Sareak

☉ Arrigorriaga

Jon Tauste Carballo: «Uste guztien aurka, arrantzale on batek ez du atsedenik hartzen»

Jon Tauste Carballo (Basauri, 2001) arrantzale basauriarragaz berba egiteko aukera izan dugu Abusuko ibaiertzean. Taustek bigarren postua eskuratu zuen Peñiscolan jokatutako Casting txapelketa nazionalean eta egun batzuk geroago Frantzian jokatutako Mundu Mailako Txapelketa irabazi zuen Espainiako selekzioarekin

Orain 3 urte

|

Jon Tauste, ibai ertzean // Geuria

Jon Tauste Carballo (Basauri, 2001) arrantzale basauriarragaz berba egiteko aukera izan dugu Abusuko ibaiertzean. Taustek bigarren postua eskuratu zuen Peñiscolan jokatutako Casting txapelketa nazionalean eta egun batzuk geroago Frantzian jokatutako Mundu Mailako Txapelketa irabazi zuen Espainiako selekzioarekin. 20 urte baino ez dituen arren lorpen handiak erdietsi ditu denbora tarte txikian kirol-arrantzaren esparruan. Abusuko Arrantza eta Casting klubeko kide gazteena dugu basauriarra. Arrainen (eta arrantzale askoren) amesgaiztoa izateaz gainera, naturarekin harremana duten ikasketak bukatzen ari da eta etorkizunean horrekin harremana duten lanetan aritzea gustatuko litzaioke Tausteri. Bizitako mundu mailako txapelketaren esperientziaz eta bere bizimoduaz berba egiteko plazera izan dugu korrokoi, barbo eta, agian, amuarrainen artean, Nerbioi ibaiaren parean.

Jon Tauste, Abusuko ibai bazterrean // Geuria

Lehenik eta behin zorionak, Jon! Nolako sentsazioa izan zenuen itsas arrantzako Espainiako Selekzioa Munduko txapeldun bilakatzean, zu bertako kidea izanik? Ez nuen uste hain ondo egin genuenik, egia esateko! Nazionalean ere bigarren postua eskuratu nuen eta horretarako entrenamendu saio asko egin behar izan ditut: ordu mordoa eman ditut hondartzetan. Txapelketa irabaztean Frantzian Mundu Mailako Txapelketan jokatzeko aukera eskuratu dut.

Nolako probak egin zenituen? Peñiscolan izan zen txapelketa eta lau egun eman nituen arrantzan, lau ordu egun bakoitzeko. Hondartzako arrantza izan zen eta bertan lupiak eta urraburuak arrantzatu nituen. Lehen egunean lehen postua eskuratu nuen, bigarrenean hirugarren postua eta azken bi egunetan bigarren postuak erdietsi nituen.

Eta nazionaletik mundu mailara egin zenuen salto. Hori da, sailkapen horretatik Frantziako Mundu Mailako Txapelketara abiatu nintzen selekzioarekin. Frantzian ere lau egun eman genituen eta esperientzia oso positiboa izan zen egia esateko. Giroa zoragarria izan zen eta asko ikasi nuen bertan: bai arrantzan, bai txankuen esparruan. Bertan lehiatu ziren gainontzeko taldeak maila izugarrikoak izan dira eta asko irakatsi didate.

Zuk 20 urte dituzu eta dagoeneko mundu mailara iritsi zara. Erritmo ikaragarria zurea! Ni berez Basaurikoa naizen arren, familiak etxe bat dauka Errioxan. Bertatik gertu Tiron ibaia igarotzen da. Bertan ikasi nuen arrantza egiten, aitarekin batera. Kanabera batekin loinak harrapatzen genituen eta denborak aurrea egin ahala, zaletasun horrek gero eta gehiago harrapatzen ninduela jabetu nintzen. Konturatu nintzenerako amuarrainak arrantzatzen nenbilen.

Eta hortik Abusuko arrantza elkartera? Handik gutxira lagun batek Abusu Casting Arrantza Elkartean parte hartzera animatu ninduen. Proba egitea erabaki nuen, eta arrantza egiteaz gainera, lehiaketaren munduan murgildu nintzen. Horrela, gaur egun arte.

