Sareak

☉ Basauri

Maialen Ibarra: «Sei abesti biltzen dituen EP bat kaleratu nahi dut udan»

San Migelgo musikaria lau abestiz osatutako lehen EPa grabatzen ari da udaz geroztik Ibon Larruzea, Joseba Ibarra eta ‘Mon’ekin, 2023aren hasieran kaleratzeko

|

Maialen Ibarra, San Migeleko abeslari eta musikaria // Geuria

[2022ko azaroaren 3an paperezko edizioan kaleratutako elkarrizketa – Geuria 090] Maialen Ibarrak (San Migel, 2001) Basauriko jaien amaieran ETS taldearen ‘Zurekin bat’ abestia kantatzeko aukera izan zuen Arizgoiti plazan, Eskarabilera zerura bidali zuten momentuan eta mila lagun baino gehiagoren aurrean jo bazuen ere, “pertsona lotsati” bezala definitzen du bere burua. San Migelgo auzotarrak hiru abesti kaleratu ditu bere kabuz momentura arte eta lehen EPa prestatzen ari da joan den udatik eta 2023ko hasieran kaleratzea espero du. Beragaz berba egiteko tartetxoa izan dugu.

Nola hasi zinen musikan, Maialen?
Txikitatik bizi izan dut oso gertutik musika. Nire amaren partetik oso familia musikazalea dut: abeslariak, txistu-joleak, gitar-joleak, dantzariak… familia elkartzen garen guztietan, musika beti izan da presente eta beraz, betidanik izan dut musikarekiko nolabaiteko lotura hori. Hala ere, esan beharra dut txikitan oso oso txarto abesten nuela.
Gero 8-9 urterekin Arrigorriagako Artizarra musika eskolan hasi nintzen gitarra ikasten eta bertan hiru urtez egon nintzen. Ondoren nire kabuz eta Youtuberen laguntzaz jarraitu izan dut orain arte, eta badirudi denborarekin zerbait hobetu dudala! (barreak).

‘No quiero volver’ (2020), ‘Azken hitza’ (2021) eta ‘Zuei’ (2022) dira momentura arte ateratako lanak. Nolako garapena izan duzu azken hiru urte hauetan?
Nire ustez garapen nahiko handia izan dut. Azkenean, lehenengo abestitik orain arte hiru urte baino gehiago pasa dira eta produkzio aldetik askoz gehiago ikasi dut. Bestalde, ideien aldetik, argiago dut zer bai eta batez ere, zer ez dudan egin nahi.
Lehenengo abestia 18 urterekin inongo intentziorik gabe igo nuen internetera: ordenagailuarekin etxean grabatuta, laguntzarik gabe, ekoizpenari dagokionez ia ideiarik gabe. Probatzeagatik izan zen, gustatzen zitzaidalako, baina ez nuen etorkizunerako ezer pentsatuta. Gero, abestiak nik pentsatzen nuena baino harrera askoz hobea izan zuela ikusita, hurrengo bat igotzera ausartu nintzen, laguntza pixka bat bilatuz, baina berdin, inolako intentziorik gabe.
‘Zuei’, azkenengo abestia, aurrera pausu nahiko handia izan da. Bigarren abestitik ‘Zuei’ igo arte urte bat baino gehiago pasa zen, denbora gehiago pasa izan dudalako abestia lantzen: lehenengo etxean maketa bat egin nuen. Gero estudio bat bilatu eta bertan grabatzen eta produzitzen ibili nintzen, bideoa ere hobetu nahi nuen. Orokorrean kalitatea hobetu nahi izan nuen (soinuan asko igartzen da aurrekoekin alderatuz). ‘Maialen Ibarra’ izenarekin ia nahi gabe sortu nuen proiektu honi, ahal den heinean, etorkizunerako ibilbide bat zabalduz. Beraz, abesti honek bai, asmo eta helburu zehatzagoa izan du.

