☉ Galdakao
Zuhatzu auzoa eraldatuko du Udalak, URAk Ibaizabal ibaia hobetzeko lanak hasi ondoren
Ibaizabal ibaiko hustubidea hobetzeko lanak hasiko ditu URAk abenduan, Bengoetxe eta Plazakoetxe artean. Ondoren Udalak Zuhatzu eraldatzeari ekingo dio
URA Euskal Agentziak Ibaizabal ibaia bideratzeko lanen hirugarren faseari ekingo dio abendutik aurrera. Hala jakinarazi du Galdakaoko Udalak. Esku-hartzea Arkotxako Firestone ingurutik Plazakoetxe ondorengo Torrezabal zubirainoko tartean izango da. Uraren joan etorriari leku gehiago emanda uholde arriskua desagerraraziko dute lanek. “Ibaia bideratu ondoren, Zuhatzun askotan gertatu diren uholdeak saihesteaz gain, auzokideek eta, oro har, galdakoztarrek aisialdirako gune bat izango dute, Udalak pasealeku berria osatuko baitu”, diote udal ordezkariek: “Ibaiaren berbideratzetik etorriko da inguru atseginago batean bizitzea, eta beraz, auzokideen bizi kalitatea hobetuko da”. Hain zuzen ere, Zuhatzu auzoak aldaketa nabarmena izango du datozen hilabeteetan. Ibaizabal ibaia bideratzeko lanak hastearekin batera, Udalak hainbat jarduera jarriko ditu abian. Iñigo Hernando alkatearen iritziz, “apustu argia dira mugikortasuna bultzatzeko eta oinezkoak eta motorrik gabeko ibilgailuak erdigunean jartzeko, ingurune askoz ere atseginagoa sortuz”.
Ibaizabal ibaiko bideratze lanez gain, bi esku hartze nagusi proposatu ditu Galdakaoko udal gobernu taldeak. Alde batetik, biribilgune berri bat egingo dute N-634 errepidean, Plazakoetxera heldu aurretik norabide aldaketa dagoen gunean. “Plazakoetxera heldu beharrik gabe Bilbotik datorren errepide nagusitik Zugutzura zuzenean iristea ahalbidetuko du. Ibaia zeharkatuko duen zubia egingo da hartarako. Saihesbide horrek ibilgailu gutxitzea ekarriko dio Galdakaoko sarrera nagusienetako bati, Plazakoetxeri. Hala, Zugutzuko bizilagunak eta bertako industria enpresetara doazen kamioiak Galdakao erditik igaro gabe iritsi ahalko dira N-634 errepidera”, dio Asier Egiraun Hirigintza arloko zinegotziak. Lanak “laster” esleituko dituztela diote udal ordezkariek, “datozen hilabeteetan biribilgunea egiteko obrak hasteko”. Beste alde batetik, aipatutako lan horiek baliatuta, Zuhatzu inguru guztia lasaitu eta biziberritzeko beste lan batzuk egitea erabaki du Udalak. Esate baterako, Txomin Egileor kalea norabide bakarreko bihurtuko du: “Horrela, oinezkoek zein bizikletek lekua irabaziko dute. Orain errepide denaren erdia espaloi eta bidegorri bihurtuko da, trafikoa nabarmen lasaituta”, dio Egiraunek: “Bidegorria Plazakoetxetik Zugutzuko Victor Anaia kalera helduko da, eta kale horretan oinezkoek lehentasun osoa izango dute: bertako bizilagunak soilik igaro ahalko dira bertara autoz, eta ezin izango da han aparkatu”. Hala ere, Formica lantegia zenaren inguruan 500 bat ibilgailurentzako aparkalekua eraikitzea aurreikusi dute udal ordezkariek. Gainera, Santa Barbara futbol zelaiko aparkalekua mantenduko dutela diote. “Formica zen inguruko aparkaleku berritik futbol zelaira, tenis zein padel pistetara eta inguruko erresidentzietara berehala helduko da oinez, aparkaleku berria eta Victor Anaia kalea lotuta egongo baitira”, dio Egiraunek.
Gaur moda desfilea egon da Galdakaoko jaietan. Fashion Day eguna antolatu du bigarren urtez Gazte Berpiztuk eta hainbat kuadrillak hartu dute parte. Jantzirik eta aurkezpenik onena Antzeko kuadrillak egin du, bigarren sailkatu da Dekantzekoz eta hirugarren Trikiriki. Laugarren Antropayak izan da eta bosgarren Piperrak. Hona hemen desfileko irudirik onenak!
☉ Galdakao
Bi gazte atxilotu dituzte Galdakaoko etxebizitza batean indarrez sartzeagatik
Olabarrieta auzoko etxebizitza batean indarra erabilita sartu ziren bart 19 eta 21 urteko bi gazte. Epailearen esku jarriko ditu Ertzaintzak
Ertzaintzak 19 eta 21 urteko bi gazte atxilotu ditu Galdakaoko Olabarrieta auzoko etxebizitza batean indarrez sartzeagatik.