Estresa ezagutu al duzu arrantza txapelketetan? Bai, noski. Ibai edo hondartzetara noan bakoitzean pazientzia eta denbora daukat arrantzaz gozatzeko. Lehiaketen mundua, ordea, bestelakoa da: azken batean, arrantza abiadurarekin konbinatzen da eta ordu bitan ahalik eta arrain kopuru handiena arrantzatu behar da.

Gainera, zure modalitateek teknika bereziak eskatzen dituzte. Bi modalitatetan aritzen naiz. Bata euli-arrantza da: galtza-botak jantzita ibaian sartu eta epaileak adierazitako zonalde zehatz batean denbora tarte mugatu batean arrantza egin behar dut. Demagun epaileak hiru ordu ematen dizkidala kilometro bateko distantzian arrantza egiteko. Bada, ibaia goitik behera arakatu behar dut amuarrainen bila, esaterako. Euli bazkak guk geuk eskuz egiten ditugu hegaztien lumekin. Arteari dagokion atala dugu esparru hau.
Beste modalitatea Sur Castinga da, hondartzan praktikatzen dena. Arrantzale bakoitzak postu finkoa dauka hondartzan, ezin du handik mugitu. Amuaren ondoan beruna jarri eta urrunera doazen jaurtiketak egiten dituzte.

Nolakoak dira zure entrenamendu saioak? Goi-mailako lehiaketan aritzeko ordu asko eman behar dira ibaietan zein itsasoan. Euli-arrantzan amuarrainak arrantzatzen dira bereziki eta horiek ibaietan harrapatzeko (itsasoan ez bezala) epe bat dago urtean. Epe horretatik kanpo arrantza egin behar dut eta horretarako Basauri edo Arrigorriagako ibaira hurbiltzen naiz. Saioak erloju batekin egiten ditut, lehiaketan egongo banintz bezala, ibaian gora eta behera arrantza eginez. Amuarrainak arrantzatzeko denboraldia ez denean barbo eta karpekin egiten ditut entrenamendu-saioak.

Aizu, eta arrainek sufritzen dute? Euli-arrantzan ez dugu arraina hiltzen. Amu txiki bat erabiltzen dugu eta horrek ez du arraina hiltzen. Ohiko amuarekin, ostera, arrainak askotan hiltzen dira, amua irentsi eta ahotik irtetea galarazten baitio, eta amua kentzean sortzen zaizkion zauriek heriotza eragiten diote. Bada, euli-arrantzan ez da halako amurik erabiltzen, eta harrapatutako arrainak ibaira itzultzen ditugu.

Orain, itsasertzean egon ordez, Nerbioi ibaiaren parean gaude, Abusun. Nolakoa da ibai hau arrantza egiteko? Hemen korrokoiak, karpak eta barboak nagusi diren arren, egia da noizbehinka amuarrainak ere ikusten direla. Duela urte batzuk, ibaia zikin zegoen eta uraren kalitatea ez zen batere ona. Urteek aurrera egin ahala kalitateak onera jo du eta arrain espezie batzuk berreskuratzen hasi gara gure uretan.

 

Abusuko arrantza elkartean ibaia garbitzearen aldeko ekimenak egiten dituzue dagoeneko. Urtean jarduera bi antolatzen ditugu Nerbioi ibaian garbiketak egiteko. Horrela, ibaira isurtzen diren hondakinak kendu eta paisaia hobetzen dugu. Elkarteko kideok ahal dugunean eguna adosten dugu lan horiek egin ahal izateko. Kideez gainera, edonor etor daiteke Abusura ibaia garbitzen laguntzera.

Nolako taldea da Abusuko Arrantza eta Casting kluba? 30 arrantzalek osatzen dugu Abusu Casting Kluba eta gaur egun gazteena naiz ni. Gainontzeko arrantzaleek 40 urte inguru dituzte eta oso lagungarria da niretzat, esperientzia handiko pertsonak direlako.

