Sareak

☉ Galdakao

Aritz Guinea Paños: «Ekintzailetzan maila handia dago Euskal Herrian, bai berrikuntzak hemen sortzeko eta bai talentua erakartzeko»

Ginea ikasketaz ingeniaria den arren, kirolarekin lotura estua izan du beti, eta bi arloen baturatik dator sortu duten Wellk teknologia

|

Jarduera fisikoa eta bizimodu osasuntsua sustatzeko teknologia a Wellk / Geuria

Gaztea, ekintzailea eta WELLK enpresaren sortzaileetariko bat da Aritz Guinea galdakoztarra (1998). Helburu argi batekin ari dira lanean bai bera eta bai bere ikaskide izandakoak ere: kirola, ariketa fisikoa eta teknologia berriak uztartuko dituen tresna herritarren eta erakundeen esku jartzea, gizartean oro har, eta edadetuengan bereziki, bizimodu osasuntsua sustatzeko asmoz. Pasioz bizi dute egiten ari direna, eta horren erakusgarri da euren enpresak izan duen babes eta hazkunde azkarra. Ginea ikasketaz ingeniaria den arren, kirolarekin lotura estua izan du beti, eta bi arloen baturatik dator Wellk. Hasierak ez ziren errazak izan, pandemia betean hasi baitziren ideiari bueltak ematen, non eta Vienan, zer eta Erasmus betean. Itxialdiak, baina, on egin zien, denbora eta patxada izan baitzituzten orduan amets besterik ez zenari eta gaur egun errealitatea sendoa den proiektuari mila eta bat buelta emateko. 

Zer da Wellk? Nondik sortu zen ideia? Nortzuk osatzen duzue taldea?
Wellk-ek jaiotzatik izan duen misioa honakoa izan da: jarduera fisikoa eta bizimodu osasuntsua sustatzeko teknologia berritzailea sortzea. Honela, 2020ko ideia hark bere garapena izan du, gaur egungo produktu bilakatu arte. Hiru produktu bereizten ditugu: Wellk App-a: Mugikorretarako doako aplikazioa da, jarduera fisikoa modu sozial eta dibertigarrian lantzea ahalbidetzen duena. Kirola egiteko planak sortu eta lagunak bilatzea, erronka eta ligetan parte hartzea edo egunerokotasunean jardueren kontrola mantentzea.

WellkSpace: Lurraldeak ulertzeko modu berritzailea ahalbidetzen du. Mugikortasunaren eta espazioen erabileraren inguruko galdera eta analisi desberdinei erantzuna ematea errazten du: Zeintzuk dira seguruak ez diren kaleak nire udalerrian? Zergatik 18:00tatik aurrera ez da kirolik egiten kale batzuetan? Zeintzuk dira gehien erabiltzen diren bideak? Egokiak dira? Etab.

MediFit: Jarduera fisikoaren preskripzio pertsonalizatua ahalbidetzen du. Pertsona bakoitzaren behar eta patologietara egokituz, jarduera plan pertsonalizatu egokiena diseinatzea ahalbidetzen du, profesionalen jarraipenarekin.

Wellk-ek denboran zehar eboluzio bat jasan du, baina hasieran ondorengo hausnarketatik sortu zen: “Zergatik ordaintzen dugu gimnasioagatik gero ez bagoaz”. Hortik, merkatu mota desberdinetan ahaleginak eginez, genituen ideietatik gaur egun denera iristea lortu dugu.

Wellk, hiru bazkidek osatzen dugu: Euken Ertzilak, Joseba Martinek eta nik neuk (Aritz Ginea). Unibertsitatean elkar ezagutu genuen, hirurak ingeniariak baina gradu desberdinetakoak. Hirurak kirolariak baita ere, bakoitza bere kirolean.  Pixkanaka hasi ginen eta orain 5 gara taldean. Lehenengo bilera “ofiziala” Vienan egin genuen COVID-a hasi baino asteburu bat lehenago, Erasmusean geunden Europan zehar eta bertan biltzea erabaki genuen. Etxean egoteak genituen ideia guztiak lantzea ahalbidetu zigun.

