☉ Arrigorriaga
Alex Pascual: “Kameraren aurrean zaudenean, batez ere zuzeneko bat egitean duzun tentsio puntua izugarri gustatzen zait”
Kazetaritza ikasle zela, Gorliz Irratian lehen aldiz mikrofono aurrean jarri zenetik ez da gelditu ere egin Alex Pascual arrigorriagarra. Egun ETB2 kateko Con la calle a cuestas saioko zuzendaria da.
Geuria #043 Monografikoan argitaratutako elkarrizketa
“Berba eta irudia. Zinema, antzerkia eta telebista. Basauriko Antzerki eskolatik ‘Handia’ filmeraino”
Irakurri osorik PDFan
Komunikabideetan urte askotan lan egin ostean egonkortasun bila beste ibilbide profesional bat hartzea erabaki duen jende asko ezagutzen duela dio: “Azkenean, seme-alabak edo familia bat osatzeko asmoa baduzu, egonkortasun minimo bat behar duzu, eta lan honetan oso zaila da”. Ezin ditu oporrak planifikatu, hilabete batzuk barru izango duen lanari buruz arrasto handirik ez du, baina orain urte mordoxka bat, oraindik kazetaritza ikasle zela, Gorliz Irratian lehen aldiz mikrofono aurrean jarri zenetik ez da gelditu ere egin, eta egun ETB2 kateko Con la calle a cuestas saioko zuzendaria da Alex Pascual (Arrigorriaga, 1981).
Askotan esaten da mundu honetan lan egiteko zortea faktore garrantzitsua dela, ahoz ahokoak asko balio duela, une egokian toki egokian egotea… Halakoek zenbat dute mitotik eta zenbat egiatik?
Gauza guztietan bezala, zortea beti garrantzitsua da, baina argi dago zortea bilatu egin behar dela. Karrera bukatu bezain pronto ezin duzu etxean geratu telefonoak noiz joko duen zain. Nik hasieratik argi izan dut; gure arloan konpetentzia handia dago, eta horregatik karrera hasi eta berehala praktikak egiten hasi nintzen. Izan ere, ikasketak bukatzen ditugunean, denok besopean titulua daukagu; nolabait esatearren, denok gara berdinak. Baina tituluaz gain beste zerbait baldin baduzu, eskarmentua, hain zuzen, aurrerapauso garrantzitsua ematen duzu lana aurkitu ahal izateko.
Nola sartu zinen zu ofizio honetan?
Esan dudan bezala, nire lehenengo lana unibertsitateko lehenengo edo bigarren urtean izan zen. Kanpusean kartel bat ikusi nuen, esanez jendea behar zutela Gorliz Irratian praktikak egiteko, eta bi aldiz pentsatu barik, eskaera bidali nuen (garai horietan ez nuen kurrikulumik ere). Urtebetez Gorlizen lanean aritu eta gero, etxetik hurbilago zegoen beste aukera bat sortu zitzaidan, eta Basauriko Oye Radion hasi nintzen lanean, musika jartzen eta esatari moduan. Sortu berria zenez, aukera ugari zabaldu zizkidan. Adibidez, zuzendariak albiste zerbitzuak sortu nahi zituen, eta ni arduratu nintzen lehenengo albistegi horiek martxan jartzeaz.
Oye Radion lanean nengoenean jaso nuen ETBko deia bekadun moduan albistegietan sartzeko. Ordura arte, ez nuen inolako eskarmenturik telebistan, baina aukera aprobetxatu behar nuela ikusi nuen, eta pentsatu barik, baietz esan nuen. Kiroletan hasi, eta albistegietatik pasa eta gero, hainbat produktora ezberdinekin lan egin dut, gaur egun arte.
Askotan ikusi zaitugu telebistan erreportari lanetan, kameraren aurrean eroso zenirudien beti! Hala al da?
Irratian zein telebistan denetarik egitea egokitu zait. Eta ahalik eta hoberen egiten saiatu naiz beti. Egia esan oso gustura nago orain, kameraren atzean, eta oso gustura egon naiz kameraren aurrean nengoenean ere. Leku bakoitzak dauzka bere gauza onak eta txarrak, baina gauza onenen artean, nik elkarrizketatuekin edo istorioen protagonistekin duzun gertutasuna aukeratuko nuke. Gainera kameraren aurrean zaudenean, batez ere zuzeneko bat egitean daukazun tentsio puntu hori izugarri gustatzen zait. Eta zuzenekoa bukatzean, eta dena ondo atera dela ikusten duzunean sentitzen duzun poza, euforia zoragarria da.
