantzia ezagutzeko”. Jarduera parte-hartzailea izango da eta helburua herriaren memoria eta nortasuna gertutik ezagutzea izango dela azaldu dute antolaketa taldetik.
☉ Ugao
Ugaoko kiroldegiak igerilekua, spa eta erlaxazio gunea berritu ditu
“Kiroldegi honek ez du soilik kirol-jarduera sustatzen; ongizaterako, osasunerako eta komunitate-kohesiorako gune ere bihurtu da”, azaldu du Foru diputatuak
Ugaoko El Jaro kiroldegiak Leixuri Arrizabalaga Euskara, Kultura eta Kirol foru diputatuaren bisita izan du gaur goizean, Udalak amaitu berri dituen igerilekuko lanak direla eta. Bisita berezira hedabideak gonbidatu dituzte, azken hilabetetako lanak ezagutzeko, espazio berriak joan den urtarrilaren 19tik herritarrentzat zabalik egon arren.
Azken hilabeteetan GEURIAn iragarri lez, Ugaoko kiroldegiak hobekuntzak egin ditu El Jaro kiroldegian, 1997tik egin diren esku-hartzerik garrantzitsuena. Izan ere 1.226.826 euroko inbertsioa egin dute, eta horietako 500.000 Foru Aldundiak finantziatutakoak dira.
Berrikuntza aipagarrienak sortu dituzten bi igerileku-baso berriak dira. Lehenengoa, 1,20 metroko sakonerakoa, jarduera espezifikoetarako izango da, hala nola haur, heldu eta nagusientzako ikastaroak eta zuzendutako jarduera berriak, aquagym kasu.
Bestea, sakonera berekoa, entretenimendurako erabiliko dela iragarri du Udalak, spa eta erlaxazio gune batekin: “Espazio hori erabilera anitzeko areto zaharra igerileku nagusiaren esparruarekin (klimatizatua) lotuz egokitu da. Azken honek bere sei kaleak eta ohiko erabilera mantentzen ditu, bai igeriketa librerako bai irakaskuntzarako”, zehaztu dute udal ordezkariek.
Bisitako momentu bat, igerilekuetan // Geuria
Ondorioz, sauna eta bainu turkiarra lekualdatu dute eta berritutako eremuaren zati handi bat irisgarritasun eta segurtasun-irizpideak kontuan hartuta diseinatu da, bereziki dibertsitate funtzionala edo mugikortasun murriztua duten pertsonak aintzat hartuz. Horrela, kiroldegia hezkuntzara eta osasuna zaintzera bideratutako gune gisa sendotu da.
Lexuri Arrizabalaga, Foru diputatua: “Kiroldegi honek ez du soilik kirol-jarduera sustatzen; ongizaterako, osasunerako eta komunitate-kohesiorako gune ere bihurtu da”
“Erakundeen arteko lankidetzari esker, herritarren bizi-kalitaterako funtsezkoak diren instalazioak nabarmen hobetu ahal izan dira”, azaldu du Arrizabalagak. “Kiroldegi honek ez du soilik kirol-jarduera sustatzen; ongizaterako, osasunerako eta komunitate-kohesiorako gune ere bihurtu da”.
Ekaitz Mentxaka Ugaoko alkateak nabarmendu du jarduketa hau herritarrek aspalditik eskatutakoa dela eta esku-hartze honi esker kiroldegiak eraldaketa handia izan duela: “Erabiltzaileek adierazitako beharrei erantzun diegu, eta ziur gaude datozen urteetako erronkei aurre egiteko prest dauden instalazio moderno eta moldakorrez gozatuko dutela”.
☉ Ugao
Adimen emozionala lantzeko ikastaroa antolatu dute Ugaon, otsailean
Helburua parte-hartzaileek euren emozioak hobeto ezagutu eta kudeatzeko tresnak eskuratzea da, ongizate pertsonala eta harreman osasuntsuak sustatzeko
Otsailaren 12an hasita, Adimen emozionala lantzeko 20 orduko ikastaroa antolatu dute Ugaoko Gaztelekuan 18:30etik 20:30era.
Ikastaroa hamabostean behin egingo dute: “Helburua da parte-hartzaileek euren emozioak hobeto ezagutu eta kudeatzeko tresnak eskuratzea, ongizate pertsonala eta harreman osasuntsuak sustatzeko”, azaldu dute udal ordezkariek.
Izena emateko epea otsailaren 5era bitartean zabaldu dute. Interesdunek Jane jauregian eman beharko dute inprimakia. Tramitea online egiteko aukera dago ere inprimaki hau betez.
☉ Ugao
Ugaoko inauterietako mozorro lehiaketan parte hartzeko epea zabaldu dute
Mozorro festa otsailaren 14an antolatu dute (larunbata), 18:00etan. Egun horretan desfilea egingo dute San Bartolome kaletik abiatuta
Urtarrilaren 30era bitartean zabaldu dute Ugaoko mozorro lehiaketan parte hartzeko epea.
