☉ Basauri
Jon Martin: “Basozelaitik Bentako plazara ekarriko dugu Festibas, San Isidro jaietan”
Festibas, Basauriko musika taldeak bultzatzeko jaialdia, maiatzaren 16an ospatuko da. Parte hartu nahi duten musika taldeek martxoaren 29a baino lehen bidali behar dute inskripzio orria Zirt Zart bulegora. Zortzi talde aukeratuko dituzte Bentako plazan zuzenean jotzeko
Tokian tokiko musika taldeen jaialdiaren bigarren edizioa antolatu du Zirt Zart gazte bulegoak Basauriko Udalaren Gazteria zerbitzuaren bitartez. Festibas jaialdia maiatzaren 16an ospatuko da Bentako plazan eta Basauriko musika taldeak eta Basozelaiko Gizarte Etxeko entsegu gelen erabiltzaileak ezagutaraztea da helburua. “2014an kontzertu aretoa bete egin zen. Finean, herriko musika taldeak dira protagonistak eta bertako jendea etortzen da”, dio Jon Martin Zirt Zart bulegoko kideak. Guztira hiru entsegu gela daude Gizarte Etxean eta iaz 100 musika taldek baino gehiagok erabili dituzte.
2014an Basozelaiko Gizarte Etxean izan ziren kontzertuak, baina aurten Bentako plazara eramango dituzte: “Gizarte Etxean kontzertuak eskaintzea ‘handicap’ bat da. Askotan jendeari kosta egiten zaio Basozelairaino etortzea”. Hori dela eta, kontzertuak kalera ateratzea proposatu zioten Udalari: “Maiatzaren 16an Bentako Jaiak izango direla kontutan hartuta eta herriko erdigunea izanik, bertan egitea erabaki dugu”.
Inskribatuko diren musika taldeetatik zortzik izango dute aukera maiatzaren 16an 22:00etatik aurrera Bentako plazan zuzenean jotzeko. “Aurreko urtean hainbat musika taldek eman zuten izena Festibaseko lehenengo edizioan parte hartzeko, baina guk finkatzen dugu muga 8 taldetan”, dio Martinek. Hala ere, arduradunek eurek erabaki dezakete kopuru hori aldatzea. Jon Martinen esanetan, “euskaraz abesten duten taldeek lehentasuna dute eta taldekideen adina ere aintzat hartzen dugu, gazteenetatik hasita”.
PARTE HARTZEKO BALDINTZAK
Festibas jaialdian parte hartzeko Zirt Zart bulegoan edo Basozelaiko Gaztegunean eskuragarri dagoen inskripzio orria bete behar dute interesatuek, eta bertan entregatu martxoaren 29a baino lehen. Posta bidez eta zirtzart@basauri.net helbide elektronikoz ere bidal daiteke izen-ematea. Inskripzio orriarekin batera musika taldearen deskribapena eta partaide baten NAN zenbakia edo errolda ziurtagiriaren fotokopia ere bidali behar dira, baldin eta 2013. urteaz geroztik taldeak ez badu entsegu gelarik erabili.
Taldekideren bat Basaurin erroldatua egotea edo azken hiru urteetan (2013tik 2015era bitarteko epean), noizbait, Basozelai Gizarte Etxean dauden entsegu gelen erabiltzaile izatea dira Festibasean parte harzteko baldintzak. Era berean, parte hartzaileek 16 urtetik gorakoak izan behar dute.
☉ Basauri
Sanfaustoetan 16.300 euro bildu dituzte Basauriko kuadrillek Aneren eta Gaizkaren alde
Iazko zifra gainditu dute. Ane Etxebarriaren alde antolatutako ekimen solidarioetan guztira 13.700 bildu dituzte, eta Hauspoak kuadrillak Gaizkarentzako 2.600 euro jaso ditu
Basauri herri solidarioa da eta San Fausto jaietan ere hori erakutsi du herriak. Aurten bi umerentzako bildu dute dirua Basauriko jaietan: Ane Etxebarria eta Gaizka Hernandez.
Jaietan zehar antolatu dituzten ekimen solidarioetan guztira 16.300 euro bildu dituzte Herriko Taldeakeko 16 kuadrillek, iaz baino 2.800 euro gehiago. Zehazki, Anerentzat 13.697,58 euro batu dituzte eta Gaizkarentzat 2.600 euro.
