☉ Arrigorriaga
Erreportajeak / Hiru hamarkadatik gora haur txikienen bidelagun
Sonia Garcia Plak orain dela hogeita hamaika urte zabaldu zuen Bihotz Haurtzaindegia, egun bere senarra den Oscar Aparicio Valverderekin batera. Denboraren poderioz Haur Eskola bilakatu zen, eta ordutik hona zientoka haur igaro da bertatik
“Nire ama BBKren haur eskola bateko sukaldaria zen, giro hori txiki-txikitatik ezagutu dut”. Sonia Garcia Plak (Bilbao, 1971) oso gaztetatik argi zeukan txikienekin lan egin nahi zuela. Behin Magisteritza ikasketak bukatuta, berak eta egun bere senarra den Oscar Aparicio Valverdek (Bilbao, 1969) aurrerapausoa ematea erabaki zuten, artean 22 eta 23 urte zituztela, hurrenez hurren. “Bilboko Udalera jo genuen laguntza eske, eta bertan jaiotza tasa handiena zuten herrien zerrenda helarazi ziguten”.
Horien artean, Arrigorriagaren izena nabarmendu zen. “Arrigorriagako Udalean galdetu genuen ea herrian haurtzaindegi edo antzekorik ba ote zegoen, eta ezetz erantzun ziguten”. Dei horretan jaio zen Bihotz Haurtzaindegiaren ernamuina, 1983. urtean. Hasiera, ohi den legez, ez zen erraza izan: “Oso gazteak ginen, eta kanpotarrak gainera”. Arrigorriagarren errezelo horiek “normaltzat” jotzen dituzte senar-emazteek.
Giro mesfidatiak ez zituen kikildu, ordea, eta bidea egiten hasi ziren. Nola? “Telefono gida eskuetan”. Azken bi hamarkadetan Bihotz Haur Eskolatik igaro diren orduko haur eta egungo gazteek sinetsiko ez duten arren, laurogeigarren hamarkadan telefono finkoa jaun eta jabe zen etxe guztietan. Telefono konpainiek liburu mardul eta hori bat bidaltzen zuten etxeetara, etxebizitza guztietako zenbakiekin eta familia bakoitzaren izen-abizenak zehaztuz.
“Abiapuntua umea da, eta bide batez familia. Horretara moldatu behar dugu Haur Eskolaren jarduna, eta unean uneko aldaketei erantzuteko prest egon”
“Telefonikarekin akordio bat egin genuen, bakoitza kabina batera joan, eta etxeetara deika hasi ginen” gogoan du Oscarrek. Zientoka dei egin ostean, interesa bazegoela ikusi zuten, eta lekuaren bila hasi ziren, irizpide argi batzuekin: “Eremu zabal bat bilatzen genuen, lorategia eskura izango zuena. Argi geneukan haurrak kalera irteteko askatasuna izan behar zuela, hori guretzat funtsezkoa zen”. Baimen guztiak lortzea ez zitzaien erraza suertatu: “Udalaren jarrera nahiko ezkorra zen. Ez gintuzten ezagutzen, eta ez zuten proiektuaren bideragarritasuna argi ikusten”.
Hala ere, zehaztu du Apariciok, “gerora harreman bikaina izan dugu Udalarekin”. Burokraziaren zoko-moko guztiak gaindituta, irekiera eguna iritsi zen, bikoteak ahaztuko ez duen data: “azaroaren 2an izan zen”. Erraz gogoratzeko moduko data, Oscarren urtebetetzea bi egun geroago baita, azaroaren 4an. “Ospakizun bikoitza izan zen”.
Hamabost “seme-alaba”
Horrela definitu ditu Garciak lehen ikasturte hartako ikasleak. Hiru hamarkada luze joan diren arren, hunkitu egiten da haietaz berba egitean. “Pentsa, horietako batzuk euren semea edo alaba ekarri dute orain haur eskolara”. Harremana mantentzen dute hamabost horietako gehienekin, eta ez da arraroa izaten ikasturtean zehar euren bisita jasotzea: “Denbora joan eta denbora etorri orduko lotura estu hori mantendu dugu. Gerta liteke hilabete luzez elkarren berri ez izatea, eta hala ere, hizketan hasten garenean, badirudi bezperan egon garela” borobildu du Soniak.