Aurtengo inauteriak otsailaren 12tik 17ra izango dira Ugaon, eta Jai Batzordeak, udalerriko Merkatarien Elkartearen laguntzarekin, mozorro-lehiaketaren edizio berri bat antolatu du.
Mozorro festa otsailaren 14an antolatu dute (larunbata), 18:00etan. Egun horretan desfilea egingo dute San Bartolome kaletik abiatuta: “Lehiaketan nahi duten pertsona guztiek parte hartu ahal izango dute, banakako edo taldekako modalitatean”, azaldu dute udal ordezkariek.
1.000 euro banatuko dituzte saritan guztira eta Ugaoko Merkatari Elkarteko establezimenduetan trukatu ahalko dira den-denak. Hiru kategoria bereiziko dira irabazleen artean:
– Banakako haur eta helduena: 50 euro, kategoria bakoitzeko
– Gehienez sei lagunez osatutako taldeak: Lehen saria 200 euro; bigarren saria 100 euro
– Sei lagunetik gorako taldeak: Lehen saria 300 euro; bigarren saria 200 euro
Parte hartzearekin batera, parte-hartzaile bakoitzak eszenatokian emanaldi edo dantza txiki bat eskaini beharko du eta erabiliko den musika izen-ematearekin batera entregatu beharko dute.
Giroa, 2024ko inauterietan // Geuria
Egitaraua | Ugaoko inauteriak 2026
Mozorro festaz gainera, bestelako jarduerak antolatu dituzte Ugaoko jaietan, otsailaren 12tik 17ra bitartean: zanpantzar desfilea, tostada lehiaketa, haurrentzako jarduerak, urteroko Kiskailuaren erretzea…
Otsailak 13, ostirala
Eskolako kalejira, buruhandiak eta haurrentzako ikuskizuna
10:45 Eskolako kalejira: Euskal Inauteriak
18:00 Buruhandiak, Herriaren enparantza eta kale zaharra
19:00 ‘Mugi Boogie’ haurrentzako ikuskizuna, Herriaren enparantza
Otsailak 14, larunbata
Zanpantzar desfilea, tostada lehiaketa, mozorro-desfile eta lehiaketa, musika eta animazioa…
12:00 Zanpantzar kalejira, herriko kaleetan zehar
13:00 Tostada lehiaketa
18:00 Mozorro desfilea Kiskailua eta Sama Siku fanfarrearekin, San Bartolome
19:00 Mozorro Lehiaketa kideen emanaldia + sari banaketa
20:00 Musika giroa, Herriaren enparantza
Otsailak 16, astelehena
Buruhandiak eta puzgarriak
17:00 Buruhandiak, Herriaren enparantza eta kale zaharra
18:00 Puzgarriak, Herriaren enparantza
Otsailak 17, asteartea
Kiskailuaren erretzea, haurrentzako jolasak eta txokolatada
17:30 Umeentzako jolasak
19:00 Kiskailua erre
19:30 Txokolatada, Herriaren enparantza
☉ Ugao
Gazteentzako euskarazko zeramika ikastaroa eskainiko dute Ugaon, otsailetik apirilera
Izena emateko azken eguna urtarrilaren 29a izango da
Otsailaren 2tik apirilaren 22ra bitartean haurrei zuzendutako zeramika monografikoa antolatu du Ugaoko Udalak Hiru Hodietako kultur etxean, 19:00etatik 20:30ak arte.
Guztira 30 orduko ikastaroa izango da eta sei eta 18 urte bitarteko gazteei zuzenduta dago. Izena emateko azken eguna urtarrilaren 29a izango da eta modu bitan egin daiteke: aurrez aurre Jane jauregia edo inprimaki hau betez.
Katixa Agirre Galdakaon izango da otsailaren 9an Leidu Irakurketa Taldearen hitzorduan
Matxitxako kaleko zubia eraisteari ekin diote, Basaurin
Zaratamoko Gutiolo eta Urdinbide auzoak urez hornituko dituen proiektu berriaren hitzarmena onartu dute
Argazkiak | Galdakao eta Altsasu senidetu egin dira inauterien transmisioari jarraipena emateko
Argazkiak | Lokatz artean lehiatu dira Ausartak Mendi Lasterketako korrikalariak Arrigorriagan
Argazkiak | Errege Magoek ilusioa eta gozokiak banatu dituzte Galdakaoko kabalgatan
Bideoa | “Altsasuko Ihauterien garrantzia bermatu nahi dugu Galdakaoko eta Altsasuko udalek”
Bideoa | Chami eta Jon aurkezle finek Korrika aurkeztu dute Galdakao