Azken urteotan euskal herritar asko pantaila txikira lotu dituen El Conquistador del Fin del Mundo eta El Conquistador del Aconcagua saioetan lanean aritu zara parte-hartzaileen aukeraketan. Zer moduzko lana izan zen? Anekdota bat baino gehiago utziko zizun…
Niretzako beste lan berri bat izan zen hori. Ordura arte ez nuen horrelakorik egin, eta kasu horretan ere, asko ikasi nuen. Izugarrizko ardura da partehartzaileak izango direnak aukeratzea, azken finean, jende askoren ametsa da El Conquisen sartzea, eta gure esku zegoen erabakia!
Mota guztietako jendea aurkitzen duzu horrelako kasting erraldoi batean. Askok frikien bila genbiltzala leporatzen ziguten eta ez sasoian edo indartsu zegoen jendearen bila. Baina ez zuten kontuan hartzen El Conquis ez direla direla Joko Olinpikoak. Telebista lehiaketa bat da, eta mota guztietako jendea behar duzu bertan parte hartzeko; bai indartsuak, bai ahulak, bai kirolariak eta baita festazaleak ere. Denetarik.
El Conquiseko lehiakideen hautaketa prozesuan aritzeak horrelako programa baten atzean zenbat lan dagoen konturatzeko balio izan dit. Izan ere, programa bat arrakastatsua izatea ez da zorte kontua, aurre-produkzio ona edukitzea ezinbestekoa da, kasting on bat, adibidez.
Estatu mailako hainbat katetan ere lanean aritu zara. Asko aldatzen al da lan egiteko modua, erritmoa etab. ETB bezalako kate batetik estatu mailako beste batera pasatzean?
Atsotitzak esaten duen bezala, “urrutiko intxaurrak hamalau, gerturatu eta lau”. Leku guztietan bere gauza onak eta txarrak daude, eta komunikabideetan ere bai. Baina orokorrean, estatu mailako kateek aurrekontu handiagoak dituzte, eta ondorioz, langile gehiago kontratatu ditzakete produkzio baterako. Zentzu horretan, zure lana, agian, zehatzagoa bihurtzen da. Elkarrizketa bat egiteko, aurretik prestatu egin behar da, eta estatu mailako kateetan, erreportaria ez den beste pertsona batek egiten du lan hori eta askotan gertutasuna galtzen da.
Estatu mailako kate horien artean, TVEn aritu zinen lanean. Kate horretako langileen protesten berri egunero izaten ari gara orain, jasaten duten informazio kontrola dela eta… Ezagutu al zenuen halakorik bertan egon zinenean? Nola bizi duzu gaia?
Gaur egun TVEn ikusten ari garen protestak batez ere informazio-irizpideekin daude lotuta. Nire kasuan, España Directo saioan ibili nintzenez, ez nuen horrelako presiorik jasan, gaiak nolabait esateko, sozialagoak zirelako. Baina kezkagarria da norbaitek bere ikuspuntua inposatu nahi izatea, edozein egoeratan.
Egun estatu espainiarrak duen jarrera kontuan izanda, arazoari konponbiderik ikusten al diozu?
Gobernuek telebista publikoen jabeak direla pentsatzen duten bitartean, ez dut konponbiderik ikusten. Kazetari guztiok badakigu ezinezkoa dela objektibotasuna lortzea albiste bat kontatzean, baina gizarte plurala nahi badugu, informazio askatasuna behar-beharrezkoa da.
Hainbat saiotako zuzendari ere izan zara. Oker ez bagaude, une honetan ETB 2ko Con la calle a cuestas saioko zuzendaria zara. Zein ardura ditu halako saio bateko zuzendariak? Audientzia datuek lorik kentzen al dizute?
Jendeak zuzendari hitza entzuten duenean pentsatzen du Telefónica edo BBVA bezalako konpainia bateko zuzendaria zarela; kolperik eman gabe bizi zarela eta dirutza irabazten duzula. Baina ez du zerikusirik. Nire kasuan, oso lantalde txikia garenez (baina oso ona eta langilea, hori bai), denok denetarik egin behar dugu. Nire arduren artean dago, adibidez, programaren gai nagusia eta bertan jorratuko diren istorioen enfokea erabakitzea. Audientziari dagokionez… bai, ostegunetan (programa emititzen den egunean) lo egitea gehiago kostatzen zait normalean. Askotan oso programa potentea egin duzula pentsatzen duzu eta hurrengo eguneko audientziak ez dira oso onak, eta besteetan, kontrakoa gertatzen da: agian ez zara oso pozik geratu programarekin eta audientziak kontrakoa esaten du. Asmatzea oso zaila da.