Esperientzia eta sariak, ikusi dudanez. Taldeak sari ugari irabazi ditu urteetan zehar. ‘Kortxeo’ modalitatean espezializatutako taldea dugu: postu finko batean egonda, amua kortxo batekin jaurtitzen da uretara. Uretan egonik, murgiltzen denean, kanaberatik tiratu eta arrantza egiten dute kirolariek. Modalitate hau ur gozoan edo gazian egin ohi da, eta Abusun bertan praktikatu daiteke. Hori bai, arrantzatzen den arrain nagusia korrokoiak izaten dira.

Euskal Herrian eta estatu mailan ez daukate ospe onik korrokoiek, baina. Esaten da ur azalean ikusten diren korrokoiek zikinkeria jaten dutela… baina usteak erdi ustel. Hemen begi txarrez ikusten baditugu ere, Frantziako Mundialean nengoela, frantziarrek asko apreziatzen duten espeziea dela ohartu nintzen: jatetxe onenetan korrokoien trontzoak asko saltzen dituzte.

Zein ezaugarri izan behar ditu arrantzale on batek? Jendeak dio arrantza egiteko pazientzia behar dela, baina nik ez dut hori uste. Are gehiago, uste guztien aurka, arrantzale on batek ez du sekula atsedenik hartzen: amu-aparailua leku batean edo bestean jartzen duzu, ibaia goitik behera arakatu behar du…

Arrantza praktikatzera doan duen zonaldearen ezagutza ere izan beharko du, ezta? Jakina! Demagun Abusuko ibaian arrantza egin nahi dugula. Akatsa litzateke hona etorri eta pentsatu barik zuzenean amua botatzea; arrantzale on bat ibaiertzera hurbilduko da, bertako harriak altxatu eta bertan bizi den fauna identifikatu eta horixe bera erabiliko du amuan. Ez dauka zentzurik ibaira jaitsi eta arrainei ogia botatzeak: agian arrainek jaten dituzten larbek ogia jango dute, baina arrainek berez larba horiek jaten dituzte.

Autoa arrantza egiteko tramankuluz beteta daukazu. Prest dauzkazu edonoiz edonora arrantza egitera joateko ala? Eskerrak auto honetan hau egin dezakedan (barreak). Baina bai! Autoa arrantza egiteko gailu guztiekin prestatuta daukat eta edonora joan behar badut eguraldiaren partea ikusi eta bertara gerturatzen naiz: euria egingo duen ala ez, nolako haizea egongo den, mareen nolakotasuna… aldagai horien guztien arabera leku batera edo bestera mugitu ohi naiz arrantza egitera.

Zer ikasi duzu zuk? Nire ikasketak naturarekin lotuta daude: mendia, ibaiak, hondartzak… Basauriko Kooperatiba ikastetxean batxilergoa egin ostean basogintza kudeaketaren inguruko goi-mailako zikloa egin nuen eta momentu honetan basogintzarekin harremana duen gradu bat egiten ari naiz. Arrantzaz gainera mendira perretxikoen bila joatea, ehiza… naturarekin harremana duten jarduerak praktikatzea gustuko dut.

Ba al duzu arrantza egiteko sasoi gogokorik? Nik uda osteko egunak ditut gogokoen. Eguzkiak eragin izugarria du uraren tenperaturan, eta berez, arrainengan: eguzkiaren beroak eta izpiek arrainak aktibatzen dituzte eta uda osteko egunetan berotasun hori asko igartzen da.

Posible izatekotan, non gustatuko litzaizuke arrantzatzea? Hego Afrikan aritzea izugarri gustatuko litzaidake. Iazko Sur Casting Mundiala bertan izan zen eta marrazo txikiak arrantzatu zituzten. Bertan egotea itzela litzateke, arrantza, bertakoarekin alderatuta, ezberdina delako.

Eta zer egin beharko zenuke bertara joan ahal izateko? Urte bakoitzean lurralde batean antolatzen dute munduko txapelketa. Aurtengoa Frantzian egin zuten eta hurrengoan Herbeheretan prestatuko dute. Aurten, nazionala La Mangan egingo dute (Murtzia). Bertako txapelketako lehen hiru postuetan sailkatuz gero Herbeheretara joango nintzateke. Esaterako, hiru urte barru Mundiala Hego Afrikan antolatuko balute, nazionalean sailkatuz gero bertara joango nintzateke.