Lehen urte haiek oso bereziak izan ziren bikotearentzat. Gazteak ziren, gogotsu zeuden, eta herrian ospe ona irabazi nahi zuten. “Oso zorrotzak ere baginen” zehaztu dute: “ezin ziren orgatxoak sarreran utzi, ezta orduz kanpo txirrina jo edo telefonoz deitu ere, hezkuntza plana hasi eta buka betetzen genuen…”
Lehen pauso haiek gogoratuz bada biek aipatzen duten beste hitz bat: beldurra. “Hasiberria zara, eta ume oso txikiekin lan egiten duzu. Dena da mehatxu eta arrisku. Uste bezala irteten ez den edozer gauza arazo bilakatzen da”. Beldur hori galtzeko “sekretua” zein den galdetuta argi daukate biek ala biek: “esperientzia”.
Urteetako lanak eman dien jakintza eta eskarmentuarekin beste ikuspuntu bat garatu dute: “abiapuntua umea da, eta bide batez familia. Horretara moldatu behar dugu haur eskolaren jarduna, eta unean uneko aldaketei erantzuteko prest egon”. Gutxi asko, esaldi horretan laburbiltzen dute euren jardunaren funtsa eta nondik norakoa.
Antzinako ikasleak // Geuria
Haurtzaindegitik Haur Eskolara
80ko eta 90eko hamarkadetan aldaketa handiak eman ziren Euskal Herrian, eta baita Arrigorriagan ere. 1983ko uholdeek herria gogor kolpatu bazuten ere, hortik aurrera garapen urbanistikoak ez zuen etenik izan, batez ere herrigunean; etxebizitza berriak eraiki ziren, eta inguruko herrietako jende gazte andana heldu zen Lonbo bezalako guneetara.
Testuinguru horretan, urte oparoak izan ziren Bihotz haurtzaindegiarentzat, eta Oscarrek ez du ahazteko matrikulazio eguna urtarrilaren 1ean zabaldu eta izena emateko ilarak eraikinari buelta osoa ematen ziola. Haurtzaindegia txiki geratzen ari zitzaien, eta handitzea erabaki zuten. “Hiru gela izatera iritsi ginen, baina guretzat ez zen bideragarria, leher eginda bukatzen genuen eta”. Arrakastaz hiltzeko arriskua zuten, bada, eta egoera berri horrek “hausnarketarako” parada eman zien. Lokala egokitu, eta egun duen itxura eman zioten.
“Mikrokosmos bat da Haur Eskola. Bere txikian, gizartearen eta familien isla gara gu, eta gizarte horrek aurrera egin ahala eraldatzen goaz “
Aldaketez ari garela, 2003an Eusko Jaurlaritzak irizpide berriak ezarri zituen, eta Haurtzaindegi izatetik, Haur Eskola izatera igaro ziren. Ordutik hona bi ikastetxe daude herrian, bata publikoa, eta eurena pribatua. Bien arteko harremana “ona” dela nabarmendu du Soniak: “bateragarriak gara, eta denon helburua berbera da: umeen hobe beharrez aritzea”. Kasu honetan, konpetentzia edo lehia hitzak zentzurik ez duela uste du Garciak, eta pandemia garaia gogoan du: “egoera bereziki gogorra izan zen haur eskolentzat. Lagundu nahia eta ezina oso gaizki eraman genuen”.
Sonia eta Oscar // Geuria
Mikrokosmos bat
Hori da Haur Eskolaz Garciak ematen duen definizioa. “Gure txikian, gizartearen eta familien isla gara. Gizarte horrek aurrera egin ahala eraldatzen goaz gu ere”. Eraldaketa hori nabaria da, senar-emazteen aburuz: “lehen herri txiki baten xarma zeukan Arrigorriagak, orain ez hainbeste”, Oscarren hitzetan. “Zentzu batean hori galdu egin da, berez ez da txarra, baina heldu ginenean herritarren artean sumatzen genuen berotasun eta hurbiltasunik ez dut nabaritzen”, gaineratu du. Egungo bizi-erritmo zoroari egotzi dio galera hori: “egun presa da nagusi”. Salbuespena, bere hitzetan, aiton-amonak dira: “haurrentzat altxor bat. Gizartean aitortza handiagoa izan beharko lukete”.