Lehen lana gazteleraz egin zenuen. Zerk eragin zizun hurrengoak euskaraz idaztearen erabakia hartzea?
Abestiak sortzen ditudanean ez dut zein hizkuntzatan izango den pentsatzen. Uste dut garai ezberdinak izan ditudala: 13-14 urterekin idatzitako lehenengo abestiak euskaraz izan ziren, gero ingelesera pasatu nintzen, gero erdarara, eta orain, nahiz eta hiru hizkuntzatan idazten jarraitu, euskaraz gehiago idazten dut. Normalean, gitarrarekin hasten naiz akorde eta erritmo batekin eta sortutako soinu horren arabera hizkuntza batera edo bestera jotzen dut, ez da erabaki oso kontzientea izaten. Hala ere, egia da nire ama hizkuntza euskara dela eta helarazi nahi dudan mezuaren arabera batzuetan euskara gertuago sentitzen dudala. Beraz horrek, bere eragina du eta izango du, baina erdaraz edo ingelesez sortutako abestiren bat gustatzen bazait, berdin-berdin kaleratuko dut.

Nola grabatu dituzu abestiak?
Hiru abestiak modu ezberdinean grabatuta daude. Lehenengoa, nik bakarrik grabatu nuen dena etxean: nire ordenagailuak dakarren programarekin, gitarrarekin, ‘midi’ batekin eta mikrofono merke batekin. Bigarren abestirako, berdin hasi nintzen, etxean eta material berdinarekin, baina abesti honetarako nire osaba Joseba Ibarraren eta bere Galdakaoko ‘Mon’ lagunaren laguntza jaso nuen, batez ere baxua eta gitarrarekin konponketak egiteko.
’Zuei’ abestia berriz, Boluetako estudio baten grabatu nuen, Euridia estudioan. Bertan Ibon Larruzea ezagutu nuen eta izugarrizko laguntza eskaini zidan: bai ekoizpenari dagokionez eta bai soinu askoz garbiago bat lortuz. Asko ikasi dut Ibonekin grabatzen eta asko lagundu nau abesti horren prozesu osoan zehar. Gainera, abesti honen bateriak berak grabatu zituen.

Nola ekoizten dituzu lanak?
Nire kabuz produzitzen hasi nintzen, Youtuben bideoak ikusiz eta Garageband programarekin probak behin eta berriz eginez. Gero, ‘Zuei’ abestia batez ere Ibonen laguntzarekin batera produzituta dago. Nik nire etxean sortutako maketa estudiora eraman nuen eta bertan berriro dena grabatu eta produzitu genuen, eta nahiz eta abesti berdina izan, soinu aldetik izugarrizko aldea dago nik eraman nion lehenengo proiektutik, ezagutzen duzuen azken proiektura arte. Baina berez ez dut inongo kanpoko laguntzarik izan: nire kabuz bilatu dut jaso izan dudan laguntza guztia: Ibon, nire osaba Joseba eta bere laguna Mon.

Zein tokitan ibili zara gitarragaz eta nolako formatua eskaintzen duzu oholtzan?
2021eko ekainera arte ez nuen jende aurrean nonbaiten abesteko inolako eskaintzarik izan eta nik ere ez nuen imajinatzen egunen baten jende aurrean abesten egongo nintzenik, beraz momentu horretan eskaintzeko nuena oso sinplea zen, ni eta nire gitarra. Gero, beste 10 hilabete egon nintzen kontzerturik eman gabe. Baina aurten, ‘Zuei’ kaleratu ondoren, leku eta ekintza ezberdinetan abesteko aukerak eskaini dizkidate eta Basaurin hiru aldiz, San Migelen bi, eta Larrabetzun, Arrigorriagan eta Erandion behin egoteko aukera izan dut. Hala ere, urte honetara arte ez dudanez proiektu hau etorkizunerako zerbait izan zitekeenik pentsatu, eman ditudan kontzertu guztiak modu akustikoan izan dira hori delako gaur egun eskaini dezakedana. Baina, nahiz eta gitarrarekin bakarrik abesten asko gozatzen dudan, jende gehiagorekin jotzea eta oholtzan zerbait ezberdina eskaintzeko formatua bilatzen nabil orain. Gitarra batekin bakarrik jotzerakoan, soinu aldetik mugak daude eta muga horiek gainditzea gustatuko litzaidake. Beraz orain horretan nabil, proiektu hau gustatu ahal zaion jendearen bila

