Urtarrilaren 27an, otsailaren 24an eta martxoaren 23an Nortasun agiria edo pasaportea tramitatzeko bulego mugikorra ipiniko dute Ugaon.

Zerbitzua goizean eskainiko dute Herriaren enparantzan, “behar diren izapide guztiak egiteko bereziki egokitutako ibilgailu batean”, zehaztu dute udal ordezkariek.

Zerbitzua erabiltzeko hitzordua eskatu beharko dute interesdunek urtarrilaren 21a baino lehen, udaletxean aurrez aurre edo 946 480 711 telefono zenbakira deituz

Duela urte asko, hiru errege magoen kabalgata antolatzen zuten Ugaon, baina urteek aurrera egin ahala desagertu zen. Ugaoko Izarra elkarteak, duela 18 urte, tradizio hura berreskuratu eta epifaniarekin batera ikuskizun berezia antolatzen du urtero Herriaren enparatzan, urtarrilaren 5ean.

Gaur egun bederatzi kidek osatzen dute Ugaoko Izarra, baina Errege Magoen Gaueko ikuskizunean 100 herritar inguruk hartzen dute parte. Aurtengo kabalgata igaro da dagoeneko, baina ekitaldiaren istorioa ezagutu nahi izan dugu Ana Guerra Anaya (Arrigorriaga, 1965) kidearen eskutik Jane jauregian, jantziz, osagarriz eta atrezzo elementuez inguratuta, Ugaoko saioaren entsegu nagusian.

Noiztik antolatzen ditu Ugaoko Izarrak Gabonetako kabalgata? Aurten gure 18. kabalgata izango da, beraz, gure lehenengo kabalgata 2008 izan zen. Argitu nahi nuke gurea ez dela soilik kabalgata bat, baizik eta epifania eta kabalgata bat. Guk antzezten dugu garai hartan gertatu omen zena eta erregeen kabalgatarekin lotzen dugu.

Nola sortu zen ekimena eta zein zen jardueraren helburua hasieran? Gure seme-alabak txikiak zirenean beste herri batzuetako kabalgata ikustera joan ginen eta, han egonda, pentsatu genuen: “Zergatik ez dugu antolatzen horrelako zerbait Ugaon gurasoak eta seme-alabak herritik mugitu beharrik ez dezaten?” Eta herriari erraztasun hori eskaintzeko asmoz sortu zen ideia.

Nolako garrantzia dauka elkartearentzat tradizio hau bizirik mantentzea? Herriko jendeari herrian bertan izatea horrelako ikuskizun bat izan zen asmoa eta, gaur egun, helburu hori bizirik mantentzen da.

Nolako garapena izan du kabalgatak hasi zenetik? Hasieran, baliabide gutxi izan genituen, baina gero, eta Udalaren dirulaguntzari esker, pixkanaka-pixkanaka pertsonaia eta estruktura gehiago gehitzen joan ginen. Une honetan, muntaia polita daukagu eta, noizbehinka gauza batzuk aldatzen edo gehitzen ditugu, baina 18 urte eta gero oinarria eginda dago.

Zenbat jendek hartzen du parte urteroko jarduera hau prestatzen? Elkartean bederatzi pertsona gara eta guk antolatzen dugu dena, baina laguntza eskatzen dugunean badaude pertsona asko laguntza hori ematen dituztenak. Horrez gain, epifania eta kabalgata urtarrilaren 5ean antzezteko eta aurrera eramateko, herriko 100 pertsona (gutxi gorabehera) laguntza ematen dute. Pertsona horiek guztiak gabe hau ez litzateke posible izango.

Zenbat denbora behar da kabalgata prestatzeko? Lehenengo urteetan egun eta ordu asko sartzen genituen, baina orain gero eta denbora gutxiago suposatzen zaigu du martxan jartzeak.
Aldaketaren bat sartzen dugunean, orduan denbora gehiago inbertitu behar dugu, baina, lehen esan dugun bezala, oinarria jarrita dago eta, horrela, askoz errazagoa da dena aurrera eramatea. Zerotik lan egitea zoramena litzateke.

