☉ Basauri
Susana Corbella (Anitza Arte Eskola): «Artea hizkuntza da guretzat»
Anitza Arte Eskolak ateak zabalduko ditu San Migelen hilaren 26an, artea ikerketa-erreminta bezala erabiliz. Zeramikarekin marrazketa, margogintza eta Butoh dantza bezalako adierazpenak landuko dituzte.
Susana Corbella (Laudio, 1965) zeramika ikaslea eta arteterapeuta da, baita irailaren 26tik aurrera zabalik izango den San Migeleko Anitza Arte Eskolako zuzendaria ere. Beste lau emakumerekin batera komunitatearekin topatzeko, ikasteko eta gizatasuna garatzeko espazio artistikoa zabalduko du.
Zeramikako formazioa eskolako ardatz nagusia izango da eta horren eskutik marrazketa, margogintza, gorputzaren ezagutza eta arteterapia tailerrak landuko dituzte haurrentzat, gazteentzat eta helduentzat.
Artelanak sortzeaz harago, artea hizkuntza modura ulertuta, materialak ezagutuko dituzte eskolan izena ematen duten ikasleek. GEURIA Abaroa kaleko laugarren zenbakira hurbildu da artearen topagune hori lehen eskutik ezagutzera eta Susanarekin eta Nagore Liñán irakaslearekin (Santurtzi, 1993) berba egin dugu, kolore, forma eta usainen artean.
Nola jaio zen Anitza Arte Eskola?
Azken 10 urteetan zeramika klaseak ematen aritu naiz Gironako unibertsitatean eta aldi berean arteterapeuta naiz. Gironan masterrak eta graduondokoak eskaintzen ditugu. Pandemia aurretik ere banintzen Laudioko Arteterapia graduondoko diplomaturaren koordinatzailea. Arteterapia lan bera Gironako Grefart formazio institutuan burutzen dut. Grefart arteterapiako profesionalen elkartea dugu. San Migeleko Anitza Arte Eskolaren sorrerari dagokionez, zeramika arteterapiaren bidez lantzeko arte leku bat izatearen beharragatik sortu genuen. Nik betidanik kultur etxeetan landu dut zeramika eta nire ustez Euskal Herrian, unibertsitatean izan ezik, ez dago zeramikan formazio arautua jasotzeko lekurik. Hori dela eta, San Migelen zeramikako titulu propioko formazioa sortu nahi dut.
Eta nola egingo duzu?
Artea modu libre batean sortuz. Gure asmoa ez da beste batzuen lanean oinarrituta lanak sortzea edo kopiatzea, baizik eta ikuspegi humanista batetik egitea. Ikasle bakoitzak bere sinbologia, bere hizkuntza bilatzea proposatzen dugu gure arte eskolatik, nahi duen hori artearen bidez adieraziz. Gure oinarria arteterapian dago eta horren arabera artea hizkuntza bat da guretzat. Ahotsa, gorputza… daukagu eta materialekin eta horiek proposatzen dutenarekin elkarrizketa bat sortzen dugu. Material horiekin artelanak sortzen ditugu eta hortxe kokatzen gara gu: artearen bidez ikerketa-lanak egiten.
Artearen bidez ikerketa-lanak egingo dituzte Anitza Arte Eskolan // Geuria
Beraz, honek ez dauka zerikusirik udal-tailer arrunt batekin.
Gure formazioaren bidez materiala ezagutuko dute ikasleek, ez dira “gauza soilak egitera etorriko”. Gure helburua ez da objektu soilak sortzera mugatzen; buztina, koloreak… gertutik ezagutuko ditugu, ikerketaren bidez artelanak eginez.
Baina dena ez da buztina izango Anitzan. Nolako eskaintza dauka Anitza Arte Eskolak zeramikako formazioaz harago?
Zeramika, Butoh dantza (gorputza eta mugimendua), Eskuarte tailer-laboratorioa, Arteterapia, idazkera kreatiboa eta marrazketa eta margogintza tailerrak prestatuko ditugu umeentzat, gazteentzat zein helduentzat.
Monografikoak ere landuko dituzue.
Funtzio bikoitza landuko dute monografikoek: artea ezagutzen ez duten pertsonengana hurbiltzea alde batetik, eta dakitenentzako formazio trinkoa ematea, bestetik.
