☉ Basauri
La Basconia eta Mercabilbao lurretarako inbertsioak lortzeko lan egingo du Basauriko Udalak
Basaurik eremu ezberdinetan erabakiak hartzeko prozesuan parte hartu ahal izatea eskatu dute Udaletik, La Basconiako eta Mercabilbaoko lurzoruen etorkizunari dagokionez
Basaurik bi lurzoru handi ditu bere mugetan: La Basconia lantegiko lursaila batetik, eta Mercabilbaokoa bestetik. La Basconiako lurzoruan Basauriko Udalak bertako nabeak berrituko ditu, erabilera publikoko espazio bihurtzeko. Gainera, SEPESek (Espainiako Garraio, Mugikortasun eta Hiri Agendako ministerioari atxikitako Lurzoruaren Enpresa Erakunde Publikoa) 35 milioi euro baino gehiago inbertituko ditu La Basconiako lursailetan, alde batetik alokairuzko 398 etxebizitza eraikitzeko, eta bestetik jarduera ekonomikoa garatzeko.
Mercabilbaoko lurzoruari dagokionez (lurzoruaren jabea Bilboko Udala da), 2027ra arte mantenduko dute orain arte ezagutu dugun jarduera ekonomikoa, Ortuellan egingo duten Euskadiko Elikagaien Campus berrian ezarri aurretik. La Basconiako proiektua garatuta dagoen bitartean, momentuz ez dago alternatibarik Mercabilbaoko lursailetarako.
Basauriko Udala bi lurzoruen etorkizuna aztertzen ari da, eta biak herriarentzat “aukera-lurzoru berriak” direla adierazi dute udal gobernu taldeko ordezkariek. Ildo horretan, oposizioko talde nagusiak, EH Bilduk, mozio bat aurkeztu zuen urtarrileko osoko bilkuran, La Basconiako eta Mercabilbaoko lurzoruen etorkizuneko erabileraren inguruan.
“Udal hauteskundeetako kanpainan zehar, alderdi guztiok gure interesa eta kezka adierazi genuen La Basconiako eta Mercabilbaoko lurzoruen erabileraren inguruan. Orube horien egoera desberdina da jabegoari, erabilerari eta egoerari dagokionez, eta esku-hartze desberdinak izan behar dira batean zein bestean irtenbideak bilatzeko”, adierazi zuen Zigor Isuskiza EH Bilduko ordezkariak.
Koalizio ezkertiarrak udal-talde politikoen arteko Jarraipen Batzordea eratzeko eskatu du, baita Herriko Kontseilua sortzeko ere, “gai honen inguruan orube horien erabilerari dagokionez herritarren eta eragileen parte-hartzea bermatu ahal izateko”, adierazi zuen Isuskizak: “Gure ustez bi foro horien arteko koordinazio bat egon beharko litzateke, elkarlana sustatzeko”.
Udal gobernu taldearen ustez “ez da beharrezkoa” bi foro horiek sortzea: “Dagoeneko beste batzorde batzuk existitzen dira gai horien inguruan hitz egiteko, eztabaidatzeko eta erabakitzeko”, adierazi zuen Maria Larrinaga EAJko bozeramaileak: “Uste dugu ez dela beharrezkoa batzordeak bikoiztea. Udaleko alderdi guztiek, oposizioak barne, zehaztasun osoz informazioa jasotzen dugu”.
“Jarraipen Batzorde bat eratzeari dagokionez, garrantzitsua da gogoraraztea bi lurzoru horien titulartasuna ez dela Udalarena. Hala ere, Basauriko Udaletik eremu ezberdinetan erabakiak hartzeko prozesuan parte hartu ahal izatea eskatu dugu, batez ere elkartzeko, aztertzeko eta planifikatzeko marko bat indartzeko”, adierazi zuen Larrinagak.
La Basconiako lurzoruen kasuan SEPESekin sinatutako akordioa gogora ekarri zuen Larrinagak: “Eremu horren garapena ahalbidetzeko hitzarmena sinatu genuen eta horretan urratsak emango ditugu”.