Azken agerraldien artean Basauriko jai amaierakoa izan genuen. Nolako esperientzia izan zen zuretzat Basaurin jendetzaren aurrean eta momentu hain hunkigarrian jotzea?
Oso esperientzia polita eta batez ere, aberasgarria. Nahiz eta jendearen aurrean abestera ausartu, ni oso lotsatia naiz eta eman ditudan kontzertu guztien aurretik oso-oso urduri jartzen naiz. Egun hartan inoiz baino urduriago nengoen. Esperientzia ezberdina zen: pilo bat jenderen aurrean abestuko nuen, lagun eta ezagun asko egongo ziren, oholtza ikaragarri handi batean, abesti bakarra, zarata handiarekin… Oso urduri hasi nintzen baina gero pozik amaitu nuen. Gutxi batzuk esan dezakete horrelako plaza baten hainbeste jenderen aurrean abestu dutela, eta nik behintzat, esperientzia hori gutxienez behin bizitzeko aukera izan dut. Gainera Basauriko jaietan abesteari esker jende gehiagok ezagutu nau eta bertan egongo ez banintz seguru aski orain ez nintzatekela elkarrizketa hau egiten egongo (barreak).

Zein abesti aukeratu zenuen bertan kantatzeko eta zergatik?
Egia esan ez nuen nik aukeratu (barreak). Jai amaierako ikuskizuna 16an, domekan, izango zen eta niri 14an, bariku arratsaldean, Herriko Taldeaken mezu bat heldu zitzaidan arazo bat izan zutela esanez eta ea jai amaierako egunean abestera animatuko banintz galdetuz. Beraz, haiekin hitz egin nuen, baietz esan nien eta haiek proposatu zidaten edo pentsatuta zuten abestia ETSren ‘Zurekin Batera’ zen. Abestia ezagutzen nuen, gustatzen zitzaidan, momenturako oso egokia iruditzen zitzaidan… baina batetik, letra (estribilloaz gain) ez nekien, eta bestetik, egun bat eta erdi nuen dena ikasteko eta entseatzeko. Horrek ere, lehen aipatutako urduritasunean eragina izan zuen baina azkenean oso polita geratu zen eta abestiaren aukeraketa ezin hobea izan zen momentu horretarako.

Zer eskaintzen dizu musikak zu bezalako kantari bati?
Batetik gozamena. Abesti bat idazten hastea, grabatzea, produzitzea, soinu berriak bilatzea, abestia kaleratzeko dena prestatzea… Prozesu luzea da, baina ikusteko eta bizitzeko polita dena eta asko gozatzen dudana. Gainera kontzertuak zuzenean ikustea, musika talde edota abesti berriak ezagutzea, abesti bat gitarrarekin ikasten jotzea… hori guztia asko gustatzen zait.
Bestetik, uste dut nire buruan ditudan ideak orri batean idazten ditudanean, ideia horiek pixka bat ordenatzen eta hobeto ulertzen laguntzen didala. Eta ez bakarrik nire letrekin, beste abesti baten letrak entzuteak eta esaten duenarekin bat egiteak ere gauza asko ulertzen lagun diezazukela uste dut.

Musikak garrantzia handia izango du zure eguneroan.
Nahiko handia, bai. Uste dut ez dagoela egun bat ere musika entzuten ez dudanik. Etxean abesten edota gitarrarekin orduak pasa ditzaket, nire nebak batzutan “bronka” botatzen dit astuna izateagatik (barreak). Baina denbora dudanean gustatzen zait gitarrarekin abestea. Ikasi behar dudanean ere, burua minutu batzuk despejatzeko gitarra hartu ohi dut eta gaurko egunera arte ondo joan zait behintzat (barreak).

