☉ Basauri
Juani Castro (Bizkotxalde ikastetxea): “Egoera hauetara moldatzeko izan dugun gaitasuna harritzekoa izan da”
Ekainean emango diote bukaera 2021/2022 ikasturteari ikastetxeek. Bizkotxalde ikastetxeko Juani Castro zuzendariarekin eta Maite Ureta ikasketa buruarekin hitz egin dugu.
Ikasturtea bukatzear da ikastetxeetan. Covid-19ak baldintzatuta, ikasturte ezberdina izan da aurtengoa, baina hamar hilabeteren ondoren atseden hartzeko tartea izango dute ikastetxeetako arduradunek. Basaurin, Bizkotxalde ikastetxeko Juani Castro zuzendariarekin eta Maite Ureta ikasketa buruarekin batu gara 2020/2021 ikasturtea nolakoa izan den eta 2021/2022 ikasturtean zer espero duten ezagutzeko. Guztira 257 ikasle daude Bizkotxalde ikastetxean, Haur eta Lehen Hezkuntzan.
Zelan bizi izan duzue Covid ikasturte hau Bizkotxalde ikastetxean?
Oso estresagarria izan da ikasturte hau; are gehiago kontuan izanda Bizkotxalde ikastetxeak bi eraikin dituela. Hau da, bi eraikin antolatu behar izan ditugu, horrek dakarren guztiarekin: sarrerak, irteerak, ordutegiak, distantziak, tenperatura kontrolatzea edota jantokiak.
Bi eraikin izateak, orduan, gauzak erraztu beharrean zaildu egin du zuen antolaketa.
Hala da. Gurean antolakuntza oso zaila izan da. Beste ikastetxeetan ere zailtasunak izan dituztela zalantzarik ez daukat: agian ikasle kopuru handiagoa duten ikastetxeetan jantoki bat besterik ez dute. Bizkotxalden, zailtasun handiena da Haur Hezkuntza eta Lehen Hezkuntza bereizita gaudela; ez gaude bata bestearengandik gertu. Dena kontrolatzeko Haur Hezkuntzako eraikinean beste pertsona bat izan dugu.
Noiz hasi zineten 2020/2021 ikasturtea antolatzen?
Abuztuan hasi ginen gauzak antolatzen. Ikastetxe pribatuak edo DBHko ikastetxeak ekainean hasi ziren ikasturtea antolatzen eta horren berri telebistan izan genuen. Guk ez geneukan antolakuntza bat ikusten genuen ikastetxe horietan, eta gainera, ez genekien zehazki zer egin. Eusko Jaurlaritzara deika ibili ginen abuztuan, baina inork ez zekien ezer, ezta Prebentzio Zerbitzuan ere. Jakin genuen ikastetxe batzuk hasi zirela materiala eurak erosten. Orduan, abuztuaren bukaeran bildu ginen zuzendaritza taldekoak eta zer egin erabakitzen hasi ginen.
Zer erabaki zenuten?
Alde batetik, segurtasun distantziari dagokionez, gurean ezin ziren distantziak mantendu. Adibidez, Lehen Hezkuntzan bi gela genituen 26 ikaslerekin. Normalean 15 ikaslerekin ezin badira distantziak mantendu, pentsa 26 ikaslerekin! Irakasle gehiago eskatu genituen, baina ez zituzten bidali. Delegaziotik esan ziguten 26 ikasle gela batean egotea normala zela, baina noski, egoera normal batean.
Bestetik, seinalizazioa erosi genuen, planteatu genuen zelan egin bai Haur Hezkuntzan bai Lehen Hezkuntzan, kontingentzia plana egin genuen… Eta gure kasuan, bi kontingentzia plan egin behar izan genituen, noski. Prebentzio Zerbitzutik lagungarri batzuk jaso genituen, baina horiek ez dira baliagarriak testuinguru guztietan.
Eta orduan?
Guk erabaki genuen zelan egin dena. Denbora asko eman genuen dena antolatzen, baina uste dut orain dena ikusita, nahiko ondo irten dela. Egia da Covid-19a gurera ere sartu dela, baina ikastetxe guztietan bezala, kanpotik baitator birusa. Urtarriletik hona nahiko lasai ibili gara. Baina ikasturte hasiera oso estresagarria izan zen. Dokumentu asko eskatzen zituzten Delegaziotik. Egunero bete behar dugu Covid txostena eta Delegaziora bidali.
