→Etxebarri

Santiagoko bidea, Napolira bidaia eta beste hainbat ekintza egingo dituzte Etxebarriko udalekuetan

Etxebarriko udalekuak ekainaren 27tik uztailaren 27ra bitartean egongo dira martxan. 60 monitore eta koordinatzaile baino gehiago egongo dira, eta 700 haurrek eta gaztek baino gehiagok hartuko dute parte Udalak antolatutako ekintzetan.

Etxebarriko udalekuetako haurrak Mendexan (Bizkaia) // Etxebarriko Udala

Etxebarriko udalekuak hilabetez egongo dira martxan, ekainaren 27tik uztailaren 27ra bitartean. 60 monitore eta koordinatzaile baino gehiago egongo dira, eta 700 haurrek eta gaztek baino gehiagok hartuko dute parte Udalak antolatutako ekintzetan.

Etxebarriko Udalak adierazi duenez, familiei “kontziliazioan” lagunduko diete udalekuek. Horrela, bi modalitate eskainiko dira aurten, familien beharrizanei egokituta: otorduei dagokionez, jantoki zerbitzuarekin edo gabe izan daitezke udalekuak; garraioari lotuta, udalekuetako ordutegia hasi baino lehen umeak utzi behar dituzten gurasoentzako, haurrak jasotzeko zerbitzua ere eskainiko da.

Aisialdiko denbora ahalik eta ondoen aprobetxatzeaz gain, udalekuen helburua umeak “berdinen arteko esperientzien bidez” balioetan heztea izango da. Horretarako, udalekuetan adin tarte bakoitzari egokitutako ekintzak prestatu dituzte. Talde desberdintzako erreferentziako gune bat egongo da: Kukullagako eskola, Etxebarriko institutua, Kultur Etxea, Barandiaran edo kiroldegia. Azken horretan, kirol-kluben eta elkarteen laguntza egongo da, hainbat kirol-campus eta udako programa eskainiko baitituzte.

Berezitasun gisa, aurtengo udalekuetan, txikienez gain, nerabeentzako ekintza bereziak ere prestatu dituzte. 17 eta 20 urteko gazteek Santiagoko bidea egingo dute. Era berean, Erasmus+ programaren baitan, Etxebarriko gazteek Napoliko (Italia) ikasleekin trukea egingo dute: italiarrak uztailaren 12ra arte egon dira herrian, eta etxebarritarrak uztailaren 16tik 24ra bitartean joango dira Italiara.

Gora

Geuria Laguntzaileak Geuria Laguntzaileak