Kabalgata antolatzean zer da lan gehien ematen duena eta zergatik? Egun horretako muntaia. Herriko enparantzan garai hartako herri bat antolatzen dugu: salmenta-postuak, ostatua, erromatarren jauregia eta Belengo jaiotza. Oso polita geratzen da eta lan handia ematen du.

Nondik eskuratzen duzue finantziazioa zuen jarduera burutu ahal izateko? Guk daukagun dirua Udalaren dirulaguntza da, hala da. Urtero kantitate finko bat ematen digu eta, horrekin, konpontzen gara.

Eskualdean Basaurin, Arrigorriagan eta Ugaon egiten dituzte kabalgatak. Tradizio hau galtzen ari dela uste duzue? Momentuz bizirik mantentzen da, baina tradizio asko, galtzen ari dira edota aldatzen ari dira. Auskalo.

Arrigorriagako kabalgatak gero eta ospe handiagoa izaten ari du azken urteetan, eta Ugaoko jende asko bertara joaten da. Nola ikusten duzue hau? Arazorik gabe. Guk eskaintza bat egiten dugu eta gero, bakoitzak dituen aukeren artean erabakitzen du. Ugaon, gero eta jende gehiago gelditzen da.

Zuen ustez, zer dela eta da hain berezia Arrigorriagako kabalgata eta bide batez, zein da Ugaoko epifania eta kabalgataren indargune nagusia? Arrigorriagako kabalgatak gurea baino urte gehiago ditu eta, ondorioz, ezagunagoa da. Hemen, Ugaon orain dela urte asko kabalgata antolatzen zen, baina gero desagertu zen guk berreskuratu arte. Bitartean, inguruko kabalgata famatuena Arrigorriagakoa zen, baina gero eta jende gehiago gelditzen da gure herrian.

Ugaoko kabalgatari dagokionez, zuen ustez zein da jardueraren target edo ikusle nagusia? Adin guztietako pertsonak ikusten dira enparantzan, baina ikuskizun hau, batez ere, haurrentzat da, beraz, esango nuke familiak direla publiko nagusia: haurrak euren gurasoekin.

Zein da kabalgatako momendu hunkigarri edo bereziena? Dudarik gabe, Erregeak enparantzan sartzen direnean eta umeak agurtzen dituztenean. Horrez gain, badago beste momentu berezi bat: erromatarrek bi urte baino gutxiko umeak hiltzen dituztenean. Enparantza gorriz tindatzen da eta sortzen den giroa berezia da. Hala ere, une guztiak dira bereziak eta politak, bakoitza bere berezitasunekin.

Gabonetako jardueren artean, zuen ustez posible al da kabalgata bezalako jarduera batek herri nortasuna indartzea? Berak bere kabuz ez. Kabalgata Gabonetako tradizioetako beste jarduera bat da, eta herrian pisu handia duen Olentzeroren ospakizunarekin batera, bi ikuskizunen inguruko magia berezia eskaintzen die haurrei.

Etorkizunari begira, nolako erronkak ikusten dizkiozue Ugaoko kabalgatari? Momentuz jarraipena, eta gero gerokoak.

Gero gerokoak? Oinordekotza dago belaunaldi gazteen artean? Egia esan ez dago errelebo handirik. Bai sartu dira bi gazte elkartean, baina, momentuz, ez da nahikorik.

Nolako mezua helaraziko zeniekete herritarrei aurtengo eta hurrengo urteetako kabalgatetan parte hartzeko? Bakarrik esango nieke etor daitezela ikustera eta, mantendu nahi badute, parte har dezatela.

Mirabatxo klubak zenbait jarduera antolatu ditu urtarrilean zehar.

GEURIAk jakin ahal izan duenez,  Olentzero eta Mari Domingi Mirabatxo klubaz oroitu dira Gabonetako oporretan eta Mirabatxon jarduera berezi bat antolatu dute urtarrilaren 10ean.

