☉ Arrigorriaga
Hamaika zirku konpainiak Arrigorriaga hartuko dute asteburuan
Irailaren 10, 11 eta 12an Arrigorriagako Klown eta Pailazoen Nazioarteko jaialdiaren XXVI. edizioa antolatu du Udalak.
Irailaren 10, 11 eta 12an Arrigorriagako Clown eta Pailazoen Nazioarteko jaialdiaren XXVI. edizioa antolatu du Udalak. Aurten hamaika konpainia izango ditugu kiroldegian eta frontoian: Euskal Herriko lau, Estatu mailako hiru eta nazioarteko beste lau. Aurten ere musika, kale-antzerkia, zirku modernoa, aire akrobaziak eta umorea izango dugu herrian Galizia, Madril, Andaluzia, Frantzia, Argentina, Brasil eta Kenyako konpainien eskutik. Gaur goizean jaialdiaren aurkezpena egin du Udalak prentsaurreko batean, eta hurrengo asteburuko nondik norako guztiak azaldu dituzte bertan: “Gaur, poztasun handiz kontatu nahi dizuegu, datorren asteburuan, irailaren 10, 11 eta 12an Klown eta Pailazoen Nazioarteko XXVI. jaialdia ospatuko dugula Arrigorriagan”, azaldu du Maite Ibarra Arrigorriagako alkateak.
“1995ean “Magia, pailazoak eta kale-artea jardunaldiak” izenpean jaio zena, 26 urte hauetan zehar, formatua eta programazioa zabaltzen eta berritzen joan da. Hasiera batean, egitate eszenikoaren hedapen gisa pentsatuta zegoen, baina azken urteetan hainbat jarduera osagarrirekin jaialdia aberasteko apostua egin da, hala nola: erakusketak, klown ikastaroak profesionalentzat eta zaleentzat, eduki pedagogikoko eskolarako jarduerak, haur-ospitaleetarako saioak, etab”, jarraitu du alkateak Begoña de Ibarra Bizkaiko Foru Aldundiko Kulturako Zuzendari Nagusiarekin, Amagoia Garaizabal Arrigorriagako Kultur Teknikaria eta Jaialdiaren Zuzendariarekin eta Iratxe Rubio Arrigorriagako Kultur zinegotziarekin batera egindako prentsaurrekoan. Aurkezpen egunean bertan Circo Chosco, Trotamundos eta Maite Guevara konpainietako kideak egon dira.
Aurtengo edizio honetara joan ahal izateko izena eman beharko dute interesdunek eta horretarako bide bi ahalbidetu ditu Arrigorriagako Udalak: lehen aukera kulturakoinskripzioak@arrigorriaga.eus helbidera idaztea da. Bigarren aukera Kultur Etxeko telefono zenbakira deitzea da (946 712 361) 16:00etatik 20:00etara. “Covid-19ari lotutako egoerari dagokionez, Udalak arduratsu jokatu nahi izan du: horregatik, aurretiko izen emateaz gainera, jarduera guztiek %60ko edukiera murriztua izango dute, musukoa nahitaezkoa izango da, eta eserlekuak 1,5 metroko segurtasun distantziara jarriko dira”, azaldu du Udalak.
Goitik behera, Circo Chosco, Trotamundos eta Maite Guevarako kideak, udaletxeko plazan // Geuria
Irailak 10, barikua
Jaialdiak gogor ekingo die ikuskizunei ostiral arratsaldean hasita: 18:00etan Galizia eta Euskal Herriko Forzu 2 ikuskizuna izango dugu Circo Chosco konpainiaren eskutik. Umorea ardatz nagusi bezala, tranpez, kolpeez eta magiaz baliatuko dira publikoa aho bete hortz uzteko.
19:30ean, Gala Zirko Euskalduna izango dugu frontoian, Trotamundos eta Zirkodromoa Barakaldo konpainien eskutik.
Irailak 11, zapatua
Zapatuan ere programa oso interesgarria izango dugu Arrigorriagan. 12:30ean Julian Y Pendorcho konpainiak 60 minutuko Julián Jaunaren Zirkua izeneko ikuskizuna eskainiko du erdaraz, 18:00etan Galiziako Sempre Arribaren C’est Pas Possible eta 19:00etan Bambolea konpainiak Udazkeneko Kabareta. Hiru saioak kiroldegian antolatu dituzte.