“Egun presa da nagusi gure gizartean, eta horregatik garrantzitsua da hona datozenean patxada, lasaitasuna, albokoarekiko kezka eta enpatia lantzea”
Bizi molde frenetiko horrek umeengan duen eraginak kezkatzen du Sonia: “haurrak etxean bizi dutenaren ispilu dira. Ziztu bizian bizi bagara, estresak jota, hori bera da gure seme-alabek egunero jasoko dutena”. Zelan ekidin hori, egungoa bezalako gizarte batean? “Oso zaila da, eta ez gara errudun sentitu behar, baina horregatik garrantzitsua da hona datozenean, orekatze aldera, guk patxada, lasaitasuna, albokoarekiko kezka eta enpatia lantzea” dio Bihotzeko arduradunak. Hori guztia lortzeko giro jakin bat sortu beharra daukate, “askatasunean” oinarrituta.
Haur bakoitzari “bere tokia” eman behar zaio, “norbere betebehar eta abileziak” errespetatuz, eta bidea urratsez urrats eginez. “Haur batzuekin oso argi ikusten duzu arlo jakin batzuetan nabarmentzen dela, edo horiekiko interes handia erakusten duela. Urteak joan eta urteak etorri ikasketak aukeratu behar dituenean erraz asko asmatu dugu norantz jo duen.
Beste kasu batzuetan, aldiz, kontrakoa gertatzen da” zehaztu du Soniak. Hori horrela, argi dauka euren lana “irudimena eta jakingura” elikatzean datzala. “Haur zoriontsuak nahi ditugu, haur pailazoak”. Pailazokeria horren albo kalteak azaldu ditu Garciak: “Askotan esaten dut, txantxetan, baina bada egia borobila ere, barre egiteagatik ditudala nik zimur gehienak. Lan nekagarri bezain ederra da gurea”.
Orain dela 31 urte telefono gida eskuetan hasi zuten abenturak bide luzea egin du, baina oraindik ere badaukate haur txikienen bidelagun izateko ilusioa eta grina.
☉ Arrigorriaga
Kepa Larrea idazleak maitasuna, diktadura eta paisaia galduak lotu ditu bere ‘Zubia’ eleberri berrian
Hego Uribeko herriek, kaleek, basoek eta mendiek protagonismo berezia dute eleberri osoan zehar: “Bolintxu”, “Izartza”, “Arguia” edo “Lapurzuloa” dira kapituloetako batzuen izenburua, hurrenez hurrenez
Atzo Kepa Larrea idazleak -basauriarra jaiotzez baina Arrigorriagan 35 urte daramatzana-, bere azken lana aurkeztu zuen, “Zubia” izenekoa. Oraingo honetan, eleberriaren aldeko apustua egin du Larreak, ohikoa duen ikerketa historiko sakona albo batera utzi gabe.
Kepa Larrea (Basauri, 1956) Euskal Filologian lizentziaduna eta Historian doktorea da. Delineatzaile, administrari eta itzultzaile lanetan aritu ondoren, EHUko irakasle gisa ibilbide luzea egin du. Ezaguna da, batez ere, bere saiakera historikoengatik, hala nola: Mina edo libertatea! (2017), Xabier Mina gerrilari nafarraren ingurukoa, edo Antilletan galdurik (2023).
Maitasuna, diktadura eta paisaia galduak, eleberriaren oinarri
“Zubia” eleberria 1936ko Gerraren eta diktaduraren hainbat pasartetan oinarritzen da, egileak berak azaldutakoaren arabera: “asko eta asko txikitan entzundako kontuak dira; helduek ahotsa apaldu eta xuxurla batean hitz egiten zutenean horrek gure arreta pizten zuen, eta adi entzuten genituen kontu haiek”.
Kontakizuna “hiru pertsonen arteko amodio istorio” batean oinarritzen den arren, errealitate historikoa eta fikzioa txirikordatzen doaz etengabe, iragana eta oraina lotuz.
Irakurketa erraztearren, bi koloretan banatu dituzte kapituluak, eta kapitulo gehienak “dagoeneko desagertuta dauden paisaietan oinarritzen dira”. Zentzu horretan, bai Larreak eta bai hitzaurrea egin zuen Jesus Etxezarragak “paisaia liburuaren beste pertsonaia bat gehiago” dela nabarmendu zuten, “Jone edo Ganix protagonisten pare”.
Zentzu horretan, Hego Uribeko herriek, kaleek, basoek eta mendiek protagonismo berezia dute eleberri osoan zehar: “Bolintxu”, “Izartza”, “Arguia” edo “Lapurzuloa” dira kapituloetako batzuen izenburua, hurrenez hurrenez.
“Desagertu den paisaia batetaz ere hitz egiten du liburuak, hobe esanda, desagerrarazi duten paisaia batetaz. Dagoeneko existitzen ez diren baserriak, basoak, bideak… berreskuratu ditut liburu honetarako, nire belaunaldikoon haurtzaroaren parte izan zirenak”. Horren ordez dena “errepidez, harrobiz eta basoei nortasuna lapurtu dietene pinu tristeez” bete dutela gaitzetsi zuen Larreak.