Zer da Covid txostena?
Ikastetxeko zenbakia, positiborik egon den, konfinatutako ikasgelarik badagoen, gelarik konfinatuta ez badago ikasle konfinaturik badagoen, edota Covid arduraduna nor den jaso behar duzu txosten horretan eta egunero bidali. Oso arin egiten da, baina egunero egin behar da.
Covid arduraduna aipatu duzu.
Bai. Ikastetxe bakoitzak Covid arduradun bat du. Gure ikastetxean inork ez zuen lan hori egin nahi; ez zegoen ordu librerik lan horretarako. Orduan zuzendaritza taldekook hartu genuen ardura. Batez ere familiekin harremana egitea da Covid arduradunaren lana.
Ikasgelarik konfinatu behar izan duzue?
Bai, kasu positiboak izan ditugu. Haur Hezkuntzan positiboren bat egon denean, ikasgela guztia itxi behar izan dugu haurrek maskararik ez dutelako eraman behar. Lehen Hezkuntzan, ostera, positiboaren ingurukoak soilik gelditu izan dira konfinatuta, eta ez gela osoa.
Eta irakaslerik?
Normalean irakasleak ez, abuztuan erabaki genuelako FPP2 maskarak guk geuk erostea eta ikastetxean horien erabilera derrigortzea. Hasieran maskara kirurgikoak bidali zituzten Delegaziotik, gero beste batzuk bidali zizkiguten irakasleentzat, baina grafitozkoak ziren eta baztertu behar izan genituen. Eskerrak ez genituen erabili!
Ikasleen senideekin zelan bizi izan duzue egoera berri hau?
Familiekin batzea ezinezkoa zen, dena posta elektronikoaren bitartez egiten genuen. Familiekin ere nahiko ondo joan da kontua. Ohitu dira, orain badakite hitzorduren bat eskatzeko deitu egin behar dutela edo ikasle baten bila badatoz, kanpoan itxaron behar dutela. Egia esan portaera ezin hobea izan dute senideek.
Esango zenukete garrantzia gehiago eman diozuela ikasleen alde emozionalari maila akademikoari baino?
Maila akademikoa joan den ikasturte amaieran jaitsi zela argi dago. Ikasturte bukaeran balorazio bat egin genuen: zer egin genuen eta zer falta zen egiteko. Alde emozionala ikasturte hasieratik kontuan hartu zen. Batez ere tutoretzetan landu da ikasleen arlo emozionala. Hasieran guraso batzuek ez zituzten seme-alabak ikastetxera ekarri nahi beldurragatik, eta erabaki hori errespetatzen jakin genuen ikasleari falta jarri barik.
Beraz, alde emozionala familiekin ere landu behar izan duzue.
Bai. Seme-alabak ikastetxera ez ekartzea erabaki zuten familiekin telefonoz hitz egiten aritu ginen beldurra gainetik kentzeko, eta horrela, urritik aurrera ikasleak gurera etortzen hasi ziren.
Ikasleekin eta senideekin alde emozionala lantzeaz gain, irakasleok ere horretan lan egin duzue?
Irakasleon beldurra zen inork ez zekiela ikasturtea nolakoa izango zen. Ekainaren hasieran gaude eta ikusten duzu lortu dugula ikasturtea aurrera eramatea. Kontrakoa gertatu izan balitz errua gurea bakarrik izango zatekeen, eta errudun sentitzea oso gogorra da. Orain liberatu gara eta oporretara ondo helduko gara, gero ikasturte berria gogotsu hasteko.
Ikasturte honek argi utzi duena da hezkuntza sistema aldatu egin dela.
Hala da. Teknologia berrietara egokitu behar izan dugu. Ez bakarrik covid kasuak direla eta; orain ikasleren bat gaixorik badago modu telematikoan ere jarraitzen dugu. Lehen Hezkuntzan egiten duguna da deitu, familiarekin konektatu, ikasle bakoitzak bere helbide elektronikoa baitu, eta horren bitartez lana bidaltzen diogu. Bestela, Classroom plataformaren bitartez egiten dugu. Familiek badakite jada funtzionamendua zein den. Eta posible denean ere liburuak eramaten dizkiegu etxean dauden ikasleei. Haur Hezkuntzan harremanak ere telematikoak izan dira noizbehinka, behintzat aurpegiak ikusteko.
