☉ Basauri
2023ko aurrekontua onartu du Basaurik gobernu taldearen babesagaz
Basauriko Udalak argi berdea eman dio 59 milioi euroko eta 3,1 milioi euroko inbertsiodun 2023ko aurrekontu “itxaropentsuari”
Basauriko Udalak argi berdea eman dio 59 milioi euroko eta 3,1 milioi euroko inbertsiodun 2023ko aurrekontu “itxaropentsuari” EAJ eta PSEren aldeko eta EH Bildu, Elkarrekin Podemos eta PPren aurkako botoekin.
Iazko abenduaren hasieran aurreratu bezala, Basauriko Udalak 59 milioi euroko aurrekontua izango du 2023an, aurten baino 3 milioi gehiago (%5,2 gehiago). Azken 12 urteetako aurrekonturik handiena izango da aurtengoa, Asier Iragorri alkateak adierazi duenez eta 8,4 milioi euro bideratuko dituzte Gizarte Politika eta Gizarte Zerbitzuetara, “Azken hamarkadako gasturik handiena”. Udal ordezkarien arabera, aurrekontu igoera horri esker Etxez-etxeko Laguntza Zerbitzura bideratuko baliabide ekonomikoak handituko direla aurreratu dute.
Iazko inbertsioak 2 milioi eurokoak izan ziren eta aurtengoak, 3,1 milioi eurokoak (%57ko igoera). “Udala egoera egokian dago urratsak egiteko gizarte-, ekonomia- eta hirigintza-alorretan, gizarte-gaietan azken hamabi urteetako gastu handiena (8,4 milioi euro) izango duen aurrekontu bati esker, handitu egingo dituena”, izan dira Asier Iragorri Basauriko alkatearen hitzak joan den abenduaren 29an egindako osoko bilkuran. “Basauriko herritarren bizi-kalitatea helburu du aurtengo programak: hala nola gizarte-zerbitzu, enplegu edo adineko pertsonentzako zerbitzuak, ekintzak eta obrak eskainiz”, nabarmendu du herriko alkateak.
Adinekoak, Soloarten // Geuria
Adinekoak, enplegua eta ongizatea
Aurtengo aurrekontuaren ardatzak adinekoak, enplegua eta komunitatearen ongizatea ditugu. Adineko pertsonei zuzendutako arloan aurrekontua 3,3 milioi eurokoa izango da, iaz baino 400.000 euro gehiago: “Adinekoen arloan erabiliko diren baliabide ekonomiko handiagoei esker, adindunen bakardadearen aurkako BBK Behari egitasmoa jarriko da martxan udalerrian, jada eginiko proba pilotuaren arrakastaren ondoren”, azaldu dute udal ordezkariek.
Enpleguaren esparruan 2022ko 1.589.000 eurotik 1.735.000 eurora igo du gobernu taldeak (%9,2). “Jarduera ekonomikoa indartzea xede duen gehikuntza horri, gehitu egin behar zaio Merkataritza eta Ekonomia Sustapena kapitulukoa, % 4,2 ere handituko dena, 503.000 eurora heldu arte”, gehitu du alkateak.
Komunitatearen ongizatean 9 milioi euroko inbertsioa egin du gobernu taldeak, 2022an baino 700.000 euro gehiago (%7,9): “Herritar guztientzako oinarrizko zerbitzuak dira: hondakinen bilketa eta tratamendua, argiteria publikoa, edateko uraren etxeko hornidura, estolderia eta bide-garbiketa”, azpimarratu du Iragorrik.
