☉ Galdakao
Unai Etxezarraga usansolotarrak Everesteko oinarrizko kanpalekura igoera hasi du gaur
Mendizaletasuna gogoz bizi du Unai Etxezarraga usansolotarrak. Horrenbeste, munduko mendi altuenetariko bat igotzeari ekin diola gaur bertan: Everest mendia, alegia. Ez du zortzi milakoa osorik egingo (8.850 metro ditu Everest mendiak), baina oinarrizko kanpalekura heltzea da bere asmoa, gutxi gorabehera 5.300 metrotara. Zazpi laguneko talde batekin joan da Unai Nepalera: Ibai Etxezarraga bere lehengusuaz gain, lau galiziar eta beste euskaldun bat.
Urtarrilaren 3an iritsi ziren Kathmandura, eta gaur goizean bertan trekkinga hasi dute Lukla herritik (Nepal) Everesteko kanpamentu nagusira: “Kathmandutik abioneta bat hartu eta Luklatik hasiko dugu trekkinga. Hortik aurrera honako ibilbidea egingo dugu: Phakding (2.600 metro), Namche Bazaar (3.440), Tyangboche (3.860), Dingboche (4.410), Lobuche (4.910), Gorakshep (5.288) eta Everesteko kampamentu nagusia (5.364). Ondoren, Kala Pattharretik Lobuchera buelta egingo dugu, eta bertatik Luklara eta Kathmandura itzulera”, dio Etxezarragak. Guztira 17 egun egingo dituzte Nepalen.
Atzo gauean bertan hitz egin ahal izan genuen Unairekin, Everesteko oinarrizko kanpalekura igoera hasi aurretik: “Urtarrilaren 3an heldu ginen Kathmandura eta lehenengoko egunean hiria ikusteko erabili ginun. Lehenengo inpresioa benetan ikaragarria izan zan! Kathmandura heldu eta hurrengo egunean hiria bisitatu genuen: Swayambhunath (Tximuen tenplua ezizenaz ere ezaguna) eta Boudhanath Katmanduko estupa sakratuena bisitatu genituen eta gauean Pemba gure Kathmanduko gidak afaltzera gonbidatuozkun bere xerpa lagun bategaz. Xerpa horrek Everest zazpi bider igo dauz, beste hainbet zortzi milakoen artean, noski”, dio Etxezarragak.
Unai eta Ibai Etxezarraga Reinhold Messner alpinistarekin // U.E.
Unai Etxezarraga Swayambhunath estupan, Tximuen tenplua ezizenaz ere ezaguna // U.E.
Erronka hau egiteko fisikoki prestatu behar izan duten galdetu diogu Unairi, eta zera erantzun digu: “Fisikoki egin doguz irteera handi batzuk, baina ez dogu egin normalean egiten ez dogun ezer. Egin doguzen irteerak material barrie probatzeko izan da batez be, hala nola, botak, motxila edota traileko zapatilak”, dio Etxezarragak: “Bidaiaren prestaketari dagokionez erraza izan da. Hilabete batzuk arinago pasaportea iraungi barik dekoguzela egiaztatu gendun. Txorakeria dirudi, baina gauza horrek dire gero barrizterakoan denbora gehien behar daurienak. Gero material zerrenda bat egin gendun eta ia gehiena erosten hasi ginen Ibai eta biok. Kathmandun, danetarik dau erosteko, beraz, gauza batzuk hemen bertan erosi doguz”.
Covid-19ak eragina izan du Unairen eta taldekideen bidaian: “Materialaren ostean tramitazio gehienak Covidagaz izan dute zerikusia”, dio Etxezarragak, eta gaineratu du koronabirusaren gaia izan dela “txarrena”: “Batez ere PCRen kontua. Gauza da hegazkina hartzeko PCR bat eduki behar dozule bai ala bai eta proba azken 72 ordutan eginda egon behar dala. Bizi doguzen garaietan ez dozu imaginetan zein zaila dan PCR bat lortzea eta 72 orduen barruen emaitza lortzea. Buelta asko eta asko emon ostean, Quiron klinika pribatura joan behar izan gendun 88 euroko PCRa egiteko, eta gero atzamarrak gurutzatu emaitza negatibo izateko! Eta, eskerrak, horrela izan zan! Gero aireportuan dokumentu guztiek eskatzen dauriez: Covid ziurtagiria, PCRa… Eta horiez gain, Dohan (geldialdia bertan egin gendun) Nepalera bidaiatzeko galdetegi bat bete behar izan gendun Internetetik eta bertan Covid-ari buruzko hainbat galdera ere eginozkuen: zein motatako txertoa jaso dogun edota noiz txertagu ginen bezalako galderak”.