Ogibide honen alde txarretako bat ezegonkortasuna dela diote. Nola bizi duzu zuk aspektu hori?
Bai. Duda barik, ezegonkortasuna da txarrena ogibide honetan. Eta tristea da esatea, baina azkenean moldatu egiten zara. Jende asko ezagutzen dut komunikabideetan urte pilo bat eman eta gero, azkenean beste ibilbide profesional bat hartzea erabaki duena egonkortasun horren bila. Azkenean, seme-alabak edo familia bat osatzeko asmoa baduzu, egonkortasun minimo bat behar duzu, eta lan honetan oso zaila da. Nik, oraingoz familia kargarik ez dut, baina ezin ditut inoiz oporrak planifikatu, hemendik hilabete batzuetara edukiko dudan lanari buruz ez baitakit ezer.
Zein asmo edo proiektu dituzu aurrera begira?
Lehenik eta behin Con la Calle a Cuestas programa bukatzea da nire proiektu bakarra. Hurrengo denboraldiari begira beste proiektu pare batekin ere bagabiltza. Baina badakizu… oraindik itxi barik dauden proiektuei buruz hitz egiteak ez dakar zorte onik.
Di-Da
Egun libre bat duzunean zer egiten duzu? Gehienetan, deskantsatu. Astean zehar lo gutxi egiten dut eta asteburuetan iratzargailu barik esnatzea gustuko dut. Horrek esan nahi du askotan eguerdi aldera esnatzen naizela!
Zure bertute bat? Sinpletasuna. Gauzak zailtzea ez dut gustuko, eta lanean ere praktikotasuna bilatzen saiatzen naiz beti
Zure akats bat? Lanarekin dudan 24 orduko lotura. Askotan lanetik deskonektatzea kostatzen zait
Zein da egin duzun azken bidaia? Oportora. Oso ondo dago, baina Lisboa nahiago dut
Eta egin nahi zenukeena? Australiara
Libururen bat irakurtzen ari al zara? Une honetan ez. Hori bai, prentsa gehiena irakurtzen dut egunero
Eta telesailen bat ikusten? Game of Thrones zale amorratua naiz, baina denboraldi berria estreinatu arte… Orain Netflixeko serieak ikusten ditut: azkena, 13 reasons whyren bigarren denboraldia
Abesti bat? Bat bakarrik? Orain uda usaina dagoenez, abesti martxoso bat aukeratuko nuke: Years and Years taldearen King, adibidez
Pelikula bat? Goodbye Lenin
Besteengan gehien miresten duzun bertutea: Gardentasuna.
Non eta noiz zara zoriontsu? Nire familia edo kuadrillarekin, afari batean. Arrigorriagako jaietan, adibidez
☉ Arrigorriaga
Ahotsa “askatzeko” tailerra antolatu dute Arrigorriagan, euskara hutsean
Urriaren 15ean antolatu dute tailerra Lamiaenan: “Gure ahotsa askatasunez bizitzen dugunean, geure buruarekin erosoago sentitzeko aukera dugu”
Urriaren 15ean ‘Askatu zure ahotsa’ izeneko tailerra antolatu dute euskara hutsean Lamiaenan, 18:00etatik 20:00ak arte.
Saioa Shakti Olaizolak antolatu du: “Ahotsa ahula bezain indartsua da. Izan ere, ahulezia horrek ematen dio duen indarra”, azaldu dute Lamiaenatik.
“Geure burua adierazteko, komunikatzeko, garena kanporatzeko, sortzeko ahalmena da hori. Horrexegatik dago beti hain baldintzatua tentsio eta blokeoekin. Gure ahotsa askatasunez bizitzen dugunean, geure buruarekin erosoago sentitzeko aukera dugu”.
Ikasturte berriaren programa urriaren 4an hasiko du Lamiaenak Emakume Sortzaileen IV. azokarekin eta ‘(Des)kontrolatuta’ antzerki ikuskizunarekin. Egun horretan, herritarrek egitaraua jasotzen duen liburuxka eskuratu ahal izango dute.
