☉ Basauri
Javier García: «Munduan hogei izango dira mahai-tenisean milioiak irabazten dituztenak»
Javier Garcíak (Basauri, 1979), Kike Irineurekin batera, zilarrezko domina eskuratu zuen Euskadirentzat joan den irailaren 16, 17 eta 18an Getafen (Madril) jokatutako mahai-teniseko Espainiako Beteranoen Txapelketan
Javier Garcíak (Basauri, 1979), Kike Irineurekin batera, zilarrezko domina eskuratu zuen Euskadirentzat joan den irailaren 16, 17 eta 18an Getafen (Madril) jokatutako mahai-teniseko Espainiako Beteranoen Txapelketan. Garcíak ordu asko eman ditu Basauriko Mahai-Tenis Klubean entrenatzen eta jokatzen. Bere adineko lagunak futbolean eta saskibaloian jokatzen hasi ziren garaian, Garcíak zale gutxiago dituen kirol honen aldeko apustua egin zuen Gaztelu ikastetxeak eskaintzen zuen ping-pongeko eskolaz kanpoko jardueran, 13 urte zituela.
Zorionak Espainiako Txapelketan lortutako bigarren postuagatik, Javi! Nolako esperientzia izan zen? Eskerrik asko! Esperientzia zoragarria izan zen. Partida asko jokatu ostean zilarrezko domina eskuratu dugu Euskadirako.
Asteburu osoko txapelketa izan zen? Bai, ostiralean, larunbatean eta igandean partidak izan genituen. Lehenik eta behin hiru taldez osatutako multzo bat sortu zuten eta euren artean partidak jokatu zituzten. Partida horietatik bi talde garaile irten ziren eta gainontzeko partidak kanporaketen bidez erabaki ziren.
Nolako aurkariak izan zenituzten Getafen? 39 urtetik gorako bi edo hiru jokalari oso onez osatutako selekzioak izan genituen aurrez aurre, komunitate bakoitzeko onenak hain zuzen ere. Finalera heldu arte Kanariar Uharteen, Galiziaren, Gaztela Mantxaren eta Extremaduraren aurka jokatu genuen. Finalean Kataluniaren aurka lehiatu ginen eta zenbait aukera on izan bagenituen ere ezin izan genituen gainditu. Partida oso lehiakorra izan zen azken minutura arte.
Nola antolatu duzu zeure burua Madrilgo txapelketan parte hartu ahal izateko? Ez da batere erraza: soldatzaile lez egiten dut lan 07:00etatik 15:00ak arte, baina batzuetan ordu gehiago ematen ditut beharrean.
Zenbatez behin egiten dituzu entrenamendu saioak gaur egun? Normalean astean hirutan egiten ditut entrenamendu saioak eta saio bakoitza ordu bikoa izan ohi da. Saio horiei guztiei asteburuetako txapelketak gehitu behar zaizkie eta batzuetan lau edo bost egun ematen ditut palarekin entrenatzen.
Eta nolakoak dira saio horiek? Entrenamendu saioak bi motatakoak dira: alde batetik astean zehar kiroldegian ematen ditudan ordu horiek, mahai tenisean jokatzen; eta bestetik, kirolari bakoitzak bere kabuz egiten dituen saioak (korrika egiten, gimnasioan…).
Ibilbide luzea egin duzu. Nola hasi zinen mahai-tenisean? 30 urte daramatzat kirol honetan. Gaztelu ikastetxean hasi nintzen, 13 urte nituela. Garai hartan eskolaz kanpoko ping-pong klaseak eskaintzen zituen ikastetxeak eta Bizkaiko beste eskolen arteko partidak jokatzen genituen
Eskolako mahai tenisetik CTMra egin zenuen salto. Eskolen arteko liga horien garaia bukatu zenean CTM Basaurin (Club de Tenis de Mesa) izena eman nuen. Bertan, maila altuagoko liga federatuetan jokatzen hasi nintzen. CTMk 40 urte inguru daramatza Estatu mailako ligetan. Horrela, 14 urte nituela Espainiako txapelketetan parte hartzen hasi nintzen.
