Basauriko Danbolin Txistulari Elkarteak 40 urte bete ditu aurten eta kontzertu berezi bat eskainiko du bihar, azaroak 29, Social Antzokian.

Kontzertu berezia, gonbidatu bereziekin. Izan ere, txistulariak ez dira bakarrik igoko oholtzara. Lagun izango dituzte: La Moncaina; Basauri Koral Elkartea; Zirzira; Agintzari; Basauritar; Edurre; Bizkaiko Gaiteroak; eta Ondalan.

Era berean, herriko zenbait musikarik ere parte hartuko dute. Besteak beste, Ibone Obieta, Aitor Aburto, Jose Ramon Pacorro eta Aritz Madariaga. Eta, Danbolineko ordezkariek adierazi dutenez, Itziar Ituño aktore eta abeslaria ere igoko da taula gainera.

Kontzertua 19:30ean hasiko da. Sarrera doakoa da, baina gonbidapenak jaso behar dituzte interesdunek Danbolinen lokalean (Ibaigane kalea z/g, Basauri Denon Eskolaren ondoan). Gaur da gonbidapenak jasotzeko azken eguna, 18:30etik 19:30era.

Indarkeria matxistaren biktimek eta bizirik atera direnek arreta egokia jasotzen ez dutela salatu du Basauriko Asanblada Feministak.

“Baliabide egokirik ez izateak dakarren berbiktimizazioa eta indarkeria instituzionala mahai gainean jarri nahi ditugu”, salatu dute.

Azaroaren 25ean, Emakumeen aurkako indarkeria ezabatzeko Nazioarteko Egunean, Basauriko Asanblada Feministak gutuna publikatu zuen GEURIAn [hemen irakurgai] eta atzo, azaroak 27, elkarretaratzea egin zuten Bentako plazan.

Epaitegiek Mercadona zigortu dute aldi baterako ezintasun-egoeran haurdun zegoen langile bat diskriminatzeagatik.

ELA sindikatuak azaldu duenez, primaren ordainketa kendu zioten: “Langilea haurdunaldiagatiko bajan zegoen, besteak beste, zorabioengatik. Enpresak jakinarazi zion ez zegoela ados aldi baterako ezintasunarekin, eta horregatik ez ziotela zegokion 6.326 euroko prima ordainduko”, adierazi dute sindikatuko ordezkariek.

Zenbateko horrez gain, 7.500 euroko kalte ordaina eman beharko dio Mercadonak emakumeari, “diskriminazioagatiko oinarrizko eskubidea urratzeagatik”.

“Nabarmendu nahi dugu kasu hau ez dela salbuespena. Mercadonak modu planifikatuan eta diseinatuan jarduten du langileek uko egin dezaten aldi baterako ezintasunei, lanaldi murrizketei edo zaintzagatiko eszedentziei”, salatu dute ELAko ordezkariek.

“Horregatik, Mercadonako dendetan egiten diren irregulartasunen eta bidegabekerien aurrean borrokan jarraituko dugu, bai sindikaldi bai juridikoki”, adierazi dute ELAtik.

Iñaki Artola pilotariak eta Iker Iriarte bere botilleroak hitzaldi jendetsua eskaini zuten atzo arratsaldean Basauriko Artunduaga pilotalekuan,  ‘Kirolarien Psikologia’ gaia hizpide hartuta.

Jardueraren ardatza Bidebieta Pilota Taldeko pilotariekin sortutako lotura izan zen. Hitzaldia amaitzean, haurrek eta gazteek galdera ugari egin zizkieten Artolari eta Iriarteri, eta gustora erantzun zituzten.

Pilotariak eta botilleroak gaztetxoen jakin-mina eta ilusioa azpimarratu zuten, eta taldeko ikasleekin sortu zen giroa nabarmendu zuten. Pilotari profesional batek bizi dituen une gogorrez eta lorpenen atzean dagoen lanaz hitz egitearekin bagera, Artolak eta Iriartek pilotarekiko zaletasuna eta pasioa transmititzea lortu zuten.

Kirol munduaren alde ezezaguna ikusarazteko eta herriko pilota mugimendua indartzeko balio izan zuen jarduerak.

Ondas Sariak banatzeko ekitaldia antolatu zuten atzo Bartzelonako Teatre del Liceun. Eta, azaroa hasieran iragarri bezala, Isabel Cadenas Cañon basauriarrak podcast onenaren Ondas saria jaso du.

‘Se llamaba como yo’ podcast sortak jaso du saria, epaimahaiaren arabera, “historia handiak, askotan, gizarteak edo gutako bakoitzak errealitate deserosoak ezkutatzeko altxatzen dituen isiluneen atzean ezkutatzen direla balioesteagatik”.

Isabelek saria jaso zuenean zera esan zuen: “‘De eso no se habla’ proiektuan oso material hauskorra lantzen dugu, etxe bakoitzeko ateen atzean ezkutatzen diren isiluneak, alegia. Eskerrik asko, benetan, epaimahaiari, familia baten isiluneak, isilune indibidualak eta herri oso baten isilune kolektiboak lotzen dituen istorio honen memoria konplexua aintzatesteagatik”.

“Isiltasun indibidualak eta kolektiboak batzea da podcast honetan gehien gustatzen zaigun bigarren gauza. Gehien gustatzen zaigun gauza istorioen protagonistak entzutea da”, amaitu zuen bere hizketaldia Isabelek.

‘Se llamaba como yo’ podcast sortako ordezkariak // Youtube: Cadena Ser

Orduan, Begoña Urroz Ibarrolari eman zion hitza, podcastaren protagonista nagusia: “Nik eskerrak eman nahi dizkiet Isabeli eta bere taldeari lan zorrotz eta bikain honengatik jaso duten sari honengatik. Entzun duzuenok nire ahotsa ezagutu duzue, eta gaur hemen ezagutu nazazue. Gurasoak eta anaia ez daude jada gurekin, baina ziur nago entzun izana gustatuko zitzaiela eta behar izango zutela. Eskerrik asko”.

Isilarazitako sekretuak

Podcastak Begoña Urroz Ibarrola du protagonista. 1960. urtean, 22 hilabete zituela, Donostiako Amarako tren geltokian leherrarazi zuten bonba batek hil zuen.

Urteetan zehar, ETA erakundeari egotzi zitzaion erasoaren egiletza eta talde horren lehen atentatu hilgarritzat jo izan zen. Eta, bertsio horri erakunde ofizialek, komunikabideek eta zenbait politikok eutsi zioten.

Geroago egindako ikerketen arabera, atentatua DRIL taldeak egin zuen (Directorio Revolucionario Iberico de Liberación). 1959. eta 1964. urteen artean frankisten aurka jardun zuen taldeak, eta galiziar eta portugaldar erbesteratuek osatu zuten.

Eta Begoña hil eta bi urtera bere ahizpa jaio zen: Begoña Urroz Ibarrola hau ere. Emakume horren istorioa berreraiki du Isabelek podcastean: neskato haren dolua ezkutuan bizi izan zuen familia batena; ikerketa ezinezkoa zirudien garaiko isiltasuna; eta 50 urte geroago, isiltasuna apurtzera etorri zen zarataren istorioa.

‘Se llamaba como yo’ podcasta zortzi kapituluk osatzen dute eta entzungai dago hainbat plataformetan. Hala nola, EITBren GUAU audio plataforman.