Frontoian Brasil eta kataluniako Circo Los-ek Kasumay testurik gabeko ikuskizuna eskainiko du 20:30ean. ‘Kasumay’ “Kaixo, zer moduz?” esan nahi du senegaldarrez eta obra honetan hiru pertsona ikusiko ditugu mahai baten inguruan, euren bizitzak zeharo aldatuko dituen dei baten zain.
Irailak 12, domeka
Domeka ere ikuskizunez blai datorkigu 12:00etatik 20:30ak arte. 12:00etan Pirritx, Porrotx eta Marimotots izango ditugu kiroldegian Amaren Intxaurrak ikuskizunarekin: “Geure kultura ospatzeko eta errituak berritzeko. Garena mugitzeko. Hankak luzatuz, gerria mugituz, hegoak astinduz eta ur azpian ere egiten dugu dantza. Etor zaitez gurekin dantzatzera, atera ezazu zure barneko animalia kalera!”.
18:00etan Adoro, Pailazak Gurpil Gainean ikuskizuna eskainiko dute Alta Gama konpainiakoek frontoian. Klownez, bizikletez eta zuzeneko musikaz gozatu ahalko dute bertara hurbilduko direnek.
19:00etan Zein Egun Ona plazaratuko du Maite Guevara artistak Martina pertsonaiaren bidez. 19:30ean La Querida Compañíaren Airean ikuskizuna antolatu dute.
20:30ean Mighty Jambok Ehiztaria izeneko testurik gabeko ikuskizuna dakar frontoira. 60 minurtuko saio honetan Kenyako masaien herrietara eramango gaitu, “indarrez betetako ikuskizuna izango da eta urruneko kultura batera hurbiltzen gaitu bgere tradizio eta jauzi tribal eta jantzi originalekin”.
Argazkiak prentsaurrekoaren ostean // Geuria
“Azken urte zailek erakutsi digute zein garrantzitsua den kultura eta artea gure herrien eta herritarron bizitzetan. Klown eta Pailazoen Nazioarteko XXVI. Jaialdiak kolorea, musika eta humorea ekarriko digu Arrigorriagari; eta hau da garrantzitsuena guretzako”, izan dira Ibarraren hitzak prentsaurrekoari amaiera emateko.
Arteen sukaldea
Irailaren 23an eta 24an ere Arteen Sukaldea 2021 Euskal Herriko kale-arteen elkartearen urteko topaketa antolatu dute Lonbo Aretoan. 23an ‘Del Dato al Relato’ tailerra antolatu du Cultumetriako Álvaro Fierrok 10:00etatik 14:00ak arte. Hilaren 24an, 09:30etatik 14:00ak arte ‘V. Gogoeta Jardunaldia antolatu dute: Datorren Kultura adierazleak eta ondasuna’ eta ostean La Pez Konpainiak ‘Alferrikakoen Askatasuna’ hitzaldia prestatu du.
☉ Arrigorriaga
Ahotsa “askatzeko” tailerra antolatu dute Arrigorriagan, euskara hutsean
Urriaren 15ean antolatu dute tailerra Lamiaenan: “Gure ahotsa askatasunez bizitzen dugunean, geure buruarekin erosoago sentitzeko aukera dugu”
Urriaren 15ean ‘Askatu zure ahotsa’ izeneko tailerra antolatu dute euskara hutsean Lamiaenan, 18:00etatik 20:00ak arte.
Saioa Shakti Olaizolak antolatu du: “Ahotsa ahula bezain indartsua da. Izan ere, ahulezia horrek ematen dio duen indarra”, azaldu dute Lamiaenatik.
“Geure burua adierazteko, komunikatzeko, garena kanporatzeko, sortzeko ahalmena da hori. Horrexegatik dago beti hain baldintzatua tentsio eta blokeoekin. Gure ahotsa askatasunez bizitzen dugunean, geure buruarekin erosoago sentitzeko aukera dugu”.
Ikasturte berriaren programa urriaren 4an hasiko du Lamiaenak Emakume Sortzaileen IV. azokarekin eta ‘(Des)kontrolatuta’ antzerki ikuskizunarekin. Egun horretan, herritarrek egitaraua jasotzen duen liburuxka eskuratu ahal izango dute.
Jarduera honetan eta Lamiaenako besteetan izena emateko epea urriaren 6an zabalduko dute eta leku bitan egin ahalko dira: Lamiaenan bertan, arratsaldeko ordutegian (astelehenetik ostegunera 17:00etatik 20:30era eta ostiraletan 20:00ak arte) edo Abusu Zentro Soziokulturalean (astelehenetik ostiralera 8:00etatik 14:45era).
