Otsailaren 26tik martxoaren 16ra luzatuko da Errigora auzolan-ariketa erraldoi honetan Agerreko —alegia, Nafarroa erdi eta hegoaldeko— produktuen eskaintza. Horien balioaren % 25 zonaldeko euskalgintzari bideratuko zaio.

Euskara hauspotzen duten eragileentzako ekarpena indarrak batuz egiten da ‘Eskutik eskura’ kanpainari esker, Nafarroa hegoalde eta erdialdeko euskalgintzari behar duen haize bolada bidaltzeko.

Zozketa Instagram sare sozialaren bidez egingo da eta honakoak dira zozketan parte hartzeko pausoak:

😍 @geuria.eus jarraitu
❤️ Like eman
💬 Zein lagunekin egingo zenuke otordutxo eder bat? 😉 Etiketatu.
🔴 Gorria edo 💚 Berdea? Elkarbanatu zure story-etan nahiago duzun saskiaren argazkia eta @geuria.eus aipatu. Horrrela jakingo dugu zein saski duzun gustukoen.

Zozketan parte hartzeko epea zabalik dago martxoaren 4ra arte (12:00). Datozen egunetan egingo dugu zozketa eta irabazleak postean bertan etiketatuko ditugu. 48 orduren buruan irabazleren bat ez bada GEURIArekin harremanetan jarri, txandapasa egingo dugu eta zerrendako hurrengoari paso emango diogu.

Irabazleetako bat bazara, nola jarri GEURIArekin harremanetan? Instagram bidez mezu bat bidalita, info@geuria.eus helbide elektronikora idatzita edo 944 406 692 telefono zenbakira deituta.

Saria jaso: irabazleak saria jasotzeko 15 egun ditu. Saria GEURIAren egoitzan (Basozelai kalea 11, -3. Basauri, Bizkaia) jasoko du.

Errigorak produktuak salgai ditu errigora.eus atari digitalaren bidez. Eskaera egin eta banaketa hurrengo asteetan izango da eta, salbuespenak salbuespen, produktu guztiak aldi berean jasoko dituzte erosleek. Eskaera egiterakoan aukeratu behar duzu produktuak jasotzeko puntua eta bertan zehaztutako egun eta ordutegian pasa beharko duzu jasotzera. Hego Uribe eskualdeko hainbat puntutan ere eros daitezke kutxak. (+) ikurra duten guneetan, internet bidez erosi eta bertan jaso daiteke erosketa.

ARRIGORRIAGA
Arrigorriagako AEK

BASAURI
+Bolintxu AEK

GALDAKAO
+Eguzkibegi Ikastola

Metroaren 5. Lineako obrek gainkostu berri bat izango dute. Izan ere, Eusko Jaurlaritzak bi milioi euro gehiago bideratuko ditu Galdakao eta Galdakao-Usansolo ospitalaren arteko tartea egiteko (hirugarren tartea).

Horrela, 69,8 milioi euroko inbertsioa aurreikusi dute. Hirugarren tartea 2023ko ekainean esleitu zuten, 58,7 milioiko hasierako zenbatekoarekin, eta azken urteetan 9,3 milioiko igoera izan du.

Oraingoan aurrekontua handitzea bi arrazoiengatik izan da. Alde batetik, arrazoi teknikoengatik, eta bestetik, obretan toxiko bat agertzeagatik.

Arrazoi teknikoei dagokienez, Ibaizabal ibaiaren azpitik igarotzeko zailtasunekin du zerikusia. Hainbat analisi egin ondoren, mikropilotez eta hormigoiz indartu behar dute puntu hori, ur-ibilguaren hurbiltasunagatik. Eta, diseinu berriak 1,3 milioi euro beharko ditu.

Gainera, tunelaren indusketan silize kristalinoko hauts-maila altuak aurkitu dituzte teknikoek, “egungo araudiak ezartzen dituen gehienekoak” gainditzen dituztenak. Material hori oso ohikoa da lurpean egiten diren obretan, baina osasunerako kaltegarria da: duela gutxi, Osasunaren Mundu Erakundeak (OME) minbizia eragin dezaketen substantzien taldean gehitu du.

“Ustekabe horrek eragin du langileak babesteko neurri gehiago hartu behar izana, baita aireztapena areagotzea ere”, diote Jaurlaritzako ordezkariek. Horrek guztiak 231.000 euroko inbertsio gehigarria ekarriko du.

