Usansolon 250 lagun inguruk egin dute bat Gernika-Palestina Herri Ekimenaren burrunbarekin.

Usansolotik GEURIAra bidali dizkiguten irudiekin sortu dugu bideo laburra.

‘Genozidioa stop!’ lelopean burrunbak antolatu ditu Gernika-Palestina Herri Ekimenak, Gazako genozidioa salatzeko.

Irailaren 5ean egingo dituzte protesta zaratatsuak, 19:00etan. Usansolon, Arlo Baltza plazan izango da.

Horrela dio Gernika-Palestina ekimenak bere webgunean: “Sarraski horren aurrean ezin dugu isilik egon, ezin besoak gurutzaturik geratu. Beste ezeren gainetik, gaur eta hemen premiazkoa da ondorio latzak izaten ari den eskalada belikoa gelditzea, bakea, justizia eta itxaropenezko etorkizuna eskaintzea”.

Wallball-eko Munduko Txapelketa jokatu du Euskal Pilota Selekzioak Herbehereetan, Leeuwarden hirian, abuztuaren 27tik 30era bitartean.

Eta, Euskadiko Euskal Pilota Federakuntzatik (EEPF) adierazi dutenez, txapelketako azken jardunaldiak berretsi du Euskal Pilota Selekzioaren “lorpen historikoa”.

Euskal Selekzioko pilotariek guztira zazpi domina irabazi dituzte jokatu dituzten bost finaletan: urrezko lau eta zilarrezko hiru.

“Euskadiko Euskal Pilota Federazioak gure pilotari guztiak zoriondu nahi ditu, baita lan bikaina egin duten teknikariak ere”, adierazi dute. Patri Espinar usansolotarra emakumezkoen hautatzaile izan da.

Wallball-eko Munduko Txapelketa jokatu du Euskal Pilota Selekzioak Herbehereetan, Leeuwarden hirian.

Txapelketa atzo, abuztuak 27, hasi zen eta hilaren 30era arte, larunbatera arte, luzatuko da. Eusku Pilotako Nazioarteko Konfederazioak (CIJB) antolatu du eta Euskadiko Euskal Pilota Federakuntza (EEPF) zuzenean ari da partidak ematen bere Youtube kanalean.

Euskal Herriko Selekzioaz gain, Argentina, Belgika, Erresuma Batua, Valentzia, Herbehereak eta Puerto Rico herrialdeetako selekzioek hartuko dute parte.

Eta, Euskal Selekzioaren taldean Patri Espinar usansolotarra ari da. Emakumezkoen selekzioko hautatzaile lanak egin ditu. Olatz Arrizabalaga Munduate, Miren Larrarte Mayoz eta Laia Salsamendi Silva pilotariak izan dira usansolotarrak hautatu dituenak.

Emakumezkoen Euskal Selekzioa Patri Espinarrekin entrenatzen // EEPF

EEPFtik adierazi dutenez, euskal ordezkaritzak “ilusioz eta konpromisoz” egingo dio aurre nazioarteko erronka honi.

Edizio hau Wallball modalitateko nazioarteko lehiaketa bateratu berri baten lehenbiziko aldia da. Horma bakarreko pilota-joko bat da Wallball, txaparik gabea, eta banaka nahiz bikoteka jokatzen da.

Partidak 21 tantura bi joko irabazi arte jokatzen dira, eta berdinketa badago, 11 tantura hirugarren joko erabakigarria jokatzen da. Lehiaketak gizonezkoen, emakumezkoen eta bikote mistoen kategorietan jokatuko dira.

Euskal Selekzioko gizonezkoen taldea honakoek osatzen dute: Lur Ziarrusta Intxaurtza, Mikel Aurrekoetxea Amuriza, Egoitz Amantegi Zubillaga eta Mikel Beldarrain Emaldi. Ekhi Ziarrusta Intxaurtza da gizonezkoen hautatzailea.

Biolentzia matxistaren biktima diren emakumeentzako harrera etxe bat du egun Usansolok, baina Galdaokotik banandu zenetik aurretik onartutako araudia indarrik gabe geratu da. Egoera hori konpondu nahian, Usansoloko Udala ordenantza berria lantzen hasi da, eta herritarrek euren ekarpenak egiteko aukera izango dute, abuztuaren 20a arte.

Horretarako, bi bide izango dituzte usansolotarrek: udalaren erregistro elektronikoaren bidez edo Txapelena baserrian bertan. Prozedura honen bidez baliabide hau kudeatzeko irizpide teknikoak eta beharrak zehaztuko dira. Helburuak argiak dira: emakume biktimen babes osoa bermatzea eta zerbitzu publikoen arteko (gizarte, osasun, lege eta segurtasun alorretakoen arteko) koordinazioa indartzea.