“Herri Kontseilua sortzeari dagokionez, 250.000 biztanletik gorako udalerrientzat edo probintzietako hiriburuentzat araututa dago, baldin eta, biztanle-tamainagatik, udalerri edo hiriburu horiek eratzera behartzen badute, guk esan bezala, Udalak gaituta dituen tresnen bidez, hala nola, batzordeak, kontseiluak eta osoko bilkurak”, adierazi zuen Larrinagak.
“Udalaren borondatea beti da parte-hartzea eta gardentasuna ahalbidetzen duten bideak sustatzearen aldekoa. Hori ezin da zalantzan jarri eta, horregatik, hilero egiten da departamentu bakoitzeko batzordea. Horietan udal teknikariek hartzen dute parte eta alderdi askotan argia ematen digute”, adierazi zuen Larrinagak, eta horrela bukatu zuen bere mintzaldia: “Gobernu talde honek legealdi honetan bultzatu nahi dituen proiektu estrategikoen artean dago La Basconia eta Mercabilbao lurretarako inbertsioak bilatzea”.
Eztabaida udalbatzan
Alderdi jeltzaleak bezala, alderdi sozialistak ere uste du ez dela beharrezkoa bi foro gehiago sortzea: “La Basconiako lursailei dagokienez, uste dugu ez dagoela askoz gehiago zehazteko garatuko den berariazko jarduera ekonomikoaz harago. Eta hori ez luke Jarraipen Batzorde batek erabakiko, ezta Hiri Kontseilu batek ere. Mercabilbaoko lurren kasuan, kezkatzeko moduko hainbat zalantza daude, egia esan. Teorian, 3 urte baino ez dira geratzen Ortuellara lekualdatzeko eta, egia esan, oraindik ez da zehaztapenik egin. Talde sozialistatik uste dugu argiago egon beharko lukeela egungo jarduera zerk ordeztuko duen”, adierazi zuen Isabel Cadaval PSEko bozeramaileak.
Marian Cantero Elkarrekin Podemoseko ordezkariaren arabera, “Mercabilbaoren lekualdaketari dagokionez, bi aukera ditugu: beste erakunde batzuek gure etorkizuna erabaki arte itxarotea edo kalitatezko enplegua sortzen duten enpresak ekartzeko borrokatzea eta lan egitea. Horrek guztiak elkarrekin lan egitera eraman behar gaitu, eta udal gisa ahalegin bat egin behar dugu foro guztietan aktiboki parte hartzeko, negozioak sustatzeko eta sortzeko”.
Ildo berean, Zigor Isuskizak zera gaineratu zuen: “Argi daukagu Basauriko hirigintza etorkizuna jokoan dagoela. Bi lurzoru horiek garrantzitsuak, eta horregatik uste dugu ezinbestekoa dela parte hartzeko foroak sortzea. Uste dugu proiektu horiek ez dutela zertan gobernu talde batenak izan; uste dugu herri-proiektuak izan behar direla”. PPko Edu Rodriguez EH Bilduren mozioaren alde agertu zen, baita Elkarrekin Podemos ere. Gobernu taldeak kontran bozkatu zuen.
Basauriko Herri Krosaren 43. edizioa izango da azaroaren 2an, igandez.
Irteera eta helmuga Artunduaga kiroldegia izango dira eta kategoriaren arabera irteera-ordutegi eta distantzia desberdinak egongo dira:
- 10:15. 2020-2025 urteetan jaiotakoak: 400 metroko lasterketa
- 10:30. Kategoria absolutua: 11 kilometro
- 10:35. 2014-2015, 2012-2013 eta 2010-2011 urteetan jaiotakoak: 3,5 kilometroko lasterketa
- 10:40. 2018-2019 eta 2016 eta 2017 urteetan jaiotakoak: 1,2 kilometroko lasterketa (atletismo pistari 3 itzuli)
Basauriko Herri Krosean parte hartzeko izena ematea zabalik dago kirolprobak.com webgunean gaur arte, urriaren 29ra arte, 23:59ak arte.
San Jose Ikastetxeko Ikasle Ohien Elkarteak eta Kukurrustu Kirol Klubak antolatzen dute Basauriko Herri Krosa.