Zein helburu dituzue?
Helburu nagusia gure teknologiaren bitartez gizartean inpaktu positiboa lortzea da. Horretarako erreferentziazkoak diren bezero eta kolaboratzaileekin lan egiteko aukera dugu, egunero gure tresnetatik igarotzen diren pertsonen kopurua handituz.

Honela, inpaktua handiagoa izateko, datozen hilabeteetan gure taldearen hazkuntza dugu helburu, bai bezero eta erabiltzaileetan hazteko eta bai merkatu berrietan hazi ahal izateko ere. Horretarako datozen hilabeteetan finantzazio erronda bat zabaltzeko asmoa dugu.

Zein da ariketa fisikoaren garrantzia egungo gizartean? Eta nagusiekin? Eta emakumeekin?
Jarduera fisikoa pilula batean sartu ahal izango bagenu, medikamenturik hoberena izango litzateke, gehien preskribatzen dena. 

Ez osasunean zein patologia eta gaixotasunen prebentzioan duen eraginagatik  bakarrik, baita duen inpaktu transbertsalagatik ere, euskararen sustapenerako, integrazio eta sozializaziorako, hazkuntza bezala, ikuspegi desberdinetatik ikusi daiteke, baina beti modu positiboan. Datu esanguratsu bat aipatzearren, jarduera fisikoan inbertitutako euro bakoitzak osasungintzako gastuetan 15€ aurreztuko lituzke.

Emakumeei bideratutako hainbat proiektu eta ekintzen parte gara. Gipuzkoako Foru Aldundiaren Emakumeok Mugimenduan programan, mugikorrerako gure aplikazioa erabiltzen ari dira emakumeen artean jarduera fisikoa sustatzeko, adibidez. Hala ere,  proiektu oso interesgarri bat lantzen ari gara gure WellkSpace teknologiaren bitartez identifikatu dugun eta gizartean nabaria den arazo bati aurre egiteko ahalegina eginez: segurtasuna kaleetan. 

Presentzia eta datuak ditugun udalerri eta hirietan bi gauza aipagarri ikusi ditugu: Emakumezkoek ez dituzte kale batzuk erabiltzen aire zabaleko jarduera fisikoa egiterakoan. 

Emakumeen kasuan, zentrotik irteten diren bide/bidegorrietan jarduera fisikoa asko jaisten da 18:30tatik aurrera. Ondo argiztatuak daude? Seguruak dira? Egokiak dira? Zer egin dezakegu hori konpontzeko?

“Jarduera fisikoa pilula batean sartzerik balego, medikuek gehien errezetatuko luketen sendagaia litzateke, ezbairik gabe

Non ari zarete orain lanean? Zein da zuen lan egiteko modua? Wellk eskuen artean hartuko banu zer aurkituko nuke?
Oraintxe administrazioarekin zein enpresa pribatuekin ari gara lanean. Gipuzkoako Foru Aldundia, Bilboko Udala, Eibarko Udala, Durangaldeko Mankomunitatea, Getxo Kirolak eta enpresa pribatuetan LKSrekin, esate baterako.

Lan egiteko bi modu ditugu: Alde batetik, gure teknologiaren lizentzien erosketaren bitartez. Produktu guztiak pertsonalizagarriak dira, bezeroaren beharretara. Bestetik, udalerri eta enpresa aktibo eta osasuntsuen programak sortuz eta dinamizatuz. Gure teknologiaz baliatuz, bezeroaren beharretara egokitzen diren programak sortu eta dinamizatzen ditugu (erronkak, planak, jarduera fisikoaren preskripzioa, prebentzioa…) Wellk aplikazioa eskuartean hartzen duen pertsona batek euskara eta gaztelaniaz dagoen app-a ezagutuko du, eta bertan sortzen diren planetara batu edo hauek sortzeko aukera izango du, horrela jarduera fisikorako jende berria ezagutuz.