Inbertsioen esparruan %57ko hazkundea egon dela azaldu dute Udaletik, hurrengo diru partidak goraipatuz:
– Artunduagako kirol-instalazioetarako inbertsioak: 535.000 euro
– Futbol zelaiaren ondoko Basozelai parke eta gimnasia guneko instalazioen estaldura: 450.000 euro
– San Migel Mendebaldeko igogailua: 400.000 euro
– Argiteria publikoaren inguruko hobekuntzak Kareagan, Basozelain, Kanda Landaburuko maldan…: 385.000 euro
– Kalistenia gunea San Migelen: 40.000 euro
– Ikastetxeak hobetzeko inbertsioa: 150.000 euro
Bestalde, aurrekontu parte-hartzaileetarako 400.000 euroko partida bideratuko du Udalak. Herritarrek proposatutako lau proiektu aukeratu eta bakoitzari 100.000 euro bideratu dizkiote: leku ilunetan argiteria hobetzeko, eserlekudun eremu estaliak eraikitzea, udalerriko espaloiak egokitu eta 0 kotara jaistea eta errepideak asfaltatzea.
A8 autobiako sarbidea, asfaltatu beharrekoa // Geuria
“Kontinuismoa”, mintzagai
Oposizioaren arabera, gobernu taldeak aurkeztutako udal aurrekontuak “kontinuistak” dira eta hitz hori behin baino gehiagotan agertu da aurrekontuaren inguruko eztabaidan. Oposizioak 71 emendakin aurkeztu zituen aurtengo aurrekontuei begira eta gobernu taldeak ez du horietako bat ere onartu.
EH Bilduren arabera, gobernu taldeak aurrekontuaren inguruan “eztabaidatzeko asmorik ez dagoela dirudiela”, azaldu du Exabier Arrieta bozeramaileak. “Gobernu taldeak ez dauka aurrekontuaren xehetasunak azaltzeko hasierako iniziatibarik”, gehitu du. “Gazterian, ingurugiroan, ekintza sozialean… esparru guztietan zuzenketak aurkeztu ditugu herritarrei bizitza kalitatea hobetzeko helburu, baina ez omen dugu asmatu. 2021ean zuzenketa bakarra onartu zeniguten, aurrekontu osoaren %0,018ko balioduna. Horixe da kontinuismoa”.
Horrez gain, aurrekontu parte-hartzaileen aldeko jarrera agertu dute EH Bildutik: “400.000 euro bideratzea oso ondo dago, baina Elkarrekin Podemosek EH Bildurekin transakzionatutako zuzenketa bat aurkeztu zuen aurretik. Bertan, aurrekontu parte-hartzaileak aktibatzea planteatzen zen diru jakin batekin eta gobernu taldeak atzera bota zuen proposamena”, azaldu du Exabierrek.
Bestalde, diru partida jakin batzuetan “desoreka” atzeman dutela adierazi dute EH Bildu alderditik: “Aurrekontuaren arabera 1.8 milioi euro bideratuko dira adinekoen laguntzarako. Gazteriari, ordea, 363.000 euro bideratuko zaizkio, eta horietatik 157.000 euro bideratuko dira presidentziarako publizitate eta propagandarako eta idazkaritzarako publizitate eta propagandarako izango dira. Emaitza hori konfidantza faltari edo zentzu txarrean gehiegizko kalkulu batengatik izango zen”, egotzi diote gobernu taldearen planteamenduari EH Bildutik.
“Aurrekontuaren inguruko Legealdi honen azken eztabaida dugu honako hau, kontinuismoak gidatutakoa”azaldu du Elkarrekin Podemoseko Marian Cantero bozeramaileak. “Kontinuismoa diogunean gobernu taldeak politika egiteko moduarekin alderatzen dugu: ez dago elkarrizketarik; ez alderdi politikoekin ezta talde sozialekin ere”, azpimarratu du Canterok eta oposiziotik aurkeztutako 71 zuzenketetatik Elkarrekin Podemos alderditik aurkeztutako 32 zuzenketetatik “gobernu taldeak bat bera ere onartu ez duela” kexatu da.
“59 milioi euroko aurrekontua onartuko dugu eta gobernu taldeak ez du asmorik izan oposizioarekin negoziazioak egiteko. Horixe da kontinuismoa” azpimarratu du Elkarrekin Podemosekoak. Jarraikortasun hori “hausteko” gobernu taldeak aldaketa sozialaren aldeko apustu egin beharko lukeela iradoki du “kudeaketa publikoan arriskatuz”.
