☉ Galdakao
Aitor Aburto: “Musika ikastea zoragarria da, baina zoratzekoa ere”
Da Capo Galdakaoko Musika Bandan klarinetea jotzen hasi zen Aitor duela hamar urte baino gehiago. Egun Orkestra Zuzendaritza Masterra egiten ari da, eta bere taldekideak zuzendu berri ditu Torrezabalen.
Galdakaoko Da Capo Musika Bandako kide da Aitor Aburto Iracizabal (Lezama, 1995). Egun klarinetea jotzen du, baina saxofoia ere jo izan du. Lehen Hezkuntzan graduatua izateaz gain, Goi Mailako Musika Gradua du, eta momentu honetan Orkestra Zuzendaritza Masterra ikasten ari da. Hain zuzen ere, urriaren 17an Da Capok 2021-2022 denboraldiari hasiera eman zion Torrezabalen ‘Erroetara bueltan’ ikuskizunarekin eta bertan zuzendari gonbidatu bezala aritu zen Aitor. Hori aitzakia hartuta, Aitorrekin berba egitera lotu gara.
Da Capo Galdakaoko Musika Bandaren ikasturteko lehen kontzertuan zuzendari gonbidatu izan zinen.
Hala da. Galdakaoko Da Capo Musika Bandaren kidea naiz. Egun, klarinetea jotzen dut. Eta bestetik, zuzendaritza ikasketak ere egin ditut. Orain arlo honetan nabil gehiago zentratzen, argi dago, klarinetea alde batera utzi gabe; orduan, zuzendari gonbidatua izateko proposamena heldu zen, bai nire partetik, bai bandaren partetik. Orain ez dut gogoratzen nor izan zen lehena proposatzen, baina egia da bi aldeetatik hori egiteko gogoa geneukala. Printzipioz iazko denboraldirako zegoen programatua, baina pandemiarekin ezin izan genuen egin, eta ez genuenez kontzertua galdu nahi, hurrengo denboraldian programatzea erabaki genuen. Azken finean aukera oso interesgarria zen bai niretzat eta bai bandarentzat eta oso era naturalean garatu da proiektua.
Eta lehenegoz zuzendari moduan aritzeko esperientzia zelan definituko zenuke?
Hasieran arraroa izan da. Batetik, beste aldean zaudelako, zure kideen aurrean; bestetik, beste era batera lan egin behar duzulako. Baina oso erraza izan da banda honekin lan egitea. Bandak berak maila altua du, lanerako jarrera itzela dute kideek eta sortzen den giroa oso lagungarria da lan egiteko eta musikan behar bezala sakontzeko.
Eta aurrera begira, zuzendari bezala ikusten duzu zure burua?
Egia esan, ez dakit eta ez dut horretan pentsatu nahi. Denborarekin ikasi dut ondo dagoela helburuak izatea, baina helburu zehatz bat jarriz gero ate asko ixten dituzula eta zure buruari mugak jartzen dizkiozula ere ikusi dut. Nik, momentuz, musikan zentratu nahi dut nire ibilbide profesionala, musikaren arlo desberdinak ikusi, euretatik ikasi… Nire ardura musika egitea da, gaur zuzendari bezala, bihar orkestran klarinetea jotzen, ganberako musika taldeekin edo irakaskuntzan belaunaldi berriak hezten.
Zer eskaini diezaioke zu bezalako zuzendari gazte batek musika banda bati?
Batez ere energia eta musika egiteko pasioa eta gogoa. Gainera, nahiz eta gaztea izan, esperientzia nahikoa daukat musikako arlo desberdinetan, eta uste dut haientzat ere interesgarria izan daitekeela nire ezagutzak partekatzea, musikarekiko ikuspuntua ezagutzea eta zerbait berria ikustea.
Gero eta zuzendari gazte gehiago ikusten dira musika bandak zuzentzen.