Erronka eta liga desberdinak aldiro antolatzen dira sari desberdinak lortzeko aukera izanik. Gure inguruan ditugun kirola egiteko hainbat ibilbide, espazio eta aukera jarduera fisikoaren erregistroa hobekuntza pertsonalak aztertzeko. Strava, Fitbit, Apple Health eta Google Fit-ekin sinkronizatu daiteke. 

Wellk aplikazioa, mugikorrean

Zeintzuk dira etorkizunera begira dituzuen erronkak?
Erronka nagusiak bi dira: erabiltzaile eta bezeroen hazkuntza eta taldearen hazkuntza eta sendotzea. Horretarako hurrengo hilabeteetan finantzazio erronda bati ekingo diogu.

Zelan ikusten duzue ekintzailetzaren egoera gaur egun?
Teknologiaren izugarrizko bilakaera azkarrak hainbat eta hainbat berrikuntza ekarri ditu oso epe laburrean eta hori, zati handi batean, ekintzailetzatik abiatutako proiektuek ekarri dute.

Honela, Euskal Herrira ekarrita, sendoa den eta hazkuntza prozesuan dagoen ekosistema ikusten dut. Enpresa berri asko, berrikuntza handiekin, eta garrantzitsuena, hemen, Euskal Herrian, bai berrikuntza hemen sortuz eta bai talentua hona erakarriz. Horretan eragin handia izaten ari dira administrazio publikoak, eskertzekoak dira urtero martxan jartzen diren proiektuak bultzatzeko, sorkuntzarako eta ikerketarako dauden programa ezberdinak. 

Erabiltzaile moduan, zuen aplikazioa zabalduz gero, zer aurkituko dut?
WELLK aplikaziora sartzerakoan ondorengo funtzionalitateak aurkituko dituzu:

Kirol Planak edo “quedada”-k sortu edo beste erabiltzaileek sortzen dituztenetara batzeko aukera. Adibidez: “Arratsaldean paseoa Pagasarrira” planera batu naiteke, bertaratuko diren pertsonen profila ikusi eta hauekin hitz egiteko aukera izanik.

Kirol erronkak: Modu kolektiboan, taldeka edo indibidualki helburu zehatz batzuengatik lehiatzeko aukera izango dugu. Egiten dugun mugimendu orok balioa du eta horregatik, sari desberdinak zozketatzen ditugu. Adibidez, erronka kolektibo bat dugu orain martxan, parte-hartzaile guztien artean kilometroak pilatzea dugu helburu, sari desberdinak ezkutatzen dituzten maila desberdinak desblokeatuz. Kirol jardueren erregistroa bai aplikazioaren GPS-aren bitartez, gailu elektronikoen bitartez edo beste kirol aplikazio batzuen sinkronizazioa eginez.

Administrazio ezberdinekin ari zarete lanean, esleipen publikoetan… .erraza da gurpil horretan sartzea? Burokrazia handia dago?
Hasiera guztietan bezala, edozein negozio mota edo sektoretan denak gehiago kostatzen du. Gu oso pozik gaude egindako lan eta kolaborazioengatik. Elkarlanak bai Euskal Herri mailako administrazioekin bai administrazio internazionalekin lortuz. Administrazio publikoek gizartean izan dezaketen eragin positiboa itzela da, eta are gehiago guk lantzen dugun osasun eta jarduera fisikoaren arloan. Horregatik beti egongo gara prest instituzio publikoekin lanean jarraitzeko.

