☉ Ugao
Aritz Irazabal: “Pribilegioa da pentatloia baserriko ortuan prestatzea”
Aritz Irazabal (Ugao, 1990) Bizkaiko II. Pentatloiko irabazlea dugu. Ugaotarra otsailean hasi zen entrenamenduak txapelketa honetara bideratzen eta denborak eta ardurak bere alde egin dute txapela eskuratu ahal izateko.
Aritz Irazabal (Ugao, 1990) Bizkaiko II. Pentatloiko irabazlea dugu. Ugaotarra otsailean hasi zen entrenamenduak txapelketa honetara bideratzen eta denborak eta ardurak bere alde egin dute txapela eskuratu ahal izateko. Konstantziari eta Ugaoko baserri aurrean duen ortuan prestatu duen ‘kiroldegi’ bereziari esker, senideek lagunduta betiere, Aritzek irabazi berri duen pentatloiko probak astean birritan erreproduzitu ahal izan ditu. Aizkoran 17 urtegaz hasi bazen ere, 2021era arte ez zuen sekula 100 edo 400 kiloko harririk altxatu, eta gorputza indar eta erresistentzia berrietara doitzen ari bada ere, garapen ona izaten ari dela aitortu du ugaotar gazteak.
Urriaren 30ean Bizkaiko II Pentatloia irabazi zenuen Algortan. Nolako esperientzia izan zen zuretzat? Otsailetik entrenatzen ibili nintzen Bizkaiko Pentatloi Txapelketarako. Guztiz ziur egon ez arren, Algortako txapelketan banekien txapela irabazteko aukera izango nuela, egia esateko. Ugaon entrenamendu saio ugari egin genituen eta etxeko lanak eginda heldu ginen Algortara.
Nolako aurkariak izan zenituen txapelketan? Aldez aurretik ezagutzen nituen. Beñat Amade bigarren postuan geratu zen (27’ 44”), eta beragaz Euskal Herriko Binakako Pentatloi Finalean parte hartu nuen. Ousmane Drame ere bazegoen Algortan eta hirugarren postua eskuratu zuen (31’ 38”). Ousmanegaz pare bat erakusketa egin ditut. Laugarren postua Daniel Españarentzat izan zen. Aurten lau kirolari bakarrik izan ginen bertan eta bi lesionatuta geratu ziren kanpoan: Unai Ardeo eta Mikel Agirre. Elkar ezagutzen genuenez, bagenekien bakoitzak zer eta nola egingo zuen, gutxi gorabehera.
Nolako txapelketa izan zen? Zer nolako probak egin zenituen egun hartan? Izenak dioen bezala, bost frogek osatzen dute pentatloia: lehena 100 kiloko bola altxatzean datza eta Bizkaiko Txapelketan 15 altxaldi egin behar dira. Bukatutakoan giza probara igarotzen gara eta bertan 400 kiloko harri bat altxatu eta bi plaza egin behar dira, plaza bakoitzak 22 metroko luzera izanik. Giza proba amaitu ostean aizkoraren txanda da eta 45 ontzako eta 1,05 metroko perimetroa duten lau enbor moztu behar dira. Gero, bi txingekin 22 metroko lau plaza egin behar dira, txinga bakoitza 50 kilokoa izanik. Azkenik, 1,5 kilometro egin behar dira korrikan: hots, Algortako Bihotz Alai plazari 17 buelta emanda betetzen da distantzia hori.
2013an Bizkaiko txapeldunordea izan zinen, eta oraingo honetan Bizkaiko II. pentatloiko txapelduna. Nolakoa izan da aintzatespen hau lortu ahal izateko egin behar izan duzun bidea? Pentatloia berri samarra da niretzat. Pentatloi Txapelketak bost urte daramatzan arren, azken bost edizioak baino lehen, 90ko hamarkadan egin zen azken saioa, Euskal Herri mailan. Duela bost urte, hainbat pertsona bildu eta txapelketa berreskuratzea erabaki zuten. Hasiera batean Euskal Herri mailan parte hartzeko prestatzen hasi nintzen. Lehenengo bikoteko proban lehiatzeko prestatzen hasi nintzen eta geroxeago, banaka. 2013ko Euskal Herriko banakako txapelketan kanporaketa bi eta finala antolatu zituzten eta kanporaketa horietan finalerako txartela eskuratu eta finalean aritzeko aukera izan nuen.