Sailkatuta:

☉ Arrigorriaga

Kepa Larrea idazleak maitasuna, diktadura eta paisaia galduak lotu ditu bere ‘Zubia’ eleberri berrian

Hego Uribeko herriek, kaleek, basoek eta mendiek protagonismo berezia dute eleberri osoan zehar: “Bolintxu”, “Izartza”, “Arguia” edo “Lapurzuloa” dira kapituloetako batzuen izenburua, hurrenez hurrenez

Orain 2 egun

|

2025/11/28

Kepa Larrea, erdian, "Zubia" liburuaren aurkezpenean // Geuria

Atzo Kepa Larrea idazleak -basauriarra jaiotzez baina Arrigorriagan 35 urte daramatzana-, bere azken lana aurkeztu zuen, “Zubia” izenekoa. Oraingo honetan, eleberriaren aldeko apustua egin du Larreak, ohikoa duen ikerketa historiko sakona albo batera utzi gabe.

Kepa Larrea (Basauri, 1956) Euskal Filologian lizentziaduna eta Historian doktorea da. Delineatzaile, administrari eta itzultzaile lanetan aritu ondoren, EHUko irakasle gisa ibilbide luzea egin du. Ezaguna da, batez ere, bere saiakera historikoengatik, hala nola: Mina edo libertatea! (2017), Xabier Mina gerrilari nafarraren ingurukoa, edo Antilletan galdurik (2023).

Maitasuna, diktadura eta paisaia galduak, eleberriaren oinarri

“Zubia” eleberria  1936ko Gerraren eta diktaduraren hainbat pasartetan oinarritzen da, egileak berak azaldutakoaren arabera: “asko eta asko txikitan entzundako kontuak dira; helduek ahotsa apaldu eta xuxurla batean hitz egiten zutenean horrek gure arreta pizten zuen, eta adi entzuten genituen kontu haiek”.

Kontakizuna “hiru pertsonen arteko amodio istorio” batean oinarritzen den arren, errealitate historikoa eta fikzioa txirikordatzen doaz etengabe, iragana eta oraina lotuz.

Irakurketa erraztearren, bi koloretan banatu dituzte kapituluak, eta kapitulo gehienak “dagoeneko desagertuta dauden paisaietan oinarritzen dira”. Zentzu horretan, bai Larreak eta bai hitzaurrea egin zuen Jesus Etxezarragak “paisaia liburuaren beste pertsonaia bat gehiago” dela nabarmendu zuten, “Jone edo Ganix protagonisten pare”.

Zentzu horretan, Hego Uribeko herriek, kaleek, basoek eta mendiek protagonismo berezia dute eleberri osoan zehar: “Bolintxu”, “Izartza”, “Arguia” edo “Lapurzuloa” dira kapituloetako batzuen izenburua, hurrenez hurrenez.

“Desagertu den paisaia batetaz ere hitz egiten du liburuak, hobe esanda, desagerrarazi duten paisaia batetaz. Dagoeneko existitzen ez diren baserriak, basoak, bideak… berreskuratu ditut liburu honetarako, nire belaunaldikoon haurtzaroaren parte izan zirenak”. Horren ordez dena “errepidez, harrobiz eta basoei nortasuna lapurtu dietene pinu tristeez” bete dutela gaitzetsi zuen Larreak.

Liburuaren laburpen moduan, zera dio kontrazalak: “1937ko ekainaren 19ko goizaldean, soldadu frankistak Bilbon sartu baino ordu gutxi batzuk lehenago, gudari gazte batek, Ganixek, ez daki zer egin: beste gudari askorekin batera hirian geratu eta bere burua entregatu ala Bilbo inguruko mendietan zelatan dauden karlisten setioa hautsi eta Euzko Gudarostearekin bat egin, horiek Kantabria aldera atzera bildu baitira. Hogeita bost urte geroago, neska gazte bat, Jone, bere familiaren isiltasuna hausten saiatzen da, gerraren ondorioz etxean ezkutatu eta bere buruari egiten dizkion galderen erantzunen bila. Gertaera bi horiek behialako zubi batek lotuko ditu. Eleberriaren izenburuak berak iradokitzen duen bezala, lan honek iragana eta oraina lotzen dituen zubi lana egin nahi du, memoriari eta zaurien itxierari ekarpena eginez”.