Baloratu duzue inteligentzia artifizialak zuen sektorean izan dezakeen eragina? Onerako izango dela uste duzu?
Kirola beti izan da garapen teknologikorako operazio-eremu bikaina. Garai bakoitzeko aurrerapen zientifiko eta tekniko asko kirolean aplikatu dira: kirolarien errendimenduan, parte-hartzaileen segurtasunean, ekipamenduen kalitatean, neurketen zehaztasunean edo ikusleen entretenimenduan. Kirola teknologiaz baliatzen da, hau estimulatu eta erronka berriei aurre egiten laguntzen baitio. Beste teknologia horiek bezala, Inteligentzia artifiziala gure garaiko aurrerapen zientifiko eta teknologikoaren emaitza da, eta aurretik izan ditugun hobekuntza guztiak bezala eragin positiboa izango du eta dagoeneko izaten ari da. Aukerak askotarikoak dira: kirolarien errendimendua aurreikustea, osasunaren gestioa, lesioen prebentzioa eta tratamendua, kirol baliabide eta tresnen diseinua. Hau da, milaka datu jasotze eta prozesatzearen ondorioz sortutako jakintzaren erabileraz baliatzea. Hori da garatzen ari garen teknologia desberdinek erabiltzen dutena, adituen ezagutza, erabiltzaileek emandako ezagutza eta milaka datu jaso eta aztertzea.

Teknologia berriekin lan egiten duzue, eta egun ohikoa da sareetan gomendioak, entrenamenduak etabar lantzen dituzten pertsonak aurkitzea. Zein da zure iritzia honen inguruan? Formazio edo ezagutzarik jaso ez duen mediku baten ebakuntza jasotzera ausartuko ez ginateken bezala, sareetan aurkitzen ditugun gomendioen iturria zein den ezagutzeko ere ahalegina egin beharko genuke, oinarri zientifikorik ez duen edozein moda, tendentzia edo gomendio ez jarraitzeko.

☉ Galdakao

Bulego, Tremenda Jauria, Zea Mays eta Mago de Oz taldeek joko dute Galdakaoko jaietan

|

Irailaren 13tik 22ra bitartean izango dira Galdakaoko santakurtzak. Jaiak iragartzeko kartel lehiaketa martxan da eta gaur zein kontzertu izango diren jakinarazi du Udalak: Bulego, Tremenda Jauria, Zea Mays eta Mago de Oz.

Prozesu parte-hartzailea martxan jarri zuen Udalak martxoan eta herritarrek guztira 460 proposamen egin zituzten. Bahetzea egin ostean, Jai Batzordeak zein prosamen pasatuko ziren bozketa fasera erabaki zuen, eta maiatzaren 8ra bitartean herritarrek euren gogoenak bozkatu ahal izan dituzte.

Irailak 13, ostirala: Mago de Oz
Irailak 14, larunbata: Bulego
Irailak 20, ostirala: Tremenda Jauría
Irailak 21, larunbata: Zea Mays

Osorik irakurri

☉ Galdakao

Familia migratzaileak integratzeko kulturarteko loturak sortu ditu Aperribaik

Laguntza Sareak Ehuntzen proiektua abiarazi zuten 2019an Aperribai auzoan, herritar migranteak integratzeko asmoz. Orain sarea herri osora hedatu nahi dute

|

Proiektuaren parte-hartzaileak, aurkezpenean / Geuria

Galdakaoko Aperribai auzoan jatorri desberdinetako hainbat kultura batzen dira, eta horrek erakusten du bertan dagoen kultura-aniztasuna aberatsa dela, “herriko handiena”, herritarren eta Udalaren arabera.

Ildo horretan, ikuspegi komunitarioa errotzeko helburuarekin eratu zuten 2019an Laguntza Sareak Ehuntzen proiektua Aperribaiko elkarteek eta norbanakoek, atzerriko jatorria duten auzokideek eta Galdakaoko Udalaren gizarte hezitzaileak.

“2019an Udaleko gizarte hezitzaileok ikusi genuen etorri berriak ziren familiek ez zutela sarerik egunerokoan aurrera egiteko. Eta Aperribain, berta dagoen kultura aniztasuna ikusita, bilerak egiten hasi ginen Basandere Emakume Taldearekin, Auzo Elkartearekin eta Argizai Eskaut Taldearekin. Auzoko elkarteekin hasi nahi genuen proiektua bertako errealitatea ezagutzeko eta herritar migranteak laguntzeko. Oinarrizko behar baten falta somatu genuen: arropak; eta horrela zabaldu genuen Armairu Solidarioa”, dio Naiara Ramos gizarte hezitzaileak.