Arte irakaskuntza integratzailea duzuela esaten duzue.
Bai, hala da, gure sormen lanean emozioak kontuan hartzen ditugulako. Arteak emozioak lantzen ditu eta bertan lan egingo dugun bost irakasletatik lau arteterapeutak gara.
Betidanik existitu izan da arteterapia?
Bigarren Mundu Gerra osteko ‘art brut’ korrontetik jaio zen. Horren arabera, jendea trauma bat pairatu ostean artearen bidez hobeto sentitzen zela ikusi zuten ikerlariek. Hortik aurrera arteterapia Europan zehar hedatzen hasi zen eta zenbait herrialdetan arteterapia zerbitzua gizarte-segurantzan sartuta daukate. Estatu mailan Bartzelona da arteterapia lantzen duen hiri nagusia. Bizkaian, esaterako 15-20 arteterapeuta egongo dira, gutxi-gorabehera.
Noiz abiarazi zenuten espazioa eta nolako lanak egin dituzue bertan?
Joan den martxoan. San Migeleko lonja hau eskuratu eta konponketa zein apainketa lanekin hasi ginen. Hezetasun asko zeuden bertan, itoginak eta guzti. Horregatik, teilatuan konponketak egin genituen. Hala ere ez dugu goitik behera aldatu: underground esentzia oso gustuko dut eta elementu batzuk zeuden bezala mantendu ditugu, baita diru apur bat aurreztu ere (barreak). Aipatutako lanez gainera, konketa batzuk jarri ditugu.
Zer dela eta San Migelen eta ez beste nonbait?
Egia esateko oso ondo kokatuta dago San Migel: trena hementxe bertan daukagu eta Basauri kilometro gutxira dago. Urte asko eman ditut Amurrion bizitzen eta lan egiten eta zeramikako klaseak emateko jende kopuru murriztua geneukan. Nire ustez erraztasunak eman behar dizkiogu jendeari eta nire ametsa zeramika klaseak mendi tontor batean egitea bazen ere, bertara ez litzateke inor hurbilduko (barreak).
Zer diote auzotarrek proiektu berri honen inguruan?
Hasiera fasean gaude oraindik eta goizegi da jakiteko, baina jendea lehen momentutik hasi zen izena ematen eta jende asko informazio bila hurbiltzen da. San Migelen interesa duen jende asko dago, urtean zehar ez dagoelako inolako eskola artistikorik edo umeentzat eskolaz kanpoko ekintzak antolatzen dituen eskola artistikorik, eta guraso askok Anitzaz galdetu digute.
Noiz hasiko duzue ikasturtea?
Irailaren 26an. Hala ere, ikasturtea hasi baino lehen saio bi prestatu genituen: San Migeleko herritarrentzako ate irekien saioa irailaren 17an eta inaugurazio ofiziala irailaren 23an. Sarrerako ate nagusia zabaldu genuen jendea hurbildu eta Anitza Arte Eskola bertatik bertara ezagutu zezan. Hala ere, ideia bat egiteko anitzaeskola.com webgunean eta gure sare sozialetan eskolaren inguruko informazio guztia eta izena emateko aukera eskaintzen dugu.
☉ Basauri
Azeituna con huesos, Keax, Reeler, Jaimones, Kruddö eta Silkat lehiatuko dira larunbatean, Rockeineko finalean
Rockeinen 2025eko edizioan 196 artistak eman dute izena, 10. urtez jarraian parte hartze marka gaindituz
Larunbat honetan, azaroaren 1ean, izango da Rockein lehiaketako finala, Basauriko Social Antzokian. Bertan, Azeituna con huesos, Keax, Reeler, Jaimones, Kruddö eta Silkat bandak lehiatuko dira. Sarrera doakoa izango da eta gonbidapen bidez egingo da, Social Antzokiko webgunetik eskuratuz.
Basauriko Udalak, Bizkaiko Foru Aldundiaren Kultura, Euskara eta Kirol sailaren laguntzaz, antolatu eta Euskadiko eta Nafarroako talde eta bakarlariei zuzendutako Rockein musika-lehiaketaren 13. edizioaren finala izango da aurtengoa.