“Nire ustez, kritika horiek aitzakiak dira zuen zuzenketak justifikatzeko ez baitute oinarri handirik”, argudiatu du Iragorrik. “Lerro gutxi batzuetan aurrekontuarekiko kritika oso lausoak eta orokorrak dira, aurrekontua ez babesteko pisuzko arrazoi bat sakondu edo zuzendu gabe”.
☉ Basauri
Basozelain eta karpa estaliarekin egingo dituzte MAZ Basauri festibalaren kaleko ekintzak
Zuzenketa bat egin dute azaroaren 8ko ordutegiei dagokienez, Los Punsetes taldeak , emango duen kontzertuaren hasierako ordutegian
Duela hiru aste baino gehiago iragarri zuen MAZ Basauri festibalak bere historiako sold out goiztiarrena, azaroaren 7ko kontzertuetarako sarrera guztiak agortu ostean. Leon Benavente eta Toundra izango dira ostiral gaueko protagonista handiak, hain zuzen ere.
Hori gutxi ez, eta antolakuntzatik jakinarazi dute azaroaren 8rako sarreren %60a baino gehiago ere saldu direla dagoeneko. Los Punsetes, Triángulo de Amor Bizarro eta Edgar Allan Pop taularatuko dira larunbat gauean Social Antzokian.
Basauriko jaialdiak bere 13. edizioa ospatuko dute datorren asteburuan, ordainpeko ekitaldiak eta dohainik izango direnak uztartuz, eta hor ere bada berrikuntza bat: Social Antzokian egingo diren kontzertuez harago Basozelai auzoko Zortziko plazan egingo dute aurten MAZ kalean. Horretarako karpa estali bat jarriko dute, eguraldiak programazioan eraginik izan ez dezan.
Zuzenketa ordutegian
Modu berean, zuzenketa bat egin dute azaroaren 8ko ordutegiei dagokienez, Los Punsetes taldeak larunbatean, azaroaren 8an, emango duen kontzertuaren hasierako ordutegian. Antolakuntzatik jakinarazi dute, halaber, Social Antzokian, beti bezala, publikoa zutik egongo dela eta barra-zerbitzua egongo dela, prezio merkeekin.
EGITARAUA
Osteguna, azaroak 6
📍 Marienea (Kareaga Goikoa, 54, Basauri)
🕕 18:00 (doan)
Solasaldia: ‘Mujeres e industria musical’
Parte-hartzaileak: La Furia, Ibone Iza (BIME, MIM), Maite Alaña (MAZ, Rockein)
Gidaria: Emilia Arias (TVE, Pikara Magazine)
Antolatzaileak: Rockein, MAZ, Marienea eta Basauriko Udala
Ostirala, azaroak 7
📍 Social Antzokia — SARRERAK AGORTUTA
21:00 Ateen irekitzea
21:30 Toundra
23:30 León Benavente
01:00 Bukaera
Larunbata, azaroak 8
🎶 Txiki MAZ — Zortziko plaza (Basozelai), doan
11:30 Reyes Torío & Mr Chase (DJ ikastaro eta saioa)
12:00 J.M. Brutal (antzerkia)
13:00 Reyes Torío & Mr Chase (DJ saioa)
13:30 Maialen Ibarra (kontzertu akustikoa)
14:15 Bukaera
🎵 MAZ Kalean — Zortziko plaza (Basozelai), doan
17:30 Ben Santana
18:15 Monday Potions
19:15 Rubia
20:15 Bukaera
🎸 Social Antzokia — 12 € + gastuak (aurretik) / 15 € (egunean bertan)
20:30 Ateen irekitzea
21:00 Edgar Allan Pop
22:15 Triángulo de Amor Bizarro
23:55 Los Punsetes
01:05 Bukaera
☉ Basauri
Nerea Ibarzabal bertsolari eta idazlearekin solasaldia antolatu dute gaur Basaurin
‘Bar Gloria’ bere lehen nobelaren inguruan arituko da Ibarzabal urriaren 30ean Basauriko Nai Lua Teterian
Nerea Ibarzabal bertsolari eta idazlea Basaurin izango da gaur, urriak 30. ‘Bar Gloria’ Ibarzabalen lehen nobelaren inguruko solasaldia antolatu du Beat Basozelaiko Euskararen Aldeko Taldeak Basauriko Udalaren babesarekin eta Basauritarraken laguntzarekin.