☉ Basauri
Azeituna con huesos, Keax, Reeler, Jaimones, Kruddö eta Silkat lehiatuko dira larunbatean, Rockeineko finalean
Rockeinen 2025eko edizioan 196 artistak eman dute izena, 10. urtez jarraian parte hartze marka gaindituz
Larunbat honetan, azaroaren 1ean, izango da Rockein lehiaketako finala, Basauriko Social Antzokian. Bertan, Azeituna con huesos, Keax, Reeler, Jaimones, Kruddö eta Silkat bandak lehiatuko dira. Sarrera doakoa izango da eta gonbidapen bidez egingo da, Social Antzokiko webgunetik eskuratuz.
Basauriko Udalak, Bizkaiko Foru Aldundiaren Kultura, Euskara eta Kirol sailaren laguntzaz, antolatu eta Euskadiko eta Nafarroako talde eta bakarlariei zuzendutako Rockein musika-lehiaketaren 13. edizioaren finala izango da aurtengoa.
Azeituna con Huesos talde gipuzkoarra (elektronika, popa, jazza); Keax hirukote bizkaitarra (The Owl Project taldeko kide ohiak, LCD Soundsystem edo Ratatat bezalakoen eraginekin); eta Bilbon egoitza duen Reeler rock alternatiboko laukotea, Bizkaiko, Poloniako, Ingalaterrako eta Irlandako musikariek osatua, dira Rockeinen 13. edizioko sari nagusia irabazteko hiru hautagaiak.
Eskualdeko hautagaiak
Beste hiru talde finalistak Jaimones (70-80 hamarkadako rock amerikar laukotea, Basauriko kide batekin), Kruddö, rock gogor eta stoner bikotea, Jon Ander Santamaría bermeotarrak eta Txaber Miravalles etxebarriarrak osatua; eta dira Silkat, indie rock hirukotea, Bilbo eta Galdakaoko musikariekin eta The Cure edo Radiohead taldeen eraginekin.
Azken hiru talde hauek Hego Uribeko artistarik onenari saria lortzeko aukera izango dute, Basaurin, Arrigorriagan, Etxebarrin, Galdakaon, Ugaon, Usansolon edo Zaratamon erroldatutako kide bat gutxienez duten proiektuak saritzen baititu.
“Ohi bezala, Rockeineko 5 kategorien irabazleen izenak (‘Bizkaia saria’, ‘Artistarik onena euskaraz’ eta ‘Eskarabilera saria’, barne) finalean bertan jakinaraziko ditu epaimahaiak”, azaldu dute antolaketa taldetik. Rockeinen 2025eko edizioan 196 artistak eman dute izena, 10. urtez jarraian parte hartze marka gaindituz.”
Emakumeen esperientziaren hitzaldia
Azaroaren 6an, MAZ Basauri jaialdiaren bezperan hain zuzen ere, ‘Emakumeak eta industria musikala’ topaketaren bigarren emanaldia hartuko du Marienean Basauriko Emakumeen Etxeak (Kareaga Goikoa, 54).
Iaz lehen edizioa izan zen eta Rockeinek, MAZ Basaurik eta Marieneak urtero antolatzen duten hitzaldia da, eta helburua musikaren industriako emakumeen esperientziak beste emakume batzuekin partekatzea da, “sektorean eta eszenatokietan emakumeen presentzia handiagoa sustatzeko”, hain zuzen ere.
Aurtengo gonbidatuak La Furia artista nafarra, Ibone Iza BIME Proko edukien arduraduna eta Maite Alaña MAZ Basauri eta Rockeineko zuzendaria izango dira eta Emilia Arias kazetari eta idazleak (TVE, Pikara Magazine) gidatuko du hitzaldia.
Egitaraua | Rockein finala 2025
Larunbata, azaroak 1
20.30 (ateak irekitzea)
Hego Uribeko artistarik onenaren kategoria
21.00 Silkat
21.30 Kruddö
22.00 Jaimones
Kategoria nagusia
22.40 Azeituna con huesos
23.10 Reeler
23.40 Keax
00.15 Sari-banaketa
☉ Basauri
Basauriko Social Antzokiko zubia itxiko dute ibilgailuentzat, San Faustoko obrengatik
Urriaren 28tik (asteartetik) azaroaren 9ra bitartean ibilgailuen trafikoa moztuko dute zubian
Urriaren 28tik (asteartetik) azaroaren 9ra bitartean ibilgailuen trafikoa moztuko dute Social Antzokiko zubian, San Fausto plaza berria eraikitzeko lanak direla eta.
