Zeberioko Udalak Zubialdeko pilotalekua konpontzeko lanak hasi ditu gaur bertan eta frontoia itxi du. Urriaren hasieran GEURIAn azaldu lez, Udalaren asmoa da Zubialdeko frontoiaren hezetasunak desagertaraziko dituen obra hauek Gabonetako oporrak baino lehen amaitzea da.

Ekain Goti herriko alkateak duela aste batzuk iragarri zuen 65.000 euro bideratu dituela Udalak (BEZa kanpo) eta hezetasunak konpontzeaz gain margoketa lanak egin, bentilazio sistema berria ipini eta LED bonbila bidezko argiteria sistema ipiniko dutela pilotalekuan.

Lanek dirauten bitartean frontoia guztiz itxita egongo da eta Mandoia Pelota Klubeko entrenamendu saioak Ermitabarriko frontoira lekualdatu dituzte: “Asteburuko partidak egiteko frontoi txikiegia da Ermitabarrikoa da baina entrenamenduetarako balioko du”, ziurtatu zuen Gotik. “Asteburuko partidak Arrigorriagako pilotalekuan antolatuko dituzte, ondo bidean”.

Udaletik barkamenak eskatu dizkie herritarrei lan hauek sor ditzaketen eragozpenengatik.

Urriaren 27an Ubideko Mendizale Eguna antolatu dute eta Zeberioko Austarri Mendi Taldea bertan parte hartzera gonbidatu dute, Arratia, Otxandio eta Ubideko taldeekin batera. Bosgarren aldia da Zeberioztarrek Ubideko Mendizale Egunean.

Mendizale Egunaren 23. edizioa da aurtengoa eta izena emateko azken eguna urriaren 23a izango da. Egunean bertan 12 edo 17 kilometroko ibilbideak antolatu dituzte Siskino izeneko tontorrera (854mt) “bide barriek ezagutzeko” 09:00etan eta 13:30ean luntxa prestatu dute Ubideko frontoian bertan.

Parte hartzeko prezioa 5 eurokoa da. 14 urterainoko haurrek ez dute ordaindu behar. Izena emateko edo informazioa handitzeko 656 415 597 telefono zenbakia ahalbidetu dute.

Siskino tontorra

Izen horrekin ezagutzen da Gorbeia mendiguneko tontor txiki bat, Oketa edo Gorbeitxikitik oso gertu dagoena (1035 m). Hego-ekialderantz jaisten den erreka eta amildegia ere izen berarekin ezagutzen dira. Bere inguruan txabola dago. Beste izen bat Soliño da.

Gorbeiako mendigunearen zati bat da, ibai-ibilguek erabat markoztatua. Iparraldera, Zubizola erreka dugu, Ubiden, Undebe ibaia, mendi horiek ekialdetik mugatzen dituena. Hegoaldean Santa Engrazia urtegia dago, eta mendebaldean Zubialde erreka. Multzoaren altuerarik handiena Oketak du (1035 mt), Gorbei-txiki ere deitua bere formagatik, Gorbeiakoaren oso antzekoa baina proportzioetan oso txikia.

Gailur horren ipar-ekialdera, Ubiderantz, baso-koten sistema konplexu bat dago, eta horien artean nabarmentzekoak dira Harrikurutze (832 mt), Siskino (852 mt) eta Korroskibila (805 mt).

Gailurra, 1950eko mendi katalogoan, “Siskimo” izena agertu zen. Arabako gailurren zerrendako 161.a

Zeberioko Udalak zoru pelbikoa lantzeko ikastaroa abiarazi du herriko emakumeentzat. Guztira bost saio eskainiko dituzte eskola zaharrean: urriaren 23an, 30ean, azaroaren 6an, 13an eta 20an.

Saio bakoitzak ordu biko iraupena izango du, 18:00etatik 20:00ak arte eta edukiera mugatua izango dela iragarri dute Udaletik. Horregatik izena ematea beharrezkoa izango da 946 481 079 telefono zenbakira deituz urriaren 21a baino lehen.

Zeberioko Udalak hiru saio antolatu ditu urrian zehar txakurrak amorruaren aurkako txertoa jartzeko betebeharra errazteko. Saioak Ermitabarriko txakurren txertaketekin hasi zituzten hilaren 15ean eta hurrengo hitzorduak Zubialden eta Arkulandan antolatu dituzte urriaren 23an eta 31n, hurrenez urren.

Txertaketa egin ahal izateko izena ematea beharrezkoa dela azaldu dute Zeberioko Udaletik eta gainera nahitaezkoa da txakurrek mikrotxipa izatea: “Mikrotxipak animaliaren identifikazio bakar eta iraunkorra ahalbidetzen du eta hori funtsezkoa da osasun-kontrolerako eta amorrua bezalako gaixotasunen prebentziorako”.

Zubialdeko txertoak aparkalekuan egingo dituzte urriaren 23an, 17:00ak eta 19:00ak bitartean. Arkulanda auzoaren kasuan urriaren 31n egingo dituzte txertaketak 11:00k eta 13:00ak bitartean.

Zeberioko Udala: “Mikrotxipak animaliaren identifikazio bakar eta iraunkorra ahalbidetzen du eta hori funtsezkoa da osasun-kontrolerako eta amorrua bezalako gaixotasunen prebentziorako”

Amorruaren aurkako txertoaren zenbatekoa 22 eurokoa da, baina laubaliokoarena (tetrabalentea, erdaraz) ipintzeko aukera ere dago. Bien zenbatekoa 44 eurokoa da.

Itxaso Atutxa Bizkai Buru Batzarreko presidenteak gaur jakinarazi du ez duela bere burua berriro Bizkai Buru Batzarreko presidentzarako aurkeztuko. Hala, Jose Antonio Susok Araban hartutako bide bera hartu du. Ikusteke dago Gipuzkoako Joseba Egibarrek gauza bera egingo duen edo ez.

Zergatiaz galdetuta, Onda Vascari emandako elkarrizketan Atutxak bere “ziklo politiko eta ibilbide publikoa” bukatutzat eman du,  enpresa pribatura bueltatuko dela zehaztuz. Bere garaian 3Koma ekoiztetxeko arduraduna izan zen zeberioztarra hainbat urtez.

2013an heldu zen Atutxa BBBren buruzagitzara, Andoni Ortuzarren ordez. Ordutik hona, alderdi mailako erabaki garrantzitsuetan parte hartu du, eta bi errelebo gidatu ditu Bizkaiko Foru Aldundian: Unai Rementeria Ahaldun Nagusi moduan Jose Luis Bilbaoren ordez, eta iaz Elixabete Etxanoberena Rementeria beraren ordez.