Nolakoak izan dira zure hastapenak kirol honetan? 17 urtegaz hasi nintzen aizkoran eta pentatloia berri samarra da niretzat. Nahiko ondo daramat, baina aitortu behar dut nire gorputza ez dagoela guztiz egokitua modalitate honetara: 100 kiloko harria altxatzeko gorputzak indar eta erresistentzia izugarria behar du eta agian hor makalago nabil. Hala ere, apurka-apurka banoa aurrera: aurten ez nuen Euskal Herriko finalera iristerik espero eta igaro naiz.
Eta non sentitzen zara erosoen? Aizkoran eta korrikan, agian. Aizkora hirugarren proba dugu eta korrika egitearena, azkena. Baina egia esateko proba errazagoak dira niretzat, proben arteko iragate horiek, hasieran bereziki, gorputzarentzat gogorregiak izan arren.
Aizkoran 17 urtegaz hasi zinela esan duzu. Nola gogoratzen dituzu urte horiek enborrak zatitzen? Ugaoko futbol taldean 6 urte eman nituen eta gero Basauriko Artunduagan atletismoa landu nuen. Egun batean aitari esan nion aizkolaria izan nahi nuela. Aitak institutuan ikasitako lagun bat zeukan: Kepa Atutxa, Aitzol Atutxaren aita. Aitak eta Kepak elkar ezagutzen zutenez, egun batean Lemoara eraman ninduten, eurek entrenamendu saioak egiten zituzten lekura. Bertan Aitzol Atutxa, Unai Aldape eta Larrea, besteak beste, ezagutu nituen. Beraiek murgildu ninduten aizkoran.
Kirolean hasi eta nolakoa izan zen garapena? Astiro-astiro eta kostata ofizioa ikasten hasi nintzen. 17 urte izan arte, baserrian olgetan ez bazen, ez nuen aizkorarik hartu. Alde handia dago enbor txiki bat moztearen eta txapelketa baterako prestatzearen artean. Pare bat urte aizkoraren lanbidea ikasten eman ostean, urte batzuk igarota Lemoako eskolara joateari utzi nion eta etxean entrenatzen hasi nintzen. Egia da aizkora bakarkako kirola dela, eta aizkolaria taldeko giroan mugitzen ez bada aspertzeko arriskua dauka edo jarraikortasuna mantentzeko zailtasunak izan ditzake. Nire kasuan, urte onak eta ez hain onak izan ditut.
Hala ere, etxeko gimnasioa ikusita aspertzeko aukera gutxi ikusten dut. Entrenamendu saioak etxeko ortuan bertan egiten ditut, eta aita, lehengusua eta anaia batzuetan laguntzaile onenak ditut. Saio familiarrak izan ohi dira. Egia da, baita ere, Getxoko Andra Mari probalekuko Getxoko Herri Kirol taldeagaz hasi nintzela harria altxatzen. Distantzia kontuengatik saio horiek etxean bertan prestatzen hasi ginen pentatloira begira.
Zenbatero egiten dituzu familia formatuko saio hauek? Txapelketarako saioak direnean astean bi alditan prestatzen naiz. Saio bakoitzean txapelketa osoa erreproduzitzen dugu, gorputzeko nekea jokoan jarriz. Txapelketarako probak ez direnean proba ezberdinak tartekatzen ditut. Pribilegioa da ortuan txapelketako proba guztiak egin ahal izatea: harri altxaketak, aizkora probak, korrika saioak… Etxearen atzealdean porlanezko bidetxoa egin dugu eta bertan giza probak eta txingak lantzen ditut. Neurrira egindako kiroldegi propioa daukagu etxean bertan.
Beraz, Ugaoko kiroldegia ikusi ere ez. Euria egiten duen egunetan El Jaroko kirol pistara jaisten naiz, ortuko zorua lokazten delako.
Zer ikasketa dituzu? Magisteritzako lehen hezkuntza eta gorputz hezkuntzako ikasketak ditut, baita haur hezkuntzako goi mailako ziklo bat ere. Horrez gainera Ugaoko enpresa batean eman ditut azken bost urteak, eta bertan metalografikako goi-mailako ziklo bat ikasi nuen. Azken urtean haurreskolatik lana eskaini zidaten eta enpresan eszedentzia eskatu nuen. Lan hura bukatu eta harrezkeroztik langabezian nabil.