Azeituna con Huesos talde gipuzkoarra (elektronika, popa, jazza); Keax hirukote bizkaitarra (The Owl Project taldeko kide ohiak, LCD Soundsystem edo Ratatat bezalakoen eraginekin); eta Bilbon egoitza duen Reeler rock alternatiboko laukotea, Bizkaiko, Poloniako, Ingalaterrako eta Irlandako musikariek osatua, dira Rockeinen 13. edizioko sari nagusia irabazteko hiru hautagaiak.
Eskualdeko hautagaiak
Beste hiru talde finalistak Jaimones (70-80 hamarkadako rock amerikar laukotea, Basauriko kide batekin), Kruddö, rock gogor eta stoner bikotea, Jon Ander Santamaría bermeotarrak eta Txaber Miravalles etxebarriarrak osatua; eta dira Silkat, indie rock hirukotea, Bilbo eta Galdakaoko musikariekin eta The Cure edo Radiohead taldeen eraginekin.
Azken hiru talde hauek Hego Uribeko artistarik onenari saria lortzeko aukera izango dute, Basaurin, Arrigorriagan, Etxebarrin, Galdakaon, Ugaon, Usansolon edo Zaratamon erroldatutako kide bat gutxienez duten proiektuak saritzen baititu.
“Ohi bezala, Rockeineko 5 kategorien irabazleen izenak (‘Bizkaia saria’, ‘Artistarik onena euskaraz’ eta ‘Eskarabilera saria’, barne) finalean bertan jakinaraziko ditu epaimahaiak”, azaldu dute antolaketa taldetik. Rockeinen 2025eko edizioan 196 artistak eman dute izena, 10. urtez jarraian parte hartze marka gaindituz.”
Emakumeen esperientziaren hitzaldia
Azaroaren 6an, MAZ Basauri jaialdiaren bezperan hain zuzen ere, ‘Emakumeak eta industria musikala’ topaketaren bigarren emanaldia hartuko du Marienean Basauriko Emakumeen Etxeak (Kareaga Goikoa, 54).
Iaz lehen edizioa izan zen eta Rockeinek, MAZ Basaurik eta Marieneak urtero antolatzen duten hitzaldia da, eta helburua musikaren industriako emakumeen esperientziak beste emakume batzuekin partekatzea da, “sektorean eta eszenatokietan emakumeen presentzia handiagoa sustatzeko”, hain zuzen ere.
Aurtengo gonbidatuak La Furia artista nafarra, Ibone Iza BIME Proko edukien arduraduna eta Maite Alaña MAZ Basauri eta Rockeineko zuzendaria izango dira eta Emilia Arias kazetari eta idazleak (TVE, Pikara Magazine) gidatuko du hitzaldia.
Egitaraua | Rockein finala 2025
Larunbata, azaroak 1
20.30 (ateak irekitzea)
Hego Uribeko artistarik onenaren kategoria
21.00 Silkat
21.30 Kruddö
22.00 Jaimones
Kategoria nagusia
22.40 Azeituna con huesos
23.10 Reeler
23.40 Keax
00.15 Sari-banaketa
☉ Basauri
Basauriko Social Antzokiko zubia itxiko dute ibilgailuentzat, San Faustoko obrengatik
Urriaren 28tik (asteartetik) azaroaren 9ra bitartean ibilgailuen trafikoa moztuko dute zubian
Urriaren 28tik (asteartetik) azaroaren 9ra bitartean ibilgailuen trafikoa moztuko dute Social Antzokiko zubian, San Fausto plaza berria eraikitzeko lanak direla eta.
“Egun horietan zehar, zubiko galtzada handituko dute, eta Autonomia kalekoa ere bai, elizaren eta A25 plazaren aurreko zatian”, azaldu dute udal ordezkariek. Hori dela eta, denbora tarte horretan ezingo da Autonomia kaletik udaletxerantz biratu, eta udaletxe eta Kareaga Goikoa kaleen arteko bidegurutzetik Arizgoitira jaitsi ere ez.
Gainera, Basauriko Udaletik iragarri dute azaroaren 4tik 9ra Autonomia kalean itxita egongo dela Begoñako Andra Mari eta Nagusia kaleen arteko zatia.