Bai. Gero eta zuzendari gazteagoak eta, gainera, prestatuagoak esango nuke. Banden inguruko musikaren interesa asko hazi da azken urteotan. Banden maila hobetu da, konpositoreak formazio honen inguruan interesatu dira eta proiektu berritzaileak agertu dira. Banda bat oso tresna boteretsua da musika egiteko eta ez da harritzekoa gaur egungo musikari edota zuzendari gazteek bandak aukeratzea euren musika jarduna garatzeko.
Banden kontzepzio tradizionala desagertzen ari da, nahiz eta honen oinarriak sendo mantendu. Gure erroak alde batera utzi gabe, musikari gazteok berrikuntza, pasioa eta energia dakartzagu, kultura sendotzeko asmoz gizarteari zerbait esanguratsua eskaintzeko.
Errepertorioa ezberdina al da zuzendari gazte bat ala nagusiago bat dagoenean?
Printzipioz ez du horrela izan behar. Egia da zuzendari gazteek askotan energia eta pasioaz bultzaturik gauza deigarriak egin nahi ditugula, baina hori pertsonaren arabera doa beti. Badaude gazteen energia baino gehiago dituzten zuzendari nagusiak eta alderantziz.
Zuzendariaren lana alde batera utzita, Da Capoko klarinete jole zaitugu.
Da Capon duela hamar urte baino gehiago hasi nintzen. Orduan ez ginen Da Capo deitzen eta banda asko aldatu da ordutik. Momentu horretan klarinetea ikasten nuen Larrabetzuko Musika Eskolan eta irakasle baten gomendioagatik hasi nintzen Galdakaoko Musika Bandan. Bandan sartu nintzen momentuan ez nintzen Galdakaon bizi, izan ere, hamaika urte nituenean Lezamara joan ginen bizitzera, baina ilusioa egiten zidan Galdakaora bueltatzea txikitan askotan ikusi nuen bandaren parte izateko.
Eta zergatik klarinetea?
Hasieran gitarra aukeratu nuen, baina Galdakaoko Musika Eskolan ez zegoen lekurik gitarrako saioetan, beraz, beste instrumentu bat aukeratzera behartu ninduten. Nire anaia nagusiak saxofoia jotzen zuen eta orduan berarekin izena eman nuen saxofoia ikasteko. Kasualitatez, bere irakasleak klarinetea ere jotzen zuen eta egun batean instrumentua aurkeztu zidan… Txundituta gelditu nintzen bere soinuaz eta momentu horretan bertan instrumentuz aldatu nuen, eta gaur egunera arte.
Non egin dituzu klarinete ikasketak?
Klarinete Goi Mailako Gradua Musikenen egin ditut. Ekainean amaitu berri dut gradua. Musika ikastea zoragarria da, baina zoratzekoa ere. Oso gogorra da. Musikak zure bizitzaren parte handi bat hartzen du eta egunero momentu oro daukazun motxila bat da. Gauza onak ditu, jakina, baina txarrak ere bai: presioa, esfortzua, nekea edota ikasketa orduak jasateko maila psikologikoan prestatua egon behar duzu edo denborarekin ikasi beharko duzu, bestela aldapa gora egiten da. Hala ere, gauza positibo bat dauka, aurreko guztiari gailentzen zaiona: musika daukazula lanbide bezala.
Musikari bat beti dago ikasketa etengabean ala noizbait bukatzen dira ikasketak?
Ikasketak inoiz ez dira bukatzen. Agian maila formalean bai, baina musikan aritzea etengabeko ikasketa da. Beti dago zerbait berria, zerbait aldatzeko edo deskubritzeko. Eguneroko bizitzan ere bizipenez ikasten dugu arlo pertsonalean garatzen jarraitzeko, etengabeko ikasketan gaude. Bada, musikan berdin.
Nola eta non entseiatzen duzue Da Capokoek?