Hitzordua 19:00etan izango da Nai Lua Teterian. Sarrera doakoa da, baina interesa dutenek mezua bidali behar dute beattaldea@gmail.com helbide elektronikora.
Basauriko Herri Krosaren 43. edizioa izango da azaroaren 2an, igandez.
Irteera eta helmuga Artunduaga kiroldegia izango dira eta kategoriaren arabera irteera-ordutegi eta distantzia desberdinak egongo dira:
- 10:15. 2020-2025 urteetan jaiotakoak: 400 metroko lasterketa
- 10:30. Kategoria absolutua: 11 kilometro
- 10:35. 2014-2015, 2012-2013 eta 2010-2011 urteetan jaiotakoak: 3,5 kilometroko lasterketa
- 10:40. 2018-2019 eta 2016 eta 2017 urteetan jaiotakoak: 1,2 kilometroko lasterketa (atletismo pistari 3 itzuli)
Basauriko Herri Krosean parte hartzeko izena ematea zabalik dago kirolprobak.com webgunean gaur arte, urriaren 29ra arte, 23:59ak arte.
San Jose Ikastetxeko Ikasle Ohien Elkarteak eta Kukurrustu Kirol Klubak antolatzen dute Basauriko Herri Krosa.
☉ Basauri
Azeituna con huesos, Keax, Reeler, Jaimones, Kruddö eta Silkat lehiatuko dira larunbatean, Rockeineko finalean
Rockeinen 2025eko edizioan 196 artistak eman dute izena, 10. urtez jarraian parte hartze marka gaindituz
Larunbat honetan, azaroaren 1ean, izango da Rockein lehiaketako finala, Basauriko Social Antzokian. Bertan, Azeituna con huesos, Keax, Reeler, Jaimones, Kruddö eta Silkat bandak lehiatuko dira. Sarrera doakoa izango da eta gonbidapen bidez egingo da, Social Antzokiko webgunetik eskuratuz.
Basauriko Udalak, Bizkaiko Foru Aldundiaren Kultura, Euskara eta Kirol sailaren laguntzaz, antolatu eta Euskadiko eta Nafarroako talde eta bakarlariei zuzendutako Rockein musika-lehiaketaren 13. edizioaren finala izango da aurtengoa.
Azeituna con Huesos talde gipuzkoarra (elektronika, popa, jazza); Keax hirukote bizkaitarra (The Owl Project taldeko kide ohiak, LCD Soundsystem edo Ratatat bezalakoen eraginekin); eta Bilbon egoitza duen Reeler rock alternatiboko laukotea, Bizkaiko, Poloniako, Ingalaterrako eta Irlandako musikariek osatua, dira Rockeinen 13. edizioko sari nagusia irabazteko hiru hautagaiak.
Eskualdeko hautagaiak
Beste hiru talde finalistak Jaimones (70-80 hamarkadako rock amerikar laukotea, Basauriko kide batekin), Kruddö, rock gogor eta stoner bikotea, Jon Ander Santamaría bermeotarrak eta Txaber Miravalles etxebarriarrak osatua; eta dira Silkat, indie rock hirukotea, Bilbo eta Galdakaoko musikariekin eta The Cure edo Radiohead taldeen eraginekin.
Azken hiru talde hauek Hego Uribeko artistarik onenari saria lortzeko aukera izango dute, Basaurin, Arrigorriagan, Etxebarrin, Galdakaon, Ugaon, Usansolon edo Zaratamon erroldatutako kide bat gutxienez duten proiektuak saritzen baititu.
