☉ Etxebarri
Metro igogailurako eta San Antoniorako oinezkoen sarbidea zabalik dago berriro Etxebarrin
Bilbao Bizkaia Ur Partzuergoak San Antonio auzoko hornidura-sarea indartzeko eta harribidea birjartzeko lanak amaituko ditu apirila bukaeran.
Bilbao Bizkaia Ur Partzuergoak San Antonio auzoko ur-hornidura sarea indartzeko eta harribidea birjartzeko lanak amaituko ditu apirila bukaeran. Hala ere, gaur bertan, eguerdian, Metroko igogailurako eta San Antoniorako oinezkoen sarbidea zabaldu dute berriro.
Iaz, urte hasieran, hiru lur-jausi izan ziren eremuan eta horren eraginez San Antonio auzoaren hornidura kaltetu zen, baita San Antonio auzoaren erdiko eremua eta metroaren 3. linea lotzen dituen igogailura iristeko oinezkoen bidea ere. Ur Partzuergoak azterlan geotekniko bat jarri zuen martxan, eta Etxebarriko Udalarekin lankidetzan, zenbait obra egin dituzte sarea babesteko, hornidura-bermea indartzeko, lursaila egonkortzeko eta kaltetutako oinezkoentzako ibilbideak lehengoratzeko.
“Arazoari premiazko irtenbide bat emate aldera, eta azterlan geoteknikoa egin ondoren, hornidura-hodiak mikropilotezko pantaila baten bidez eutsi ziren. Ondoren, askatutako materiala kendu eta gero, betelanak egin ziren harri findugabearekin eta harri-lubetarekin. Halaber, bidea birjarri da 15 zentimetroko zabor-legar artifizialarekin eta 20 zentimetroko lodiera duen hormigoi armatuzko zolata batekin, aurretik zeukan trazadura bera mantenduz”, diote udal ordezkariek.
Horrez gain, bidetik igarotzen den linea elektrikoaren PVCzko hodia aldatu dute, eta lur-jausiaren ondorioz kaltetutako farola bat ere ipini dute. Bidearen ezkerreko aldean, zurezko baranda bat jarri dute, materialak N634 errepidera erortzea saihesteko. Lanak amaitzeko, ezponda estaliko dute, bai abiaburuan, bai behealdean, metro linealeko bi igokari jarrita, lursailaren higadura prebenitzeko asmoz. Esku-hartze honen inbertsioa 136.300 eurokoa izan da.
Bizkaiko Goma gaineko Sokatira txapelketa jokatuko da azaroaren 29an Etxebarrin.
Frontoian izango da 18:30ean eta gizonezkoen eta emakumezkoen kategoriak lehiatuko dira.
Abadiño, Gaztedi, Goiherri eta Forua taldeak dira lehiatuko direnak, 8×8 mistoa 580 kiloko kategorian.
Herri Kirol Federazioak antolatu du, Udalaren laguntzarekin.
☉ Etxebarri
San Esteban etorbideko obrak faseka egingo dituzte Etxebarrin eta aldi baterako murrizketak iragarri ditu Udalak
Lehen fasean etorbideko zenbaki bikoitien aparkalekuak desgaitu dituzte eta bigarren fase batean zenbaki bakoitietan egingo dituzte obrak
Etxebarriko San Esteban etorbidea eta Barrondo kalea guztiz eraldatzeko eta herritarrentzat irisgarriagoak, seguruagoak eta atseginagoak bihurtzeko lanetan murgilduta dabil Udala.
Birmoldaketa horri esker aparkaleku-sistema berrantolatuko dute —bateriatik lineara—, aparkaleku berriak jarriko dituzte, espaloiak zabalduko dituzte eta eliza ondoko autobus geltokiaren funtzionaltasuna eta segurtasuna hobetuko dute.
Obrak udan hasi zituen Ansareo enpresak eta dagoeneko Barrondo kalean egin behar zituzten lanak amaitu dituzte. Eta, behin lan horiek bukatuta, San Esteban etorbidean esku hartzen hasi dira aste honetan.
Lan berri hauek faseka burutuko dituzte. Hasteko, San Esteban etorbideko zenbaki bikoitietan jardungo dute eta, hortaz, bertako aparkalekuak desgaitu dituzte eta edukiontziak lekualdatu dituzte. Ondoren, zenbaki bakoitietan esku hartuko dute.