☉ Basauri
Sidenorreko presidentea ikertzen ari da Espainiako Auzitegi Nazionala, Israelgo arma enpresa bati altzairua saltzeagatik
Jose Antonio Jainaga ikertzeaz gain, zuzendaritzako beste bi kide ikertuko dituzte, kontrabandoagatik eta gizateriaren aurkako delituan parte hartzean konplize izateagatik
Jose Antonio Jainaga Sidenor enpresako zuzendaria eta beste bi kide ikertzen ari da Espainiako Auzitegi Nazionala, Israelgo arma enpresa bati altzairua saltzeagatik.
Zehazki, kontrabandoagatik eta gizateriaren aurkako delituan parte hartzean konplize izateagatik ikertuko dituzte hiru enpresariak.
Ikerketa Francisco de Jorge epaileak zabaldu du, Comunitat Palestina de Catalunya-Terra Santa elkartearen kereila baten ondorioz.
Hain zuzen ere, Sidenorrek Israel Military Industries (IMSI) konpainia israeldarrari altzairua saldu diolakoan zabaldu du epaileak ikerketa.
Epailearen ustez, Basauriko enpresako zuzendaritzako kideak “erabat jakitun” ziren saldutako materiala armak ekoizteko erabiliko zela.
Momentuz, ez dute Sidenor Aceros Especiales enpresa osoa ikertuko. Gertakariak Clerbil SL merkataritza-sozietateari ere egotz dakizkioke, sozietate horrek baitu Sidenor Holdings Europa sozietatearen administratzaile bakarraren kargua.
Hala ere, epaitegiak uste du oraingoz ez dela bidezkoa Sidenor Aceros Especiales SLU merkataritza-sozietatea pertsona juridiko ikertu gisa hartzea. Alegatutako arrazoia da enpresa horretako langileek zeregin aktiboa dutela eta salaketa publikoa egiten laguntzen dutela, bai eta ustezko delitu-jarduerarekin jarraitzea eragozten dutela ere.
Kasu horretan, epaileak Europako zuzentaraua eta arauhausteei eta ustelkeriaren aurkako borrokari buruzko informazioa ematen duten pertsonen babesa arautzen duen legea aplikatzen ditu erabaki hori hartzeko.
Harremana etetea
Sidenorrek uztailean adierazi zuen salmentak eten zituela Israelekin. BDZ mugimenduaren (Boikota, Desinbertsioa eta Zigorrak) eta sindikatuen kritiken ostean eten zuen harremana Sidenorrek Israelekin.
Hain zuzen ere, ekainean GEURIAn eta beste hedabide batzuetan zabaldu genuenaren arabera, Sidenorrek 1.207 tona altzairu saldu zizkion IMI Systems armagile israeldarrari, 2024ko abuztutik.
Enpresaren arabera, Israelekin salmentak eten zituen, “joan den apirilean Espainiako Gobernuak herrialde horri salmenta-kontratua etetea erabaki ondoren”. Aurretik, ordea, Sidenorrek, epailearen autoaren arabera, ez zion salmentarako beharrezko baimenik eskatu Espainiako Gobernuari.
☉ Basauri
La Basconiako nabeen birgaitze-proiektua idazteko kontratazio-prozesua hasi du Basauriko Udalak
Nabeak birgaitu ondoren, parte-hartze prozesua jarriko du martxan Udalak zehazteko zein jarduera kultural edo artistiko egin bertan
La Basconiako industria-nabeak birgaitzeko proiektua idazteko kontratua lehiaketa publiko bidez adjudikatzeko lizitazio-prozesua hasi du Basauriko Udalak.
Lizitazioaren oinarrizko aurrekontua 220.825 eurokoa da, eta exekuzio-epea sei hilabetekoa. Birgaitze-lanek Kultura Ministerioaren dirulaguntza jasoko dute; 4 milioi euro, zenbait urtetan banatuta.
“Nabeen eraikuntza-antolamendu egokia dela eta, proiektuak egitura metaliko errematxatua mantentzea aurreikusi beharko du. Zoladurari dagokionez, berria egingo dute. Eta, bestalde, fatxadak desmuntatu, eta berriak jarriko dituzte”, diote udal arduradunek.
