☉ Galdakao
Sinadura bilketa hasi dute Galdakaon, “herrian gaztetxe baten beharra badagoela” adierazteko
Gaztetxea Pizten taldea sortu berri dute Galdakaon. Herrian “gaztetxearen beharra badagoela” adierazi nahi diote Udalari, eta horretarako sinadura bilketa abiarazi dute.
Gaztetxea Pizten taldea sortu berri dute Galdakaon. Herrian “gaztetxearen beharra badagoela” adierazi nahi diote Udalari, eta horretarako sinadura bilketa abiarazi dute: “Galdakaoko Udalaren jabetzako den eraikin bat gazteei lagatzea eta bertan egingo diren proiektuen inguruan herriko gazteek eztabaidatzeko prozesu parte hartzaile bat martxan jartzeko eskatzen diogu Udalari”, diote. Sinadura bilketa gaurtik, maiatzaren 21etik, ekainaren 13ra bitartean gauzatuko dute. Prozesua bereziki herriko gazteei dago zuzenduta: “15 urtetik gorako edozein galdakoztarrek parte hartu ahalko du modu fisikoan zein Interneten bidez”, diote.
“Galdakaoko hamarna gazte elkartu gara egun herrian ikusten dugun gabezia bat mahai gaineratu eta horri irtenbidea emateko Gaztetxea Pizten taldea sortu dugu. Ez da gauza berria herri honen eta gaztetxearen auziaren arteko lotura. Denboran atzera egin eta duela urte batzuetako testuingurua erreparatuz gero, hainbat izan dira egindako saiakerak”, diote. Hain zuzen ere, Ortuondo Gaztetxea izan zuen Galdakaok 2012-2017 bitartean: “Gazteriari herria ulertzeko beste ikuskera bat bazegoela erakustea ahalbidetu zuen honek, baina udal gobernuaren adreilu eta porlanek honekin bukatu eta ordura arte eraikitako horrekin bukatu zuten”, diote. Ondoren, 2019. urtean, beste espazio berri bat okupatu zuten Galdakaoko Gazte Asanbladako kideek Muguru plazan. “Ez zen honekin aurrera egiterik lortu, baina herriko gazteek gaztetxeren grina bazutela argi gelditu zen orduan”, diote.
Galdakaoko Udalak Gazteria arloko ildo estrategikoak zehazteko diagnostiko parte-hartzailea jarri zuen martxan iazko abenduan, eta besteak beste, bilerak antolatu zituzten gazteekin: “Herriko hainbat gazte kuadrillak argi adierazi zuten egun haietan zehar beharrezkoa ikusten dutela guretzako espazio bat, gurea, herriko gazteena, nahi dugun eran eta nahi dugun forma emanez honi”, diote. Gazte diagnosiaren inguruko bileretan herrian forma aktiboan parte hartzen duten 20 bat kuadrilla bildu ziren, “eta gehiengo handi batek adierazi zuen gaztetxearen beharra”, diote.
Antolatzearen beharra
“Argi erakutsi nahi dugu gazteok, antolakuntzaren eta autogestioaren bitartez, badugula espazio bat gurea egin eta herriko gazteentzat bideraturik egongo dena kudeatzeko ahalmenik”, diote Gaztetxea Pizten taldeko kideek. “Izan gazte mugimenduko kide, ikaskideekin bilera bat egin nahi duen ikasle, edota erakusketa zein aurkezpen bat egin nahi duen elkarte, finean ez dugu non antolatu eta elkartzeko tokirik, eta egindako lanketa honen baitan argi ikusi dugu badagoela honetarako beharra”, diote, eta gaineratu dute “premiazkoa” ikusten dutela “gazte ikuspuntutik bizi dugun egoeraren eta datorkigun etorkizun beltzaren aurrean antolatzearen beharra”.
Era berean, gazteek aisialdirako duten eskaintza urriaz ere aritu dira Gaztetxea Pizten taldeko kideak: “Eskaintza bakarra kontsumora baino ez dago bideraturik. Pandemiak agerian utzi du tabernetatik harago gazteok ez dugula non egoterik. Gehitu honi herriko kultur eskaintza ez dela gazteon testuingurura hurbiltzen. Hainbat dira herrian bertan aurki daitezkeen sortzaile, artista zein bestelako, sortzeko eta egindako erakusteko baliabiderik ez dutenak”, diote.