-20ºko lo-zakua eta kutun bat
Everestera joateko erabakia duela urtebete inguru hartu zuen Etxezarragak: “Nire lehengusua dan Ibai Etxezarragaz berbaz hasi nintzen bidaia handi bat antolatzeko. Biok gabiz arraunean, Deustuko taldean, eta denboraldie amaitutakoan bidaia itzel bat prestatzeko asmoa eduki zauela esaozten Ibaik. Antza, Lur Uribarrenegaz —Kaikuko patroi ohia eta mendi-gida bezala ibiltzen dana— berba egin zauen eta Nepalera bidaia bat prestatzen zebilela esaotzen. Hortik gutxira hirurok batu ginen Usansoloko taberna batean eta erabakie hartu gendun: Nepalera bagoaz!”, dio Etxezarragak: “Bidaia honen zergatia oso argi dau: biok mendie maite doguleko eta guretzat Nepal, mendi arloan, munduko tokirik eta bereziena delako. Everest eta beste zortzi milako hainbet mendi ikusteak ez dekolako preziorik mendizale batentzako”.
Zazpi laguneko taldea, Pemba gidarekin eta xerparekin afaltzen // U.E.
Urtarrilaren 3an iritsi zen Kathmandura zazpi laguneko taldea // U.E.
Motxilan zer sartu behar izan duten galdetu diogu Unairi: “Motxilako % 90a kiroleko arropa da. Lurrek zerrenda bat bidaliozkun beharrezko gauza batzukaz, adibidez, -10°tako eskularruak, -20°tako lo-zakua, neguko galtzerdiek, neguko txanoa… Horrek izan dire erosi behar izan doguzenak, bestea: trekkingeko prakak, goretex jakea, plumas on bat, termikak, bota on batzuk, traileko zapatilak, ezpainetako babesa eta eguzkitako krema, mendiko betaurreko onak, buffak, frontala…”. Motxilan beste gauza bat du Unaik; bere bikoteak oparitutako kutun bat: “Everesteko kanpamentu nagusira heldutakoan, gure helburue heldutakoan, zabalduko dot”, dio Etxezarragak.
Meltxor, Gaspar eta Baltasar Galdakaon zehar ibili dira, poza eta ilusioa oparitzen. Herritarrak, gazteak eta helduak, kalera irten dira eurekin egotera, eta trukean gozoki pila jaso dituzte!
☉ Galdakao
Jakes Sarrailleten ‘Bardeetako otsoak’ liburua aztertuko du Leiduk urteko lehen hitzorduan
Galdakaoko Leidu Irakurketa Taldeak urte berriko lehen hitzordua zehaztu du: urtarrilaren 12an, astelehenez, batuko dira Peña Santa Cruz elkartearen lokalean 18:30ean.
Jakes Sarrailleteren ‘Bardeetako otsoak. Edo Santxiko Errota nafar bidelapur famatuaren bizitza, berak kontaturik’ liburua aztertu eta komentatuko dute. Gainera, egilea bera hitzordura batuko dela adierazi dute Leiduko kideek.
☉ Galdakao
Errege Magoek kamioiz egingo dute kabalgata Galdakaon, Bengoetxetik Kurtzeko plazara
Errege Magoen kabalgata inklusiboa izango da Galdakaon: lehen zatian gozokirik bota gabe eta musika eta argiak intentsitate txikiagoan jarriko dituzte
Urtarrilaren 5ean Errege Magoak iritsiko dira Hego Uribe eskualdera. Galdakaon 18:00etan hasiko dute kabalgata Bengoetxeko elizaren ondoan eta Kurtzeko plazan bukatuko dute.
Eta, aurten, iaz bezala, kamioi batean egingo dute kalejira Errege Magoek eta Gabone Izarrak.
Ibilbidearen lehen zatia egokitua eta inklusiboa izango da: gozokirik ez dute botako eta musika eta argiak intentsitate txikiagoan jarriko dituzte El Arco tabernaren pareraino, sentikortasun sentsoriala duten pertsonen parte hartzea errazteko helburuarekin. Hortik aurrera, kabalgatak musikarekin, argiekin eta gozokien banaketarekin jarraituko du Kurtzeko plazara iritsi arte.
Kabalgataren amaieran txokolatada egongo da Kurtzeko plazan, Argizaiko gurasoek prestatua.
Kamioia, aukerarik onena
Iaz Errege Magoak eta Gabone Izarra kamioiz egin zuten ibilbidea eta horrek hautsak harrotu zituen herritarren artean.
Hori dela eta, Argizai Eskaut Taldeak alternatibak bilatu zituen iaz: “Martxoan, araudia betetzeko baldintza horiek bermatzen zituzten hainbat proposamen bidali genizkion Udalari, baina ez genuen erantzunik jaso ekainera arte eta ondoren irailera arte”, adierazi zuten abenduaren 23an Instagram publikatu zuten komunikatuan.
“Azaroan, bideraezintzat jo genituen beste proposamen batzuk helarazi zizkiguten, eta azkenik, abenduan jakinarazi ziguten onartutako aukera bakarra kabalgata kabriolet autoetan egitea zela: bana Errege Mago bakoitzarentzat eta beste bat Gabonerentzat”, esan dute.