Ondo moldatu zarete?
Berritzegunean (Prestakuntzan eta Hezkuntzaren Berrikuntzan Laguntzeko Zentroa) balorazioa egin dugunean baieztatu ahal izan dugu egoera hauetara moldatzeko izan dugun gaitasuna harritzekoa izan dela. Irakasleak, ikasleak eta senideak oso ondo moldatu gara egoera berri honetara. Gainera, IKTko irakasleak eskolak ematen ditu familiekin zein ikasleekin teknologia zelan erabili irakasteko.
Datorren ikasturtean ere teknologia berri horiek erabiliko dituzue?
Nahitaez. Eusko Jaurlaritzak plan bat egin du datorren ikasturtetik aurrera hezkuntza sisteman teknologia indartzeko. Besteak beste, irakasleei exijituko diete oposizioetan gaitasun digitala izatea; ez da soilik sare sozialetan mugitzeko gaitasuna izatea, baizik eta zelan aplikatzen dituzten teknologia berriak pedagogian eta gela barruan.
Badakizue datorren ikasturtea nolakoa izango den?
Zurrumurruak daude berriro burbuiletan edo talde egonkorretan hasiko dugula ikasturte berria, distantzia 1,50 metrokoa izan beharrean 1,20 metrokoa izango dela… Baina, zurrumurruak besterik ez dira. Pertsonalki, lasaiago ikusten dut datorren ikasturteko planifikazioa. Dagoeneko buruan dugu zer egin dugun eta zer egin dezakegun: ordutegiak moldatu, txandak jarri jolastokian eta jantokian, sarrerak eta irteerak mailakatuak… Gauza horiek aurten planifikatu ditugunez, datorren ikasturterako barneratuta ditugu jada.
2021/2022 ikasturterako matrikulazio kanpaina itxita dago jada.
Bai, eta gure ikastetxean oso berezia izan da. Familia batzuek ez zekiten zer egin 2 urteko umeekin, eta asko zalantzan egon dira azken ordura arte. Maiatzean etorri dira matrikula egitera, baina Delegaziotik esan digute ez dutela 2 urteko beste gela bat irekiko gure zentroan. Udalerriko beste ikastetxeetan hutsuneak daudenez horietan sartuko dituzte. Zentzu horretan guk galdu dugu, baina etorkizunean ikasle horiek gurera etorriko diren esperantza daukagu.
☉ Basauri
Sidenorreko presidentea ikertzen ari da Espainiako Auzitegi Nazionala, Israelgo arma enpresa bati altzairua saltzeagatik
Jose Antonio Jainaga ikertzeaz gain, zuzendaritzako beste bi kide ikertuko dituzte, kontrabandoagatik eta gizateriaren aurkako delituan parte hartzean konplize izateagatik
Jose Antonio Jainaga Sidenor enpresako zuzendaria eta beste bi kide ikertzen ari da Espainiako Auzitegi Nazionala, Israelgo arma enpresa bati altzairua saltzeagatik.
Zehazki, kontrabandoagatik eta gizateriaren aurkako delituan parte hartzean konplize izateagatik ikertuko dituzte hiru enpresariak.
Ikerketa Francisco de Jorge epaileak zabaldu du, Comunitat Palestina de Catalunya-Terra Santa elkartearen kereila baten ondorioz.
Hain zuzen ere, Sidenorrek Israel Military Industries (IMSI) konpainia israeldarrari altzairua saldu diolakoan zabaldu du epaileak ikerketa.
Epailearen ustez, Basauriko enpresako zuzendaritzako kideak “erabat jakitun” ziren saldutako materiala armak ekoizteko erabiliko zela.
Momentuz, ez dute Sidenor Aceros Especiales enpresa osoa ikertuko. Gertakariak Clerbil SL merkataritza-sozietateari ere egotz dakizkioke, sozietate horrek baitu Sidenor Holdings Europa sozietatearen administratzaile bakarraren kargua.
