Neguko ordutegira salto egin baino lehen, Arrigorriagako Soinuarri elkarteak ‘Vispera del Cambio de Hora Fest’ izeneko jaialdia antolatu du Arrigorriagako Gaztetxean, urriaren 24an.

Boogie Riders, Uda eta Chuleria Joder! taldeek kontzertuak eskainiko dituzte bertan. “Soinuarrilari, entzun! 24AN Txispun!”, iragarri dute elkartekoek. “Bueltan gara eta denboraldia hasteko urriaren 24an ‘Uda’, ‘Chuleria, Joder!’, eta ‘Boogie Riders’ taldeak Arrigorriagako Gaztetxeko oholtzara gonbidatu ditugu”.

Uda, Anderrek, Ibaik, Gaizkak eta Unaxek, osatzen dute eta Bizkaitik euskaraz abestutako Punk “freshkoa” dakartzate. Momentura arte hiru lan kaleratu dituzte: ‘Badatoz ez direnak joan’, ‘Ekaitza’ eta Uda’.

Chuleria, Joder! duela urte batzuk beste musika-proiektu batzuetan aritutako musikariek osatutako banda da. Taldeak estudioko lehen diskoa grabatu berri du Haritz Harreguy soinu teknikariaren gidaritzapean, eta lana ‘La Urbe’ izenpean argitaratu da. Punk-rock estiloko euskaraz eta gaztelaniaz abestutako abestiak sortzen dituzte. Antxon, Miryam, Alda eta Iratxe dira taldeko kideek osatzen dute.

Boogie Riders eskarmentu handiko arrigorriagako ‘power trioa’ da. “A bluesrock n’ roll soul band from Red Stone Valley”, Horrelaxe definitzen du bandak bere burua. Momentura arte ‘Highway Dagger‘ (2014) eta  ‘Catch the wind’ albumak (2022) eta ‘Who’s gonna save your soul’ (2025) abestia kaleratu dituzte. Bidean geldialdi bi izan ditu bandak baina joan den uztailean iragarri zuten entsegu lokalean jo eta su ari zirela eta hirugarren album bat bidean dagoela.

Kontzertuak 21:30ean hasiko dira eta sarrerak 3 euroan daude salgai.

Urriaren 12an ibilbidea egingo dute Gure Magalean Mendi Taldekoek Garrastatxuko inguruetatik (Araba). Izena emateko epea urriaren 9ra bitartean zabaldu dute mendi taldekoek.

Garrastatxu, behin ikusiz gero ahantzi inoiz ez. Gorbeiako Parke Naturalaren barruan, Andere Maria Errukiñeren baseliza bertan nagusi, inguru alde eder-ederrean, ikuspegia ere halakoxea.

Amurriotik hamabost minutura, beribilez, Baranbion, eta handik hara ibilteko bideak nahi beste. Baseliza ondoan larrain zelai bat, aire zabalean mahaiak, jarlekuak, sutokiak… eta asteburu-jaiegunetan taberna zabalik: Garrastatxuko txosna.

Garrastatxutik ibilbide ugari irteten dira Gorbeiara.

Izen emateak Gure Magalean Guraso Elkartearen webgunean edo info@guremagalean.eus helbide elektronikora idatziz egin daitezke.

Padura Mendi Taldeak Gorbeialdera antolatu du hurrengo egun osoko mendi-irteera. Hitzordua urriaren 26an izango da eta izen emateak urriaren 22ra bitartean zabaldu dituzte.

Arrigorriagako mendizaleak Muruako harrobiak, Gorbeiako gurutzea, Arraba, Itzina, Atxulo, Pagomakurre eta Bikotzganetik igaroko dira.

Irteera 07:30ean egingo dute Arrigorriagako osasun zentrotik abiatuko den autobus batean. Itzulera 17:00etan aurreikusi dute, “berandu lez”.

Hitzordua urriaren 26an izango da eta izen emateak urriaren 22ra bitartean zabaldu dituzte

Gorbeia mendia da Gorbeiako zerumuga definitzen duen gaina. Gailurretik, 1.481 metroko altueran, bista panoramikoak ikusgarriak dira eta bidean animaliak ikusteko aukera ematen du Gorbeia parke naturalak.

Han, Gorbeiako Gurutzea aurkituko duzu, euskal mendizaletasunaren erreferentzia puntua eta Euskadiren ikurra. 17 metro pasatxoko eraikina da eta Eiffel dorrea gogorarazten duen egitura da.

Itzinako biotopoa // gorbeiaeuskadi.com

Itzinako biotopoa

Beste mendi enblematikoetako bat, bere balio historikoagatik eta aniztasun naturalagatik, Itzinako mendigunea da. Katilu forma du, eta barrualdea labirinto harrigarri bat da, euskal mitologiako leize eta elezaharrez zipriztindua.

Itzinako mendigunea, airetik ikusita, ingurutik altxatzen den goi-lautada harritsu ikusgarria da, 1.000 metrorainoko altuera duten hormen gailur batez inguratua, barrualde hustua babestuz. Duela 110 milioi urte inguru itsaso bero eta ez oso sakonetan hazi ziren koralezko arrezifeak dira mendigunea osatzen duten kareharrien jatorria. Haitzak iragaztean pitzatzen dituzten euriak dira lurpeko kobazulo erraldoien erantzule; bertan, lurrazpian, estalaktita eta estalagmita ugari daude.

