Basauri Koral Elkarteak, Soinu Bideak, Biarte Dantza Eskolak, Edurre Dantza Taldeak eta Danbolin Txistulari Elkarteak indarrak batu dituzte beste urte batez elkartasun kontzertu bat antolatzeko.

Aurtengoa Ongintzazko IX. Kontzertua da eta urtarrilaren 10ean, larunbatez, izango da Basauriko Social Antzokian 19:30ean. Sarrera 7 eurokoa izango da.

Aurten Laia Arteaga 9 urteko etxebarritarrarentzat izango da. Entzelopatia epileptikoa eta neurogarapena ditu.

Mutazio genetiko arraro batek eragindako sendabiderik gabeko gaixotasuna da, eta tratamenduaren epilepsia super erregogorra eta garapen psikomotorraren eta desgaitasun intelektualaren atzerapen global larria dakartza. “Laiak gure laguntza behar du bere oinarrizko behar guztiak betetzeko”, diote antolatzaileek.

Zozketa solidarioa

“Apurka-apurka, ekitaldi hori gero eta esanguratsuagoa da gure herrian; gero eta merkatari eta erakunde gehiagok parte hartu nahi dute herrian eta herriarentzat egiten den ekitaldi honetan”, diote.

Zentzu horretan, herriko 19 merkatarik dohaintzan emango dituzten produktuen zozketa solidarioa ere antolatu dute emanaldia bitartean.

Saltoki horiek dira: Juanita Oinetakoak, FrutaEskatu Frutadenda, Eroski, Ohana Arropa-denda, Eguileor Farmazia, Pertxas, Laboral Kutxa, New Magic Taberna-jatetxea, Politena Jatetxea, YF Ileapaindegia, Elkar, Olabarri Mahastiak, Dulce de Remate Gozotegia, Merkatarien Elkartea, Loradenda, Felix Oinetakoak, Roaldo Erloju-denda, Mila Konponketak eta Carmen de la Villa Arropa-denda.

Zozketarako txartelak urtarrilaren 10ean bertan salduko dituzte 2 euroan.

“Iaz zozketako txartelekin eta sarrerekin 5.912 euro jasotzea lortu genuen. Aurten, beti ere parte-hartzaile guztien laguntzarekin, kopuru hori gainditzea espero dugu”, diote.

Meltxor, Gaspar eta Baltasar agurtu dituzte gaur basauriarrek. Goizean Social Antzokian harrera egin ostean, indarrak hartu eta arratsaldean kabalgata egin dute herritik zehar. Herritarrak, gazteak eta helduak, kalera irten dira Errege Magoak agurtzera, eta trukean ehunka gozoki eta konfeti jaso dituzte!

Meltxor, Gaspar, Baltasar eta euren pajeak badaude Basaurin dagoeneko! Goizean umeen bisita jaso dute Social Antzokian eta bertan topo egin dugu eurekin! Arratsaldean, 18:00etan kabalgata egingo dute herritik.

Zazpigarren urtez jarraian Kareaga Auzo Elkarteak egutegia egin du. Eta aurreko urteetan bezala, auzoko argazki zaharrekin bete dute egutegia, “gure auzoaren iragana eta auzotarrak gogorarazteko”.

Abenduan jarri zituzten 1.000 ale salgai auzoko tabernetan 2,5 euroan. Auzo Elkarteko bazkideek doan jaso ahal izango dute.

2019ko abenduan publikatu zuten lehen egutegia, eta ordutik urtero kaleratu dute. Horretarako argazki bilketa martxan du Auzo Elkarteak.

“2020tik Kareaga Auzo Elkartea herritarren parte-hartze bidezko proiektu bat aurrera eramaten ari da; auzokideek emandako dokumentazioarekin eta testigantzekin auzoaren historia berreraiki eta sakondu nahi duen proiktua, alegia”, diote.

Argazkiak, negatiboak, diapositibak, kartela, egunkarietako ebakiak edota bideoak ari dira biltzen eta digitalizatzen.

“Oroitzapen bilketa honen bidez, gure historiaren zati bat galtzea saihestu nahi dugu, eta material hori auzoko kontakizun kolektibo bat eraikitzeko erabili. Izan ere, Kareaga auzoa aldaketa handiak eta sakonak bizi izan ditu XX. mendetik hirigintzan, gizartean eta ekonomian”, diote.

Gabon gau egunean iragarri zuen Leganes talde madrildarrak albistea: Igor Oca Pulido basauriarra CD Leganeseko lehen taldeko entrenatzailea izango da denboraldia bukatu bitartean, taldearen gidaritza hartu eta hiru astera.

Joan den udan iritsi zen Oca Leganesera, Sestao Riverretik, klubeko bigarren taldea (Leganes B) gidatzeko asmoz. Hala ere, Paco Lopezen kargugabetzearen ostean, lehen taldearen ardura hartu zuen behin-behinean.

Tarte honetan zuzendu dituen hiru partidetan (bi berdinketa eta porrot bat), klubeko zuzendaritzaren konfiantza bereganatu duela argi utzi du erabaki honek.

GEURIAk elkarrizketa egin zion Ocari 2024ko apirilean, ´Arkeologia baloirengatik aldatu zuen basauriarra´ izeneko erreportajean. Profil berezia du entrenatzaile basauriarrak: Historian lizentziatua da eta Arkeologian espezializatua, baina bere ibilbide profesionala aulkian garatu du azken urteetan, batez ere Hego Amerikan, hala nola Ekuadorren, Txilen edo Mexikon.

Erronka nagusia: Salbazioa

Basauriarraren zeregina ez da erraza izango. Leganes LaLiga Hypermotion-eko (Bigarren Maila) jaitsiera postuetan dago une honetan, salbaziotik puntu bakar batera bada ere. Bere lantaldean Ivan Gomez (bigarren entrenatzailea), Alberto Bueno eta Nano Rivas izango ditu lagun denboraldiko helburua lortzeko.

Datorren astelehenean, abenduaren 29an, prentsaurreko ofiziala eskainiko du Ocak Butarque instalazioetan, proiektu berriaren xehetasunak emateko.