Jarduera honetan eta Lamiaenako besteetan izena emateko epea urriaren 6an zabalduko dute eta leku bitan egin ahalko dira: Lamiaenan bertan, arratsaldeko ordutegian (astelehenetik ostegunera 17:00etatik 20:30era eta ostiraletan 20:00ak arte) edo Abusu Zentro Soziokulturalean (astelehenetik ostiralera 8:00etatik 14:45era).
☉ Arrigorriaga
Gizonak berdintasunaren borrokan inplikatzeko hitzaldia antolatu dute Arrigorriagan
Ikasturte berriaren programa urriaren 4an hasiko du Lamiaenak Emakume Sortzaileen IV. azokarekin
Lamiaena emakumeen etxeak ikasturte berriko programa iragarri berri du Udaleko Berdintasun sailarekin elkarlanean.
“Aurtengo egitarauak ikastaroak, hitzaldiak, solasaldiak, zinema, erakusketak eta tailerrak hartzen ditu barne. Gehienak proposamen berriak dira, Lamienakideek proposatutakoak batzuk, Berdintasun Sailetik behar espezifikoetara erantzuteko diseinatuak besteak”, azaldu dute Lamiaenatik.
Jarduera guztien artean berdinatsuna eta gizonek esparru honetan duten errolaren inguruko hitzaldia prestatu dute: «Non gelditzen gara gizonok berdintasunaren garaian?».
Saioa herritar guztiei zuzenduta dago eta urtarrilaren 20 eta 27an antolatu dute, 18:00etatik 20:00ak arte.
Azkenaldi honetan, berdintasunaren giroa askoz indartsuagoa da. Horrek gizonok kolokan jartzen gaitu eta, askotan, gure lekua zein den ez dugu argi”, azaldu dute Lamiaenatik. “Gainera, gure lagun batzuk ezkor agertzen dira honen aurrean. Tailer honetan, gizonak elkartuko gara, horretaz hitz egiteko, patxadaz eta matxismoak gure kontra eragiten diguten guztiaz hausnartzeko (kotxe istripuak, gartzela, drogak…)”.
Ikasturte berriaren programa urriaren 4an hasiko du Lamiaenak Emakume Sortzaileen IV. azokarekin eta ‘(Des)kontrolatuta’ antzerki ikuskizunarekin. Egun horretan, herritarrek egitaraua jasotzen duen liburuxka eskuratu ahal izango dute.
Jardueretan izena emateko epea urriaren 6an zabalduko dute eta leku bitan egin ahalko dira: Lamiaenan bertan, arratsaldeko ordutegian (astelehenetik ostegunera 17:00etatik 20:30era eta ostiraletan 20:00ak arte) edo Abusu Zentro Soziokulturalean (astelehenetik ostiralera 8:00etatik 14:45era).
☉ Arrigorriaga
Haurrentzako Breakdance ikastaroa antolatu dute Arrigorriagan, urtarrilera bitartean
Eneko Redondo ‘BBoy Witxillok’ eskainiko ditu jarduera hauek eta lehen saio irekia hilaren 23an antolatu dute, 17:30ean
Altzoan Zaintza Sareak eskolaz kanpoko Breakdance ikastaroa antolatu du urritik urtarrilera Arrigorriagako eskolako frontoian 4 eta 8 urte bitarteko haurrentzat.
Eneko Redondo ‘BBoy Witxillok’ eskainiko ditu jarduera hauek eta lehen saio irekia hilaren 23an antolatu dute, 17:30ean. Ordubeteko saioak izango dira hilabeteko astearte bitan: 4 eta 5 urteko haurrena 17:15etan programatu dute eta 6 eta 8 urte bitarteko umeen taldearen saioa 18:15etan izango da.
“Helburua eskolaz kanpoko ekintza ezberdinak eskaintzea da”, azaldu dute Altzoan Zaintza Saretik. “Kirola egiteko jarduerak ere martxan ipiniko ditugu eta baita gorputz adierazpena susatzen dituztenak ere, adin tarte horretan oso garrantzitsua baita umeentzat norberaren gorputza ezagutzea, kontrolatzea eta maitatzea, ‘Dantza & Jolasa Familiartean’ jarduerarekin bezala”.
Eskolaz kanpoko ekintzen maiztasunari dagokionez, helburua da haurren denbora eta jolas librea ez moztea. Hori dela eta programatu dituzte bi astean behin: “Horrela, familiei bestelako jarduerak egiteko aukera ematen diegu”.
Lauhilekoaren prezioa 65 eurokoa da. Informazio gehiagorako eta izena emateko ipini harremanetan altzoansarea@gmail.com helbide elektronikora e-posta bidaliz.