Armairu Solidarioan herritarrek dohaintzan ematen dituzte arropak eta horien beharra duten auzotarrek hartzen dituzte. Eperlandako eskola zaharren lokalean dago Armairu Solidarioa eta asteazkenero zabaltzen dute 16:30etik 19:30era bitartean. Era berean, arropaz gain, umeentzako jostailuak eta bestelakoak ere jaso eta dohaintzan uzten dituzte.

Horrez gain, hainbat ekintza antolatzen dituzte Eperlandan: “Komunitate osoa ezagutzeko tailerrak, besteak beste”, dio Belen Relea Aperribaiko Auzo Elkarteko kideak. Pilates astean bitan izaten dute; dantza sevillanak, zunba, eta josteko eta kakorratz lanetarako tailerrak astean behin eskaintzen dituzte; irakurketa tailerra hamabost egunean behin; eta haurrentzako arabiar eskolak eta nagusientzako gaztelaniazkoak ere antolatzen dituzte. Usansolon ere migranteentzako gaztelaniazko eskolak eskaintzen dituzte asteazkenetan 10:30etik 11:30era UHren lokalean.

Halaber, urtean behin irteera bat antolatzen dute Aperribaiko umeek ere euren artean batu daitezen: “Aurten Donostiako Aquariumera joango gara. Bi autobus bete ditugu, benetan arrakastatsua!”, dio Releak. Era berean, urtean behin ere auzo bazkaria antolatzen dute: aurten maiatzaren 25ean izan da Aperribaiko frontoian. Hala nola, marokoar bazkaria dastatzeko aukera izan zuten: oilasko halala, arroza eta postre desberdinak, “auzotarrek eurek egindakoak”. Musika eta hennazko tatuajeen tailerrak ere antolatu zituzten.

“Familia bat gara”

Naiara Ramos gizarte hezitzaileak azaldu duenez, Eperlandako eskola zaharren lokala “elkargunea” da: “Harrera eta laguntza emateko gunea, beharrak eta zalantzak partekatzeko gunea. Auzoak eskatzen duenera eta behar duenera moldatzen gara”, dio Ramosek, eta migranteen harrera gero eta “positiboagoa, ahalduntzaileagoa eta politagoa” dela zehaztu du.

Naoual Hajoubi jatorri arabiarra du eta Aperribain bizi da duela urtebete: “Oso pozik bizi gara Aperribain. Integratuta gaude eta familia bat sortu dugu: edozein laguntza behar izatekotan Sareko taldean topatzen dut, eta lagun harremana errotu dugu”.

“Plazera izan da Aperribaira etortzea. Alde handia nabaritu dut bizi izan garen beste herriekiko. Adibidez, gure seme-alabek arabiera ikasi ahal dute Aperribain. Aukera hori ez dago leku askotan eta guretzat garrantzitsua da gure seme-alabek arabiera ikasten jarraitzea. Euskara eta arabiera ikas dezatela nahi dut”, dio Naoualek: “Laguntza Sareak Ehuntzen proiektua Galdakaoko herri osora zabaltzeak gehiago aberastuko du herria”.

Irene Romero Aperribaiko bizilaguna da eta Basandere elkarteko kidea, eta Laguntza Sareak Ehuntzen proiektuan parte hartzen du: “Beste herri batzuetatik etorritako auzokideak eta Aperribai bertakoak naturaltasunez batzen gara. Egunerokoan lan egiten dugu auzo hobea eta solidarioa eraikitzeko. Migratzaileek guk ematen dieguna baino gehiago ematen digute. Auzokoak dira, lagunak”.

“Gure errealitatea elikatzea”

“Aniztasun asko dago Aperribain eta horrek pertsona bezala aberasten gaitu eta gure errealitatea elikatzen du”, dio Amets Iturbe Gizarte Ekintzako zinegotziak: “Errealitate desberdinen inklusioa gizartean errotzen ari gara, eta ezinbestekoa da bide horretatik jarraitzea: ekintza txikietatik handietara”.