Beti entseatu izan dugu Galdakaoko musika eskolan, baina Covid-19ak eragindako murrizketen ondorioz, Torrezabalera eraman gaituzte. Hori bai, banda bezala Torrezabal alokatu behar dugu entseatzera joan ahal izateko. Urrira arte izan dugu erreserbatuta, eta badirudi laster itzuliko garela musika eskolara.
Zer eskaintzen dio Da Capo Galdakaoko Musika Bandak herriari eta orokorrean gizarteari?
Galdakaoko Banda goi mailako kultur aukera bat da, eta, aldi berean, publikoarengandik hurbil dagoena. Torrezabalen eta horren moduko antzokietan kontzertuak eskaintzen ditugu, baita kalean ere, jai-ekitaldi askotan gaude, folklore ekitaldietan, herriko zein auzoetako jaietan, eta kalejirak ere egiten ditugu. Bestetik, esan behar da Galdakaoko Banda beti dagoela musika eskolako musikariak hartzeko prest. Beti izan du hurbiltasun hori, nahiz eta eskolak eta bandak elkarrekin lotura zuzena ez izan.
Da Caporen jardunean pandemiak eraginik izango zuen.
Bai. Hilabete asko eman ditugu geldirik izan diren murrizketa guztiengatik. Gurekin zerikusirik ez duen zerbait izan da, eta Bandan izan dituen ondorioak nahiko nabarmenak izan dira. Alde batetik, ezin izan dugulako ezer eskaini, eta, bestetik, berriro martxan jarri garen aldietan kosta egin delako taldea martxan jartzea. Hala ere, banda osatzen dugunok beti prest gaude itzultzeko. Gogo handiz itzuli gara, herriari kultura eskaini ahal izateko.
Baina dagoeneko martxa hartu duzue. Zein erronka duzue ikasturte berrirako?
Galdakaoko Udalari programazio oso zabala eta interesgarria proposatu diogu. Oraindik ez dago ezer itxita, baina bost kontzertu hitzartu ditugu Torrezabalen, beste bost kontzertu kalean, auzo ezberdinetara joango gara eta kalejira batzuk egingo ditugu. Bestalde, lankidetza dezente egingo ditugu ikasturte berrian, baita nazioarteko kolaborazioak ere. Ez dakit askoz gehiago aurreratu dezakedan, baina ikasturte berrian zenbait sorpresa izango ditugu.
Athleticek jakinarazi duenez, Jose Mari Argoitia futbolari ohia hil da gaur 85 urterekin. Jaiotzez Galdakaokoa, Arkotxarekin lotura handia izan zuen, familia bertakoa baita.
Basauriko CD Basconian jokatu ostean, hirurogeiko hamarkadan fitxatu zuen Athleticek eta 1972an taldea utzi zuen: hamabi denboralditan 308 partida jokatu zituen eta 69 gol sartu zituen. Besteak beste, Piru Gainza basauriarra bere entrenatzaile izan zen.
1969ko Kopa irabazi zuen, eta Argoitiak Anton Arietari asistentzia eman zion titulua lortzeko erabakigarria izan zen golean.
“Athleticekiko leialtasun handia izan zuen. Bere familiak bere oparia jaso zuen atzo, hil bezperan, elkarteko bazkide gisa 75 urte baino gehiago betetzeagatik. Lezamako beheko mailetan entrenatu zuen, filialeko bigarren entrenatzailea izan zen eta Jose Luis Mendilibarren laguntzailea ere bere lehen taldean egin zuen denboraldi bakarrean. Klubari laguntzeko beti prest, bikote paregabea osatu zuen Koldo Aguirre peñen enbaxadore zela”, adierazi dute klub bizkaitarretik.
Athleticek besoko beltza jantziko du urriaren 25ean Getaferen aurka jokatuko duen partidan.