Baina denbora izateari etekina atera diozu Pentatloirako prestatzeko. Bai noski! Guztiz zentratuta egon naiz txapelketarako jo eta su prestatzen. Lanagaz bateragarri egin beharko izan banu lehenik eta behin lanera joan beharko nuke, bertan zortzi ordu eman eta etxera guztiz nekatuta helduz.
Erreferenterik baduzu aizkoraren munduan? Gustuko ditut Miguel Mindeguia edota Joxe Mari Olasagasti bezalako lehen mailako aizkolariak. Gero, argi dago Aitzol Atutxa ere erreferente ona dela, Euskal Herriko finalera heltzen lehen bizkaitarra izan zelako eta bost txapela dituelako.
Nolakoak izan dira Ugaon egindako erakustaldiak? Politak! Urtetan pilo bat antolatu dituzte bertan, Ugaoko jaietan. Herriko berotasunak hartzen zaitu eta esperientzia ederra izan da koronabirusa heldu arte.
Ba al dago enborra moztea gustatuko litzaizukeen ametsetako lekurik? Orain arte Bizkaiko Lehen Mailako Txapelketa Santo Tomas egunean egiten zen, Bilboko udaletxe ondoan. Duela hiru urte gaixorik egon nintzen eta urte kaxkarra izan zen niretzat. Bigarren mailara jaitsi nintzen. Aurten ez naiz lehen mailan egongo eta Bilboko Arriaga Plazan antolatuko dute, egoerak hala uzten badu. Nik bertan enborra moztu dut, baina ez Santo Tomas egunean. Espero dut egunen batean eta Santo Tomasetan bertan moztea egurra, benetan ikusgarria izan behar duelako.
Eta orain zer, Aritz? Hurrengo erronka 2022ko urtarrilaren 6an daukat, Azpeitiko zezen plazan. Lehen duatloia prestatu dute eta bertan korrika eta enborrak mozten ibiliko naiz. Modalitate berria izanik proba moduan antolatu dute, nolako emaitza duen ikusteko. Orduan, kirol proba horretan murgilduta nabil momentu honetan. Hala ere, helburu nagusia hurrengo urteko pentatloian zentratzea da, aizkoran soilik aritu ordez.
☉ Ugao
Bideoa | DJ Pipi Galtzaluze: «Musika ona, energia eta publikoarekin konektatzea da ondo pasatzeko gakoa»
DJ Pipigaltzaluzeko hirukotea lanez gainezka dago 2023ko Ugaoko Gazte Egunean proiektua martxan jarri zutenetik. Udan ez dira gelditu eta plan berriak dituzte
Ane Bikandi (Zaratamo, 2003), Maite Otsoa (Ugao, 2003) eta Nerea Bajo (Ugao, 2003), dira ‘DJ Pipigaltzaluze’ proiektuko lemazainak. Gauak eta ospakizun bereziak alaitzeaz arduratzen da hirukote parrandazalea, proiektua 2023ko Ugaoko Gazte Egunean jaio zenetik. Helburua maite duten musika plazaratu eta jendea parranda giro horretan murgiltzea dela azaldu digute, eta azken saioa Bilboko Aste Nagusiko Txinparta Feminista konpartsan eskaini zuten, jendez lepo. Proiektuaren inguruan mintzatu gara eskualdeko neskekin.
DJak definitzeko modu asko daude, askotariko estiloko DJ asko daudelako gaur egungo panoraman. Zer da DJa izatea zuentzat? Gauaz disfrutatzeko beste modu bat da, parranda egitea, baina maite dugun musika aukeratuz. Gainera normalean lagunak eta herriko jendea dator gurekin disfrutatzera eta asko gustoko dugu ere.
Nola bereizi egiten dira zuen saioak gainontzeko DJenengatik? Lagunek eta ezagunek gurekin batera disfrutatzeko modu bat da. Horregatik ez dugu modan dagoena soilik jartzen, baizik eta guk gustuko duguna eta gure ingurukoek gustura entzuten dutena. Horrez gain, mikrofonoa erabiliz jendearekin harreman zuzena sortzea asko gustatzen zaigu, eta hori ez da DJ guztiek egiten duten zerbait.