Liburuaren laburpen moduan, zera dio kontrazalak: “1937ko ekainaren 19ko goizaldean, soldadu frankistak Bilbon sartu baino ordu gutxi batzuk lehenago, gudari gazte batek, Ganixek, ez daki zer egin: beste gudari askorekin batera hirian geratu eta bere burua entregatu ala Bilbo inguruko mendietan zelatan dauden karlisten setioa hautsi eta Euzko Gudarostearekin bat egin, horiek Kantabria aldera atzera bildu baitira. Hogeita bost urte geroago, neska gazte bat, Jone, bere familiaren isiltasuna hausten saiatzen da, gerraren ondorioz etxean ezkutatu eta bere buruari egiten dizkion galderen erantzunen bila. Gertaera bi horiek behialako zubi batek lotuko ditu. Eleberriaren izenburuak berak iradokitzen duen bezala, lan honek iragana eta oraina lotzen dituen zubi lana egin nahi du, memoriari eta zaurien itxierari ekarpena eginez”.
Kepa Larrearen liburu berria eskuragarri dago dagoeneko, eta Durangoko azokan ere egongo da salgai.
☉ Arrigorriaga
Jardueraz betetako egitaraua prestatu dute Arrigorriagan, Euskararen Nazioarteko Egunaren testuinguruan
Udalak ipuin kontalariak, Jon Maiaren ‘Desde Extremadura al euskera’ hitzaldia, komedia gaua eta bertso saioa antolatu ditu abenduaren 14a bitartean
Abenduaren 14ra bitartean jardueraz betetako programa osatu du Arrigorriagako Udalak, euskararen presentzia eta erabilera udalerrian bultzatzeko helburuarekin: “Euskararen eguna abenduaren 3an izango den arren, jarduerak lehenago hasiko dira, azaroaren 28an, eta abenduaren erdialdera arte luzatuko dira, herritar guztien gustuko eskaintza bermatzeko”, azaldu dute udal ordezkariek.
Azaroare 28an, ostiral honetan, Eñaut Elorrietaren kontzertua eta haurrentzako Begizur antzezlana prestatu dute. Abendura begira, ipuin kontalariak, hitzaldiak, komedia gaua eta ‘Ez da kasualidadea’ izeneko bertso-saioa prestatu dute eta Alaia Martin, Nerea Ibarzabal, Oihana Bartra eta Uxue Alberdi bertsolariak Lonbo aretoan izango dira.
Ekitaldi guztiak herrigunean zein Abusun antolatu dituzte.”Ekitaldi nagusiez gain, eskolako eta institutuko ikasleentzako propio diseinatutako egitarau paraleloa ere antolatu dituzte. Besteak beste, La Basu eta La Pulga musikariekin elkarrizketa musikatua egingo dute, ipuin kontalariak, antzerkiak eta bertso emanaldiak izango dira”.
“Arrigorriaga euskaldunagoa nahi dugu, eta horretarako ezinbestekoa da herritarrok euskaraz hitz egiteko ohitura bereganatzea”, azaldu du Gorka Etxebarria Euskara zinegotziak. “Udal Gobernutik udal euskaltegia dugu, diru-laguntzak eskaintzen dizkiegu talde eta elkarteei, bekak ditugu euskara ikasteko edota lanean dihardugu hizkuntza-paisaiaren normalizazioaren alde. Baina ahalegin horri erantzuteko, herritarrak animatu nahi ditugu euskaraz hitz egitera, lotsarik, beldurrik eta konplexurik gabe”. Horregatik, herritar guztiak animatu nahi dituzte Euskararen Nazioarteko Egunean antolatutako ekintzetan parte hartzera.