Barrualdean, harri-labirinto itzel bat leku malkartsuenetan hazten diren pagoekin nahasten da. Pago horiek baso txikiak osatzen dituzte, eta salamandrak, igel gorriak, muxar grisak eta azeriak babesten dituzte. Haitzetan harkaitz-sugandilak, sai zuriak, belatzak, belatxingak eta kobazulo eta zuloetan saguzarrak bizi dira.

Itzina babestutako ekosistema naturala da, eta katalogatutako 175 goroldio- eta hepatika-espezie biltzen ditu

Itzina babestutako ekosistema naturala da, eta katalogatutako 175 goroldio- eta hepatika-espezie biltzen ditu. Ikaztegien eta artzainen txabolen hondarrak, historiaurreko aztarnategien ondoan, dira gizakiaren lanaren lekuko. Elurtegi baten hondakinak ere badaude bertan; aurreko mendearen erdialdera arte Orozko izotzez hornitzen zen bertatik. Izotza, elikagaiak kontserbatzeko erabiltzen zuten.

Itzinan Supelegor leize ikusgarria dago, Mari euskal mitologiako jainkosaren bizilekuetako bat. Kondairen arabera, Marik ekaitzak leherrarazten ditu suzko suge itxura duen bere senar Sugaarrekin lur azpian elkartzen denean.

Joan den asteburuan Iruñeako Nazioarteko Opena antolatu zuten Nafarroan eta bertan Arrigorriagako 16 kirolarik hartu zuten parte.

Borroka modalitatean Arrigorriagako klubeko Aitzol Portugalek irabazi zuen urrezko domina. Gainera, brontzezko hiru domina eskuratu zituzten klubeko Markel Garciak, Iago Garciak eta Paule Sagredok.

Teknikan urrezko domina eskuratu zuen Itxaso Hernandez borrokalariak; Iñigo Pereirak zilarrezko domina ba lortu zuen eta beste bat Ariane Martinezek, Itxaso Hernandezek eta Irati Veladak osatutako hirukoteak; Brontzezko dominak ere irabazi zituzten Ariane Martinezek, Elaia Garciak eta Iñigo Pereirak eta Elaia Garciak osatutako bikoteak.

Teknika modalitateko kirolariak // Garriko Taekwondo Taldea

“Emaitza hauen ondorioz, Garriko Taekwondo Taldea hirugarren postuan geratu zen taldekako sailkapen nagusian”, azaldu dute Arrigorriagako klubetik.

Hurrengo hilabeteetan Merkataritza Plan Estrategikoa martxan ipiniko dute Arrigorriagan Udalak eta Adeckak, Ikertalderen laguntzarekin.

Prozesu parte-hartzailea izango da eta urritik 2030. urterako iraupena izango du. “Helburua da hiri-ekonomia jasangarria, gertukoa eta lehiakorra indartzea, tokiko garapena dinamizatzea eta merkataritza, ostalaritza zein zerbitzuen ehuna sendotzea”, zehaztu dute udal ordezkariek. Plana udalerriko politika lokalak eguneratzeko estrategia orokorrean kokatzen dela gehitu dute Udletik: “Modu transbertsalean barne hartzen ditu mugikortasuna, kultura, kirola eta hiri-ekonomia bezalako arloak”.

Plan honek gobernu planean jasotako konpromiso bi hartzen ditu barne: 21 neurria (udalerriko saltoki hutsen zerrenda egitea eta horien balizko merkataritza-kudeaketa aztertzeari buruzkoa) eta 23.a (merkataritza-negozioen erreleboa sustatzeko programa diseinatzea eta abian jartzeari buruzkoa).

Hilabete honetan bertan abiaraziko dute plana, tokiko merkataritza-proiektuetan esperientzia duen Ikertalde aholkularitza-enpresaren laguntzarekin: “Emaitza izango da 2030era arteko ibilbide-orri bat, sektorearen erronka nagusiei aurre egiteko eta herritarren beharrei erantzuteko diseinatua”.

Izan ere, Ikertalden Estatistika zerbitzu publikoekin elkarlanean aritzen dira, analisi konplexu kuantitatibo eta kualitatiboen garapenerako informazioa sortu eta ustiatzeko; pertsonak zein enpresak hartuta helburu eta plan estrategikoak burutzen eskarmentua dute: “Erreferentziazko enpresa gara azterlanak zein plan estrategiko instituzionalak gauzatzen, lurralde-eskala desberdinetan: udalerrietan, eskualdeetan, lurralde historikoetan…).”

Herritarrei galdetuz

Arrigorriagako datuak jasotzeko herritarrei zuzendutako inkestak zabalduko dituzte, bai merkataritza sektorean, bai herritarren artean. Udaletik azaldu dute telefono bidezko inkestak eta lansaioak izango direla: “Gainera, partaidetzarako kanalak gaituko dira tokiko eragileen eta Arrigorriagako bizilagunen ekarpenak jasotzeko”, gehitu dute.

Udaletik deia zabaldu diete herritarrei prozesu parte-hartzaile honetan parte hartzera. “Arrigorriagako merkataritzak etorkizuna izan dezan nahi dugu, garai berrietara egokituz baina gertutasuna galdu gabe, eta gure auzoen bizitzaren motor izaten jarrai dezan. Diagnostiko hau urrats beharrezkoa da estrategia partekatu baten bidez aurrera egiteko”, izan dira Gaizka Ibarretxe Ekonomia, Merkataritza eta Enplegu zinegotziaren berbak.