Nolakoa izan da aurtengo uda zuentzat? Uda honetan goraino egon gara. Lehengo saioa lagun baten ezkontzan hasi, ondoren Ugaoko Herrikoan egon ginen, Arrigorriagako jaietan, eta joan den abuztuan Bilboko jaietan egoteko aukera izan genuen ere, Txinparta Feminista konpartxan. Leku guzti hauetan egotea plazer izugarria izan da.
Noiz eta nola jaio zen DJ Pipi proiektua sortzearen ideia? 2023ko Ugaoko Gazte Egunean jaio zen. Gaua bukatzeko DJ bat behar genuen eta hasieran Ugaoko gazteen arteko musika biltzea erabaki genuen, baina norbait eszenatokira igotzea ideia hobea iruditu zitzaigun, jendea gehiago animatuko zelako. Antolatzaileen artean bildu eta erabaki genuen gu animatzen ginela, lotsa gutxien geneuzkanak, hain zuzen ere.
Nola prestatu eta burutzen duzue saioak? Normalean playlistak sortzen ditugu eta musika jarri. Nahasketa-mahaia erabiltzen hastea gustatuko litzaiguke eta ikasten ari gara dagoeneko.
Nolako saioak izaten dira zuenak? Gehienetan herriko jaietan egin ditugu saioak eta aurten pare bat Gaztetxetan egon gara. Uda honetan lehen aldiz lagun baten ezkontzan egon ginen eta gure saiorik kuttunena izan zen. Leku itxietan egindako saioak nahiago ditugu, jendea gertuago dugulako eta mikrofonoarekin haiekin abestea asko gustatzen zaigulako.
Nolako osagarriak izan behar ditu DJ baten gauak arrakastatsua izateko? Garrantzitsuena da jendeak ondo pasatzea eta giroa sortzea. Horretarako beharrezkoak dira honakoak: musika ona, energia eta publikoarekin konektatzeko gaitasuna. Gure kasuan, lagunen presentzia eta mikroaren erabilera ezinbestekoak dira. Nonoz karaokeren bat inprobisatu dugu!
“Irailaren 19an Galdakaoko jaietan egongo gara, txosnetan. Eta Gorlizen izango gara ere. Hortik aurrera… batek daki nolako ikasturtea izango dugun!”
Uda igarota, zein izan da zuen setlistean falta ezin izan den abestia? Skabidean taldearen ‘Pipi’ abestia gure abestirik bereizgarriena dela esan daiteke. Saioen hasieran jartzen dugu jendea saioa hasi dela konturatzeko eta oholtzan nor dagoen jakiteko. Bestela, Shakira, Abba, edota Bad Gyalen edozein abesti… egia esateko denetarik jartzen dugu gure saioetan eta ezin dugu abesti bakarra aukeratu.
Udako gauek ere istorio asko ostantzen dituzte. Ba al dago aztarna sakonik utzi duen pasarterik zuen gauetako saioetan? Uda honetan Bilboko Aste Nagusian egon ginen Txinparta feminista txosnan, eta itzela izan da, hainbeste jende ezagun ikustea jendetzaren artean itzela izan zen. Ahazten ez den momentu horietako bat. Bestalde, Ugaoko ezkontza batean pintxatu ahal izan genuen eta hura ere itzela izan zen!
Ba al dago pintxatu duzuen leku arraro aipagarririk? Lagun baten osabaren urtebetetzean egon ginen, hori da lekurik arraroena. Hala ere, konfiantza asko dugu gure lagunaren familiarekin eta ez zitzaigun batere arraroa egin bertan egotea. Oso ondo pasatzen dugu beti Becerra familiarekin.
Hiru neska zarete oholtzan. Zein da bakoitzaren betekizuna? Ez dugu betekizun ezberdinik, hirurek egiten dugu lana batera. Normalean hasierako abestiak adosten ditugu eta ondoren, gustatzen zaizkigunak eta eskatzen dizkigutenak gehitzen goaz. Hori bai, Maitek hobeto kontrolatzen du ordenagailua eta askotan berak egiten ditu aldaketak. Saioen kudeaketa eta musika aukeraketa bestela, hiruron artean egiten dugu.