Zein da musikarekin duzun helburua?
Ez dut epe luzerako inongo helbururik ez dakidalako zertan ibiliko naizen. Momentuz, hainbat abesti biltzen dituen lantxo bat kaleratu nahi dut eta behintzat helburu hori betetzen nabil. Posible izango balitz, noski gustatuko litzaidakeela disko bat grabatu ahal izatea eta kontzertuetan jendeak nire abestiak jakitea eta abesten ikustea. Denbora kontua da hori!

Abesti edo albumik ateratzeko asmorik duzu datorren urteari begira?
Bai. Momentura arte abesti solteak kaleratu ditut, baina orain 4 abesti biltzen dituen EP bat kaleratzea gustatuko litzaidake. Udan hasi nintzen ideia honekin lanean eta oraindik horretan nabil. Abestien maketak gutxi gorabehera prest daude baina orain estudio batean dena ondo grabatzea eta produzitzea falta da. Ez dakit noizko edukiko dudan prest, unibertsitateko azkenengo urtean nabil eta prozesu honek denbora asko eskatzen du, baina datorren urteko lehenengo hilabeteetarako (asko jota) dena prest edukitzea gustatuko litzaidake.
Gainera, abestiak eta soinuak orain arte kaleratutakoaren pixka bat ezberdinagoak dira eta proiektu honetan ez dut bakarrik lan egingo; laguntza izango dut. Beraz, uste dut oso polita geratuko dela.

☉ Basauri

Antón Ferrerori eta errepresio frankistako biktimei omenaldia egingo diete Basaurin martxoaren 9an

|

1976ko martxoaren 8an erail zuten indar errepresio frankistek Anton Ferrero basauriarra // Geuria

Indar errepresibo frankistek Vicente Anton Ferrero basauriarra hil zutenetik 48 urte beteko dira martxoaren 8an.

1976ko martxoaren 3an Gasteizen izan ziren erasoak eta erailketak salatzeko manifestazioan parte hartzen ari zen Anton Ferrero Basaurin eta poliziak tiroz hil zuen bere izena daraman kalearen ondoan 18 urte zituela.

Urtero bera eta diktadura eta errepresio frankistaren biktimak omentzeko ekitaldia deitzen du Ahaztuak elkarteak Basaurin. Aurten martxoaren 9n, larunbatez, izango da 13:00etan Bingen Anton Ferrero kalean.

Osorik irakurri

☉ Basauri

Emakumeek faxismoaren aurka egindako borroka azpimarratuko dute Basauriko M8 egitarauan

|

Martxoaren 8an elkarretaratzea egingo dute Basaurin, Azaroak 25 plazan // Geuria

Martxoa heldu da eta horrekin batera berdintasunaren eta emakumeen eskubideen aldeko aldarriak berriro mahai gainean jartzeko tartea.

Martxoaren 8a Emakumeen Nazioarteko Eguna da eta horren inguruan hamaika jarduera antolatu ditu Basaurin Berdintasun arloak. Eta ez bakarrik egun horretan; izan ere, egitaraua hilabete osoan zehar eta apirilean zehar luzatuko da.

Besteak beste, erakusketak, tailerrak, hitzaldiak eta Emakumeen Ahotsak zikloa antolatu dituzte Basaurin. Era berean, M8an elkarretaratzea ere deitu du Basauriko Asanblada Feministak, Berdintasun Kontseiluaren babesarekin.

M8ko elkarretaratzea 13:00etan izango da Azaroak 25 plazan, indarkeria matxistaren biktima diren eta bizirik atera diren emakumeen Memorialaren eta Eskarabileren estatuaren ondoan (San Pedro elizaren ondoko plaza).

“Aurten ere, emakumeen errealitatea hainbat ikuspegitatik landuko dugu; Martxoaren 8 honetan, bidegabekeria sozialen aurka emakumeek egin duten borroka historikoa ikusgai jartzearekin hasi, eta feminismoak adinik ez duelako aldarrikapenagaz amaituko dugu”, dio Isabel Cadaval Berdintasun arloko zinegotziak.