Egitaraua | Euskararen Eguna Arrigorriagan 2025
AZAROAK 28, ostirala
‘BEGIZUR’ ANTZEZLANA
12.30 Abusu Zentro Soziokulturala
EÑAUT ELORRIETA
20:00 Magdalena eliza
ABENDUAK 1, astelehena
‘KUKU MUKU’
Eskolako umeentzako egitaraua
ABENDUAK 2, asteartea
‘ETXEAN OTSO, KALEAN USO’
Eskolako umeentzako egitaraua
Lonbo Aretoa
ABENDUAK 3, asteazkena
TXAPELDUNAK
Eskolako umeentzako egitaraua
Lonbo Aretoa
ROSA MARTINEZ IPUIN KONTALARIA
17:15 Edurne Garitazelaia
‘HITZAK ZAPIAN’ IKUSKIZUNA
18:00 Udaletxeko plaza
ABENDUAK 4, osteguna
BERTSO-JASA
Eskolako umeentzako egitaraua
Lonbo Aretoa
‘DESDE EXTREMADURA AL EUSKERA’
19:00 Abusu Zentro Soziokulturala
ABENDUAK 5, ostirala
EZER EZ
Eskolako umeentzako egitaraua
Lonbo Aretoa
ABENDUAK 12, ostirala
KOMEDIA GAUA
20:00 Lonbo aretoa
ABENDUAK 13, larunbata
‘SCROOGE ETA MAMUAK’
18:30 Lonbo aretoa
ABENDUAK 14, igandea
‘EZ DA KASUALIDADEA’ BERTSO SAIOA
19:00 Lonbo aretoa
☉ Arrigorriaga
Buia-Abusu Bilbobus linea Santa Isabelera luzatzeko eskatu diote Bilboko Udalari
Bilbobuseko 50. linea Santa Isabelera luzatzea Abusuko auzotarren aspaldiko eskaera da
Mugikortasuna hobetzea helburu, Arrigorriagako Udalak eskaera egin dio Bilboko Udalari Buia eta Abusu konektatzen dituen Bilbobuseko 50. autobus linea “hobetzeko”.
Izan ere, linea hori Abusuko Santa Isabel auzora luzatzea proposatu dio Arrigorriagako Udalak Bilbokoari. Maite Ibarra alkatea Bilboko Udaleko Nora Abete Bilboko Udaleko alkateordea eta Mugikortasun eta Jasangarritasun zinegotziarekin elkartu zen azaroaren erdialdean proposamenaren inguruan berba egiteko. Bilboko Udaletik eskaera hori aztertu eta abenduan erantzuteko konpromisoa hartuko zuela azaldu zuen.
Bilbobuseko 50. linea Santa Isabelera luzatzea Abusuko auzotarren aspaldiko eskaera da. Arrigorriagako Udalak, gainera, egunero herriko instituturaino iristea eskatu dio Bilbokoari, “Arrigorriagako erdigunea lotu ahal izateko”.
☉ Arrigorriaga
Arrigorriagako Bertsio Gauaren bosgarren edizioan izena emateko epea zabaldu dute
Abenduaren 27an antolatu du Arrigorriagako Soinuarri Elkarteak Bertsio Gauaren bosgarren edizioa, Gaztetxean, 20:00etatik aurrera
Abenduaren 27an antolatu du Arrigorriagako Soinuarri Elkarteak Bertsio Gauaren bosgarren edizioa, Gaztetxean, 20:00etatik aurrera.
Urtero lez, epea zabaldu dute bertan jo nahi duten taldeek izena eman ahal izateko: “Utzi lotsak alde batera eta animau zaitez gauarekin bat egiten, zure musika gogokoena jotzera, ergelkeriak egitera eta esatera, eta zure gurasoak lotsaraztera”, azaldu dute Soinuarritik. Gainera, 2026an 10 urte beteko ditu Arrigorriagako elkarteak eta “gauzatxoak” prestatu dituztela iragarri dute.
Bertsio Gauari dagokionez, elkartetik azaldu dute “aukera ezinhobea” dela bandek zuzenean jotzeko eta “kristoren gauaz gozatzeko”. Parte hartu nahi duten bandek 15 minutuko emanaldia prestatu behar dute abesti propio edo bertsioekin. “Eszenatokian Soinuarri utzitako musika aparailuak egongo dira: bateria, baxua, gitarra bi eta anpliak. Nahi izanez gero, nork bere instrumentuak ekar ditzake”, argitu dute Soinuarritik.
Izena emateko soinuarrielkartea@gmail.com helbidera idatzi behar dute interesdunek. Bertan, taldearen izena, kide kopurua eta bakoitzaren rola eta jo beharreko abestien zerrenda idatzi beharko da.
☉ Arrigorriaga
Arrigorriagak 17,6 milioi euroko udal aurrekontua aurkeztu du 2026rako, aurtengoa baino % 6,8 handiagoa
Proposamena hurrengo egunetan aurkeztuko dela azaldu dute udal ordezkariek eta asmoa “urte berria onartutako udal aurrekontuarekin hastea” dela, ondo bidean
Maite Ibarra Arrigorriagako alkateak, Peio Garmendia Ogasun eta Kontu zinegotziarekin batera 2026ko aurrekontu-proposamena egin du. 17.646.735 milioi eurokoa izango da, 2025eko baino % 6,8 handiagoa.