☉ Galdakao
Galdakaoko aparkalekuen okupazioa denbora errealean kontsultatzeko aukera dute orain herritarrek
Galdakao app-a eguneratu du Udalak. Herriko aparkalekuen okupazioaz gain, garraio publikoari buruzko informazio zehatza ezagutu dezakete galdakoztarrek
‘Galdakao’ sakeleko telefonoko aplikazioa eguneratu du Udalak. Eta eguneraketa horri esker, herritarrek anbulatorioko, Lapurdiko eta udaletxe ondoko aparkalekuen okupazioa denbora errealean kontsultatu ahal izango dute.
“Mapa interaktibo baten bidez, erabiltzaileek bakoitzean zenbat aparkaleku libre dauden ikus dezakete, baita hautatutako parkingera iristeko jarraibide zehatzak jaso ere”, diote udal ordezkariek.
Era berean, garraio publikoari buruzko informazio zehatza jaso ahalko dute herritarrek eguneraketari esker: Euskotreneko trenetarako itxaron denbora kontsultatzea eta Galdabusaren bi lineei buruzko informazioa ezagutzea, hain zuzen.
“Zuhatzu-Galdakao tren geltokitik igarotzen diren trenetarako itxaron denbora kontsultatu daiteke, bai Bilboko noranzkoan, baita Bermeo, Eibar eta Donostiako noranzkoetan ere. Horrela, herritarrek euren joan-etorriak modu eraginkorragoan antolatu ahal izango dituzte, alferrikako itxaronaldiak saihestuz”, diote.
Galdabusari buruzko informaziori dagokionez, erabiltzaileek mapa interaktiboan ikus dezakete geltoki guztien kokapen zehatza, baita ibilbide bakoitzaren eguneratutako ordutegiak ere.
Zerbitzu horiek eskaintzeaz gain, ‘Galdakao’ app-ak honako funtzionalitateak ditu: azken berriak ezagutzea; agenda kontsultatzea eta sarrerak eraostea; Bizkaibus lineei buruzko informazioa; botika eta guardiako farmazien kontaktuak; liburutegien eta kiroldegien informazioa eta horietan tramiteak egiteko aukera; ESAN Herritarren Arretarako Bulegoarekin zuzenean harremanetan jartzeko aukera; abisuak eta iradokizunak bidaltzea; edota Udalean egin daitezkeen administrazio tramite guztiei buruzko informazio zehatza kontsultatzea.
“Udalaren aplikazioaren bidez, eta horren azken eguneratzearekin, Udalak digitalizazioarekiko eta zerbitzu publikoak hobetzeko duen konpromisoa berresten du, herritarren egunerokoan erabilgarriak diren tresnak guztien eskura jarriz. Hortaz, aplikazioa sakelako telefonoan jartzeko gonbita egiten die Udalak herritarrei, informazioa uneoro eskura izan dezaten”, diote. App-a Android zein Apple gailuetan deskargatu dezakete herritarrek.
☉ Galdakao
Galdakaoko Batzokiak 120 urte bete ditu eta hori ospatzeko ekitaldia antolatu dute urriaren 26an
Ikurrin igoera, ekitaldi politikoa, luntxa eta argazki erakusketa antolatu dituzte igandean Galdakaoko Batzokiaren 120. urteurrena ospatzeko
Galdakaoko Batzokiak 120 urte bete ditu eta urteurrena ospatzeko ekitaldia antolatu du EAJk urriaren 26an, igandez.
Iturrondo plazan izango da ospakizun ekitaldia 12:00etan: ikurrin igoera, ekitaldi politikoa, luntxa eta argazki erakusketa antolatu dituzte.
Iñigo Ansola Bizkai Buru Batzarreko (BBB) presidentea izango da ekitaldian; berak emango du hitzaldia ekitaldi politikoan.
☉ Galdakao
Torrezabaleko liburutegia itxita dago ostiralera arte Galdakaon, eraikinaren estalkiko lanak direla eta
Torrezabal Kultur Etxeko estalkia berritu du Udalak eta orain karga proba bat egin behar dute. Proba hori egiten duten bitartean hirugarren solairua itxita egongo da
Torrezabal Kultur Etxeko estalkia berritu du Galdakaoko Udalak. Orain, eraikinaren estalkian karga proba egin behar dute.