Hala ere, epaitegiak uste du oraingoz ez dela bidezkoa Sidenor Aceros Especiales SLU merkataritza-sozietatea pertsona juridiko ikertu gisa hartzea. Alegatutako arrazoia da enpresa horretako langileek zeregin aktiboa dutela eta salaketa publikoa egiten laguntzen dutela, bai eta ustezko delitu-jarduerarekin jarraitzea eragozten dutela ere.
Kasu horretan, epaileak Europako zuzentaraua eta arauhausteei eta ustelkeriaren aurkako borrokari buruzko informazioa ematen duten pertsonen babesa arautzen duen legea aplikatzen ditu erabaki hori hartzeko.
Harremana etetea
Sidenorrek uztailean adierazi zuen salmentak eten zituela Israelekin. BDZ mugimenduaren (Boikota, Desinbertsioa eta Zigorrak) eta sindikatuen kritiken ostean eten zuen harremana Sidenorrek Israelekin.
Hain zuzen ere, ekainean GEURIAn eta beste hedabide batzuetan zabaldu genuenaren arabera, Sidenorrek 1.207 tona altzairu saldu zizkion IMI Systems armagile israeldarrari, 2024ko abuztutik.
Enpresaren arabera, Israelekin salmentak eten zituen, “joan den apirilean Espainiako Gobernuak herrialde horri salmenta-kontratua etetea erabaki ondoren”. Aurretik, ordea, Sidenorrek, epailearen autoaren arabera, ez zion salmentarako beharrezko baimenik eskatu Espainiako Gobernuari.
☉ Basauri
La Basconiako nabeen birgaitze-proiektua idazteko kontratazio-prozesua hasi du Basauriko Udalak
Nabeak birgaitu ondoren, parte-hartze prozesua jarriko du martxan Udalak zehazteko zein jarduera kultural edo artistiko egin bertan
La Basconiako industria-nabeak birgaitzeko proiektua idazteko kontratua lehiaketa publiko bidez adjudikatzeko lizitazio-prozesua hasi du Basauriko Udalak.
Lizitazioaren oinarrizko aurrekontua 220.825 eurokoa da, eta exekuzio-epea sei hilabetekoa. Birgaitze-lanek Kultura Ministerioaren dirulaguntza jasoko dute; 4 milioi euro, zenbait urtetan banatuta.
“Nabeen eraikuntza-antolamendu egokia dela eta, proiektuak egitura metaliko errematxatua mantentzea aurreikusi beharko du. Zoladurari dagokionez, berria egingo dute. Eta, bestalde, fatxadak desmuntatu, eta berriak jarriko dituzte”, diote udal arduradunek.
Obren lehen faseari dagokionez, nabeak birgaituko dituzte: egitura sendotu, eta orubea zolatuko dute, plaza publiko estalia bihur dadin.
“Gero, analisi tekniko eta herritarren parte-hartze prozesu baten ostean, zehazkiago erabakiko da eremu hartan zein jarduera egingo diren, baina, edozelan ere, jardun kulturalak edota artistikoak izango dira”, diote udal ordezkariek.
Hiru gune
Hiru nabe birgaituko ditu Udalak: 125 metro luze eta 57 metro zabal. “Hiru nabeen azalera 7.125 metro karratu da, ia-ia San Mames futbol-zelaiaren bestekoa (7.140 metro karratu); beraz, azpiegituran gune desberdinak egon ahalko dira, erabilera kolektiboetarako”, diote.
Udalaren helburua da nabeak birgaitu ondoren sortuko den espazio berria lotunea izatea eremu hartan eraikiko dituzten etxebizitzen eta ekonomia-jarduerako gunearen artean, “eta basauriarrentzako erreferentziazko tokia ere bihurtu dadila”.
La Basconiaren industria-nabeak SEPESen lurretan daude. Erakunde horrek orubeok erosi zituen erabilera mistoko hirigintza-jarduketa abiarazteko, eta, horren barruan, eremu bi garatuko dituzte: ipar-mendebaldekoa, ekonomia-jardueretarako, eta ipar-ekialdekoa, etxebizitza- eta merkataritza-erabilerarako.