Gertaerak bart gauerdian jazo dira: pertsona batek SOS Deiakera deitu du Olabarrietan dagoen eta une horretan hutsik zegoen aita-amaginarreben etxean indarrez sartu direla esanez, instalatuta zuten zaintza-kamera deskonektatu egin dutela konturatu baitira.
Orduan, patruila bat bertaratu eta argi bat piztuta ikusi zuten eta etxebizitzaren goiko aldean bi gazteak aurkitu dituzte.
Bi gazteak epailearen esku utziko dituzte dagozkion eginbideak amaitu ostean.
☉ Galdakao
Bideoa | Antzeko, Bertan Kaldo eta Dekantzekoz, Galdakaoko jaietako Playback lehiaketako onenak!
Playback lehiaketa mundiala da Galdakaoko jaietan eta atzo zuzenean bizi genuen! Txapeldun Antzeko izan zen: Mamma Miaren ‘Ai ama!’ bertsio euskalduna egin zuen kuadrillak. Euren amei omenaldi zoragarria egin zieten.
Bigarren Bertan Kaldo izan zen, hirugarren Dekantzekoz, laugarren Trikiriki eta bosgarren Erdu Mizketan.
GEURIAn lehenengo hiru postuetan sailkatutako ordezkariak elkarrizketatu zituen: Mirene eta Izaskun (Antzeko), June eta Ane (Bertan Kaldo), eta Ane eta Janire (Dekantzekoz). Aupa zuek!
Playback lehiaketa arrakastatsua da Galdakaoko jaietan. Eta aurten ere ez du hutsik egin, beste urte batez Zizpak antolatuta. Irabazle Antzeko izan da, euren Ai Ama! (Mamma Mia!) bertsioari esker, amei omenaldia eginez. Bigarren Bertan Kaldo izan da, hirugarren Dekantzekoz, laugarren Trikiriki eta bosgarren Erdu Mizketan.
☉ Galdakao
Galdakaoko GBGE elkartea Europako bi saritan finalista hautatu dute Valentziako uholdeetan egindako lanengatik
Gaur Vienako udaletxean, Austrian, Innovation in Politics Awards sarien irabazleak emango dituzte jakitera, eta otsailean Zero Project sariak banatuko dituzte Vienan ere
Galdakaoko GBGE elkartea Europako bi saritan finalista hautatu dute, iazko urritik Valentziako uholdeek kaltetutako eremuetan egindako lanengatik.
Alde batetik, Innovation in Politics Awards sarietan bi izendapen izan dituzte bi proiektu hauengatik: Nave 51 eta Garbitegi humanitarioa.
Nave 51 izeneko proiektuan, Paiportan 40.000 tona laguntza humanitario bideratzeko aukera eman zuen GBGEk, “xahuketa minimizatuz eta jasotako laguntza guztia ahalik eta gehien aprobetxatuz, milaka boluntario eta militarri esker”, dio Ainhoa Crespo GBGEko ordezkariak.
Eta Garbitegi humanitarioa delakoan uholdeek lokatzez hondatutako arropa berreskuratu zituzten, “balio praktiko eta emozional handiko doako zerbitzua eskainiz”, dio Crespok.
Innovation in Politics Awards sarien banaketa gaur, irailak 17, izango da Vienako udaletxean, Austrian.
Otsailean: Zero Project sariak
Beste alde batetik, GBGE finalista izendatu dute Zero Project sarietan, “Krisi-egoeretan desgaitasunaren aurrean inklusioa” kategorian.
GBGE elkarteko boluntarioak Valentziako hondamendian // GBGE
Ekintza humanitarioetan, larrialdietan eta hondamendietan inklusio-irtenbideak aitortzen ditu sariketa horrek, eta sari banaketa otsailean izango da Vienan ere; kasu horretan, Nazio Batuen egoitzan.
“Izendapen hauek nazioarteko aitorpena dira Valentziako Dana-ren ondoren izandako elkartasun uholdeari. Nabarmentzekoa da beste modu batean ere erantzun daitekeela hondamendiei: zirkularra, inklusiboa eta aliantzetan oinarritua. Umiltasunez jasotzen dugu, oraindik ere asko dagoelako berreskuratzera iristeko, baina pozik ere bai, pertsona askoren lan ikaragarriari egindako aitortza delako”, adierazi du Crespok.
Argazkiak | Moda pasarela bilakatu da gaur Galdakao, Santakurtze jaietan
‘Jone, batzuetan’ filma euskaraz proiektatuko dute Social Antzokian, Basaurin
Ahotsa “askatzeko” tailerra antolatu dute Arrigorriagan, euskara hutsean
Argazkiak | Moda pasarela bilakatu da gaur Galdakao, Santakurtze jaietan
Argazkiak | Galdakaoko jaietako Playback lehiaketa 140 argazkitan!
Argazkiak | Kuadrillak busti dira gaur Galdakaoko jaietan: batzuk euripean, beste batzuk Paddle Surfean
Bideoa | DJ Pipi Galtzaluze: «Musika ona, energia eta publikoarekin konektatzea da ondo pasatzeko gakoa»
Bideoa | Antzeko, Bertan Kaldo eta Dekantzekoz, Galdakaoko jaietako Playback lehiaketako onenak!