“Egun horietan zehar, zubiko galtzada handituko dute, eta Autonomia kalekoa ere bai, elizaren eta A25 plazaren aurreko zatian”, azaldu dute udal ordezkariek. Hori dela eta, denbora tarte horretan ezingo da Autonomia kaletik udaletxerantz biratu, eta udaletxe eta Kareaga Goikoa kaleen arteko bidegurutzetik Arizgoitira jaitsi ere ez.
Gainera, Basauriko Udaletik iragarri dute azaroaren 4tik 9ra Autonomia kalean itxita egongo dela Begoñako Andra Mari eta Nagusia kaleen arteko zatia.
☉ Basauri
Sidenorreko presidentea ikertzen ari da Espainiako Auzitegi Nazionala, Israelgo arma enpresa bati altzairua saltzeagatik
Jose Antonio Jainaga ikertzeaz gain, zuzendaritzako beste bi kide ikertuko dituzte, kontrabandoagatik eta gizateriaren aurkako delituan parte hartzean konplize izateagatik
Jose Antonio Jainaga Sidenor enpresako zuzendaria eta beste bi kide ikertzen ari da Espainiako Auzitegi Nazionala, Israelgo arma enpresa bati altzairua saltzeagatik.
Zehazki, kontrabandoagatik eta gizateriaren aurkako delituan parte hartzean konplize izateagatik ikertuko dituzte hiru enpresariak.
Ikerketa Francisco de Jorge epaileak zabaldu du, Comunitat Palestina de Catalunya-Terra Santa elkartearen kereila baten ondorioz.
Hain zuzen ere, Sidenorrek Israel Military Industries (IMSI) konpainia israeldarrari altzairua saldu diolakoan zabaldu du epaileak ikerketa.
Epailearen ustez, Basauriko enpresako zuzendaritzako kideak “erabat jakitun” ziren saldutako materiala armak ekoizteko erabiliko zela.
Momentuz, ez dute Sidenor Aceros Especiales enpresa osoa ikertuko. Gertakariak Clerbil SL merkataritza-sozietateari ere egotz dakizkioke, sozietate horrek baitu Sidenor Holdings Europa sozietatearen administratzaile bakarraren kargua.
Hala ere, epaitegiak uste du oraingoz ez dela bidezkoa Sidenor Aceros Especiales SLU merkataritza-sozietatea pertsona juridiko ikertu gisa hartzea. Alegatutako arrazoia da enpresa horretako langileek zeregin aktiboa dutela eta salaketa publikoa egiten laguntzen dutela, bai eta ustezko delitu-jarduerarekin jarraitzea eragozten dutela ere.
Kasu horretan, epaileak Europako zuzentaraua eta arauhausteei eta ustelkeriaren aurkako borrokari buruzko informazioa ematen duten pertsonen babesa arautzen duen legea aplikatzen ditu erabaki hori hartzeko.
Harremana etetea
Sidenorrek uztailean adierazi zuen salmentak eten zituela Israelekin. BDZ mugimenduaren (Boikota, Desinbertsioa eta Zigorrak) eta sindikatuen kritiken ostean eten zuen harremana Sidenorrek Israelekin.
Hain zuzen ere, ekainean GEURIAn eta beste hedabide batzuetan zabaldu genuenaren arabera, Sidenorrek 1.207 tona altzairu saldu zizkion IMI Systems armagile israeldarrari, 2024ko abuztutik.
Enpresaren arabera, Israelekin salmentak eten zituen, “joan den apirilean Espainiako Gobernuak herrialde horri salmenta-kontratua etetea erabaki ondoren”. Aurretik, ordea, Sidenorrek, epailearen autoaren arabera, ez zion salmentarako beharrezko baimenik eskatu Espainiako Gobernuari.