Proba hori egiten duten bitartean, eraikinaren hirugarren solairua itxita egongo da urriaren 22tik 24ra arte. “Bertan kokatzen da liburutegia eta, beraz, zerbitzu hori erabiltzaileentzat itxita egongo da ostiral eguerdira arte”, diote udal ordezkariek.
Auzokide, ikasle eta liburutegiko erabiltzaile guztien lankidetza eskertu du Udalak eta lan hauengatik sor daitezkeen eragozpenenak sentitzen dituela jakinarazten du. Eskuhartzearen eragina ahalik eta gehien murrizteko lanean ari da.
Era berean, makina gela handituko du Galdakaoko Udalak, “etorkizunari begira makineria berria jartzea aurreikusten baitugu”, diote.
☉ Galdakao
Finlandiako hezkuntza sistema nolakoa den ezagutu dute Galdakaoko Elexalde Institutuko irakasleek
Finlandiako hezkuntza sistemaren “malgutasuna” eta ikasleei ematen dieten “autonomia” nabarmendu dute Gemma Gutierrez eta Edurne Ruiz irakasleek
Eramus+ programaren barruan, Galdakaoko Elexalde Institutuko Gemma Gutierrez eta Edurne Ruiz irakasleek job shadowing egonaldia egin zuten irailaren 29tik urriaren 2ra bitartean Helsinkiko Märsky Athletics and Education ikastetxean, Finlandiako kirol-ikastetxerik handienean.
Zehazki, Finlandiako hezkuntza sistema bertatik bertara ezagutu zuten: “Esperientzia horrek aukera eman zigun lehen eskutik ikusteko Finlandiako hezkuntza sistemaren malgutasuna eta ikasleei ematen zaien autonomia, beren ikaskuntza modu autonomoagoan antolatzeko”, esan dute.
“Märsky-n, ikasturte akademikoa bost alditan banatzen da, eta horietako bakoitza gutxi gorabehera bi hilabetekoa da. Horri esker, ikasleek beren curriculum-a planifikatu eta ikasketak beren beharretara eta gaitasunetara egokitu ditzakete. Ikasleek aukeratu ditzakete ikasgaiak, ikastaroak aldatu edota irakasleak hautatu, betiere zuzendaritzak gainbegiratuta. Egituraren malgutasun horrek erantzukizuna, motibazioa eta autoantolaketa sustatzen ditu, ikaskuntza iraunkorrerako funtsezko trebetasunak”, diote.
Finlandiako hezkuntza sistema guztiz doakoa dela nabarmendu dute: “Lehen hezkuntza, bigarren hezkuntza, goi mailako bigarren hezkuntza, eta baita unibertsitatea ere. Ia guztiz publikoa da, eta ikastetxe pribatuen kopurua oso txikia da”, diote.
Digitalizazioaren garrantzia
Märsky ikastetxean digitalizazioari garrantzia handia ematen diotela ere nabarmendu dute Elexaldeko irakasleek: “Ikasle guztiek liburu digitalak eta plataforma interaktiboak erabiltzen dituzte ia ikasgai guztietan; gainera, azterketa guztiak –unibertsitaterako sarbide-probak (Ylioppilastutkinto) ere– ingurune digitaletan egiten dira. Horri esker, ikasleek modu autonomoan lan egin dezakete, baita klaseetara huts egiten dutenean ere”, diote.