Erreferenterik al dekozue DJen munduan? Gaur egun DJ asko daude baina hasi ginenean, gure lagunak ziren DJ Latxirongak baino ez genituen ezagutzen. Latxirongak Gasteizko Jimmy Jazz aretoan hasi ziren eta guri asko gustatuko litzaiguke bertara joatea. Laritxongak erreferente izan badaitezke, zalantza barik haiek izan zirela esan dezakegu.
Nora eraman nahiko zenukete zuen musika eta bizipoza? Apurka-apurka leku desberdinetan gabiltza baina gure helburua ez da Euskal Herri osotik mugitzea, baizik eta, parranda gustukoa dugun lekuetara joatea edo behintzat bat egiten dugun kausaren batengatik egiten diren ekintzetan parte hartzea.
“Gure helburua parranda gustukoa dugun lekuetara joatea edo behintzat bat egiten dugun kausaren batengatik egiten diren ekintzetan parte hartzea da”
Zelan azaltzen da ikasturtea saioei begira? Datarik itxi al duzue? Bai! Momentuz irailaren 19an Galdakaoko jaietan egongo gara, txosnetan. Eta Gorlizen izango gara ere. Hortik aurrera… batek daki nolako ikasturtea izango dugun! Baina beti Instagramen iragartzen ditugu gure hurrengo saioak, beraz jarraitzera gomendatzen dizuegu.
Besterik, neskak? Gure kuadrillako lagunei zein Ugaoko Txosnaguneari eta Gazte Egunari eskerrak eman nahi genizkieke, eskeinitako laguntza eta babesagatik.
☉ Ugao
Nagore Urueña Ugaoko zinegotziak herriko jaietan jasandako azken erasoa salatu du
Aurreko urteetan ez bezala, aurtengo erasoak “muga guztiak gainditu dituela” adierazi du Ugaoko zinegotziak sareetan
“Beste urte batez, Ugaoko jaietan opari berria utzi didate etxean”, azaldu du Nagore Urueña Ugaoko zinegotziak. “Baina aurreko urteetan ez bezala, aurten trafiko-bolardoa bota digute balkoira eta azken eraso honek muga guztiak gainditu ditu”, salatu du herritarrak.
Urueñaren arabera, onartezina da ideologia politiko jakin bat izateagatik urtez urte era horretako erasoak jasatea: “Pentsatzeko era biolentziaren bidez aldatzen saiatzea ez da bidea, guztiz kontrakoa; gure pentsaera zuzena dela esan nahi du horrek”, eta jende horrek besteek desberdin edo beraiek bezala pentsatzen saiatzeko beste modu batzuei buruz hausnartzea “interesgarria” litzatekeela proposatu du.
Ugaoko gobernu taldeak “bere gaitzespenik sendoena” adierazi du joan den asteburuan gertatutako azken erasoaren aurrean. Izan ere, Segurtasun Sailak aditzera eman duenez, joan den irailaren 14ko goizaldean, 01:00ak aldera, norbaitek trafiko-bolardo edo pibote bat jaurti zuen Ugaoko EAJko zinegotziaren etxearen aurka, kalteak eraginez balkoiko pertsianan.
“Ez da gertaera isolatua. 2022az geroztik, zinegotzia iraindu, mehatxatu eta bere etxebizitzaren aurkako erasoak jasan ditu”, azaldu dute udal ordezkariek. “Indarkeriazko ekintza horiek gure gizartea gidatu behar duten bizikidetza, errespetua eta printzipio demokratikoak larriki urratzen dituzte.”
Nagore Urueña: “Pentsatzeko era biolentziaren bidez aldatzen saiatzea ez da bidea, guztiz kontrakoa; gure pentsaera zuzena dela esan nahi du horrek”
Bozeramaileen Batzordeak elkartasuna eta babes osoa adierazi nahi izan dizkio Nagoreri eta bere familiari. “Aldi berean, irmo arbuiatzen dugu herritarrak zilegitasunez ordezkatzen dituztenen aurkako indarkeria, mehatxu edo jazarpen oro. Ugaon ez dute lekurik jokabide koldar eta onartezin hauek”.
“Ekintza onartezina, justifikaezina eta koldarra da”, azaldu du Iñigo Ansola Kareaga Bizkai Buru Batzarreko presidenteak bere sareetan, eta alderdi guztiek salatu beharreko ekintza dela gehitu du. Ekaitz Mentxaka Ugaoko alkateak ere irmoki gaitzetsi du eraso berri hau: “Hirugarren erasoa da eta Udaletik guztiz gaitzesten dugu”.