Emakume erresistenteak

Gatazka historikoaren barruan, emakumeek faxismoaren aurka egindako borroka nabarmendu nahi izan dute Basaurin, eta horretarako martxoaren 4tik apirilaren 26ra bitartean ‘Emakume erresistenteak’ erakusketa izango da Marienean.

Erakusketa hori Memoria Historikoa Berreskuratzeko Elkarteak antolatu du, emakumeek Espainiako Gerra zibilean eta Bigarren Mundu Gerran faxismoaren aurka egindako borroka ikusgai jartzeko asmoz.

Martxoaren 7an, 18:30ean izango da erakusketaren inaugurazio-ekitaldia, eta elkarteko ordezkari batek parte hartuko du bertan.

Mari Luz Esteban eta adineko emakumeak

‘Feminismoa dugu alternatiba!’ hitzaldi-zikloaren barruan, Mari Luz Esteban Galarza basauriarrak adineko emakumeen gaia ikuspegi feminista batetik landuko du. Hitzaldia Marienean izango da martxoaren 21ean 18:00etatik 20:30era.

Martxoaren 21ean ere Korrika igaroko da Basauritik eta hori aprobetxatuta, emakumeek presentzia izango dute kilometro batean, Azaroak 25 plazatik hasita. Aurten Kapritxosas taldeak eramango du lekukoa; izan ere, Basauriko emakumezko pailazo feministen taldeak hamahiru urte betetzen baititu.

Egitaraua / M8 Basaurin

Otsailak 20-Martxoak 5
‘Emakumeen erabakia: Guatemala’ argazki erakusketa Marienean

Martxoak 2-30
‘Emakumeen Ahotsak’ zikloa Social Antzokian: Limbo Cabaret, Sara Azurza, Eva Guerrero, Lolita Flores…

Martxoak 4-Apirilak 26
‘Emakume erresistenteak’ erakusketa (Memoria Historikoa Berreskuratzeko Elkartea)
Inaugurazio-ekintza: martxoaren 7an, 18:30ean

Martxoak 5, asteartea
19:00 Antzerki foro tailerra Marienean

Martxoak 8, ostirala
13:00 Elkarretaratzea Azaroak 25 plazan

Martxoak 21, osteguna
13:50 Korrika: Emakumeen kilometroa (Las Kapritxosas) Azaroak 25 plazatik
18:00-20:30 Hitzaldia Marienean: ‘Emakue zaharren gorputzean jokatzen ari da berdintasuna’ (Mari Luz Esteban Galarza, Emakume Feminista Zaharren taldearekin lankidetzan)

Osorik irakurri

☉ Basauri

Mikel Garcia Basauriko Javi Conde klubeko atleta munduko Short Track Virtus txapeldun da

|

Mikel Garcia Munduko Short Track Virtus Txapelketan, Reimsen (Frantzia) // Argazkia: Geoffrey Wahlen, FFSA

Javi Conde klubeko Mikel Garcia eta Ibai Magdaleno atleta paralinpikoek Munduko Short Track Virtus Txapelketan parte hartu zuten otsailaren 20tik 25era bitartean. Txapelketa Reimsen izan zen, Frantzian.

Lorpenei dagokienez, 800 metroko lasterketan munduko txapeldun da Mikel Garcia. Gainera, zilarrezko domina irabazi zuen 400 metrotan.

“Mikel sasoi bikainean iritsi zen txapelketara, Ciechanowen (Polonia) kros laburreko munduko txapelketan urrezko domina eskuratu ondoren”, dio Javi Conde entrenatzaileak, eta gaineratu du: “Mikelen bi dominek Down kirolarien aldarrikapena indartzen dute Joko Paralinpikoetan lehiatu ahal izateko”.

Hain zuzen ere, Joko Paralinpikoetan ez dago Down sindromedunentzako kategoriarik, eta duela urte batzuk Mikelen gurasoek Elvira Agirrezabal eta Gotzon Garcia‘Down Paris 2024’ ekimena martxan jarri zuten. Ekimen horren helburua da Joko Paralinpikoetan Down kategoria sortzea.