☉ Arrigorriaga
Bideoa | Infekzio-gaixotasunei aurre egiteko prebentzio-protokolo falta salatu dute Arrigorriagako Arandia egoitzako langileek
Domus VI taldeko langileak ostegunero elkartuko dira Arandiako egoitzaren aurrean, bizi duten egoera salatzeko
Gaur goizean kalera irten dira berriro Arandia egoitzako langileak, beren lanpostuetan “osasuna arriskuan dagoela” salatzeko.
GEURIAri azaldu lez, infekzio-gaixotasunei aurre egiteko prebentzio-protokolo falta salatu dute Arrigorriagako zentroko langileek eta egoera salatzeko mobilizazioa egin dute zentroaren aurrean.
“Arrigorriagako egoitzan ez dago langile nahikorik”, gehitu dute ELA sindikatuko ordezkariek. “Garabi falta, aldagelak, ohe barrak, gortinak… eta infekzio gaixotasunei aurre egiteko prebentzi-protokolo eguneraturik ez dago. Horri gehitu behar zaizkio inolako justifikaziorik gabeko kaleratzeak eta zehazpen-espedienteak”.
Gainera, sindikatuko ordezkariak azaldu du Domus VI taldeak langileen mobilizazioari esker egindako arrisku psikosozialen balorazioa ez duela osatu: “Ebaluazio horrek argi eta garbi islatzen du langile falta eta lan-gainkarga. Datuak kezkagarriak dira eta presazko neurri eraginkorrak hartzea eskatzen dugu”.
ELA: “Ebaluazio horrek argi eta garbi islatzen du langile falta eta lan-gainkarga. Datuak kezkagarriak dira eta presazko neurri eraginkorrak hartzea eskatzen dugu”
Ondorio modura, Arandiako langileek ez dute onartuko beren osasunarekin jolasten jarraitzea, eta mobilizazio-dinamika batekin jarraituko dutela iragarri dute, egoera konpondu arte. Izan ere, langileak ostegunero elkartuko dira Arandiako egoitzaren aurrean, bizi duten egoera salatzeko.
Langileak, Arandia zentroko leihoetan // Geuria
Langileak eta egoiliarrak, kaltetuak
Gaurko mobilizazioak egoiliarren eta langileen arreta erakarri du eta horietako batzuk kalera irten dira, langileen borrokarekin bat egitera.
GEURIAk bertako familia batekin berba egiteko parada izan du eta egoera honek egoiliarrengan eta beren familiengan eragin zuzena duela azaldu dute. Ez dute izen abizenik eman nahi, “horrek izan ditzakeen ondorioak direla eta”. Hala ere, familiaren arabera, 43 egoiliar daude solairu bakoitzean eta horiek artatzeko pertsona bi baino ez daude kasurik onenean. Guztira 132 egoiliar daude Arrigorriagako egoitzan: “Langile falta izugarria da egoitza honetan”, kexatu dira.
Familiaren arabera egoerak nabarmen egin zuen txarrera 2019an, zentroak zuzendaritza aldatu zuenean: “Kudeaketa guztiz aldatu zen pribatizatu zenean langile eta janari kopuruan eta zainketan aurreztu zuen enpresa berriak. Langileak leher eginda daude: ordutegi txarrak dituzte, soldata kaxkarrak… eta lanez gainezka daude beti”. Enpresari langileek bizi duten egoeraren berri ematen dieten bakoitzean “egin beharrekoak egiten dituztela” izaten da erantzuna, familiaren arabera.
“Kudeaketa oso txarra izaten ari da, baina momentu txarrena itzalaldi masiboa gertatu zen bezperan bizi izan genuen Arandian”, gehitu dute. “Joan den apirilaren 28an izan zen eta zentroa argindarrik gabe egon zen bi orduz. Elektrogeno-taldea ez zebilen eta ez zegoen larrialdi egoetarako planik ere ez. Zentroko zuzendaritza oporretan zegoen eta inprobisazioz egin behar izan zuten lan bertako langileek. Onartezina da”. Sindikatuaren arabera, gaur egungo lan-giroa “tirabiratsua” izaten ari da eta “egungo zuzendaritzarekin ezinezkoa da elkarrizketa adeitsua izatea”.
