Perejilek Folklore Taldea sortu dute Galdakaon eta gaur kalejira egingo dute herriko tabernetatik.

Kalejira 17:30ean hasiko dute On Kafen, eta arratsaldea (hiru orduz) emango dute kantuan eta jai giroan.

Gildatxo, Muguru, Baserri, Alai, Sorgiñe, Ganguren, Zurrut, Ganbara eta Herriko Benta tabernetatik ere igaroko dira.

“Euskaldunen abestiak ditugu errepertorioan: Lau teilatu, Oihanian, Baratze bat… Badugu gaztelaniaz den baten bat edo Euskal Herritik kanpo sortua izan arren, bertakoek maitekiro hartu dutena”, esan diote GEURIAri.

Olentzero, Mari Domingi eta Galtzagorriekin topo egin dugu gaur Galdakaon!! Entzun GEURIAko ikus-entzuleei helarazi dieten mezua!

Batera proiektuaren barruan gazteentzako zerbitzu berria martxan jarri du Galdakaoko Udalak: arreta psikologikorako eta afektibo sexualerako Whatsapp bidezko zerbitzua, hain zuzen.

Zerbitzua 12 urtetik gorako Galdakaoko gazteei dago zuzenduta eta helburu nagusia da laguntza emozionala eskaintzea.

Horretarako profesional kualifikatuek artatuko dituzte gazteak, “arreta konfidentziala eta kalitatezkoa eskainiko diena”, diote udal ordezkariek.

“Entzute erreala eta pertsonala bermatuko da horrela, adimen artifizialeko aplikazioek ematen dituzten erantzun automatikoetatik urrun. Beraz, harremanen eta emozioen inguruan dituzten kezkei ohikoa eta gertukoa zaien baliabidearen bitartez erantzungo zaie gazteei, baina modu profesional eta seguru batean. Gazteengandik hurbil egotea eta behar duten akonpainamendua egitea da helburua”, diote.

“Espazio segurua”

Profesional espezializatuek gazteei osasun psikologikoarekin eta harreman pertsonalekin lotuta dituzten kezka eta zailtasunetan entzun, ulertu eta euren bideetan lagunduko diete.

“Zerbitzu berri hau aholkularitza, arreta eta laguntza psikologikoa eskaintzen duen espazio segurua izango da”, diote.

Besteak beste, norbere buruaren zainketa eta autoestimua, estresaren eta bakardadearen kudeaketa, bikote harreman gatazkatsuetatik ateratzeko edo horiek konpontzeko laguntza, kontsumo eta adikzio egoerak lantzea, edota indarkeriak detektatzea dira landuko dituzten gaiak.

“Eta hori dena, arreta hurbil, konfidentzial eta pertsona bakoitzaren errealitate eta beharretara egokitutik abiatuta”, diote.

Zerbitzu hau erabili nahi duten gazteek informazioa eskatu dezakete 747 480 472 telefono zenbakira deituta, batera@galdakao.eus helbidera idatzita, edo aurrez aurre Torrezabal Kultur Etxean.

Espainiako Kultura Ministerioak atzo iragarri zuen nortzuek jasoko duten 2025eko Arte Ederretako Merezimenduaren Urrezko Domina.

Eta, saria jasoko duten kulturaren munduko 35 izenen artean da Miren Arzalluz Loroño galdakoztarra.

Ernest Urtasun Kultura ministroak proposatuta Arzalluz sarituko dute eta arrazoi hauek eman dituzte: “Bere ibilbideak ikerketa, kontserbazioa, dibulgazioa eta lidergoa uztartzen ditu, ekosistema kulturalari ikuspegi berriak emanez, tradizioa, berrikuntza eta proiekzio globala lotuz, eta artearen, modaren eta gizartearen arteko lotura indartuz”.

Artearen historialaria eta modan espezializatutako kultur kudeatzailea da Arzalluz eta iazko azaroan Bilboko Guggenheim museoko zuzendari izendatu zuten.

Aurretik, ordea, ibilbide luzea izan du: Cristobal Balenciaga Fundazioan hasi zuen bere ibilbidea; 2018an, Palais Galliera – Parisko Modaren Museoaren zuzendaritza hartu zuen, eta erakunde horren buru izan zen kudeatzaile ez-frantziar bakarrenetako bat izan zen.

Hainbat errekonozimendu jaso ditu, hala nola, Frantziako Arteen eta Letren Ordenako Zaldun saria, Felicidad Duce saria eta Cooper Hewitt Smithsonian Design Museum-eko National Design Awards sarietako epaimahaikide izan da.

Arzalluzez gain, Agustin Ibarrola artista basauriarrak ere jaso zuen Arte Ederretako Merezimenduaren Urrezko Domina, 1993an. GEURIAk Ibarrolarekin luze eta zabal berba egin zuen 2015ean egindako elkarrizketan bere bizitzaren errepasoa eginez.

Ganguren Mendi Taldea, Andra Mari Dantza Taldea, Adiskide Pilota Elkartea, Guzur Aretxa Kultur Elkartea, Los Tonos Humanos Abesbatza, Rigor Mortis Rol eta Simulazio Elkartea eta Da Capo Musika Banda omendu ditu Galdakaoko Udalak.

Aurten urteurren borobilak egin dituzte: Gangurenek 80 urte, Andra Marik 70, Adiskidek 50, Guzur Aretxak eta Los Tonos Humanosek 40 urte, Rigor Mortisek 30 eta Da Capok 10.

Eta herriko zazpi elkarte horiei aitortza egiteko ekitaldia antolatu zuen atzo Udalak Torrezabalen.

“Elkarte horien konpromisoa, dedikazioa eta ekarpen soziala eta kulturala balioan jarri nahi izan ditugu”, esan zuen Eguzkiñe Gezuraga Udaleko Giza Baliabideetako zinegotziak. Berak gidatu zuen ekitaldia.

Ezkerretik eskumara: Xabier Zabalo (Guzur Aretxa), Belen Madariaga (Los Tonos Humanos Abesbatza), Edu Olea (Ganguren Mendi Taldea), Iñigo Hernando alkatea, Amaia Souto (Da Capo), Alazne Solinis (Rigor Mortis), Gaizka Uriarte (Adiskide) eta Unai Zabala (Andra Mari) // Geuria

Udalak oroigarria eman zien zazpi elkarteetako ordezkariei: Eider Eibar herriko ilustratzaileak eta Asier Martin bertsolari galdakoztarrak elkarte bakoitzarentzat marrazki eta bertso pertsonalizatuekin egindako koadroak, hain zuzen.

Edu Oleak (Ganguren), Unai Zabalak (Andra Mari), Gaizka Uriartek (Adiskide), Xabier Zabalok (Guzur Aretxa), Belen Madariagak (Los Tonos Humanos Abesbatza), Alazne Solinisek (Rigor Mortis) eta Amaia Soutok (Da Capo) jaos zuten oroigarria.

Iñigo Hernando alkateak elkarte bakoitzari bere urteurreneko zenbakia duen margolana eman zion opari gisa, Asier Martin bertsolariak elkarte bakoitzerako prestatu dituen bertsoak abestu zituen bitartean. Ekitaldiaren amaieran, gainera, alkateak ere bertsoa bota zuen elkarteei eskerrak emateko.