☉ Galdakao
Kepa Iribar Elizegiren ‘Erleen azken ziztada’ liburua aztertuko du Leiduk martxoko hitzorduan
Galdakaoko Leidu Irakurketa Taldeak martxoko hitzordua zehaztu du: hilaren 9an, astelehenez, batuko dira Peña Santa Cruz elkartearen lokalean 18:30ean.
Kepa Iribar Elizegi idazlearen ‘Erleen azken ziztada’ liburua aztertu eta komentatuko dute.
☉ Galdakao
Korrikako abestien karaokea antolatu dute biharko Barikupasan Galdakaon
Otsailaren 27an, ostiralez, izango da tailerra Urreta eskolako arkupean. Parte hartu nahi duten familiek izena eman behar dute, doan
Martxoaren 27an igaroko da 24. Korrika Hego Uribe eskuldetik [hemen eskualdeko ibilbidea eta ordutegia], baina lekukoa iritsi aurretik, Galdakaon ekitaldi berezia antolatu dute Barikupasa dinamikaren barruan.
Zehazki, Korrikaren historian zehar izan diren abestien karaokea prestatu dute. Otsailaren 27an izango da Urreta ikastetxeko arkupean 17:15etik 18:15era.
“1980. urteko lehen edizioko abestitik hasi eta Akelarre, Egan, Oskorri, Tapia eta Leturia, Kepa Junkera, Joxe Ripiau, Fermin Muguruza, Mikel Laboa eta Ruper Ordorika, Afrika, Niko Etxart, Betagarri, Gose, Esne Beltza eta Anariren abestiak kantatuko ditugu, besteak beste. Zetak talde nafarraren Xiberutik Mendebaldera kantua ere abestuko dugu, azken edizioa iragartzeko kanta”, diote antolatzaileek. Sandra Fernandez kantariak aurkeztuko du saioa.
Aurreko saioak bezala, Barikupasa ekimena doakoa da, baina familiek aldez aurretik izena eman behar dute online galdetegiaren bidez.
Otsaileko Barikupasa Bagabiz elkarteak, Argizai Eskaut Taldeak, Ludotekak, AEKk eta Galdakaoko Udalak antolatu dute elkarlanean.
☉ Galdakao
Galdakaoko gazteek ingurumenaren eta animalien aldeko ‘Youth4change-Ekozaleak’ sarea osatu dute
Proiektuaren lehen urteko emaitzak aurkeztuko dituzte gaur, otsailak 26, Torrezabal Kultur Etxean egingo den ekitaldian
Youth4change-Ekozaleak proiektua martxan jarri zuen iaz Galdakaon Argizai Proiektuakek, Galdakaoko Udalaren eta Europar Batasunaren laguntzarekin.
Animalien ongizatean, ingurumenaren zaintzan eta 3R-ak —murriztu, berrerabili eta birziklatu— sustapenean oinarritutako gazteen partaidetza-proiektua da.
Ildo horretan, hezkuntza-jardueren, kontzientziazio-kanpainen eta proiektu iraunkorren bidez, gazteak, ingurunearekin duten harremanean ohitura ekologikoak eta praktika etikoak hartzearen garrantziaz sentsibilizatzea bilatzen du.
“Horrela, planetaren babesarekin eta animalien eskubideekin konprometitutako gazteen sare bat eratzea espero da, tokiko mailan zein maila globalean eragin positiboa sortuz”, diote.
Iaz jarri zuten martxan proiektua eta emaitzak “pozteko eta ospatzeko modukoak” direla diote antolatzaileek. Proiektuan 15 eta 30 urte bitarteko 60 gazte inguruk hartu dute parte.
Besteak beste, zuhaitz landaketak egin zituzten Galdakaoko gune desberdinetan, hondartzak garbitzeko irteerak antolatu zituzten, eta animalien ongizateari buruzko solasaldiak eta kontzientziazio kanpainak burutu zituzten.
Aurkezpen ofiziala gaur
Gaur arratsaldean, 18:00etan, prozesu honen guztiaren itxiera eta ospakizun ekitaldia egingo dute Torrezabal Kultur Etxean.
Ekitaldi irekia izango da, eta esteka honetan eman dezakete izena interesa dutenek. Proiektua azaltzeaz gain, 2025ean egindako ekintzen aurkezpena egingo dute.
“Gainera, parte hartzaileei ‘Youthpass agiria’ banatuko diegu eta egindako lana txalotuko dugu”, diote.
Bukatzeko, etorkizun laburrean zer nolako ekintzak planifikatu ahal dituzten hausnarketa kolektiboa egingo dute. “Eta hori guztia mokadutxo goxo batekin lagunduta, noski!”, diote.