“Aniztasun politikoan oinarrituta, errespetuaren, bizikidetza baketsuaren eta balio demokratikoen defentsaren aldeko deia bateratua egiten dugu. Indar guztiekin lan egiten jarraituko dugu indarkeriarik gabeko Ugao baten alde, non inor ez den erasotua bere ideiengatik edo konpromiso instituzionalagatik”, gehitu dute udal ordezkariek.
Beste eraso bat
Urueñak horrelako ekintza gehiago jasan ditu azken urteetan: arazoak 2022an hasi ziren, eta 2024an irainak eta mehatxuak egin zizkioten. Gainera, urte berean etxearen kontra objektuak bota zizkioten.
Azken erasoa iazko ekainean jasan zuen, GEURIAn iragarri lez, norbaitek etxeko fatxadaren aurka arrautzak bota zizkionean. Egoera honen aurrean, Ugaoko Udalak “aho bateko gaitzespena” erakutsi zuen, eta “Udalbatzako indar politiko guztiek gertutasuna eta babesa adierazi nahi izan zizkieten irainak eta bere etxeko leihoan objektuen jaurtiketak jasan behar izan dituen biktimari eta haren senideei”.
☉ Ugao
Argazkiak | Jaietako indaba janak ugaotarrez bete du institutuko pista
Beste urte batez bertara gerturatu gara, indaben usain zoragarria eta festetako giro ezinhobeaz gozatzeko
Ugaoko jaiek azken txanpa hasi dute eta egun garrantzitsua da gaurkoa ugaotarrentzat, herri indaba jana egin dutelako institutuko kirol pistan. Beste urte batez bertara gerturatu gara, indaben usain zoragarria eta festetako giro ezinhobeaz gozatzeko.
Aurten 340 pertsonak hartu dute parte herri bazkarian. Urtez urte errezeta egiteko teknika alda daiteke, baina badago edizio bakoitzean mantendu egiten den ezaugarri bat: indabek ez dutela adinik ezta bereizketarik egiten: haurrak, gazteak, helduak… ikusten dira elkarren artean urtero, denok elkarrekin, giro zoragarrian.
Sukaldarien amantaletan ipintzen duen moduan: “Guztion artean, geurea zaintzen”.
☉ Ugao
Ugaoko udal bozeramaile batzordeak EAJko zinegotzi bati egindako azken erasoa gaitzetsi du
“Ez da gertaera isolatua. 2022az geroztik, zinegotzia iraindu, mehatxatu eta bere etxebizitzaren aurkako erasoak jasan ditu”, azaldu dute udal ordezkariek
Ugaoko gobernu taldeak “bere gaitzespenik sendoena” adierazi du EAJko zinegotzi batek jasandako azken erasoaren aurrean.
Izan ere, Segurtasun Sailak aditzera eman duenez, joan den igande goizaldean, 01:00ak aldera, norbaitek trafiko-bolardo edo pibote bat jaurti zuen Ugaoko EAJko zinegotzi baten etxearen aurka, kalteak eraginez herritarraren pertsianan.
“Ez da gertaera isolatua. 2022az geroztik, zinegotzia iraindu, mehatxatu eta bere etxebizitzaren aurkako erasoak jasan ditu”, azaldu dute udal ordezkariek. “Indarkeriazko ekintza horiek gure gizartea gidatu behar duten bizikidetza, errespetua eta printzipio demokratikoak larriki urratzen dituzte.”
Bozeramaileen Batzordeak elkartasuna eta babes osoa adierazi nahi dizkio erasoa jasan duen ordezkariari eta bere familiari. “Aldi berean, irmo arbuiatzen dugu herritarrak zilegitasunez ordezkatzen dituztenen aurkako indarkeria, mehatxu edo jazarpen oro. Ugaon ez dute lekurik jokabide koldar eta onartezin hauek”.
“Ekintza onartezina, justifikaezina eta koldarra da”, azaldu du Iñigo Ansola Kareaga Bizkai Buru Batzarreko presidenteak bere sareetan, eta alderdi guztiek salatu beharreko ekintza dela gehitu du. Ekaitz Mentxaka Ugaoko alkateak ere irmoki gaitzetsi du EAJko zinegotziak jasandako eraso berri hau: “Hirugarren erasoa da eta Udaletik guztiz gaitzesten dugu”. Hurrengo orduetan oharra plazaratuko du Udalak.