CTMrekin Estatu mailako txapelketetan federatu bezala jokatzen hasi zinen. Zer esan zizuten etxean? Arraroa iruditzen zitzaien hain zale gutxi dituen kirol baten aldeko apustua egin izana. Gutxik dakite nola funtzionatzen duen kirol honek.
Baina, argi dezagun: mahai tenisa eta ping-ponga ez dira gauza bera? Praktikatzeko mahai bertsuak erabiltzen diren arren, kirol ezberdinak dira: ping-pong-a jolas-aretoetan kortxozko palekin jokatzen den ‘vintage’ kirola dugu eta 21 puntuko partidak jokatzen dira. Mahai-tenisa, ostera, kirol ofiziala dugu eta set bakoitzean 11 puntu jokatzen dira.
Nolakoa da Basauriko Mahai Tenis Taldea? 40 kidek osatzen dugu Mahai Tenis Taldea eta hastapenerako eskola bat dugu, adin guztietako kirolariei zuzendutakoa. Esan behar da klub honetan Bizkaiko eta Euskadiko txapeldun askok ikasi dutela. Kide guztien artean nabarmentzekoa da 17 urteko Ane Felipe jokalari basauriarra, Espainiako 10 neska onenen artean sailkatutakoa.
Bakarra da edo neska gehiago dituzue klubean? Emakumeen gaia benetan konplexua da. Neska gehiago baditugu taldean. Ikasturte hasieran askok izena ematen dute eta elkarrekin datoz entrenamendu saioetara, baina denborak aurrera egin ahala etortzeari uzten diote. Bakarrik etortzeko ‘beldurragatik’ izan daiteke. Ez dakit nik.
Nola ‘beldurragatik’? Euren kabuz kirola egitea kostatzen zaiela uste dut. Hasiera batean prestutasun handia dute taldean datozelako, baina egunek aurrera egin ahala galdu eta hasierako momentura bueltatzen dira.
Kirol jarduerak antolatzen dituzue Basaurin? Bai, noski! Liga topaketak, txapelketak… Urtean zehar lauzpabost hitzordu izan ohi ditugu herrian eta Bizkaia osoko klubak gerturatu ohi dira Basaurira.
Zu eskola-kirolaren bidez murgildu zinen mahai-tenisean. Nolako garrantzia dauka eskolako kirolak gaur egun haurrengan? Nire ustez gaur egun garrantzi apur bat galdu du eskolako kirolak, nire garaiarekin alderatuta. Nik uste dut duela 30 urte hezkuntza zentroek inplikazio handiagoa zutela eskola kirolean, oro har. Kontuan izan lehen eskola arteko liga bat zegoela Bizkaia osoan; gaur egun, ordea, ez dago horren arrastorik. Nire ustez, jendeak eskolaz kanpoko bestelako jardueratara eramaten ditu seme-alabak, hala nola, hizkuntzak edota margolaritza ikastera. Lehen erraztasun gehiago zeukaten haurrek eskoletan kirola egiteko. Gaur egun klubek kudeatzen dituzte haurren kirolak.
Zer eskatzen dio mahai-tenisak kirolariari? Kirol lasaia dirudien arren, kirolariak sasoian egon behar du. Gainera, koordinazio handia eta prestaketa psikologiko altua izan behar ditu kirol hau praktikatzen duenak.
Kirolari beteranoa zaitugu. Kirol hau praktikatzeko adin jakin bat dagoela esango zenuke? Kirol hau praktikatzeko adin tartea benetan zabala da: 12 urtetik 60ra arte, gutxi gorabehera. Hala ere, badago 60 urte baino gehiagoko jokalaririk ere gurean!
Posible da gaur egun mahai-tenisetik bizitzea? Benetan zaila da, tamalez. Estatu mailan profesional gutxi dago eta mundu mailako txapeldunek diru asko irabazten badute ere 20 pertsona egongo dira planeta osoan milioiak irabazten dituztenak.
Eta ziurrenik txinatarrak izango dira! (Barreak) Bai, ziurrenik! Mahai tenisean pentsatzen dugunean horixe da burura datorkigun lehen irudia, ezta? Mahai-tenisa Txinako Estatu Kirola dugu eta herrialde horretan bakarrik futbolak Europa osoan baino lizentzia federatu gehiago dauzka. Izugarria da. Bertara bidaiatzea zoragarria litzateke.