Edurne Espilla Migrazio zinegotziak Aperribaiko esperientzia zoriondu du: “Bertan ari direnek egiten duten lana eskertzekoa da, eta eredu da. Asko dugu ikasteko”, dio Espillak. Hain zuzen ere, esperientzia beste eremu batzuetara eramateko nahia adierazi du.

2022an Galdakaoko Udalak Ikuspegi Immigrazioaren Euskal Behatokiarekin jatorri atzerritarra daukaten herritarren egoera aztertu zuen, eta Aperribaiko proiektuak azterketak agerian utzitako eginbeharrekin bat datorrela zehaztu du Espillak: “Azterketaren emaitza oso argia izan zen: ez dago gizarte gatazkarik, baina atzerritik etorritakoak eta bertan jaiotakook ez dugula elkarbizitzen ondorioztatu genuen. Aperribin sortu diren harreman hauek, elkarrekintza hauek, onurak baino ez dituzte, aberastasuna dira herriarentzat, ezberdintasunei aurre egiteko baliabide egokia”.

Norabide horri eusteko asmoa azaldu du, beraz, Jon Gayarre Udaleko Migrazio teknikariak. “Indar eta ahalmen handia du proiektu honek eta Udaletik sustatu behar dugu”, azaldu du. Bide horretan lanean ari dela zehaztu, Udala Galdakaon Aniztasunaren Mahaia sortzeko lanean ari dela jakinarazi, eta egiten ari den lanaren emaitza zehatzak aurrerago ikusiko direla adierazi du.

Osorik irakurri

☉ Galdakao

Euskararen normalizazioa “agenda politikoaren erdigunera” eramateko erronka hartu du Galdakaok

|

Agurne Gaubeka Hizkuntza Eskubideen Behatokiko zuzendaria eta Iñigo Hernando alkatea lankidetza hitzarmena sinatzen // Galdakaoko Udala

Galdakaoko Udalak eta Hizkuntza Eskubideen Behatokiak lankidetza hitzarmena sinatu dute 2034. urtera arte, euskara indarberritzeko eta euskaldunak ahalduntzeko asmoz.

Zehazki, Udala Euskararen Plana diseinatzen ari da, eta marko estrategiko horren barruan sinatu dute akordioa Iñigo Hernando Galdakaoko alkateak eta Agurne Gaubeka Hizkuntza Eskubideen Behatokiko zuzendariak.

Lankidetza hitzarmenak hiru erronka nagusi ditu: euskararen normalizazioa agenda politikoaren erdigunera eramatea; berariazko nahiz zeharkako hizkuntza politika garatzea, gainerako hizkuntzekin zein kulturekin bizikidetzan; eta euskararen aldeko jarrera areagotzea eta hiztunen ahalduntzean, hizkuntza ohituretan eta portaeretan eragitea.

Osorik irakurri

☉ Galdakao

Galdakaoko jaiak iragartzeko kartel lehiaketak 2.100 euro banatuko ditu saritan

|

Galdakaoko jaietako txupinazoa, iaz // Geuria

Irailaren 13tik 22ra bitartean izango dira Galdakaoko jaiak. Kontzertuak zeintzuk izango diren esperoan, kartel lehiaketa martxan jarri du Udalak.

Interesdunek uztailaren 5era arte dute euren lanak aurkezteko epea zabalik, eta pertsona bakoitzak gehienez ere bi lan aurkeztu ahal izango ditu. Entrega Torrezabal Kultur Etxeko Kultura, Gazteria eta Kirol sailean egingo da 09:00etatik 14:00etara bitartean.

Lanak leloa idatzita eta izenperik gabe aurkeztuko dituzte parte-hartzaileek, eta kartelekin batera, gutun azal itxi baten kanpoaldean lelo berbera eta egilearen adina. Gutun azalaren barruan jasoko dira egilearen datu pertsonalak (egilearen izena, helbidea eta telefonoa) eta NANaren fotokopia, edo hamalau urtetik beherakoa balitz, bere nortasuna eta jaiotze data egiaztatzen dituen beste edozein dokumentu publiko edo ofizial.