Gaztetxearen aldeko asteburua antolatu du Izetu Gazte Asanbladak Galdakaon. Otsailaren 27an eta 28an prestatu dute egitaraua: mahai-ingurua, tailerrak, indaba-jana, bertso-saioa, trikipoteoa eta kontzertuak izango dira.
“Gaztetxearen aldeko aldarriak mahaigaineratuko doguz herrien. Denbora asko daroagu gaztetxe barik herrien eta ordue da gazteontzako espazio bat aldarrikatzeko”, diote Izetu Gazte Asanbladatik.
GEURIA Ander Uribarri Orbe eta Ainhize Alvarez Villamayor Izetuko kideekin elkartu da eta asteburuan prestatu dutena azaldu digute.
Atzera begira, Galdakaok Ortuondo Gaztetxea izan zuen 2012-2017 bitartean, eta 2019an, beste espazio berri bat okupatu zuten Galdakaoko Gazte Asanbladako kideek Muguru plazan. Azken horrekin aurrera egiterik ez zuten lortu, eta horregatik herriko hainbat gaztek sinadura bilketa jarri zuten martxan 2021ean.
Egitaraua | Gaztetxearen aldeko asteburua – Izetu
Otsailak 27, ostirala
19:00 Mahai-ingurua Zabalganeko gradetan: “Gaztxeak zertarako?”
Otsailak 28, larunbata
12:00 Serigrafia tailerra Santi Brouard plazan
15:00 Indabada Santi Brouard plazan
16:00 Bertsolariak: Txaber Altube eta Janire Arrizabalaga
18:00 Trikipoteoa: Merhezi
21:30 Kontzertuak Santi Brouard plazan: Mikosis + Ainke + DJ Izetu
☉ Galdakao
Death Kafe saio berria antolatuko dute otsailaren 26an Galdakaon, heriotzaz modu naturalean hitz egiteko
Hileko azken ostegunetan antolatuko dituzte Galdakaon heriotzaren inguruan modu naturalean hausnartu eta kezkak partekatzeko doako saioak
Heriotzaz modu naturalean hitz egiteko espazio seguruak eskainiko ditu Galdakaoko Udalak.
Death Kafe izenez ezagunak, Zainduz programako lantaldeak, herriko osasun zentroko profesionalekin elkarlanean, heriotzaren inguruan modu naturalean hausnartu eta kezkak partekatzeko hitzorduak antolatuko dituzte hilabete bakoitzeko azken ostegunetan.
Hurrengo hitzordua otsailaren 26an izango da 17:30ean Medina’s tabernan (Bizkai kalea, 38).
Parte hartzea doakoa da, baina beharrezkoa da aurrez izena ematea 664 323 853 telefono zenbakira deituta edo idatzita.
Topaketak baina ez terapiak
“Death Cafeak beldurrei, zalantzei eta bizipen pertsonalei hitzak jartzea, eta bizitzaren parte den errealitate bat hobeto ulertzea proposatzen du”, diote antolatzaileek, eta gaineratu dute: “Aurreko saioetan parte hartu dutenek heriotzaz hitz egiteak, paradoxikoki, oraina biziago baloratzen laguntzen duela nabarmendu dute”.
Death Kafeak topaketak direla azpimarratu dute antolatzaileek: “Ez dira terapia saioak, ezta dolurako laguntza taldeak ere. Aitzitik, heriotzaren inguruan modu naturalean hausnartu eta kezkak partekatzeko espazioak dira, kafe baten bueltan eta elkarrekiko errespetuan eta konfidentzialtasunean oinarrituta”.
Ekimen hau Galdakao Zeugaz proiektu komunitarioaren baitan kokatzen da; ekimena Galdakaoko Udalak sustatzen du, Agirre Lehendakaria Centerekin, hainbat elkarte eta norbanaka parte hartzen ari diren herritarrekin elkarlanean, auzokideen artean zaintza, entzutea eta laguntza sareak indartzeko helburuarekin.
Abusun aparkalekuak mugatzeko ordenantza onartu du Arrigorriagako Udalak
Euskal Pilota Egokituaren lehen txapelak Basaurin banatuko dituzte martxoaren 1ean
Kepa Iribar Elizegiren ‘Erleen azken ziztada’ liburua aztertuko du Leiduk martxoko hitzorduan
Argazkiak | Euriak ez ditu Arrigorriagako herri-inauteriak geldiarazi
Argazkiak | Lau urtaroak, Oilategi Deluxe eta Txorimaloak izan dira mozorrorik onenak Basaurin