Ametsik ba al daukazu kirol honen esparruan? Bordelera itzultzea gustatuko litzaidake Beteranoen Mundu Mailako Txapelketa jokatzera. 2020an bertan jokatzeko sailkatuta nengoen, baina koronabirusak eragindako pandemiagatik bertan behera geratu zen.
Zeintzuk dira zure hurrengo erronkak? 2023ko ekainean Norvegiara joango naiz Beteranoen Europako Txapelketa jokatzera.
☉ Basauri
800 metro karratuko baso autoktonoa sortu dute Basaurin, nekazaritza-sistema berriei buruz sentsibilizatzeko
Fruta-arbolak, usain-belarrak eta basa-fruitu gorriak ematen dituzten zuhaixkak ditu Iruaretxetako baso autoktonoak. Abendura bitarte lau tailer antolatu dituzte
Baso autoktono jasangarria sortu dute Basaurin, Iruaretxetan. Guztira 800 metro karratuko azalera du basoak eta Udala aitzindaria izan da administrazio publikoen artean horrelako proiektu bat aurrera eramaten.
Basoak arbola, zuhaixka eta belar espezie ugari ditu: intxaurrondoak, arteak, haltzak, intsusak, artelatzak, haritzak, pinuak, hurritzak, pagoak eta abar landatu dituzte, eta, horiekin batera, sagarrondoak, madariondoak, aranondoak, limoiondoak eta laranjondoak; izpilikua eta erromeroa; eta marrubiak, ahabiak eta mugurdiak bezalako basa-fruitu gorriak ematen dituzten zuhaixkak landatu dituzte bertan. Gainera, txorientzako eta saguzarrentzako etxolak ere jarri dituzte.
“Baso jangarri sintropikoak dira basoko ekosistema naturalen egitura eta funtzioak imitatzeko diseinatutako nekazaritza- eta baso-sistemak. Ekoizpen, erresilientzia eta birsortze-gaitasun handia dute, eta, batez ere, gizakiontzat jangarriak era erabilgarriak diren espezieak hartzen dituzte. Ekologia eta elikadura-subiranotasuna uztartzen dituen nekazaritza birsortzaile eta jasangarri mota bat dira”, esan du Irene Garcia Basauriko Udaleko Ingurumen arloko zinegotziak.
Zentzu horretan, horrelako basoek “onura asko” dituztela adierazi du Garciak: “Leheneratze ekologikoa sustatzen dute, biodibertsitatea eta lurzoruaren osasuna hobetzen dute, klima-aldaketaren eraginak arintzen dituzte, karbonoa atzitzen dute, eta, finean, mikroklima ontzen dute”.
Baso autoktonoa herritarrek bozkatu zuten 2024ko aurrekontu parte hartzaileetan, eta Udalak 2025ean zehar gauzatu behar zuen, “berdeguneak handitzeko”.
Tailerrak baso autoktonoan
Proiektuak nekazaritza-sistema berriei buruz sentsibilizatzea eta horien zabalkundea egitea aurreikusten du, eta, horretarako, lau tailer antolatu ditu Udalak irailetik abendura bitartean, hilean bat.
Tailerren helburuak honakoak dira: herritarrak baso-kontzeptu horretara hurbiltzea lurzoruaren kudeaketa ekologikoaren alorreko oinarrizko teknikak aplikatuta (inausketa, konpostatzea eta landatzea); biodibertsitatea, erresilientzia eta tokiko elikadura bultzatzea, eta auzolana eta jakintza agroekologikoa sustatzea.
Irailaren 27an izango da lehen tailerra eta hizpide izango dute ‘Baso jasangarriak: hastapenak eta oinarrizko diseinua’. Hurrengoa, urriaren 25ean izango da: ‘Konpostatze ekologikoa eta zoru bizia zaintzea’. Hirugarren tailerra izango da ‘Inausketa, biomasa erabiltzea eta mulch bizia’ eta azaroaren 15ean antolatuko dute. Eta azkenik, abenduaren 13an ‘Udazkenean landatzekoak eta negurako prestaketa-lanak’ tailerra eskainiko dute.