Obren lehen faseari dagokionez, nabeak birgaituko dituzte: egitura sendotu, eta orubea zolatuko dute, plaza publiko estalia bihur dadin.
“Gero, analisi tekniko eta herritarren parte-hartze prozesu baten ostean, zehazkiago erabakiko da eremu hartan zein jarduera egingo diren, baina, edozelan ere, jardun kulturalak edota artistikoak izango dira”, diote udal ordezkariek.
Hiru gune
Hiru nabe birgaituko ditu Udalak: 125 metro luze eta 57 metro zabal. “Hiru nabeen azalera 7.125 metro karratu da, ia-ia San Mames futbol-zelaiaren bestekoa (7.140 metro karratu); beraz, azpiegituran gune desberdinak egon ahalko dira, erabilera kolektiboetarako”, diote.
Udalaren helburua da nabeak birgaitu ondoren sortuko den espazio berria lotunea izatea eremu hartan eraikiko dituzten etxebizitzen eta ekonomia-jarduerako gunearen artean, “eta basauriarrentzako erreferentziazko tokia ere bihurtu dadila”.
La Basconiaren industria-nabeak SEPESen lurretan daude. Erakunde horrek orubeok erosi zituen erabilera mistoko hirigintza-jarduketa abiarazteko, eta, horren barruan, eremu bi garatuko dituzte: ipar-mendebaldekoa, ekonomia-jardueretarako, eta ipar-ekialdekoa, etxebizitza- eta merkataritza-erabilerarako.
2024ko martxoan, SEPESek doan laga zizkion nabeak Basauriko Udalari. Erakunde biek sinatutako lagapen-kontratuak ezartzen du nabe horiek erabilera publikoko edo gizarte-intereseko xedeetara bideratuko direla. “Adibidez, tokiko artearen eta kulturaren zabalkundea, euskara, hezkuntza-jarduerak, gizarte-izaerakoak eta enplegua sustatzera zuzendutakoak”, diote.
☉ Basauri
Haurren aurkako sexu abusuen inguruan solasaldia antolatu dute Basauriko Marienean, Maddi Ane Txoperenarekin
‘Ez erran inori’ liburuaren aurkezpena egingo dute urriaren 29an Marienean. Bertan izango da Maddi Ane Txoperena Iribarren idazlea
Haurren aurkako sexu abusuei buruzko solasaldia antolatu dute Marienea Basauriko Emakumeen Etxean.
Sexu Informazio Bulegoarekin elkarlanean, ‘Ez erran inori’ liburuaren aurkezpena egingo dute eta solasaldian parte hartuko du Maddi Ane Txoperena Iribarren idazleak.
Urriaren 29an, asteazkenez, izango da hitzordua 19:00etatik 20:30era Marienean. Saioa doakoa da, baina bertaratzeko interesa dutenek esteka honen bitartez izena ematea gomendatu dute, bestela zuzenean Marieneara hurbilduz.
2022an kaleratu zuen nobela Txoperenak eta Lide du protagonista: haurra zela sexu abusu bat pairatu zuen, etxean bertan, Donapaleun.
Aurretik, 2020an, Elkar argitaletxeak, Beasaingo Udalak eta CAF enpresak urtero antolatzen duten Igartza Saria irabazi zuen Txoperenak ‘Ez erran inori’ nobela proiektuagatik.
Arrigorriagako Mendi Asteak emakumeen ahotsak ekarriko ditu Lamiaena eta Lonbo aretora
Otso baten antza duen txakur bat bilatzen ari dira Zeberion
Kuantika ardatz izango du aurten Etxebarriko Zientzia Asteak bere hamargarren urteurrenean
Argazkiak | Ehun arrigorriagar baino gehiagok Heidelberg enpresan gertatutako heriotza-istripua salatu dute herriko plazan
Argazkiak | Aldatxa eta Urbiko Lagunak, Basauriko jaietako buruhandienak!
Argazkiak | Jaietan etenaldia egin dute ehunka basauriarrek Palestinari elkartasun keinu bat egiteko
Bideoa | Dozenaka pertsona elkartu dira Arrigorriagan Heidelberg enpresan gertatutako lan-heriotza salatzeko
Bideoa | Berbalagun egitasmoa martxan da Basaurin eta Galdakaon, nobedade askorekin