Märsky Athletics and Education ikastetxeko ikasleak // Argazkia: Elexalde BHI
“Gure egonaldian Ingeles, Gaztelania, Idazketa eta Ahozko trebetasun tailerretako eskoletan parte hartu genuen, eta orientatzailearekin zein zuzendariordearekin elkartu ginen, ikastetxearen eta Finlandiako hezkuntza-sistemaren funtzionamendua lehen eskutik azal ziezaguten. Irakasleekin digitalizazioari buruzko iritziak partekatu genituen, eta nazioarteko ikasleek beren Erasmus esperientziak aurkeztu zizkiguten, ikastetxearen aurkezpena egiteaz gain”, diote.
Halaber, honakoa gaineratu dute: “Ikastetxeko instalazio bikainetan zehar bisita egin genuen eta online ikastaroen funtzionamendua ezagutu genuen, bereziki ikasle kopuru txikia duten ikasgaietan. Ikasleek modu kolaboratibo eta autonomoan lan egiten dutela ikusi genuen, liburu digitalak eta jarduera interaktiboak erabiliz”.
Ylioppilastutkinto azterketa
Finlandian goi-mailako bigarren hezkuntza (Lukio) amaitzean egiten den azterketa da Ylioppilastutkinto, eta batxiler-kalifikazioa ematen du. Eta horri esker, unibertsitatera sar daitezke Finlandiako ikasleak.
“Azterketa nazionala goi-mailako ikasketak egiteko irizpide nagusia da, eta ebaluazioa ikasturtearen amaierako notan baino gehiago funtsezko gaitasunetan eta ezagutzetan oinarritzen den ideia indartzen du”, diote.
Märskyko jardunaldiak prestakuntza akademikoa eta kirol-prestakuntza uztartzen ditu: “Ikasleek goizero beren diziplinetan entrenatzeko aukera dute, eta, aldi berean, ikasgai orokorren eta hautazkoen ikastaroak egiten dituzte. Irakasleek gela bakoitzaren erregistro zehatza dute, eta, horri esker, bertaratzen ez diren ikasleak modu autonomoan eguneratu daitezke. Eskolak errefortzuko eta banakako laguntzako eskolak ere eskaintzen ditu arreta gehigarria behar duten ikasleentzat, inor atzean geratzen ez dela ziurtatuz”.
“Märsky hezkuntza integralarekin eta eliteko kirolarekin duen konpromisoagatik nabarmentzen da. Atleta profesional asko igaro dira beraien ikasgeletatik, eta ikastetxeak loturak ditu Urhea National Training Centerrekin. Bertan, urtero, 10.000 atleta inguruk entrenatzen eta ikasten dute”, diote.
Finlandiako ereduak malgutasuna, autonomia, integrazio digitala eta gaitasunetan oinarritutako ebaluazioa uztartzen dituela berretsi dute Elexaldeko irakasleek, “gazteak unibertsitaterako zein bizitza aktiborako eta kirolerako prestatuz”, esan dute: “Beraz, Märsky adibide bat da hezkuntza nola egokitu daitekeen ikasle bakoitzaren talentu eta beharretara, arrakasta pertsonala eta kolektiboa sustatuz”.
Jose Mari Argoitia galdakoztarra hil da, Basconiako eta Athleticeko futbolari ohia
Sidenorreko presidentea ikertzen ari da Espainiako Auzitegi Nazionala, Israelgo arma enpresa bati altzairua saltzeagatik
Bideoa | Dozenaka pertsona elkartu dira Arrigorriagan Heidelberg enpresan gertatutako lan-heriotza salatzeko
Argazkiak | Aldatxa eta Urbiko Lagunak, Basauriko jaietako buruhandienak!
Argazkiak | Jaietan etenaldia egin dute ehunka basauriarrek Palestinari elkartasun keinu bat egiteko
Argazkiak | Laguntasuna eta Ontzak garaile, Basauriko jaietako Sokatira txapelketan
Bideoa | Dozenaka pertsona elkartu dira Arrigorriagan Heidelberg enpresan gertatutako lan-heriotza salatzeko
Bideoa | Berbalagun egitasmoa martxan da Basaurin eta Galdakaon, nobedade askorekin