Bestalde, Ugaoko klubak jolasak prestatu dituz gaztetxoentzat urtarrilaren 24an. Mirabatxo klubean ekintzak, jolasak, tailerrak… antolatzen dituzte.

2015 eta 2017 urteen artean jaiotako umeentzako jarduerak dira. Informazio gehiago Jane jauregian topatu daiteke edo 946 480 704 telefono zenbakira deituz. Beste aukera bat ugao-miraballes-museo@ortzadar.es helbide elektronikora e-posta idaztea da.

Ugaoko Udalak bere 2030 Agenda onartu berri du, datozen urteetan udalerriak jarraitu beharreko estrategia definitzen duen dokumentua. Planak 33 ekintza zehatz jasotzen ditu, herria Garapen Jasangarrirako Helburuekin (GJH) lerrokatzeko eta 2050erako herri irisgarria lortzeko helburuarekin.

Zer dira GJHak eta 2030 Agenda?

Garapen Jasangarrirako Helburuak (GJH) Nazio Batuen Erakundeak bultzatutako 17 helburu global dira. Horien xedea mundu mailako erronkei aurre egitea da: pobrezia desagerraraztea, ingurumena babestea eta berdintasuna bermatzea. 2030 Agendak helburu handi horiek tokiko errealitatera eramaten ditu.

Planaren ekintza esanguratsuenak

Udalak hiru lan-ildo nagusitan laburbildu ditu bere 33 ekintzak:

• Gizarte-kohesioa eta zaintza: Gizarte-zerbitzuak indartuko dituzte, kolektibo zaurgarrienak babestuz eta zaintza-sistema hobetuz.

• Jasangarritasuna: Isurketak murriztea, energia-eraginkortasuna sustatzea eta uraren zein hondakinen kudeaketa hobetzea da helburua.

• Euskara eta berdintasuna: Kultura-aniztasuna eta euskararen erabilera bultzatuko dituzte, berdintasun-politikak eta herritarren parte-hartzea indartzearekin batera.

Ugaok, Bizkaiko Foru Aldundiaren laguntzarekin, lan ikastaro berria jarriko du martxan 2026ko otsailean. LanBerri 2025 programaren baitan, instalazio elektrikoak, energia berriztagarriak eta domotika izango dira ikastaroaren ardatz nagusiak, herrian enplegua eta formazioa sustatzeko asmoz.

Ikastaroa doakoa da eta 14 plaza eskainiko dituzte. Honako baldintzak betetzen dituzten herritarrei zuzenduta dago: 45 urtetik gorako langabeak izatea, Ugao-Miraballesen erroldatuta egotea, eta Lanbiden erregistratuta egotea.

Udalak zehaztu duenez, lehentasuna izango dute langabezian denbora luzea daramatenek, desgaitasuna dutenek edota bazterketa-arriskuan dauden pertsonek.

300 orduko prestakuntza Jane Jauregian

Formakuntza otsailean hasiko da, eta Jane Jauregian (Kultur Etxean) eskainiko da goizeko ordutegian. Guztira 300 ordu izango dira, eta hainbat eduki landuko dituzte: Oinarrizko sistema elektrikoen diseinua eta instalazioa, energia berriztagarrien aplikazio praktikoak, teknikak eta prozesuak instalazio domotiko eta automatikoetan, lana aktibatzeko saioak eta oinarrizko gaitasun digitalak.

Interesa daukatenek 2026ko urtarrilaren 31ra arte dute izena emateko aukera Gazteinfo zerbitzuaren bulegoan (Udiarraga kalea, 39). Telefono bidez ere egin daiteke kontsulta, 94 632 20 14 edo 747 402 383 zenbakietara deituta. Gazteinfoko ordutegia honako hau da: Astelehen eta asteazkenetan: 17:00etatik 20:00etara. Astearte, ostegun eta ostiraletan: 12:00etatik 15:00etara.