Kepa Larrearen liburu berria eskuragarri dago dagoeneko, eta Durangoko azokan ere egongo da salgai.

Osorik irakurri

☉ Arrigorriaga

Jardueraz betetako egitaraua prestatu dute Arrigorriagan, Euskararen Nazioarteko Egunaren testuinguruan

Udalak ipuin kontalariak, Jon Maiaren ‘Desde Extremadura al euskera’ hitzaldia, komedia gaua eta bertso saioa antolatu ditu abenduaren 14a bitartean

Orain 3 egun

|

2025/11/27

Abenduaren 14ra bitartean jardueraz betetako programa osatu du Arrigorriagako Udalak, euskararen presentzia eta erabilera udalerrian bultzatzeko helburuarekin: “Euskararen eguna abenduaren 3an izango den arren, jarduerak lehenago hasiko dira, azaroaren 28an, eta abenduaren erdialdera arte luzatuko dira, herritar guztien gustuko eskaintza bermatzeko”, azaldu dute udal ordezkariek.

Azaroare 28an, ostiral honetan, Eñaut Elorrietaren kontzertua eta haurrentzako Begizur antzezlana prestatu dute. Abendura begira, ipuin kontalariak, hitzaldiak, komedia gaua eta ‘Ez da kasualidadea’ izeneko bertso-saioa prestatu dute eta Alaia Martin, Nerea Ibarzabal, Oihana Bartra eta Uxue Alberdi bertsolariak Lonbo aretoan izango dira.

Ekitaldi guztiak herrigunean zein Abusun antolatu dituzte.”Ekitaldi nagusiez gain, eskolako eta institutuko ikasleentzako propio diseinatutako egitarau paraleloa ere antolatu dituzte. Besteak beste, La Basu eta La Pulga musikariekin elkarrizketa musikatua egingo dute, ipuin kontalariak, antzerkiak eta bertso emanaldiak izango dira”.

“Arrigorriaga euskaldunagoa nahi dugu, eta horretarako ezinbestekoa da herritarrok euskaraz hitz egiteko ohitura bereganatzea”, azaldu du Gorka Etxebarria Euskara zinegotziak. “Udal Gobernutik udal euskaltegia dugu, diru-laguntzak eskaintzen dizkiegu talde eta elkarteei, bekak ditugu euskara ikasteko edota lanean dihardugu hizkuntza-paisaiaren normalizazioaren alde. Baina ahalegin horri erantzuteko, herritarrak animatu nahi ditugu euskaraz hitz egitera, lotsarik, beldurrik eta konplexurik gabe”. Horregatik, herritar guztiak animatu nahi dituzte Euskararen Nazioarteko Egunean antolatutako ekintzetan parte hartzera.

Egitaraua | Euskararen Eguna Arrigorriagan 2025

AZAROAK 28, ostirala
‘BEGIZUR’ ANTZEZLANA
12.30 Abusu Zentro Soziokulturala
EÑAUT ELORRIETA
20:00 Magdalena eliza

ABENDUAK 1, astelehena
‘KUKU MUKU’
Eskolako umeentzako egitaraua

ABENDUAK 2, asteartea
‘ETXEAN OTSO, KALEAN USO’
Eskolako umeentzako egitaraua
Lonbo Aretoa

ABENDUAK 3, asteazkena
TXAPELDUNAK
Eskolako umeentzako egitaraua
Lonbo Aretoa

ROSA MARTINEZ IPUIN KONTALARIA
17:15 Edurne Garitazelaia
‘HITZAK ZAPIAN’ IKUSKIZUNA
18:00 Udaletxeko plaza