Guztira 2.100 euro banatuko dituzte saritan: kartel irabazlearen egileak 1.000 euro jasoko ditu, bigarren sailkatuak 400 euro eta Galdakaoko lehenengo irabazleak beste 400 euro.

Haur eta gazteen kategorian, Galdakaoko denda batean gastatzeko 100 euroko bonoa izango dute ondorengo adin tarteko irabazleek: 2014 eta 2016 urteen artean jaiotakoak, 2010 eta 2013 artean jaiotakoak eta 2007 eta 2009 artean jaiotakoak.

Iaz Jon Ortega galdakoztarrak irabazi zuen lehiaketa, eta berarekin berba egin genuen GEURIAn (hemen bideoa).

Teknika librea

Aurkeztutako lanak berriak izan behar dira, bestelako lehiaketa batean aurretik saririk jaso ez dutenak eta aldi berean beste leku batean aurkeztu ez direnak, eta 50x70ko neurria izan behar dute, euskarri zurrun baten gainean muntatuta.

Kolorea eta teknika librea izango da eta nahitaez “Galdakaoko Santakurtzak 2024. Irailak 13-22” leloa eraman beharko dute lanek.

“Lanak ezingo dira diskriminatzaileak izan, sexu, genero identitate edo sexu orientazioa dela eta. Helburu horrekin, testuetan hizkera ez sexista erabili beharko da eta irudietan bi sexuen presentzia orekatua bermatu beharko da. Era berean, ez dira inola ere onartuko mota hauetako lanak: pertsonak beren sexu, genero identitate edo sexu joeraren arabera giza duintasunari dagokionez maila altuagoetan edo baxuagoetan aurkezten dituztenak edo sexu objektu soil gisa aurkezten dituztenak; genero estereotipoak sustatzen dituztenak; eta emakumeen kontrako indarkeria justifikatzen, hutsaltzen edo bultzatzen dutenak”, diote udal ordezkariek.

Lehiaketaren oinarriak esteka honetan kontsulta daitezke.

Osorik irakurri

☉ Galdakao

Palestinako sarraskia gelditzea eskatzeko kanpaldia antolatu dute Galdakaoko hainbat eragilek

Maiatzaren 30ean izango da kanpaldia. Egun berean, hitzaldi bat, elkarretaratzea, afari kolektiboa eta dokumental baten proiekzioa antolatu dituzte

|

Kanpaldiaz gain, hitzaldi bat, elkarretaratzea, afari kolektiboa eta dokumental baten proiekzioa antolatu dituzte maiatzaren 30ean Galdakaon // Argazkia: Omer Yildiz, Unsplash

Palestinako sarraskia salatzeko Galdakaoko hainbat eragilek kanpaldia antolatu dute maiatzaren 30ean, ostegunez.

“Gatazka hau ez da gaurko arazoa soilik, baizik eta orain dela urte dezente hasitako zapalkuntza. Hori dela eta, maiatzaren 30ean Palestinalen aldeko kanpaldia burutuko dugu”, diote.

Ernaik, Herriko Bentak, Sortuk, Elkarlaguntza Sareak, Zizpak, Ganguren Mendi Taldeko batzordeak, Ikamak, Momoakek, TEAk, Guzur Aretzak, GBGEk eta Berdez Bizik antolatu dute kanpaldia.

Gainera, kanpaldiaz gain, hitzaldi bat, elkarretaratzea, afari kolektiboa eta dokumental baten proiekzioa antolatu dituzte maiatzaren 30ean bertan.

Maiatzak 30, osteguna
18:30 Hitzaldia: ‘Palestinako sarraskia’ (Iratzar Fundazioa)
20:30 Elkarretaratzea Eroskiko bidegurutzean
21:00 Afari kolektiboa
21:30 Dokumentala: ‘Nacidos en Gaza’
22:00 Kanpaldia

Osorik irakurri