“Ohi bezala, Rockeineko 5 kategorien irabazleen izenak (‘Bizkaia saria’, ‘Artistarik onena euskaraz’ eta ‘Eskarabilera saria’, barne) finalean bertan jakinaraziko ditu epaimahaiak”, azaldu dute antolaketa taldetik. Rockeinen 2025eko edizioan 196 artistak eman dute izena, 10. urtez jarraian parte hartze marka gaindituz.”
Emakumeen esperientziaren hitzaldia
Azaroaren 6an, MAZ Basauri jaialdiaren bezperan hain zuzen ere, ‘Emakumeak eta industria musikala’ topaketaren bigarren emanaldia hartuko du Marienean Basauriko Emakumeen Etxeak (Kareaga Goikoa, 54).
Iaz lehen edizioa izan zen eta Rockeinek, MAZ Basaurik eta Marieneak urtero antolatzen duten hitzaldia da, eta helburua musikaren industriako emakumeen esperientziak beste emakume batzuekin partekatzea da, “sektorean eta eszenatokietan emakumeen presentzia handiagoa sustatzeko”, hain zuzen ere.
Aurtengo gonbidatuak La Furia artista nafarra, Ibone Iza BIME Proko edukien arduraduna eta Maite Alaña MAZ Basauri eta Rockeineko zuzendaria izango dira eta Emilia Arias kazetari eta idazleak (TVE, Pikara Magazine) gidatuko du hitzaldia.
Egitaraua | Rockein finala 2025
Larunbata, azaroak 1
20.30 (ateak irekitzea)
Hego Uribeko artistarik onenaren kategoria
21.00 Silkat
21.30 Kruddö
22.00 Jaimones
Kategoria nagusia
22.40 Azeituna con huesos
23.10 Reeler
23.40 Keax
00.15 Sari-banaketa
☉ Basauri
Basauriko Social Antzokiko zubia itxiko dute ibilgailuentzat, San Faustoko obrengatik
Urriaren 28tik (asteartetik) azaroaren 9ra bitartean ibilgailuen trafikoa moztuko dute zubian
Urriaren 28tik (asteartetik) azaroaren 9ra bitartean ibilgailuen trafikoa moztuko dute Social Antzokiko zubian, San Fausto plaza berria eraikitzeko lanak direla eta.
“Egun horietan zehar, zubiko galtzada handituko dute, eta Autonomia kalekoa ere bai, elizaren eta A25 plazaren aurreko zatian”, azaldu dute udal ordezkariek. Hori dela eta, denbora tarte horretan ezingo da Autonomia kaletik udaletxerantz biratu, eta udaletxe eta Kareaga Goikoa kaleen arteko bidegurutzetik Arizgoitira jaitsi ere ez.
Gainera, Basauriko Udaletik iragarri dute azaroaren 4tik 9ra Autonomia kalean itxita egongo dela Begoñako Andra Mari eta Nagusia kaleen arteko zatia.
Bideoa | Xanduli-manduli kirrikiki… Gau Beltza ospatu dute Galdakaon!
Argazkiak | Mozorroak jantzi eta kalera irten dira zeberioztarrak Gau Beltzan
Argazkiak | Sorginek eta mamuek Arrigorriagako Gau Beltza hartu dute etxeko txikiekin
Argazkiak | Mozorroak jantzi eta kalera irten dira zeberioztarrak Gau Beltzan
Argazkiak | Antzerkia, tailerrak eta edabe magikoa prestatu dituzte Galdakaon Gau Beltza ospatzeko
Argazkiak | Galdakao Gela TEk mendiko aulki egokitua entregatu dio Bizkaiko Mendi Federazioari
Bideoa | Xanduli-manduli kirrikiki… Gau Beltza ospatu dute Galdakaon!
Bideoa | Dozenaka pertsona elkartu dira Arrigorriagan Heidelberg enpresan gertatutako lan-heriotza salatzeko