Ane 9 urteko sanmigeldarra da, Zigorrak kuadrillakoa, eta oraindik diagnostikorik ez duen afektazio neurologikoa du. Baldintza horrek bere neurogarapenari eragiten dio, maila motorrean, kognitiboan eta hizketaren mailan. Egunero joaten da Hezkuntza Bereziko ikastetxe batera, eta, gainera, hainbat terapia jasotzen ditu bere bizi-kalitatea hobetzen eta ahalik eta ahalmen handiena garatzen laguntzeko.
Bestetik, Gaizkak 10 urte ditu eta Angelman sindromea du. Urtero Hauspoak kuadrillak Elkartasun Azoka eta zozketa antolatzen ditu sanfaustoetan bere alde.
☉ Basauri
Eskarabilera Zestoan agertu da, hegaldia hasi eta ordu batzuetara!
Eskarabilerak atzo galdu zuen burua, baina ordu batzuk bakarrik: Zestoan agertu da gaur goizean!
Agertu da aurtengo Eskarabileraren burua! Ez du ezta egun oso bat pasa zerutik bueltaka: atzo 21:00ak inguru hasi zuen hegaldia eta gaur bertan agertu da Zestoan (Gipuzkoa).
“Hegaldi laburra izan da aurtengoa, atzo Aldatxa kuadrillak zeruratutako Eskarabilera gaur goizean agertu da Zestoako mendi batean!”, adierazi dute Herriko Taldeaketik sare sozialetan.
Aldatxa kuadrilla arduratuko da Eskarabileraren burua berreskuratzeaz. Oraindik ez dute zehaztu noiz, baina bidaia prestatu beharko du Basozelaiko kuadrillak!
Bukatu dira Basauriko jaiak. Eskarabilerari agur esan diote Arizgoitiko plazan batu diren ehunka herritarrek. Aurten Trastorna2 tokiko taldeak jarri du agurrerako soinua: Exkixuren ‘Agur’.
☉ Basauri
Bideoa / Zein izan da aurtengo zurrakapoterik onena Basauriko jaietan? Eta txarrena? Herritarrek erantzun dute!
Basauriko jaietako edaberik magikoena da: zurrakapotea. Herriko Taldeakeko kuadrilla guztiek bere zurrakapotea prestatzen dute eta egunero doan eskaintzen dute euren lonjetan.
Basauriarrek ondo baino hobeto ezagutzen dute zein den zurrarik onena eta zein txarrena, eta horregatik GEURIAko mikrofonoa kalera atera eta inkesta egin dugu, Alaiak kuadrillak urtero jaietan antolatzen duen dastatze itsu-itsuan.
Bigarren urtez jarraian Goitibehera lasterketa izan da Basauriko jaietan. Euskal Inertzia Kopak eta Herriko Taldeakek antolatu dute batera jarduera: kuadrillen arteko txapelketa izateaz gain, pilotu profesionalak ere ikusi ahal izan ditugu Basozelaitik maldan beheran.
Kuadrillen arteko txapelketan irabazle izan da Ontzak, bigarren Basatiak eta hirugarren Zoroak.
GEURIAn Basauriko pilotu batzuekin berba egiteko aukera izan dugu, baita boluntarioekin ere! Aupa Gaizka, Unai, Iratxe eta Lorea, eta Jokin!
Agirre Lehendakaria parkeko jolasgunea naturalizatzeko proposamena lehenetsi dute herritarrek Arrigorriagan
Jon Atxutegi: “Eusko Legebiltzarraren aurrean ere argi utzi dugu Usansolo erdigunean nahi dugula geltokia”
Bideoa / “Gustura egoten gara Berbalagun taldeetan; jende jatorra gara!”
Argazkiak / Sanfaustoetako goitibehera jaitsierak askotariko ibilgailu eta gidariak ekarri ditu Basaurira
Argazkiak / Ontzak izan da azkarrena Basauriko jaietako Mami-jan txapelketan
Argazkiak / Jo eta su aritu dira herriko taldeak sanfaustoetako sokatira txapelketan
Bideoa / “Gustura egoten gara Berbalagun taldeetan; jende jatorra gara!”
Bideoa / Martxan dira Galdakaoko eta Basauriko Berbalagun taldeak!