“Aniztasun politikoan oinarrituta, errespetuaren, bizikidetza baketsuaren eta balio demokratikoen defentsaren aldeko deia bateratua egiten dugu. Indar guztiekin lan egiten jarraituko dugu indarkeriarik gabeko Ugao baten alde, non inor ez den erasotua bere ideiengatik edo konpromiso instituzionalagatik”, gehitu dute udal ordezkariek.
Beste eraso bat
Ugaoko EAJko zinegotziak horrelako ekintza gehiago jasan ditu azken urteetan: arazoak 2022an hasi ziren, eta 2024an irainak eta mehatxuak egin zizkioten. Gainera, urte berean etxearen kontra objektuak bota zizkioten.
Azken erasoa iazko ekainean jasan zuen, GEURIAn iragarri lez, norbaitek etxeko fatxadaren aurka arrautzak bota zizkionean. Egoera honen aurrean, Ugaoko Udalak “aho bateko gaitzespena” erakutsi zuen, eta “Udalbatzako indar politiko guztiek gertutasuna eta babesa adierazi nahi izan zizkieten irainak eta bere etxeko leihoan objektuen jaurtiketak jasan behar izan dituen biktimari eta haren senideei”.
☉ Ugao
Ugaoko EAJko zinegotzi baten etxea erasotu dute asteburuan, pibote batekin
Ekaitz Mentxaka Ugaoko alkateak irmoki gaitzetsi du EAJko zinegotziak jasandako eraso berri hau
Segurtasun Sailak aditzera eman duenez, joan den igande goizaldean, 01:00ak aldera, norbaitek pibote bat jaurti zuen Ugaoko EAJko zinegotzi baten etxearen aurka, kalteak eraginez herritarraren pertsianan.
“Ekintza onartezina, justifikaezina eta koldarra da”, azaldu du Iñigo Ansola Kareaga Bizkai Buru Batzarreko presidenteak bere sareetan, eta alderdi guztiek salatu beharreko ekintza dela gehitu du.
Ekaitz Mentxaka Ugaoko alkateak irmoki gaitzetsi du EAJko zinegotziak jasandako eraso berri hau: “Hirugarren erasoa da eta Udaletik guztiz gaitzesten dugu”. Hurrengo orduetan oharra plazaratuko du Udalak.
2024an bota zizkioten arrautzen arrastoak // Utzitakoa
Beste bat
Ugaoko EAJko zinegotziak horrelako ekintza gehiago jasan ditu azken urteetan: arazoak 2022an hasi ziren, eta 2024an irainak eta mehatxuak egin zizkioten. Gainera, urte berean etxearen kontra objektuak bota zizkioten.
Azken erasoa iazko ekainean jasan zuen, GEURIAn iragarri lez, norbaitek etxeko fatxadaren aurka arrautzak bota zizkionean. Egoera honen aurrean, Ugaoko Udalak “aho bateko gaitzespena” erakutsi zuen, eta “Udalbatzako indar politiko guztiek gertutasuna eta babesa adierazi nahi izan zizkieten irainak eta bere etxeko leihoan objektuen jaurtiketak jasan behar izan dituen biktimari eta haren senideei”.
Argazkiak | Moda pasarela bilakatu da gaur Galdakao, Santakurtze jaietan
‘Jone, batzuetan’ filma euskaraz proiektatuko dute Social Antzokian, Basaurin
Ahotsa “askatzeko” tailerra antolatu dute Arrigorriagan, euskara hutsean
Argazkiak | Moda pasarela bilakatu da gaur Galdakao, Santakurtze jaietan
Argazkiak | Galdakaoko jaietako Playback lehiaketa 140 argazkitan!
Argazkiak | Kuadrillak busti dira gaur Galdakaoko jaietan: batzuk euripean, beste batzuk Paddle Surfean
Bideoa | DJ Pipi Galtzaluze: «Musika ona, energia eta publikoarekin konektatzea da ondo pasatzeko gakoa»
Bideoa | Antzeko, Bertan Kaldo eta Dekantzekoz, Galdakaoko jaietako Playback lehiaketako onenak!