Podiumaren atarian

Bestetik, Ibai Magdalenoren kasuan, podiumaren atarian geratu zen. Magdalenok 3.000 metrotako lasterketan parte hartu zuen eta laugarren bukatu zuen.

Ibai Magdaleno Munduko Short Track Virtus Txapelketan, Reimsen (Frantzia) // Argazkia: Geoffrey Wahlen, FFSA

Era berean, 1.500 metrotako proba ere egin zuen Magdalenok eta zazpigarren sailkatu zen.

“Oso maila altuan lehiatu da Ibai. Lasterketa zailak izan ziren, eta pozik gaude lortu duen emaitzekin”, dio Condek.

Ekainean Javi Conde klubeko zenbait atletak Suedian jokatuko den aire zabaleko Europako Txapelketan parte hartuko dute.

Osorik irakurri

☉ Basauri

Kareaga eta Basozelai auzoetako irisgarritasuna hobetzea jasotzen du Basauriko Udal Gobernuaren planak

Udal ordezkariek azaldu dutenaren arabera “aginte-plana osatzen duten jarduera guztiak Nazio Batuak zehazten dituen Garapen Iraunkorreko Helburuekin lerratuta daude”

|

Basauriarrek merezi duten herria egiten jarraitzea. Hori da Udalak aurkeztu duen Gobernu Planaren helmuga. Horretarako, 6 arlo ezberdinetan antolatutako 79 neurri aurkeztu dituzte Asier Iragorri alkateak eta Isabel Cadaval PSEko bozeramaileak. Arloak honako hauek dira:

  • Basauri Soziala
  • Basauri enpleguarekin, garapen ekonomikoarekin eta tokiko merkataritzarekin
  • Basauri hezkuntzarekin eta gure gazteentzako aukerekin
  • Basauri bizigarria, jasangarria eta segurua
  • Basauri kulturarekin, kirolarekin eta euskararekin
  • Udal moderno eta irekia

Udal ordezkariek azaldu dutenaren arabera “aginte-plana osatzen duten jarduera guztiak Nazio Batuak zehazten dituen Garapen Iraunkorreko Helburuekin lerratuta daude”.  Helburua, Asier Iragorri alkatearen arabera, herritarren ongizatea bermatuko duen eta sozialki aurreratua izango den Basauri bat eraikitzen jarraitzea da. Horretarako, udalerri irisgarri eta seguruagoa eta jasangarriagoa sustatu nahi dute, enpresa eta enplegu aukerak sortzeko gai izango dena. “Denontzako Basauri plural eta euskaldun baten alde ere lan egingo dugu, bere nortasunari eutsiko diona eta kultura- eta aisialdi-eskaintza aberatsa izango duena. Azken finean, Udal moderno eta irekia, kalitate handiko zerbitzu publikoak eskainiko dituena” borobildu du Iragorrik.

Hirigintza protagonista

Neurri zehatzei dagokienez, arlo urbanistikoak pisu nabarmena izango du udal gobernuaren jardunean. Hori horrela, hainbat jarduera garatuko dira “Basauri bizigarria, jasangarria eta segurua” arloaren 26 neurrietan zehar. Horietako bat Kareaga Goikoaren hirigintza-garapena izango da, 1,3,5 eta 7. zenbakietan. Bestalde, Larrazabal eremuaren kasuan birgaitu daitezkeen hirigintza eremuetarako udalaz gaindiko baliabideak aztertzea eta eremu horietarako sarbidea erraztuko da, La Baskoniaren inguruko hirigintza- eta gizarte-garapenarekin batera.