☉ Basauri
La Basconiako nabeen birgaitze-proiektua idazteko kontratazio-prozesua hasi du Basauriko Udalak
Nabeak birgaitu ondoren, parte-hartze prozesua jarriko du martxan Udalak zehazteko zein jarduera kultural edo artistiko egin bertan
La Basconiako industria-nabeak birgaitzeko proiektua idazteko kontratua lehiaketa publiko bidez adjudikatzeko lizitazio-prozesua hasi du Basauriko Udalak.
Lizitazioaren oinarrizko aurrekontua 220.825 eurokoa da, eta exekuzio-epea sei hilabetekoa. Birgaitze-lanek Kultura Ministerioaren dirulaguntza jasoko dute; 4 milioi euro, zenbait urtetan banatuta.
“Nabeen eraikuntza-antolamendu egokia dela eta, proiektuak egitura metaliko errematxatua mantentzea aurreikusi beharko du. Zoladurari dagokionez, berria egingo dute. Eta, bestalde, fatxadak desmuntatu, eta berriak jarriko dituzte”, diote udal arduradunek.
Obren lehen faseari dagokionez, nabeak birgaituko dituzte: egitura sendotu, eta orubea zolatuko dute, plaza publiko estalia bihur dadin.
“Gero, analisi tekniko eta herritarren parte-hartze prozesu baten ostean, zehazkiago erabakiko da eremu hartan zein jarduera egingo diren, baina, edozelan ere, jardun kulturalak edota artistikoak izango dira”, diote udal ordezkariek.
Hiru gune
Hiru nabe birgaituko ditu Udalak: 125 metro luze eta 57 metro zabal. “Hiru nabeen azalera 7.125 metro karratu da, ia-ia San Mames futbol-zelaiaren bestekoa (7.140 metro karratu); beraz, azpiegituran gune desberdinak egon ahalko dira, erabilera kolektiboetarako”, diote.
Udalaren helburua da nabeak birgaitu ondoren sortuko den espazio berria lotunea izatea eremu hartan eraikiko dituzten etxebizitzen eta ekonomia-jarduerako gunearen artean, “eta basauriarrentzako erreferentziazko tokia ere bihurtu dadila”.
La Basconiaren industria-nabeak SEPESen lurretan daude. Erakunde horrek orubeok erosi zituen erabilera mistoko hirigintza-jarduketa abiarazteko, eta, horren barruan, eremu bi garatuko dituzte: ipar-mendebaldekoa, ekonomia-jardueretarako, eta ipar-ekialdekoa, etxebizitza- eta merkataritza-erabilerarako.
2024ko martxoan, SEPESek doan laga zizkion nabeak Basauriko Udalari. Erakunde biek sinatutako lagapen-kontratuak ezartzen du nabe horiek erabilera publikoko edo gizarte-intereseko xedeetara bideratuko direla. “Adibidez, tokiko artearen eta kulturaren zabalkundea, euskara, hezkuntza-jarduerak, gizarte-izaerakoak eta enplegua sustatzera zuzendutakoak”, diote.
Ertzaintzako agente batek drogetan positibo eman du Etxebarri parean gertatutako esku hartze baten ostean
Igerilekuan liburutegi bat sortzeko proposamena landuko du Haurren Kontseiluak Galdakaon
‘Katana’ bakarrizketa eta ‘Azkena eta bagoaz’ euskarazko obra eskainiko dituzte Ugaoko ‘Ostiralero antzerkiarekin bat’ zikloan
Argazkiak | Ehun arrigorriagar baino gehiagok Heidelberg enpresan gertatutako heriotza-istripua salatu dute herriko plazan
Argazkiak | Aldatxa eta Urbiko Lagunak, Basauriko jaietako buruhandienak!
Argazkiak | Jaietan etenaldia egin dute ehunka basauriarrek Palestinari elkartasun keinu bat egiteko
Bideoa | Dozenaka pertsona elkartu dira Arrigorriagan Heidelberg enpresan gertatutako lan-heriotza salatzeko
Bideoa | Berbalagun egitasmoa martxan da Basaurin eta Galdakaon, nobedade askorekin