Tailerretan izena eman nahi dutenek mezu elektronikoa bidali behar dute jurgivuriarte@hotmail.com helbidera. Udaletik zehaztu dutenez, 15 plaza baino ez dituzte eskainiko.
Basauriko jaietarako atzera kontaketa hasi da. Urriaren 11n, larunbatez, hasiko dira sanfaustoak eta jaiak iragarriko dituen kartela aurkeztu dute gaur.
Sari nagusia Basaurin geratu da eta irabazlea Amaia Bonachera izan da. Basauriarrak 1.500 euro jaso ditu, ‘San Fausto zeruan’ izeneko lanagatik.
Tokiko mailan, Iñaki Zorriketa basauriarraren kartelari eman diote saria. Zorriketak ‘Bere alde ona’ izena jarri dio bere lanari eta 300 euroko saria jaso du.
Eta, Gazte eta Txiki kategorietan irabazle izan dira Unai Fernandez eta Asier Ortiz.
Zoroak kuadrillak herriko saltokietan erabiltzeko 50 euroko bonua eman dio Asierri, Txiki kategoriako irabazleari.
Unaik, Gazte kategoriako irabazleak 100 euroko bonua jaso du.
☉ Basauri
San Fausto plazako obrak azaroa bukaeran amaituko dituzte, Basaurin
Hainbat arrazoiengatik atzeratu da plaza irekitzeko momentua. Basauriko Udalak arrazoi horien berri eman du
Iazko maiatzean hasi zituzten San Fausto plaza guztiz berritzeko obrak Basaurin eta oraindik lanean ari dira.
Udal ordezkariek jakinarazi dutenez, plaza azaroa bukaerarako egongo da amaituta.
Aurtengo udaberrirako plazaren zati bat erabilgarri egon zitekeela adierazi zuen iaz Udalak, baina hainbat arrazoiengatik atzeratu egin da.
Arrazoi horien berri eman dute udal arduradunek: “Plaza eraitsi ondoren, egiaztatu zen plazaren egiturazko geometria ez zetorrela bat 90eko hamarkadaren hasieran amaitutako obraren planoetan jasotakoarekin. Plano horietan oinarritu zen proiektua, eta, ondorioz, metalezko egitura birdimentsionatu behar izan da, zimendatu eta urbanizatu, lurraren errealitatera egokitzeko. Horrek, eta inguruneko benetako baldintzetara egokitzeko goiko plazaren diseinua hobetzeak, obrak atzeratzea eragin du”.
Jaietan erabiliezin
Urrian Basauriko jaiak izango dira —urriaren 11tik 19ra— eta Trintxera ezizenez ezagunagoa den plaza hainbat ekitaldi egiteko erabiltzen du Herriko Taldeakek.
Baina aurten ere —iaz ere ezin izan zen erabili— ez du erabilgarri izango San Fausto jaiak antolatzen dituen elkarteak.
Basauriko Udalak dagoeneko jakinarazi dio Herriko Taldeaki plaza ezingo dela aurtengo jaietan erabili.
☉ Basauri
San Fausto plaza ez da Basauriko jaietarako bukatuta egongo
Basauriko Udalak dagoeneko jakinarazi dio Herriko Taldeaki plaza ezingo dela aurtengo jaietan erabili
Iazko maiatzean hasi zituzten San Fausto plaza guztiz berritzeko obrak Basaurin eta oraindik lanean ari dira.
Urrian Basauriko jaiak izango dira —urriaren 11tik 19ra— eta Trintxera ezizenez ezagunagoa den plaza hainbat ekitaldi egiteko erabiltzen du Herriko Taldeakek.
Baina aurten ere ez du erabilgarri izango San Fausto jaiak antolatzen dituen elkarteak.
Basauriko Udalak dagoeneko jakinarazi dio Herriko Taldeaki plaza ezingo dela aurtengo jaietan erabili.
Azarorako bukatuta
Udal ordezkariek jakinarazi dutenez, plaza azaroa bukaerarako egongo da amaituta.
Obrak iazko maiatzean hasi eta 12 hilabeteko epean erdi bukatuta egongo zela eta ordurako plazaren zati bat erabilgarri egon zitekeela adierazi zuen Udalak, baina hainbat arrazoiengatik atzeratu egin da.