Era berean, San Migelgo Renferen geltokiaren ondotik doan espaloia handitzea, Urbiko plazan hobekuntzak egitea eta Zumalakarregi kalearen hirigintza-berrikuntza integrala egitea aurreikusten da; izan ere, esku-hartze horrek 2024ko aurrekontuan partida ekonomiko bat esleituta dauka. Basauriko alkateak zehaztu du gobernu planean jasotako ekintza batzuk legegintzaldiko lehen hilabete hauetan jarriko direla martxan, eta beste batzuk pixkanaka definitzen edo gauzatzen joango direla. Arlo honen baitan kokatzen dira Basozelai eta El Kaleroko irisgarritasuna hobetzea, parkeak eta aisialdirako eremuak handitzea edo hiri-baratzeak sortzea.

Ongizate komunitarioa helburu

18 neurri jasotzen dira arlo honetan, besteak beste gizarte-bazterkeriako eta ahultasun ekonomikoko egoeren aurkako borroka,”Basauri lagunkoia adinekoekin” programan jasotako ekintzak garatzen jarraitzea, Adinekoentzako gizarte-zentro berria, nahi ez den bakardadearen aurkako programak edo  Sarratuko bizikidetza-unitatearen eta eguneko arreta-zentroaren proiektua garatzea.”Adinekoak gure kudeaketa politikoaren erdigunean daude, eta baliabideak bideratuko ditugu haien babesa eta bizi-kalitatea bermatzeko”, azpimarratu du Isabel Cadavalek.

Beste arloak ere ez ditu bazter utzi udal gobernuak, eta berdintasuna erdigunera ekarri dute. PSE-EEko bozeramaileak adierazi duenez, “Basauriko Indarkeria Matxistaren aurkako II. Planean jasotako neurriak ere ezarriko ditugu, eta indarkeria matxistaren biktimei eta mendekotasuna duten pertsonei laguntza juridikoa eta psikologikoa ematen jarraituko dugu; ezinbesteko zerbitzua da, eta oso beharrezkoa prozesu osoan laguntzeko”.

Enplegua eta tokiko merkataritza ere funtsezko elementuak dira Basauriren garapenerako, eta hori horrela, basauriarrei enplegu-aukerak eskainiko dizkieten enpresa berriak herrian kokatu daitezen lan egingo dutela iragarri dute udal ordezkariek, horretarako dauden guneak baliatuz, bereziki La Baskonia eta Mercabilbao kokatzen diren orubeetan.

Haurreskolen egoera ere kontutan hartu du udal gobernuak plan osatzerako orduan: “agintaldiaren hasieran iragarri genuenez, uztailean, gobernu-akordioa aurkeztu genuenean, udalerrian 0 eta 2 urte bitarteko haurren eskolatze-beharrak aztertzen ari gara, eta, plazarik ez dagoela ikusiz gero, Haurreskolen Partzuergoari eskatuko diogu familiei zerbitzu hori eskaintzeko gune berriak sortzea, Basaurin antzemandako eskaerari erantzuteko”, gogorarazi du Cadavalek.

Kulturari, kirolari eta euskarari dagokienez, kultura-ekipamendu berri bat izateko helburuan aurrera egingo da, Baskoniaren nabe zaharraren birgaitzearekin, eta Euskara Sustatzeko Plana ere garatuko da, prozesu parte hartzaile baten bidez.

Bukatzeko, beste helburu nagusi bat ere badu planak, udal eredu  “modernoago, parte-hartzaileago eta irekiago” baten arrastoan.

Osorik irakurri

☉ Basauri

Jantokiaren kalitatea bermatzeko “aktiboki lan” egingo duela ziurtatu die Basauriko Udalak Guraso Elkarteei

Eusko Jaurlaritzak Basauriko Udalari azaldu dio egungo jantoki-zerbitzurako alternatiba ezberdinak lantzen ari dela, eta litekeena dela Basauri izatea horrelako esperientzia bat martxan jartzeko aukeratuko duten lehen herrietako bat

|

San Migelgo Sofia Taramona ikastetxeko jantokia / Sofia Taramona

Hilabete hasieran Basauriko IGE taldeak ( Ikasleen Guraso Taldeak) gutuna igorri zien ikastetxe publikoetako gurasoei, otsaileko Osoko Bilkurara eraman behar zuten aldarrikapen eta eskariaren berri emateko: udal sukalde baten sorrera herrian, “eskolak eta interesa duten beste zentro batzuk hornitu ahal izango duena, enplegua udalerrian eskainiz eta bertako merkataritzan oinarritutako kalitatezko janaria eskaintzen duena”. Hori bakarrik ez, bihar 18:00etan ospatuko den Osoko Bilkurara hurbiltzeko gonbidapena luzatu zieten gurasoei.