☉ Arrigorriaga
Gizonak berdintasunaren borrokan inplikatzeko hitzaldia antolatu dute Arrigorriagan
Ikasturte berriaren programa urriaren 4an hasiko du Lamiaenak Emakume Sortzaileen IV. azokarekin
Lamiaena emakumeen etxeak ikasturte berriko programa iragarri berri du Udaleko Berdintasun sailarekin elkarlanean.
“Aurtengo egitarauak ikastaroak, hitzaldiak, solasaldiak, zinema, erakusketak eta tailerrak hartzen ditu barne. Gehienak proposamen berriak dira, Lamienakideek proposatutakoak batzuk, Berdintasun Sailetik behar espezifikoetara erantzuteko diseinatuak besteak”, azaldu dute Lamiaenatik.
Jarduera guztien artean berdinatsuna eta gizonek esparru honetan duten errolaren inguruko hitzaldia prestatu dute: «Non gelditzen gara gizonok berdintasunaren garaian?».
Saioa herritar guztiei zuzenduta dago eta urtarrilaren 20 eta 27an antolatu dute, 18:00etatik 20:00ak arte.
Azkenaldi honetan, berdintasunaren giroa askoz indartsuagoa da. Horrek gizonok kolokan jartzen gaitu eta, askotan, gure lekua zein den ez dugu argi”, azaldu dute Lamiaenatik. “Gainera, gure lagun batzuk ezkor agertzen dira honen aurrean. Tailer honetan, gizonak elkartuko gara, horretaz hitz egiteko, patxadaz eta matxismoak gure kontra eragiten diguten guztiaz hausnartzeko (kotxe istripuak, gartzela, drogak…)”.
Ikasturte berriaren programa urriaren 4an hasiko du Lamiaenak Emakume Sortzaileen IV. azokarekin eta ‘(Des)kontrolatuta’ antzerki ikuskizunarekin. Egun horretan, herritarrek egitaraua jasotzen duen liburuxka eskuratu ahal izango dute.
Jardueretan izena emateko epea urriaren 6an zabalduko dute eta leku bitan egin ahalko dira: Lamiaenan bertan, arratsaldeko ordutegian (astelehenetik ostegunera 17:00etatik 20:30era eta ostiraletan 20:00ak arte) edo Abusu Zentro Soziokulturalean (astelehenetik ostiralera 8:00etatik 14:45era).
☉ Arrigorriaga
Haurrentzako Breakdance ikastaroa antolatu dute Arrigorriagan, urtarrilera bitartean
Eneko Redondo ‘BBoy Witxillok’ eskainiko ditu jarduera hauek eta lehen saio irekia hilaren 23an antolatu dute, 17:30ean
Altzoan Zaintza Sareak eskolaz kanpoko Breakdance ikastaroa antolatu du urritik urtarrilera Arrigorriagako eskolako frontoian 4 eta 8 urte bitarteko haurrentzat.
Eneko Redondo ‘BBoy Witxillok’ eskainiko ditu jarduera hauek eta lehen saio irekia hilaren 23an antolatu dute, 17:30ean. Ordubeteko saioak izango dira hilabeteko astearte bitan: 4 eta 5 urteko haurrena 17:15etan programatu dute eta 6 eta 8 urte bitarteko umeen taldearen saioa 18:15etan izango da.
“Helburua eskolaz kanpoko ekintza ezberdinak eskaintzea da”, azaldu dute Altzoan Zaintza Saretik. “Kirola egiteko jarduerak ere martxan ipiniko ditugu eta baita gorputz adierazpena susatzen dituztenak ere, adin tarte horretan oso garrantzitsua baita umeentzat norberaren gorputza ezagutzea, kontrolatzea eta maitatzea, ‘Dantza & Jolasa Familiartean’ jarduerarekin bezala”.
Eskolaz kanpoko ekintzen maiztasunari dagokionez, helburua da haurren denbora eta jolas librea ez moztea. Hori dela eta programatu dituzte bi astean behin: “Horrela, familiei bestelako jarduerak egiteko aukera ematen diegu”.
Lauhilekoaren prezioa 65 eurokoa da. Informazio gehiagorako eta izena emateko ipini harremanetan altzoansarea@gmail.com helbide elektronikora e-posta bidaliz.