2024ko martxoan, SEPESek doan laga zizkion nabeak Basauriko Udalari. Erakunde biek sinatutako lagapen-kontratuak ezartzen du nabe horiek erabilera publikoko edo gizarte-intereseko xedeetara bideratuko direla. “Adibidez, tokiko artearen eta kulturaren zabalkundea, euskara, hezkuntza-jarduerak, gizarte-izaerakoak eta enplegua sustatzera zuzendutakoak”, diote.
☉ Basauri
Haurren aurkako sexu abusuen inguruan solasaldia antolatu dute Basauriko Marienean, Maddi Ane Txoperenarekin
‘Ez erran inori’ liburuaren aurkezpena egingo dute urriaren 29an Marienean. Bertan izango da Maddi Ane Txoperena Iribarren idazlea
Haurren aurkako sexu abusuei buruzko solasaldia antolatu dute Marienea Basauriko Emakumeen Etxean.
Sexu Informazio Bulegoarekin elkarlanean, ‘Ez erran inori’ liburuaren aurkezpena egingo dute eta solasaldian parte hartuko du Maddi Ane Txoperena Iribarren idazleak.
Urriaren 29an, asteazkenez, izango da hitzordua 19:00etatik 20:30era Marienean. Saioa doakoa da, baina bertaratzeko interesa dutenek esteka honen bitartez izena ematea gomendatu dute, bestela zuzenean Marieneara hurbilduz.
2022an kaleratu zuen nobela Txoperenak eta Lide du protagonista: haurra zela sexu abusu bat pairatu zuen, etxean bertan, Donapaleun.
Aurretik, 2020an, Elkar argitaletxeak, Beasaingo Udalak eta CAF enpresak urtero antolatzen duten Igartza Saria irabazi zuen Txoperenak ‘Ez erran inori’ nobela proiektuagatik.
☉ Basauri
Basozelaiko haurren parkean estalkia jartzeko lanak hasi ditu Basauriko Udalak
Lanak lau hilabetez luzatuko dira. Estalkia jartzeaz gain, gune horren ondoan erabilera anitzeko pista berria egingo dute
Basozelaiko futbol zelaiaren ondoan dagoen haurren parkean estalkia jartzeko lanak hasi ditu Basauriko Udalak. Gainera, futbol-zelaiaren eta jolasgunearen artean dagoen orubean futbolean edota saskibaloian jolasteko erabilera anitzeko pista eraikiko dute.
Lanak aste honetan hasi dituzte eta lau hilabetez luzatuko dira. Udalak 619.520 euro bideratuko ditu esku hartze horietan.
Bestetik, Soloarteko futbol zelaiaren atzealdean dagoen eserleku-eremua estaltzeko lanei ekingo dio laster Udalak. Eta, horrez gain, Solobarria plazan estalkia jartzeko proiektua idazteko kontratua lizitazio-prozesuan dagoela gogorarazi dute udal ordezkariek.
“Gure asmoa da udalerriko kirol-eremu eta atsedenleku gehiago estaltzen joatea, basauriarrek aisialdirako gune eta aukera gehiago izan ditzaten urte osoan zehar, baita eguraldi txarra dagoenean ere. Parke, kirol-kantxa, eskola-patio eta banku-eremu gehiago estaltzea izan zen basauriarrekin aginte-planean hartu genuen konpromisoetako bat, eta betetzen ari gara”, esan du Zuriñe Goikoetxea Hirigintza arloko zinegotziak.
☉ Basauri
Langabezian dauden 77 pertsona kontratatuko dituzte Basaurin Enplegu Planaren barruan
Gazteentzat bi lanpostu eta gainontzekoentzat beste 35 eskainiko ditu Udalak. Gainera, Lehentasunezko Arreta behar duten 40 kontratazio egingo ditu
Langabezian dauden 77 pertsona kontratatuko ditu Basauriko Udalak, Lanbidek sustatutako Enplegu Planaren barruan.
Hasteko, 16 eta 30 urte bitarteko bi gazte kontratatuko dituzte webmaster eta sistemen teknikari lanpostuetarako. Kontratazioak 12 hilabetekoak izango dira eta lan-jardunaldia % 100ekoa izango da.
“Euskadiko EGF+ programaren bitartez bi gazte kontratatuko ditugu. Helburua da gazte horiei lan-esperientzia bat eskaintzea, beren gaitasunak eta trebetasun sozial eta profesionalak indartzeko beharrezkoa izango dena”, dio Isabel Cadaval Basauriko Udaleko Enplegu arloko zinegotziak.