Eskari hau ez da Guraso Taldetik egiten duten lehena, aurretik ere hainbat proposamen egin baitituzte, gutunean bertan zehazten dituztenak, betiere, “gure zentroetan elikadura egoki baten alde” lan egiteko helburuarekin : “lehenik eta behin, garraiatutako catering-zerbitzuak sinatutako agirien zehaztapenak bete daitezen borroka egin genuen (gutxiegitzat jotzen ditugun dokumentuak), eta gure zentro gehienetan tokian tokiko sukaldaritza ere eskatu dugu (guztietan bideraezina ikusten duguna eta denbora asko behar izango da aldaketa lortzeko)”.

Proposamen honen harira, Basauriko Udalak bilera egin du guraso-elkarteetako ordezkariekin, eta bertan hainbat konpromiso hartu ditu, “ikastetxe horietako ikasleek kalitatezko jantoki-zerbitzua jaso dezaten, betiere bere eskumenen esparruan”. Hasteko, udal arduradunek zera zehaztu dute: “Basauriko Udalak udalerriko eskola-jantokien egoerari buruzko informazioa bildu eta kontrastatu du zenbait iturritatik, besteak beste, Eusko Jaurlaritzaren Hezkuntza Saila eta guraso-elkarteak, zerbitzuaren diagnostikoa egin, eta horrela, Eusko Jaurlaritzari Basauriko familien kezkak eta proposamenak helarazi ahal izateko”.

Helburu horrekin, Eusko Jaurlaritzaren Hezkuntza Saileko arduradunekin harremanetan egon da etengabe Udala, guraso-elkarteen iritziak eta gogoetak helarazteko eta egungo zerbitzua hobetzeko konponbideak bilatzeko deia egiteko; izan ere, jantoki-zerbitzua Basauriko Udalaren eskumena ez den arren, arazoak udalerriko familia askori eragiten die

Eusko Jaurlaritzarekin izandako hartu eman horren harira, udalak jakin ahal izan du Eusko Jaurlaritza “beste alternatiba batzuk” baloratzen ari dela jantoki-zerbitzurako, eta horietako baten bat gauzatu balitz “litekeena dela” Basauri izatea horrelako esperientzia bat martxan jartzeko aukeratuko duten lehen udalerrietako bat.

Bukatzeko, Udalak adierazi du  “eskumena duen Eusko Jaurlaritzarekin batera, ikuspegi juridiko, tekniko eta ekonomikotik bideragarria den edozein aukera aztertuko” duela, “baldin eta gure ikasleei emandako jantoki-zerbitzuaren kalitatea hobetzeko bada”. Helburu hori lortze aldera, “udal-azpiegiturak Eusko Jaurlaritzaren esku jartzeko prest dago Basauriko Udala, xede horretarako erabil ditzaten, bai eta eskumena partekatzeko prest ere, lankidetza-hitzarmenen bidez edo bestelako bideetatik, horretarako beharko litzatekeen finantzaketarekin”.

Begiraleen artean euskara sustatzea helburu

Beste alde batetik, Udalak jakinarazi du jantokiko eta jolastokiko begiraleekin lan egingo duela,  “enpresa esleipendunaren betebeharra” den arren. “Basauriko Udalak”,  borobildu dute  ” bere kudeaketaren lehentasunezko arloetako bat euskararen erabilera sustatzea denez, zenbait aukera, baliabide eta ekintza baloratzeko konpromisoa hartu du, guraso- elkarteekin lankidetzan gune horietan euskararen erabilera sustatzeko helburuarekin”.

Osorik irakurri