☉ Arrigorriaga
Bideoa | Infekzio-gaixotasunei aurre egiteko prebentzio-protokolo falta salatu dute Arrigorriagako Arandia egoitzako langileek
Domus VI taldeko langileak ostegunero elkartuko dira Arandiako egoitzaren aurrean, bizi duten egoera salatzeko
Gaur goizean kalera irten dira berriro Arandia egoitzako langileak, beren lanpostuetan “osasuna arriskuan dagoela” salatzeko.
GEURIAri azaldu lez, infekzio-gaixotasunei aurre egiteko prebentzio-protokolo falta salatu dute Arrigorriagako zentroko langileek eta egoera salatzeko mobilizazioa egin dute zentroaren aurrean.
“Arrigorriagako egoitzan ez dago langile nahikorik”, gehitu dute ELA sindikatuko ordezkariek. “Garabi falta, aldagelak, ohe barrak, gortinak… eta infekzio gaixotasunei aurre egiteko prebentzi-protokolo eguneraturik ez dago. Horri gehitu behar zaizkio inolako justifikaziorik gabeko kaleratzeak eta zehazpen-espedienteak”.
Gainera, sindikatuko ordezkariak azaldu du Domus VI taldeak langileen mobilizazioari esker egindako arrisku psikosozialen balorazioa ez duela osatu: “Ebaluazio horrek argi eta garbi islatzen du langile falta eta lan-gainkarga. Datuak kezkagarriak dira eta presazko neurri eraginkorrak hartzea eskatzen dugu”.
ELA: “Ebaluazio horrek argi eta garbi islatzen du langile falta eta lan-gainkarga. Datuak kezkagarriak dira eta presazko neurri eraginkorrak hartzea eskatzen dugu”
Ondorio modura, Arandiako langileek ez dute onartuko beren osasunarekin jolasten jarraitzea, eta mobilizazio-dinamika batekin jarraituko dutela iragarri dute, egoera konpondu arte. Izan ere, langileak ostegunero elkartuko dira Arandiako egoitzaren aurrean, bizi duten egoera salatzeko.
Langileak, Arandia zentroko leihoetan // Geuria
Langileak eta egoiliarrak, kaltetuak
Gaurko mobilizazioak egoiliarren eta langileen arreta erakarri du eta horietako batzuk kalera irten dira, langileen borrokarekin bat egitera.
GEURIAk bertako familia batekin berba egiteko parada izan du eta egoera honek egoiliarrengan eta beren familiengan eragin zuzena duela azaldu dute. Ez dute izen abizenik eman nahi, “horrek izan ditzakeen ondorioak direla eta”. Hala ere, familiaren arabera, 43 egoiliar daude solairu bakoitzean eta horiek artatzeko pertsona bi baino ez daude kasurik onenean. Guztira 132 egoiliar daude Arrigorriagako egoitzan: “Langile falta izugarria da egoitza honetan”, kexatu dira.
Familiaren arabera egoerak nabarmen egin zuen txarrera 2019an, zentroak zuzendaritza aldatu zuenean: “Kudeaketa guztiz aldatu zen pribatizatu zenean langile eta janari kopuruan eta zainketan aurreztu zuen enpresa berriak. Langileak leher eginda daude: ordutegi txarrak dituzte, soldata kaxkarrak… eta lanez gainezka daude beti”. Enpresari langileek bizi duten egoeraren berri ematen dieten bakoitzean “egin beharrekoak egiten dituztela” izaten da erantzuna, familiaren arabera.
“Kudeaketa oso txarra izaten ari da, baina momentu txarrena itzalaldi masiboa gertatu zen bezperan bizi izan genuen Arandian”, gehitu dute. “Joan den apirilaren 28an izan zen eta zentroa argindarrik gabe egon zen bi orduz. Elektrogeno-taldea ez zebilen eta ez zegoen larrialdi egoetarako planik ere ez. Zentroko zuzendaritza oporretan zegoen eta inprobisazioz egin behar izan zuten lan bertako langileek. Onartezina da”. Sindikatuaren arabera, gaur egungo lan-giroa “tirabiratsua” izaten ari da eta “egungo zuzendaritzarekin ezinezkoa da elkarrizketa adeitsua izatea”.
