Zeberiok “transport desert” izateari utzi nahi dio. Transport Desert-ak garraio-basamortuak dira, garraio publikoko zerbitzu desegokiek tokiko komunitateentzako aukerak murrizten dituzten horiek, hain zuzen ere.

Duela urte batzuetatik hona, Europako Batzordeak aktiboki sustatu du hiri-mugikortasuneko plangintza jasangarriaren kontzeptua eta, ildo horretatik,  zenbait proiektu finantzatu ditu.

Trantsizio Energetikoari eta Klima Aldaketari buruzko otsailaren 8ko 2/2014 Legeko 31. artikuluan honakoa xedatzen da: “Euskal administrazio publikoek, bakoitzak bere eskumenen esparruan, mugikortasun jasangarriagoa sustatuko dute, eta, horretarako, sustatuko dituzte oinezkoen eta txirrindularien mugikortasun aktiboa, garraio publikoa eta efizienteagoak diren eta gutxiago kutsatzen duten garraio moduak, aintzakotzat hartuta aurrezpen-irizpideak, energia-efizientziako irizpideak eta produktuaren, ondasunaren edo zerbitzuaren kostu eta balio-bizitzako irizpideak, eta, horrekin batera, garraioaren deskarbonizazioa bultzatzen duten energia alternatiboen erabilera ere sustatuko dute”.

Hego Uribeko egoerara erreparatuz, gaur egun, Bi-3524 errepideak konektatzen du Zeberio alboko herriekin. Mendebaldetik Ugaorekin eta ekialdetik, Artearekin. Errepide horietatik igarotzen den trafikoaren artean, herritarrek auto pribatuz, taxiz eta Bizkaibuseko A3928 lineako autobus zerbitzuaren bidez garraiatzeko aukera dute soilik.

Bi-3524 errepidetik igarotzen den trafikoaren artean, herritarrek auto pribatuz, taxiz eta Bizkaibuseko A3928 lineako autobus zerbitzuaren bidez garraiatzeko aukera dute soilik

Eskualdeko kasu honi erreparatuz eta Bizkaibuseko hurrengo lizitazio-prozesua hastear dagoela, Zeberioko Udalak herritarrek bizi duten egoera plazaratu nahi dio autobus enpresari. Izan ere, Udalaren iritziz, abagunea dago herritarren beharrizanak eta hobekuntza proposamenak aipatutako lizitazio prozesuan txertatzeko.

Auto elektrikoak kargatzeko gunea, Zeberion // Geuria

Nola goaz lanera?

Zeberion 618 auto daude DGTko Trafiko Zuzendaritza Nagusiaren 2022ko datuen arabera. Ibigailu guztien % 62,80a norberaren erabilerarako dira eta DGTko ikerketen arabera kotxe pribatuarekiko menpekotasuna “erabatekoa” da.

Beste hitz batzuetan esanda, herrian 600 autotik gora egoteak gutxi gora behera, gidabaimena izateko adinean dagoen bizilagun bakoitzak auto bat duela esan nahi du.

DGTko ikerketen arabera kotxe pribatuarekiko menpekotasuna “erabatekoa” da

Alboko herrietara taxiz joateko aukera eskaintzen du Udalak astearte eta ostegunetan. Zerbitzu honek euro bat eta lau euro arteko prezio sinbolikoa dauka eta gidabaimenik edo kotxerik ez duten adinekoeni, elbarriei edo auzo sakabanatuetan bizi diren auzotarreni zuzenduta dago.

Bi-3524 errepideak Zubialde auzoa gurutzatzen du // Geuria

Eustateko 2022ko datuen arabera, zeberioztarren % 72,85ak Lurralde Historiko bereko beste udalerri batean lan egiten du, hau da, egunero-egunero bidaiatu behar du ohiko bizitokitik lantokira. Gauza bera ikasleen kasuan, bigarren hezkuntzara iristean ezinbestean mugitu behar baitira herritik; Ugao, Igorre edo Laudiora, besteak beste.

Herritarren berbak

Herritarren iritziak jasotzeko, Zeberioko Udalak galdetegi bat abiarazi zuen iazko urrian. Bertan hainbat galdera luzatu zizkien herritarrei: “Zein auzotan bizi zara? Erabiltzen al duzu Bizkaibus Zerbitzua? Uste duzu sarriago erabil zenezakeela hobera eginez gero? Bizkaibus egungo zerbitzuak herriaren gutxieneko beharrak betetzen dituela uste duzu?…”.

Galdetegiak 21 auzotako bizilagunen iritziak jaso ditu eta % 56ak autobus zerbitzua erabiltzen duela adierazi du (% 24ak batzutan edo oso gutxi eta % 20 bai). Zerbitzua hobetuz gero gehiago erabiliko lukeen galderari dagokionez, inkestatuen % 81ak baietz erantzun du (% 17k ez daki, % 2 ez du erantzun eta % 0 ezetz).

Inkestatuen % 56ak autobus zerbitzua erabiltzen du eta zerbitzua hobetuz gero % 81ak gehiago erabiliko lukeela erantzun du

Bizkaibusen egungo zerbitzuak herriaren gutxieneko beharrak betetzen dituen galdetzean, % 87k ezetz erantzun du eta gaur egungo zerbitzuaren arazo nagusia maiztasuna dela adierazi dute inkestako parte-hartzaileen % 36ak, “gehienez ere orduro autobusak egotea noranzko bietan”, nabarmendu dute Udaletik.

Areatza eta bertako mendiak // Geuria

Gidabaimena ez duten gazteen artean (12 eta 17 urte bitarteko gazteak) aisialdia Ugaon eta Igorren ematen dute, bigarren mailako ikasketak hasita bertan sortzen baitituzte beren inguru berriak: “Egungo ordutegiei erreparatuta, ezinezkoa da apenas 10 minutura dauden bi herrietara garraio publikoz mugitzea; batetik, apenas dagoelako zerbitzurik (bereziki Arratiara) eta, bestetik, azken autobusa 20.30etan delako. Komenigarria litzake zerbitzua 22.00-23.00 aldera bukatzea, bereziki ostiral, asteburu edo jaiegunetan”, azaldu dute Zeberioko Udaletik.

Ondorio modura, galdetegiak honako emaitzak plazaratu ditu:

• Herritarrek maiztasun handiagoa nahi dute: gutxienez orduko behin
• Oinarrizko zerbitzuetan fokua ipintzea
• Autobusetan segurtasuna hobetzea
• Kalitatezko zerbitzu publikoarekiko konpromisoa
• Kutsadura murriztea