Elkarretaratzeko langileak // Geuria
Egoiliarren osasuna eta ongizatea lehentasuna dira guretzat, eta hori bermatzeko konpromisoz eta profesionaltasunez lan egiten jarraitzen dugu”, azaldu dute ELAtik. “Baina premiazkoa da egoera hau aldatzea, langileen osasuna jokoan dagoelako”
☉ Arrigorriaga
Bihar da Gure Magalean Arrigorriagako elkarteko eskolaz kanpoko ekintzetan izena emateko azken eguna
“Lankidetza, talde lana, besteenganako begirunea eta parte-hartze aktiboa dira ekintza hauen ardatza”, azaldu dute Gure Magalean elkartetik
Irailaren 19a da Gure Magalean Guraso Elkarteak antolatutako eskolaz kanpoko jardueretan izena emateko azken eguna.
Balleta, eskalada, batukada, xakea, jolas kooperatiboak, irristaketa, margogintza, multikirola… eskaintza zabala plazaratu dute guraso elkartetik: “Lankidetza, talde lana, besteenganako begirunea eta parte-hartze aktiboa dira ekintza hauen ardatza”, azaldu dute Gure Magaleanetik.
Gure Magalean | Eskolaz kanpoko jarduerak 2025
4-5 urteko haurrak
Ingelesa Ludoteka: 4 urtekoak, astelehenetan; 5 urtekoak, asteazkenetan
Balleta: astezkenetan
Dantza Modernoa: 4 , ostegunetan; 5 urtekoak, ostiraletan
Taekwondo: 5 urtekoak, astelehenetan; 4 urtekoak, asteazkenetan
Irristaketa: 5 urtekoak, ostiraletan (16:45-17:45)
Jolas kooperatiboak: 4 eta 5 ustekoak, asteartetan
1. 2. eta 3. mailakoak
Margogintza: 3. maila, astelehen eta asteartetan; 1. eta 2. maila, asteazkenetan; 1. maila, ostegunetan; 2. maila, ostiraletan
Ingelesa Ludoteka: 1. maila, ostiraletan
Balleta: 1. maila, asteazkenetan
Eskalada: 1. 2. eta 3. maila, astelehenetan eta ostegunetan
Batukada: 1. eta 2. maila astelehenetan; 2. eta 3. maila, asteazkenetan
Dantza modernoa: 1. 2. eta 3. maila, astelehen, astearte eta asteazkenetan
Xakea: 2. eta 3. maila, ostegun eta ostiraletan
Joskintza: 1. 2. eta 3. maila, astelehen eta asteazkenetan
Esku Pilota: 1. 2. eta 3. maila, astelehen eta ostiraletan
Irristaketa: 1. 2. eta 3. maila, ostiraletan (16:45-17:45)
Multikirola: 1. 2. eta 3. maila, asteartetan
4. 5. eta 6. maila
Margogintza: 5. maila, astelehenetan; 4. maila, astearte eta ostegunetan; 6. maila, asteazkenetan; 5. eta 6. maila, ostiraletan
Eskalada: 4. 5. eta 6. maila, astelehen eta ostegunetan
Antzerkigintza: 5. eta 6. maila, asteazkenetan
Batukada: 4. 5. eta 6. maila, astelehen eta asteazkenetan
Dantza modernoa: 4. eta 5. maila, astelehenetan; 6. maila, ostiraletan
Hip Hop: 4. 5. eta 6. maila, ostegun eta ostiraletan
Xakea: 4. 5. eta 6. maila, ostegun eta ostiraletan
Joskintza: 4. 5. eta 6. maila, astelehen eta asteazkenetan
Irristaketa: 4. 5. eta 6. maila, ostiraletan (16:45-17:45)
Multikirola: 4. 5. eta 6. maila, asteartetan
‘Jone, batzuetan’ filma euskaraz proiektatuko dute Social Antzokian, Basaurin
Ahotsa “askatzeko” tailerra antolatu dute Arrigorriagan, euskara hutsean
Gizonak berdintasunaren borrokan inplikatzeko hitzaldia antolatu dute Arrigorriagan
Argazkiak | Galdakaoko jaietako Playback lehiaketa 140 argazkitan!
Argazkiak | Kuadrillak busti dira gaur Galdakaoko jaietan: batzuk euripean, beste batzuk Paddle Surfean
Argazkiak | Jaietako indaba janak ugaotarrez bete du institutuko pista
Bideoa | DJ Pipi Galtzaluze: «Musika ona, energia eta publikoarekin konektatzea da ondo pasatzeko gakoa»
Bideoa | Antzeko, Bertan Kaldo eta Dekantzekoz, Galdakaoko jaietako Playback lehiaketako onenak!