Beste alde batetik, beste 35 lanpostu eskainiko ditu Udalak ESTE Enplegua Sustatzeko Toki Ekintzetarako programaren barruan.
Lanpostu horiek dira: Udal Brigadarako biltegiko langilea (1), igeltsero laguntzailea (5), gidaria (1), eraikuntzako peoia (8), elektrikaria (2), eta elektrikari laguntzailea (1), administrari-laguntzailea (8), community managerra (1), Tokiko Osasun Sarearen dinamizatzailea (1), tokiko merkataritzaren alorreko prospekziogilea (1), ekintzailetzako teknikaria (1), mantentze-lanetako laguntzailea (1), ‘Merkataritza Euskaraz’ kanpainaren dinamizatzailea (1), katastroko agentea (1), humanitateetako erdi-mailako teknikaria (1), eta liburutegiko laguntzailea (1).
Kasu horietan, 3, 5 edo 9 hilabeteko kontratuak eskainiko dituzte, lan-jardunaldi desberdinekin.
Izena ematea
Basauriko Udalak bete beharreko lanpostuen ezaugarriak bidaliko ditu Lanbidera, eta han, gero, bilaketa bat egingo dute lana eskatzeko izena emanda daudenen artean, eta, gainera, eskaintzak argitaratuko ditu bere webgunean, interesa duten eta baldintzak betetzen dituztenek izena emateko aukera izan dezaten.
“Datozen egunetan zabalduko dute lanpostu horien eskaintza, eta, hartara, gomendatzen dugu datuak eguneratzea Lanbiden; bai lan-esperientziari dagokionez, baita eskuratutako titulu berriei dagokienez. Era berean, eskaintzetan izena ematera dei egiten dugu”, dio Asier Iragorri alkateak.
Izapideak Lanbideren webgunean egin ahalko dira, edo, aukeran, aurretiazko hitzordua eskatuta 945 160 600 zenbakira deituz.
“Hurrengo urratsa izango da Lanbidek hautatutako pertsonen zerrenda bidaltzea Udalari, eta hark hautaketa-prozesua egitea: teknikarien eta giza baliabidetako langileen talde espezifiko batek hautagaitzak ebaluatuko ditu, ordezkari politikoen parte-hartzerik gabe”, diote.
Beste 40 kontratazio
36 lanpostu horiez gain, beste 40 kontratazio burutuko ditu Udalak. Kasu honetan Lehentasunezko Arreta behar duten Kolektiboei daude zuzenduta lanpostuak, eta horiek dira: bankuak eta hiri-altzariak margotzea (8), eskola-orduetatik kanpo patioak dinamizatzea (Patioak Zabalik), agente zibikoa (12), eta kulturarteko horma-irudiak margotzea (8).
Programa hori Euskadiko hirugarren sektoreko entitateek kudeatuko dute. Seil hilabeteko kontratuak izango dira, lan-jardunaldiaren % 75ean, eta formakuntza eta lan-orientazioa ere eskainiko diete parte hartzen dutenei.
Basauriko Udalak deialdiaren berri emango du aurrerago, “izapidetze-fasea hasten denean”, diote.
Jose Mari Argoitia galdakoztarra hil da, Basconiako eta Athleticeko futbolari ohia
Sidenorreko presidentea ikertzen ari da Espainiako Auzitegi Nazionala, Israelgo arma enpresa bati altzairua saltzeagatik
Bideoa | Dozenaka pertsona elkartu dira Arrigorriagan Heidelberg enpresan gertatutako lan-heriotza salatzeko
Argazkiak | Aldatxa eta Urbiko Lagunak, Basauriko jaietako buruhandienak!
Argazkiak | Jaietan etenaldia egin dute ehunka basauriarrek Palestinari elkartasun keinu bat egiteko
Argazkiak | Laguntasuna eta Ontzak garaile, Basauriko jaietako Sokatira txapelketan
Bideoa | Dozenaka pertsona elkartu dira Arrigorriagan Heidelberg enpresan gertatutako lan-heriotza salatzeko
Bideoa | Berbalagun egitasmoa martxan da Basaurin eta Galdakaon, nobedade askorekin