“Aurrekontu hauek Arrigorriaga kohesionatuagoa, inklusiboagoa eta jasangarriagoa eraikitzeko borondatez diseinatu ditugu. Herri gisa aurrera egiteko eta gure auzokide guztien bizi-kalitatea hobetzeko funtsezko tresna dira”, nabarmendu du Arrigorriagako alkateak.
Aurkezpena egin ostean, proposamenaren lerro nagusiak aurkeztu dituzte komunikabideen aurrean.
Arrigorriagako udal-aurrekontuaren proposamena 2026
– Hirigintza eta Auzoak: Arlo honetara milioi bat euro baino gehiago bideratuko ditu gobernu-taldeak eta hiru ekintza nabarmendu dituzte: Osasun eta Higiene auzoko espazio publikoen irisgarritasuna eta kalitatea hobetzeko obrak egitea; eskolako patioa gune inklusiboagoa eta birnaturalizatuagoa bihurtzea, eta hirugarrenik, kiroldegi berriaren lehen fasea eraikitzeko
proiektuaren idazketa martxan jartzea.
– Politika Feministak: Arlo honek 155.450 euroko partida jasoko du. 2019 urtearekin alderatuta diru kopurua bikoiztu dutela iragarri du Garmendiak.
– Gizarte Politikak: zaintza komunitarioen aldeko apustu irmoa egin dute, eta Zaindu Arrigorriaga izena izango duen proiektu bat jarriko da abian. Proiektu honek ‘Zainduz’, ‘Herri Lagunkoia’, ‘Zu Nagusi!’ eta ‘GEUna’ lan-programa batuko ditu. “Horri esker, programa guztien arteko lotura eta koherentzia lortu ahal izango da, udalerri solidarioago eta zainduago baterantz urrats garrantzitsua eginez”.
– Ekonomia eta Enplegua: esparru honetara 45.500 euro bideratuko dute enplegu-prestakuntzarako eta laneratzeko ikastaroak egiten dituztenentzako laguntza ekonomikoetarako. Bestalde, ArrigoBono kanpaina egiten jarraituko dutela iragarri dute, “tokiko merkataritzari bultzada emateko”.
2026rako udal-aurrekontuaren proposamenak Ingurumenera, Euskarara, Kulturara, Kirolera eta
udalerriaren garapenerako funtsezkoak diren beste arlo batzuetara bideratutako partidak ere
jasotzen dituela gehitu du Maite Ibarrak.
Peio eta Maite, Arrigorriagan // Geuria
Aurkezpena, laster
Gobernu taldea joan den irailean hasi zen udal aurrekontua prestatzen eta urrian lehen zirriborroa bidali zioten oposizioko alderdiei, horiek aztertzeko bilera batera gonbidapena eginez.
“Heldu diren iruzkinak aztertu ondoren egin dugu behin betiko proposamena”, azaldu du Ibarrak. “Argi utzi nahi dugu udal gobernu irekia garela eta negoziatzeko prest gaudela”.
Proposamena hurrengo egunetan aurkeztuko dela azaldu dute udal ordezkariek eta asmoa “urte berria onartutako udal aurrekontuarekin hastea” dela, ondo bidean.
Euskal dantzak, erromeriak eta tradizioak protagonista, Galdakaoko azaroko Barikupasan
Danbolin Txistulari Elkarteak 40 urte bete ditu eta kontzertu berezia eskainiko du Basaurin
Umorezko bakarrizketa, Mintzodromoa eta lehiaketak antolatu dituzte Etxebarrin, Euskararen Eguneko programazioan
Ehun pertsona baino gehiago elkartu dira Ugaon, indarkeria matxistaren aurkako eguneko elkarretaratzean
Argazkiak | ‘Erreakzioari erantzun feminista’ lemapean manifestazioa egin dute azaroaren 25ean Galdakaon
Argazkiak | Indarkeria matxistak isilarazi dituen emakumeak oroitu dituzte gaur Basaurin
Bideoa | Indarkeria matxistaren biktimentzako “arreta duina” eskatu du Basauriko Asanblada Feministak
Bideoa | “Indarkeria matxistari aurre egiteko beharrezkoa da patriarkatuaren irakurketa estruktural bat egitea”