Ildo horretan, ibilgailuak bilatzeari ekin zioten, baina ezinezkoa izan zuten kabriolet autorik topatzea.
“Egora horren aurrean, abendua erdialdean bilera izan genuen udaletxean alkatearekin eta ekitaldian inplikatutako gainerako udal-taldeekin. Bilera horretan, kabalgata aurrera eramateko bi aukera baino ez zizkiguten planteatu: oinez egitea edo kamioi batean egitea. Aukera horietako bat ere ez dator bat Galdakaorentzat nahi dugun kabalgatarekin, ezta historikoki egin izan denarekin ere. Hala ere, uste dugu hemendik aurrera Udalarekin benetako eta elkarlanean oinarritutako lan bati ekin nahi badiogu, eta etorkizunean lehenengo kagalgata berreskuratu nahi badugu, urrats hau ematea beharrezkoa dela”, diote.
Gauzak horrela, “eta hausnarketa sakon baten ondoren”, kabalgata kamioian egitea onartu du Argizai Eskaut Taldeak, “erabaki honen datozen urteetan elkarlanean, koordinatuta eta behar besteko aurrerapenarekin lan egiteko abiapuntu izan dadin”, diote.
“Badakigu albiste honek etsipena sor dezakeela -eta guk ere sentitzen dugu-, baina azpimarratu nahi dugu gure esku zegoen guztia egin dugula kabalgata ezagutzen dugun moduan mantentzeko”, diote.
☉ Galdakao
Argazkiak | Korrika eta giro apartarekin agurtu dute urtea Galdakaon San Silvestre lasterketan
Kirola eta festa uztartu dituzte Galdakaon gaur arratsaldean. Ehunka korrikalarik hartu dute parte herriko kaleetan barrena jokatu den lasterketan, eta eguraldiak lagun, ikusle ugari hurbildu dira parte-hartzaileei babesa ematera.
Giro aparta Galdakaon urtea ondo baino hobeto bukatzeko!
☉ Galdakao
Biharko San Silvestre lasterketak aldaketak eragingo ditu Galdakaoko trafikoan
Mozketa eta aldaketa nagusiak 15:00etatik 20:00etara bitartean egingo dituzte, baina goizetik izango dute eragina bai autobus geltikoetan eta bai trafikoan ere
Urtea korrikan agurtzeko ohiturari eutsiko diote galdakoztarrek asteazken honetan, abenduak 31, San Silvestre lasterketarekin. Urteroko hitzordu honek, baina, eragina izango du herriguneko zirkulazioan, eta Udalak hainbat neurri hartu ditu ibilgailuen joan-etorria eta aparkalekuak arautzeko.
Mozketa eta aldaketa nagusiak 15:00etatik 20:00etara bitartean egingo dituzte, baina goizetik izango dute eragina bai autobus geltikoetan eta bai trafikoan ere.
Autobus geltokiak eta trafikoa
Autobus erabiltzaileek kontuan izan behar dute Juan Bautista Uriarte, Lapurdi eta Altzadiko biribilguneko geltokiak kendu egingo dituztela arratsaldez (15:00-20:00). Ordezko geltokiak honako gune hauetan egongo dira: Gernika kalea, 5. zenbakian, Maximo Moreno parkean eta Pintxazo biribilgunean.
Ibilgailu pribatuei dagokienez, goizeko 08:00etatik aurrera debekatuta egongo da aparkatzea Lapurdi, Juan Bautista Uriarte eta Zamakoa kaleetan. Gainera, 15:00etatik aurrera ezingo da autoarekin sartu Juan Bautista Uriartera eta Zamakoara.
Garajeak eta norabide aldaketak
Lasterketak irauten duen bitartean, Juan Bautista Uriarteko eta Ganekogortako garajeetarako sarbidea mugatuta egongo da. Horrez gain, Euskadi kaleak norabidea aldatuko du behin-behinean, eta Errekalde bidera bizilagunek eta baimendutakoek soilik sartu ahal izango dute 15:30etik aurrera.
Udaletik eta antolakuntzatik gomendioak jarraitzeko eta seinaleak errespetatzeko deia egin diete herritarrei, urteko azken lasterketa segurtasunez jokatu dadin.
Argazkiak | Errege Magoek ilusioa eta gozokiak banatu dituzte Galdakaoko kabalgatan
Argazkiak | Errege Magoen Kabalgatak eta epifaniak jendez bete du Arrigorriagako plaza
Venezuelako kontsulak Basaurin aldarrikatu du presidentea Nicolas Maduro dela
Argazkiak | Errege Magoek ilusioa eta gozokiak banatu dituzte Galdakaoko kabalgatan
Argazkiak | Errege Magoen Kabalgatak eta epifaniak jendez bete du Arrigorriagako plaza