Arrazoi horien berri eman dute udal arduradunek: “Plaza eraitsi ondoren, egiaztatu zen plazaren egiturazko geometria ez zetorrela bat 90eko hamarkadaren hasieran amaitutako obraren planoetan jasotakoarekin. Plano horietan oinarritu zen proiektua, eta, ondorioz, metalezko egitura birdimentsionatu behar izan da, zimendatu eta urbanizatu, lurraren errealitatera egokitzeko. Horrek, eta inguruneko benetako baldintzetara egokitzeko goiko plazaren diseinua hobetzeak, obrak atzeratzea eragin du”.
☉ Basauri
Euskal Herriko folklorearen plaza bihurtuko da Basauri asteburuan Dantza Agerketari esker
Mendexako dantza taldea, Tolosako Udaberri, Gasteizko Indarra, Zuberoako Atharratzeko Dantzariak eta lehen aldiz Murchanteko herritarrek parte hartuko dute Basauriko 53. Euskal Herriko Dantza Agerketan
Euskal folkloreak eta dantza tradizionalek lekua izango dute asteburu honetan Basaurin. Hain zuzen ere, Euskal Herriko Dantza Agerketa izango da irailaren 19tik 21era bitartean.
Aurtengoa 53. edizioa da eta honako taldeek hartuko dute parte: Mendexako dantza taldea (Bizkaia), Tolosako Udaberri (Gipuzkoa), Gasteizko Indarra (Araba), Atharratzeko Dantzariak (Zuberoa) eta Murchanteko herritarrak (Nafarroa).
“Aurten aipatzekoa da Nafarroako Erriberako Murchanteko herritarrek ‘paloteoa’ ekarriko dutela lehen aldiz Basaurira. Urteak daramatzate herriko plazan ‘paloteoa’ egiten abuztuaren 15ean, San Roke patroiaren bezperan”, diote antolatzaileek.
Ekitaldi nagusia irailaren 20an, larunbatez, izango da, baina asteburu osoan zehar dantza plaza bihurtuko da Basauri: irailarne 19an, ostiralez, haurrentzako tailerrak, erromeria herrikoia eta Basauri Kantari izango dira, eta irailaren 21ean, igandez, Basauriko hiru dantza taldeek (Agintzari, Basauritar eta Edurre) emanaldia eskainiko dute.
Egitaraua | Euskal Herriko LIII. Dantza Agerketa
Irailak 19, ostirala
18:30 Haurrentzako tailerrak Solobarriako karpan: erraldoiak, txapak, marrazkiak margotzea, musika tresnak egitea… Gainera, buruko zapiak jartzeko tailerra ere izango da nagusientzat
18:30 Txorizo dastaketa sagardoarekin
19:00 Erromeria herrikoia Solobarriako karpan
20:30 Basauri Kantari Solobarria plazatik
Irailak 20, larunbata
18:00 Gonbidatutako taldeen kalejira Social Antzokitik
19:00 Euskal Herriko LIII. Dantza Agerketa Bizkotxalde parkean. Euria bada, Social Antzokian
Irailak 21, igandea
19:00 Basauriko dantza taldeen emanaldia Bizkotxalden: Agintzari, Basauritar eta Edurre. Euria bada, Social Antzokian
Haurrentzako Breakdance ikastaroa antolatu dute Arrigorriagan, urtarrilera bitartean
Etxebarriko Euskaltegian izena emateko epea zabalik dago urriaren 3ra arte
Bi gazte atxilotu dituzte Galdakaoko etxebizitza batean indarrez sartzeagatik
Argazkiak | Galdakaoko jaietako Playback lehiaketa 140 argazkitan!
Argazkiak | Kuadrillak busti dira gaur Galdakaoko jaietan: batzuk euripean, beste batzuk Paddle Surfean
Argazkiak | Jaietako indaba janak ugaotarrez bete du institutuko pista
Bideoa | Antzeko, Bertan Kaldo eta Dekantzekoz, Galdakaoko jaietako Playback lehiaketako onenak!
Bideoa | Infekzio-gaixotasunei aurre egiteko prebentzio-protokolo falta salatu dute Arrigorriagako Arandia egoitzako langileek