“Obrak egiten diren bitartean aldi baterako murrizketak egingo zaizkio oinezkoen eta ibilgailuen zirkulazioari, esku-hartzearen fase bakoitzari egokituta. Hala ere, etxebizitza, garaje eta saltokietarako behin-behineko sarbidea bermatuko da”, zehaztu dute udal ordezkariek: “Udalak herritarren laguntza eskatzen du, baita kaltetutako eremuetan kontu handiz ibiltzeko ere”.
Etxebarriko Udalak guztira 564.000 euro bideratuko ditu eraldaketa integral honetara. Aurreikuspenen arabera, urte berriko lehen hiruhilekorako amaituko dituzte lanak.
San Antonioko Jai Batzordeak lehenengo Garagardotegi Eguna antolatuko du azaroaren 29an, larunbatez.
Kuadrillen arteko poteoa eta bazkaria izango dira egun horretan, eta Jai Batzordetik aurreratu dutenez, bazkaria Basauriko Txakoli Iñaki Garagardotegian izango da.
“Adi! Etorri Garagardotegi Egunera zure kuadrillako jantziarekin!”, animatu dituzte herritarrak Jai Batzordeko ordezkariek.
☉ Etxebarri
Etxebarrik zortzi pertsona kontratatuko ditu sei hilabetez lan egiteko
Profil desberdinetako lanpostuak beteko dituzte eta hautaketa-prozesuan parte hartu ahal izateko interesdunek Lanbiden eman behar dute izena azaroaren 18a baino lehen
Langabezian dauden zortzi pertsona kontratatuko ditu Etxebarriko Udalak sei hilabetez lan egiteko % 75eko lanaldian.
Zehazki profil hauek dira kontratatuko dituztenak: bi agente zibiko Udaltzaingoarekin elkarlanean bizikidetza eta segurtasuna hobetzeko; bi administrari-laguntzaile; bi komunikazio-dinamizatzaile; datu-baseetako analista bat; eta biltegiko laguntzaile bat.
Hautaketa-prozesuan parte hartu ahal izateko, Lanbideren webgunean lanpostu bakoitzerako adierazten den eskaintzan izena eman behar dute interesdunek. Izena emateko epea zabalik dago azaroaren 18ra arte.
“Lanpostuak sortzeaz gain, enplegua sustatzeko tokiko ekintza horien helburua partehartzaileen inklusioa, prestakuntza eta egonkortasuna bultzatzea da”, diote udal ordezkariek.
Etxebarriko Udalak 89.500 euro bideratuko ditu 2025-2026 Enplegu Planera, Eusko Jaurlaritzako Enplegu Sailak sustatutako dirulaguntzari esker.
Arpela Euskaltzaleen Elkarteak mendi irteera antolatu du azaroaren 9an.
Santa Marina ospitale zaharra, Iturritxualdeko lubakiak eta askaldia eta Leon askaldia bisitatzeko aukera izango dute herritarrek.
Sei kilometroko ibilbidea izango da eta Alberto Lago ipuin kontalariak parte hartuko du.
Interesa dutenek izena eman behar dute; QR kodea udal webgunean dago.
Buia-Abusu Bilbobus linea Santa Isabelera luzatzeko eskatu diote Bilboko Udalari
Geuria 124 – 2025 Abendua – Aldizkaria
Iñaki Artola pilotariak eta Iker Iriarte botilleroak hitzaldia eskainiko dute bihar Basaurin
Ehun pertsona baino gehiago elkartu dira Ugaon, indarkeria matxistaren aurkako eguneko elkarretaratzean
Argazkiak | ‘Erreakzioari erantzun feminista’ lemapean manifestazioa egin dute azaroaren 25ean Galdakaon
Argazkiak | Indarkeria matxistak isilarazi dituen emakumeak oroitu dituzte gaur Basaurin
Bideoa | “Indarkeria matxistari aurre egiteko beharrezkoa da patriarkatuaren irakurketa estruktural bat egitea”
Bideoa | Izaro abeslariaren ‘Libre’ kantatu dute Basaurin, A25aren testuinguruan
