Euriak ez du zapuztu Olentzeroren eta Mari Domingiren kalejira Basaurin. Galtzagorriak, dantzariak, Mari eta Sugaar, eta Basajaun lagun izan dituzte bidean, baita kalejirara batu diren herritarrak ere.

San Migeleko lanzadera zerbitzuak aldaketak izango ditu 2026ko urtarrilaren 1etik aurrera.

Basauriko Udaletik azaldu dutenez, lanzaderaren Basauriko geltokia lekuz aldatuko dute eta urtarrilaren 1etik aurrera Kareaga Goikoa 83 kalean egongo da geralekua, Kareagan, Kutxabanken ondoan.

“Gaur egun autobusa Basozelaiko metro geltokiaren aurrean gelditzen da, baina sarbide hori ez da irisgarria. Horregatik, urtarrilaren 1etik aurrera Bidasoa kaleko metro geltokiaren aurrean geldituko da; hango sarbidea irisgarria da”, esan dute udal ordezkariek.

Modu horretan, honakoa izango da lanzaderak San Migeletik Basaurira egingo duen ibilbidea: Eleuterio Villaverde 22 (San Migel)-Gernika 5 (Abaroa)-Kareaga Goikoa 83 (Kutxabank).

Ondoren, Boketean norabide aldaketa egin ostean, Basauritik San Migelerako ibilibidea hau izango da: Kareaga Goikoa 26 (Bidasoa metro geltokia)-Gernika 8 (Abaroa)-Eleuterio Villaverde 22 (San Migel).

30 minutuko maiztasuna

Lanzadera astelehenetik igandera bitartean ibiliko da, 06:05etik 23:15era, eta maiztasuna 30 minuturik behinekoa izango da.

Eta, udal arduradunek zehaztu dutenez, 11:ooetan eta 18:30ean ez da zerbitzurik egongo.

Urtarrilaren 1etik aurrera lanzaderaren maiztasuna txikiagoa izango da (abenduaren 31ra arte 20 minuturik behinekoa da): “Hala ere, San Migeletik igarotzen diren Bizkaibusen lineekin konbinatuz gero, garraio-zerbitzu integrala 15 minuturik behinekoa izango da. Gainera, badaude bizkaitarrontzako zenbait garraio-laguntza publiko”, esan dute.

Autobus berria

Aldaketa horiez gain, ingurumenaren alorreko hobekuntzak ezarriko ditu Basauriko Udalak. Zehazki, autobus berri batek emango du zerbitzua, “katalizatzailea eta ad blue teknologia erabiltzen dituena”.

“Orain arte zerbitzua eman duten autobusak baino efizienteagoa da eta ingurumenaren alorreko hobekuntzak ditu. Gainera, kutsadura akustikoa gutxituko da, lanzadera ez delako Basozelaitik igaroko”, diote udal ordezkariek.

Bestetik, epe laburrera eta ertainera, “eta san migeldarrei metrorainoko garraioa bermatzen jarraitzeko”, Bizkaiko Foru Aldundiaren mugikortasun jasangarriaren eredu berrian sartuko da Basauriko Udala.

“Aurreikusten da eredu hori bi urteko epean hasiko dela martxan, eta, beraren bidez, zerbitzu publikoak bikoiztea ekidingo da, Bizkaiko garraio osoa arrazionalizatuko da, eta mugikortasun jasangarriranzko urratsak egingo dira”, diote.

Eredu berrian dohainik izango dira garraioen arteko aldaketak, “eta, horri esker, San Migeleko auzotarrek Bizkaibus eta Metroa lotu ahalko dituzte, metroraino heltzeko edo metroa erabili osteko ibilbidean kostu gehigarririk izan gabe”, esan dute.

Eredu berria abiarazi aurretik, Bizkaibusek parte-hartze bidezko prozesua abiaraziko du, bizkaitarrek euren iritzia eman eta proposamenak egiteko aukera izateko.

Euskarak eta euskal hiztun komunitateak bizi dugun larrialdi linguistikoaren aurrean, indarraldi berri baterako bidea zabaldu nahi du Euskalgintzaren Kontseiluak.

Eta, horretarako ekitaldia antolatu du abenduaren 27an, larunbatez, Bilbao Arenan, Miribillan. ‘Euskaraz bizitzeko Pizkundea’ lelopean, ekitaldia 17:00etatik 19:00etara izango da.

“Etsipenean jausi beharrean, euskaraz bizi nahi dugula adierazi, elkarrekin arnasa hartu, eta euskarari etorkizuna emateko prest gaudela erakusteko ekitaldia izango da”, esan dute antolatzaileek.

Besteak beste, ‘Euskararen soinu-banda’ taularatuko dute, hamarkadatan euskararen taupadaren parte izan diren kantuak ekarriz. Amets Aranguren (Ibil bedi taldea), Anari, Beñat Goitia (Benizze), Gontzal Mendibil, Gorka Urbizu, Joseba Tapia, Julen Goldarazena (Flako Fonki-Chill Mafia), Maia Iribarne (Habia taldea) eta Miren Narbaiza (MICE) musikariek hartuko dute parte.

