Austarri Mendi Taldeak irteera berria programatu du Gaztela eta Leoneko mendietara. Oraingo honetan Cadagua (411mt), Canto Muriel (896mt), Cantonad (820mt) eta Lezana (366mt) tontorretatik igaroko dira egun bakarreko irteeran, irailaren 21ean.

“Mendi-ibiliak maite dituztenentzako gune interesgarri baten parte dira. Mendi horietara igotzeko, pagadi-basoez gozatzeko eta Kadagua ibaiaren sorrera bisitatzeko ibilbide zirkularrak egiten dituzte. Tontorren gailurretik Peña Mayor eta Mena Harana bezalako tokiak ikus daitezke. Ibilbideak mendi-mazelak inguratzen ditu, bide arabiarretik igarotzen da eta Cantonad eta Canto Muriel tontorretara igotzen da”, azaldu dute.

Autobusa 08:00etan abiatuko da irailaren 21ean Zeberioko plazatik. Mendizaleek egin beharreko ibilbidea 14 kilometrokoa izango da. Izena emateko azken eguna hilaren 17a da. Aurrez aurre egin daiteke Hogarrean (barikuetan, Hogarrean, 20:00etatik 21:00ak arte) edo telematikoki: austarrimenditaldea@gmail.com helbidera idatziz. Telefonoz egiteko aukera dago ere. Horretarako, interesdunek  665 735 054 edo 656 415 595 telefono zenbakiekin ipini behar dira harremanetan.

Zeberioko Udalak, Kutxabankeko ‘Herriz Herri’ programaren bidez, telefono mobila erabiltzeko egun biko tailerra prestatu du irailaren 16an eta 18an, Hogarrean, 17:00etatik 19:00ak bitartean.

Tailerrak operazio praktikoak egiten irakatsiko dizkie adinekoei: Whatsappa erabiltzea, BIZUMak egitea, Osakidetzako aplikazioa modu egokian erabiltzea… Ikastaroa doakoa da eta 946 481 079 telefonoaren bidez eman daiteke izena.

Uda igarota, Zeberioko Udalak Ermitabarriko frontoiko lanei ekingo die “urtea amaitu baino lehen pilotalekua prest egoteko, ondo bidean”. Horiek izan dira Ekain Goti Zeberioko alkatearen berbak. “Enpresa bati esleitu diogu proiektua eta asmoa datorren hilabetean lan egiten hastea da”.

“Ermitabarriko pilotalekuko harmailetako atzeko partea sarratu behar dugu, eguraldi txarra egiten duenean bertatik hotza, euria eta haizea sartzen delako”, azaldu zioten udal ordezkariek GEURIAri joan den urtarrilean.

Porlanezko harmailen gainean aulkiak eta hotza isolatzeko panel batzuk ipini gura dituztela zehaztu dute Udaletik. Gainera, pilotalekuko hormak margotu, sabaiko panel batzuk bere lekuan ipini, markagailuak ezarri eta frontoiko segurtasun elementu batzuk ipintzeko asmoa dagoela gehitu du Zeberioko alkateak. Udalak 70.000 euro bideratu ditu (BEZ barik) proiektu hau 2025a amaitu baino lehen burutu ahal izateko. “Asmoa eraikina bera eguneratzea da, laburbilduz”.

Frontoia, gaur egun // Geuria

Ermitabarriko frontoia eguraldi txarra egiten duen egunetan erabilezin zegoela nabaritu zuten joan den urtean udal ordezkariek eta euria egiten duen egunetan ura erretenetik iragazten da. Ondorioz, frontoiko zoruan putzuak egiten dira.

Lanek hilabeteko lanak izango izango dituztela aurreikusi dute Udaletik: “Ez da egitura osoaren lan handi bat izango, konponketa txikiak egitea baizik: aulkiak ipintzea, markagailu berria ekarri eta instalatzea… ziurrenik aldi berean lan egin ahalko dute gremioek, epeak arinduz”.

Bizenta Ipiña Hierro-Olabarria auzotarrak 105 urte bete ditu joan den irailaren 1ean. Gaur egun Zeberioko biztanle zaharrena da Areiltzako Presalde auzoan jaiotako bizilaguna.

Zeberioko udal ordezkariak, berria jakin bezain pronto, Bizentarengana hurbildu ziren zorionak ematera: “Bizenta Ipiña andereari: Zeberioko Udaletik ohore handia da guretzat, Areiltzako Presalden jaiotako Bizenta Ipiña Hierro-Olabarriari, bere jaiotzaren 105. urteurrenean agur bat, musu bat eta lore hauek eskaintzera etortea. Udalaren izenean eta Zeberioko biztanleen ordezkari moduan, zure senide maiteenen artean zera opatu gura deutsugu: osasuna, alaitasuna eta egun gehiagotan zure bizitza luzeaz disfrutatzea. Zorionak Bizenta!”, izan dira zoriondu zuten udal ordezkarien berbak.

Zorionak, Bizenta!

‘Genozidioa stop!’ lelopean burrunbak antolatu ditu Gernika-Palestina Herri Ekimenak, Gazako genozidioa salatzeko.

Deialdiak irailaren 5ean egingo dituzte 19:00etan, herrietako udaletxeen aurrean. Zeberion ekimenean parte hartzeko deialdia egin dute udaletxeko plazan.

Horrela dio Gernika-Palestina ekimenak bere webgunean: “Gernikako bonbardaketaren herria gara, eta lehen eskutik ezagutzen ditugu suntsipenaren ondorioak. Gernika berririk ez oihukatzeko beharra dugu, beraz, euskal herritarrok. Ezin dugu holakorik
onartu”.

“Sarraski horren aurrean ezin dugu isilik egon, ezin besoak gurutzaturik geratu. Beste ezeren gainetik, gaur eta hemen premiazkoa da ondorio latzak izaten ari den eskalada belikoa gelditzea, bakea, justizia eta itxaropenezko etorkizuna eskaintzea”.