Elkarretaratzeko langileak // Geuria
Egoiliarren osasuna eta ongizatea lehentasuna dira guretzat, eta hori bermatzeko konpromisoz eta profesionaltasunez lan egiten jarraitzen dugu”, azaldu dute ELAtik. “Baina premiazkoa da egoera hau aldatzea, langileen osasuna jokoan dagoelako”
☉ Arrigorriaga
Bihar da Gure Magalean Arrigorriagako elkarteko eskolaz kanpoko ekintzetan izena emateko azken eguna
“Lankidetza, talde lana, besteenganako begirunea eta parte-hartze aktiboa dira ekintza hauen ardatza”, azaldu dute Gure Magalean elkartetik
Irailaren 19a da Gure Magalean Guraso Elkarteak antolatutako eskolaz kanpoko jardueretan izena emateko azken eguna.
Balleta, eskalada, batukada, xakea, jolas kooperatiboak, irristaketa, margogintza, multikirola… eskaintza zabala plazaratu dute guraso elkartetik: “Lankidetza, talde lana, besteenganako begirunea eta parte-hartze aktiboa dira ekintza hauen ardatza”, azaldu dute Gure Magaleanetik.
Gure Magalean | Eskolaz kanpoko jarduerak 2025
4-5 urteko haurrak
Ingelesa Ludoteka: 4 urtekoak, astelehenetan; 5 urtekoak, asteazkenetan
Balleta: astezkenetan
Dantza Modernoa: 4 , ostegunetan; 5 urtekoak, ostiraletan
Taekwondo: 5 urtekoak, astelehenetan; 4 urtekoak, asteazkenetan
Irristaketa: 5 urtekoak, ostiraletan (16:45-17:45)
Jolas kooperatiboak: 4 eta 5 ustekoak, asteartetan
1. 2. eta 3. mailakoak
Margogintza: 3. maila, astelehen eta asteartetan; 1. eta 2. maila, asteazkenetan; 1. maila, ostegunetan; 2. maila, ostiraletan
Ingelesa Ludoteka: 1. maila, ostiraletan
Balleta: 1. maila, asteazkenetan
Eskalada: 1. 2. eta 3. maila, astelehenetan eta ostegunetan
Batukada: 1. eta 2. maila astelehenetan; 2. eta 3. maila, asteazkenetan
Dantza modernoa: 1. 2. eta 3. maila, astelehen, astearte eta asteazkenetan
Xakea: 2. eta 3. maila, ostegun eta ostiraletan
Joskintza: 1. 2. eta 3. maila, astelehen eta asteazkenetan
Esku Pilota: 1. 2. eta 3. maila, astelehen eta ostiraletan
Irristaketa: 1. 2. eta 3. maila, ostiraletan (16:45-17:45)
Multikirola: 1. 2. eta 3. maila, asteartetan
4. 5. eta 6. maila
Margogintza: 5. maila, astelehenetan; 4. maila, astearte eta ostegunetan; 6. maila, asteazkenetan; 5. eta 6. maila, ostiraletan
Eskalada: 4. 5. eta 6. maila, astelehen eta ostegunetan
Antzerkigintza: 5. eta 6. maila, asteazkenetan
Batukada: 4. 5. eta 6. maila, astelehen eta asteazkenetan
Dantza modernoa: 4. eta 5. maila, astelehenetan; 6. maila, ostiraletan
Hip Hop: 4. 5. eta 6. maila, ostegun eta ostiraletan
Xakea: 4. 5. eta 6. maila, ostegun eta ostiraletan
Joskintza: 4. 5. eta 6. maila, astelehen eta asteazkenetan
Irristaketa: 4. 5. eta 6. maila, ostiraletan (16:45-17:45)
Multikirola: 4. 5. eta 6. maila, asteartetan
Argazkiak | Moda pasarela bilakatu da gaur Galdakao, Santakurtze jaietan
‘Jone, batzuetan’ filma euskaraz proiektatuko dute Social Antzokian, Basaurin
Ahotsa “askatzeko” tailerra antolatu dute Arrigorriagan, euskara hutsean
Argazkiak | Moda pasarela bilakatu da gaur Galdakao, Santakurtze jaietan
Argazkiak | Galdakaoko jaietako Playback lehiaketa 140 argazkitan!
Argazkiak | Kuadrillak busti dira gaur Galdakaoko jaietan: batzuk euripean, beste batzuk Paddle Surfean
Bideoa | DJ Pipi Galtzaluze: «Musika ona, energia eta publikoarekin konektatzea da ondo pasatzeko gakoa»
Bideoa | Antzeko, Bertan Kaldo eta Dekantzekoz, Galdakaoko jaietako Playback lehiaketako onenak!