Era berean, azken urteetan euskarazko zineman nabarmendu diren hainbat aktorek ere parte hartuko dute, tartean, Itziar Ituño basauriarra, Edurne Azkarate, Miren Gaztañaga eta Ramon Agirre.

Oholtzara igoko dira ere Ane Labaka eta Sustrai Colina bertsolariak, baita kulturgile gehiago ere. Ekitaldiaren gidaritza artistikoa Oier Guillan antzerkigilearen esku izan da.

Ekitaldia zuzenean ikusteko oraindik ere sarrerak sagai daude 10 euroan webgune honen bitartez.

Sarreraren kostua artisten lana eta ekitaldiaren gastuen zati bat ordaintzera bideratuko dela adierazi dute Kontseilutik.

Bizkaiko merkatariak eta merkataritza omentzeko Bizkaidendak Gala hartuko du Basaurik abenduaren 27an, larunbatez. Social Antzokian izango da 20:00etan.

Aurtengoa hirugarren edizioa izango da eta Bizkaiko hiru denda sarituko dituzte, hiru kategoriatan banatuta: Ibilbidea, Berrikuntza eta Euskara. Guztira, 2.250 euro banatuko dituzte saritan.

“Sari hauek urteetan zehar merkataritza eraikitzen aritu direnen dedikazioa, berritzen dutenen ikuspegi eraldatzailea eta eguneroko jardunean euskeraz hitz egiten duten enpresen ahalegina nabarmentzen dituzte”, esan du Jose Cebrecos Bizkaidendak Federazioaren lehendakariak.

Horiez gain, Bizkaiko erakusleihoen zazpigarren lehiaketako saridunak ezagutaraziko dituzte galan.

Asier Iragorri Basauriko alkatea “pozik eta harro” agertu da Bizkaidendak Gala herrian antolatuko delako: “Tokiko merkataritzak kalitatezko zerbitzua eta profesionala eskaintzen du eta horri garrantzia eman behar diogu”.

Era berean, merkataritza dagoen lekuan “bizitza” dagoela ere azpimarratu du: “Leloak hori dio, baina horrez gain, lana eta etorkizuna ere eskaintzen dituzte tokiko dendek. Tokiko ekonomia suspertzen laguntzen dute”, esan du Iragorrik, eta Udaletik lan-ildo hori laguntzen jarraituko dutela adierazi du.

Basauriko erakusleihoak

Bestetik, galaren barruan Basauriko erakusleihoen lehiaketako sariak ere banatuko dituzte. Guztira herriko 42 saltokik hartu dute parte lehiaketan.

“Duela urte asko ez genuela Basaurin tokiko erakusleihoen lehiaketarik antolatzen, eta aurten berriro egitea erabaki dugu. Gure herriko denden sormena bultzatu nahi izan dugu, eta gizartean erakutsi oinarri sendoa direla”, adierazi du Isabel Cadaval Merkataritza arloko zinegotziak.

Basauriko erakusleiho onenaren sarian ere hiru sari banatuko dituzte, eta 450, 400 eta 350 euro banatuko dituzte.

Gainera, Basauri Merkatari Elkartearen lankidetzarekin erakusleiho onenaren saria irabaziko duen saltokian bideo bat grabatuko dute, eta herri zozketan parte hartu duten herritarren artean zozketa antolatu dute.

Jose Feijoo Basauri Merkatari Elkarteko presidenteak esan du “pribilegioa” dela Bizkaidendaken Gala Basaurin antolatzea: “Eguneroko ahaleginaren aitorpena da”.

Basauriko eta Usansoloko Bridgestoneko langileek % 25,3ra arteko soldata igoera izango dute. Horrela zehaztu dute enpresako zuzendaritzak eta BUB, UGT eta CCOO sindikatuek sinatutako akordioaren ondoren.

Akordioak Estatuko 2.409 langileri eragingo die, horietatik 700 Basaurin eta 30 Usansolon.

Zehazki, hau da adostu dutena: 45.000 euroko urteko oinarrizko soldata 48.736 eurora arte igo daiteke 2027an, eta guztira 9.831 euroko igoera izango dute sei urtean, 2021etik aurrera.

Gainera, hitzarmen berriari esker 2025ean izandako soldata-atzerapenak ordainduko dizkiete langileei 2026ko lehen hiruhilekoan.

Lanaren antolaketari dagokionez, hitzarmenak aparteko orduen borondatezkotasuna indartzen du, makinak gelditzeko eta abiatzeko denborak blindatzen ditu, eta errendimendu txikiagatiko soldata-kenkariaren aukera kentzen du.

Era berean, kontziliazioan eta eskubide sozialetan aurrerapenak onartu dituzte, ospitaleratzeagatiko edo gaixotasun larriagatiko baimenak eta LGTBI berdintasun-neurri espezifikoak barne.

Akordio berria duela bi urte adostutako hitzarmen kolektiboan oinarritzen da, eta sindikatuen arabera, langileentzako egonkortasun-esparru bat ezartzen du berregituraketek markatutako urte baten ondoren, eta soldatak berreskuratzeko etapa berri bat irekitzen du.

SITB sindikatuak ez du hitzarmena sinatu, euren esanetan bere proposamenak ez dituztelako txertatu.