ABENDUAK 4, osteguna
BERTSO-JASA
Eskolako umeentzako egitaraua
Lonbo Aretoa

‘DESDE EXTREMADURA AL EUSKERA’
19:00 Abusu Zentro Soziokulturala

ABENDUAK 5, ostirala
EZER EZ
Eskolako umeentzako egitaraua
Lonbo Aretoa

ABENDUAK 12, ostirala
KOMEDIA GAUA
20:00 Lonbo aretoa

ABENDUAK 13, larunbata
‘SCROOGE ETA MAMUAK’
18:30 Lonbo aretoa

ABENDUAK 14, igandea
‘EZ DA KASUALIDADEA’ BERTSO SAIOA
19:00 Lonbo aretoa

Osorik irakurri

☉ Arrigorriaga

Buia-Abusu Bilbobus linea Santa Isabelera luzatzeko eskatu diote Bilboko Udalari

Bilbobuseko 50. linea Santa Isabelera luzatzea Abusuko auzotarren aspaldiko eskaera da

Orain 3 egun

|

2025/11/27

Bilbobuseko unitate bat // Geuria

Mugikortasuna hobetzea helburu, Arrigorriagako Udalak eskaera egin dio Bilboko Udalari Buia eta Abusu konektatzen dituen Bilbobuseko 50. autobus linea “hobetzeko”.

Izan ere, linea hori Abusuko Santa Isabel auzora luzatzea proposatu dio Arrigorriagako Udalak Bilbokoari. Maite Ibarra alkatea Bilboko Udaleko Nora Abete Bilboko Udaleko alkateordea eta Mugikortasun eta Jasangarritasun zinegotziarekin elkartu zen azaroaren erdialdean proposamenaren inguruan berba egiteko. Bilboko Udaletik eskaera hori aztertu eta abenduan erantzuteko konpromisoa hartuko zuela azaldu zuen.

Bilbobuseko 50. linea Santa Isabelera luzatzea Abusuko auzotarren aspaldiko eskaera da. Arrigorriagako Udalak, gainera, egunero herriko instituturaino iristea eskatu dio Bilbokoari, “Arrigorriagako erdigunea lotu ahal izateko”.

Osorik irakurri

☉ Arrigorriaga

Arrigorriagako Bertsio Gauaren bosgarren edizioan izena emateko epea zabaldu dute

Abenduaren 27an antolatu du Arrigorriagako Soinuarri Elkarteak Bertsio Gauaren bosgarren edizioa, Gaztetxean, 20:00etatik aurrera

Orain 2 aste

|

2025/11/18

Susterbaks, Soinuarrik antolatutako Kale Gorrian Fest IV jaialdian // Soinuarri & Iñigo Gonzalez Fuentes

Abenduaren 27an antolatu du Arrigorriagako Soinuarri Elkarteak Bertsio Gauaren bosgarren edizioa, Gaztetxean, 20:00etatik aurrera.

Urtero lez, epea zabaldu dute bertan jo nahi duten taldeek izena eman ahal izateko: “Utzi lotsak alde batera eta animau zaitez gauarekin bat egiten, zure musika gogokoena jotzera, ergelkeriak egitera eta esatera, eta zure gurasoak lotsaraztera”, azaldu dute Soinuarritik. Gainera, 2026an 10 urte beteko ditu Arrigorriagako elkarteak eta “gauzatxoak” prestatu dituztela iragarri dute.

Bertsio Gauari dagokionez, elkartetik azaldu dute “aukera ezinhobea” dela bandek zuzenean jotzeko eta “kristoren gauaz gozatzeko”. Parte hartu nahi duten bandek 15 minutuko emanaldia prestatu behar dute abesti propio edo bertsioekin. “Eszenatokian Soinuarri utzitako musika aparailuak egongo dira: bateria, baxua, gitarra bi eta anpliak. Nahi izanez gero, nork bere instrumentuak ekar ditzake”, argitu dute Soinuarritik.

Izena emateko soinuarrielkartea@gmail.com helbidera idatzi behar dute interesdunek. Bertan, taldearen izena, kide kopurua eta bakoitzaren rola eta jo beharreko abestien zerrenda idatzi beharko da.