Kontratu hau aldatzeak ez du esan nahi lanak egiteko epea luzatuko dutenik. Hori esanda, metroaren adar berria ez litzateke prest egongo 2029 edo 2030 baino lehen, Eusko Jaurlaritzako arduradunen arabera.

Hasiera batean 2027an eta 2028an amaitzea aurreikusi zuten bai Bizkaiko Foru Aldundiak zein Eusko Jaurlaritzak. Erdibana, bi erakundeek 380 milioi euro bideratuko dituzte 5. Linea eraikitzeko.

Bizkaiko Foru Aldundiak Kirolur erronka jarri du abian, lurraldeko udalerrien arteko kirol-liga.

Erronkaren helburua da udalerri bakoitzak talde birtual bat osatzea Wellk mugikorrentzako aplikazioan (Aritz Guinea galdakoztarra app-aren garapeneko arduraduna da) eta udalerri bakoitzean izena emango duten erabiltzaileen artean ahalik eta kilometro gehien egitea oinez, korrika edo bizikletan.

Dagoeneko Bizkaiko 39 udalerrik eman dute izena kirol-erronkan, tartean, Hego Uribeko lauk: Arrigorriagak, Basaurik, Etxebarrik eta Usansolok. Hala ere, oraindik Udalerri gehiagok izena emateko epea zabalik dagoela gogorarazi du Leixuri Agirrezabala kirol diputatuak.

Erronka urtean zehar hiru alditan burutuko da: lehena, apirilaren 15etik maiatzaren 17ra; bigarrena, ekainaren 15etik uztailaren 15era; eta hirugarrena, irailaren 23tik urriaren 23ra.

Udaberriko, udako eta udazkeneko aldi horietan erregistratutako kilometro bakoitza puntu bihurtuko da, egindako jarduera motaren araberako balorazio doituarekin.

Udalerriak inskribatu ondoren parte-hartzaileak izango dira inskribatu eta Wellk app-a deskargatu beharko dutenak, haien kilometro aktiboak zenbatu eta udalerrirako puntuak batu ahal izateko.

Datozen egunetan Bizkaiko Foru Aldundiko Kirol Zerbitzua udalerri bakoitzarekin harremanetan jarriko da banakako bilera bat hitzartzeko. Bilera horretan zehatz-mehatz azalduko dute ekimenaren funtzionamendua eta sarien sistema, zalantzak argituko dituzte eta era egokian hedatzeko beharrezkoak diren komunikazio-materialak emango dituzte.

Ertzaintzak delitugileen jatorria jakinarazteko erabakiak polemika piztu du gizartean.

Iazko urrian erabaki zuen Eusko Jaurlaritzako Segurtasun Sailak atxilotuen jatorriaren berri ematea.

Irizpide hori, ordea, ez dute udal guztiek beteko: batzuek informazio hori publikatuko dute eta beste batzuek ez.

Esate baterako, Hego Uribe eskualdean, Basauriko Udalak esan du jatorria emango duela eta Galdakaok eta Arrigorriagak, aldiz, kontrako erabakia hartu dute: ez publikatzea.

Etxebarri eta Ugaoko udalei dagokienez, adierazi dute Ertzaintzaren esku utziko dutela atxilotuen jatorria publikatzea edo ez.

Ez Etxebarrin ez Ugaon ez dago ziegarik eta diligentziak Ertzaintzak egiten ditu bi kasuetan.

“Etxebarrin ez dugu inoiz horren berririk eman. Batez ere guk ez dugulako jendea atxilotzen. Hori egin behar denean Ertzaintza deitu eta eurek egiten dute. Beraz, gure datuak Ertzaintzaren datuen barruan egongo liratezke”, adierazi dio Iker Lopez alkateak GEURIAri.

Ugaon “atxiloketa gutxi” daudela eta zuzenean Ertzaintzara deitzen dutela zehaztu dute. “Orain arte ez da Udaltzaingotik daturik eman. Eta printzipioz ez da ezer aldatuko, egoera berdin mantenduko da Udaltzaingoari dagokionez behintzat. Ertzaintzaren esku uzten dira datuak eta hauek erabakiko dute argitaratu ala ez”, argitu dute Ugaoko udal ordezkariek.

Haizearen ondorioz, zuhaitz bat trenbidera erori da Ugao eta Laudio artean gaur arratsaldean.

Ondorioz, gutxienez 30 minutuko atzerapenak eragin ditu tren zerbitzuan: bai distantzia luzeko joan-etorrietan eta baita Hego Uribe eskualdetik igaro den C3 linean.