Osorik irakurri

☉ Arrigorriaga

Arrigorriagak 17,6 milioi euroko udal aurrekontua aurkeztu du 2026rako, aurtengoa baino % 6,8 handiagoa

Proposamena hurrengo egunetan aurkeztuko dela azaldu dute udal ordezkariek eta asmoa “urte berria onartutako udal aurrekontuarekin hastea” dela, ondo bidean

Orain 2 aste

|

2025/11/18

Peio Garmendia eta Maite Ibarra, udal aurrekontuaren proposamenaren aurkezpenean // Geuria

Maite Ibarra Arrigorriagako alkateak, Peio Garmendia Ogasun eta Kontu zinegotziarekin batera 2026ko aurrekontu-proposamena egin du. 17.646.735 milioi eurokoa izango da, 2025eko baino % 6,8 handiagoa.

“Aurrekontu hauek Arrigorriaga kohesionatuagoa, inklusiboagoa eta jasangarriagoa eraikitzeko borondatez diseinatu ditugu. Herri gisa aurrera egiteko eta gure auzokide guztien bizi-kalitatea hobetzeko funtsezko tresna dira”, nabarmendu du Arrigorriagako alkateak.

Aurkezpena egin ostean, proposamenaren lerro nagusiak aurkeztu dituzte komunikabideen aurrean.

Arrigorriagako udal-aurrekontuaren proposamena 2026

– Hirigintza eta Auzoak: Arlo honetara milioi bat euro baino gehiago bideratuko ditu gobernu-taldeak eta hiru ekintza nabarmendu dituzte: Osasun eta Higiene auzoko espazio publikoen irisgarritasuna eta kalitatea hobetzeko obrak egitea; eskolako patioa gune inklusiboagoa eta birnaturalizatuagoa bihurtzea, eta hirugarrenik, kiroldegi berriaren lehen fasea eraikitzeko
proiektuaren idazketa martxan jartzea.

– Politika Feministak: Arlo honek 155.450 euroko partida jasoko du. 2019 urtearekin alderatuta diru kopurua bikoiztu dutela iragarri du Garmendiak.

– Gizarte Politikak: zaintza komunitarioen aldeko apustu irmoa egin dute, eta Zaindu Arrigorriaga izena izango duen proiektu bat jarriko da abian. Proiektu honek ‘Zainduz’, ‘Herri Lagunkoia’, ‘Zu Nagusi!’ eta ‘GEUna’ lan-programa batuko ditu. “Horri esker, programa guztien arteko lotura eta koherentzia lortu ahal izango da, udalerri solidarioago eta zainduago baterantz urrats garrantzitsua eginez”.

– Ekonomia eta Enplegua: esparru honetara 45.500 euro bideratuko dute enplegu-prestakuntzarako eta laneratzeko ikastaroak egiten dituztenentzako laguntza ekonomikoetarako. Bestalde, ArrigoBono kanpaina egiten jarraituko dutela iragarri dute, “tokiko merkataritzari bultzada emateko”.

2026rako udal-aurrekontuaren proposamenak Ingurumenera, Euskarara, Kulturara, Kirolera eta
udalerriaren garapenerako funtsezkoak diren beste arlo batzuetara bideratutako partidak ere
jasotzen dituela gehitu du Maite Ibarrak.

Peio eta Maite, Arrigorriagan // Geuria

Aurkezpena, laster

Gobernu taldea joan den irailean hasi zen udal aurrekontua prestatzen eta urrian lehen zirriborroa bidali zioten oposizioko alderdiei, horiek aztertzeko bilera batera gonbidapena eginez.

“Heldu diren iruzkinak aztertu ondoren egin dugu behin betiko proposamena”, azaldu du Ibarrak. “Argi utzi nahi dugu udal gobernu irekia garela eta negoziatzeko prest gaudela”.

Proposamena hurrengo egunetan aurkeztuko dela azaldu dute udal ordezkariek eta asmoa “urte berria onartutako udal aurrekontuarekin hastea” dela, ondo bidean.

Osorik irakurri