Sareak

☉ Etxebarri

Oier Asla: “Durangoko Azoka kultur plazarik nagusiena da, eta gure diskoa bertan aurkeztea ikaragarria da”

Asla musika taldeak bere lehen diskoa argitaratu du azaroan: ‘Nire eguzkia’. Durangoko Azokan aurkeztuko dute, abenduaren 10ean. Oier Asla taldeko kidearekin berba egin dugu.

|

Oier Asla, Asla taldeko kidea // Geuria

Musikak betidanik hartu du bere bizitzaren zati garrantzitsu bat Oier Asla etxebarritarrarentzat (Bilbo, 1978). Gaztea zenean hasi zen gitarra jotzen eta Maldan taldean izan zituen hastapenak. Beste talde batzuen bertsioak abestu ditu, bere abesti propioak konposatu ditu eta gaur egun Asla taldean aritzen da. 2016an sortu zuen taldea eta gaur egun bost kidek osatzen dute: Oier bera, Gurutze, Danel, Asier eta Andres. Pop-rocka egiten dute eta azaroan publikatu dute euren lehen diskoa, ‘Nire eguzkia’. Durangoko Azokan aurkeztuko dute diskoa: abenduaren 10ean Plateruenan.

‘Nire eguzkia’ lehen diskoa kaleratu berri duzue Asla taldekoek.
Bai. Azaroa bukaeran kaleratu dugu gure lehen diskoa, ‘Nire eguzkia’. Benetan oso pozik gaude emaitzarekin. Diskoaren prozesu guztia nahiko luzea eta gogorra izan da. Arazo asko izan ditugu eta nahi genuena baino gehiago luzatu egin da prozesua. Hala ere, oztopoak oztopo, oso emaitza ona aterako dugu. Oso pozik gaude egindako lanarekin.

Durangoko Azokan izango zarete eta gainera Plateruenan aurkezpen kontzertua emango duzu. Aukera ezin hobea ezagutzera emateko, ezta?
Oso berezia, bai. Taldekide guztiontzat oso berezia. Ni pertsonalki urtero joaten naiz Durangoko Azokara eta Ahotsenean kontzertu ugari entzun izan ditut. Argi dago Euskal Herriko kultura plazarik nagusiena dela, eta bertan gure diskoa aurkezteak kriston ilusioa eragiten digu. Plateruenan kontzertua emango dugu abenduaren 10ean, larunbatez, 13:20etik 13:50era.

Danel, Andres, Gurutze, Asier eta Oier dira Asla taldea // Utzitakoa

Hamar abesti biltzen ditu diskoak. Zer helarazi nahi duzue abestiekin?
Hamar abesti daude eta denak musikalki desberdinak dira. Eta, noski, letrak ere desberdinak dira elkarren artean. Diskoaren abestietan istorio pertsonalak eta gai sozialak nahasten ditugu. Anitza da diskoa. ‘Nire eguzkia’ abestiak, adibidez, istorio pertsonal bat dauka atzetik eta abesti honek izena ematen dio diskoari. Bestetik, gai sozialak ere jorratzen ditugu. Esaterako, abesti bat daukagu gerraren aurkako letrarekin.

‘Nire eguzkia’ abestiak istorio pertsonal bat islatzen duela diozu.
Bai. Nire aita 2016. urtearen bukaeran hil egin zen minbiziak jota. Nahi gabe eta bilatu gabe, handik hilabete batzuetara abesti bat konposatu nuen bere omenez. Barrutik atera zitzaidan, Gurutzeri gustatu zitzaion eta hunkitu egin zen. Orduan, abesti hori lantzen hasi ginen, eta, behin banda osatuta, erabaki genuen abesti hori diskoan sartzea eta nire aitari omenaldi moduan diskoari ‘Nire eguzkia’ izena jartzea.

Taldearen izenak ere zure abizena du: Asla.
Hala da. 2016an sortu nuen Asla proiektua. Bakarlari bezala hasi nintzen, eta nire amaren abizena jarri nion proiektuari. Bakarlari izatetik orain talde bat gara, baina izena mantentzea erabaki genuen. Laburra da izena, originala, erraz esateko… Orduan mantentzea erabaki genuen. Azken finean, proiektu pertsonal bezala abiatu zen Asla, baina gainontzeko taldekiderik gabe ezinezkoa izango zen hau aurrera ateratzea. Nire abizena taldearen izena izan arren, banda bat gara. Lauroba taldean ere gauza bera gertatu zen. Hasieran, Lauroba anaiak zeuden, baina gero taldekide berriak batu ziren proiektura, eta hala ere, taldearen izena mantendu zuten. Hau antzeko zerbait izango litzateke. Azken batean abestiak denon artean landu ditugu eta banda moduan funtzionatuko dugu.

Hamar abesti eta denak euskaraz. Euskarak ahotsa behar du?
Bai, noski. Niri berez ateratzen zaidan gauza bat da. Euskara nire hizkuntza da eta euskaraz sortzen ditut abestiak. Orain modan jarri da eta jendeari gustatzen zaio hizkuntzak nahastea… Nik oso argi daukat euskaraz egin behar nituela abestiak.

Oier Aslarekin batu gara Etxebarrin eta solasaldia izan dugu berarekin // Geuria

Zeintzuk dira lehen disko berri honen inguruan dituzuen espektatibak?
Gu ez gara talde gazte bat, baina nolabait hasi berriak gara lehen diskoa atera dugulako. Agian ez dugu egiten modan dagoen musika estiloa. Beraz, ez dugu inolako espektatiba handirik egiten. Espero dugu diskoak onarpen eta harrera ona izatea, kontzertuak eman ahal izatea baldintza duinetan eta denok disfrutatzea. Ez dugu espektatibarik jarri nahi, bestela gauza oso zaila jartzen da. Egunean egunekoa bizitzen joango gara.

Musika estiloa aipatu duzula, nola definituko zenuke Asla Taldea?
Orokorrean, pop-rockaren barruan mugitzen garela esango nuke, baina abesti nahiko desberdinak ditugu eta abesti bakoitzak bere istorioa du. Batez ere, doinuei eta ahotsei ematen diegu garrantzia. Gitarrak ere garrantzia dauka gure taldean.

Kontzertuak egin nahi dituzuela ere aipatu duzu.
Bai. Eta non baino, ametsetako kontzertua izango litzateke publikoa entregatuta dagoen kontzertu bat. Musika entzuten, zurekin abesten eta zurekin gozatzen. Hori garrantzitsuagoa da lekua baino. Publikoarekin konexioa sortzean, hori izan liteke nire ametsetako kontzertua.

Zer da musika zure bizitzan, Oier?
Txikitatik beti nirekin egon den zerbait da musika. Aita oso musikazalea zen. Orduan, etxean edo autoan edozein lekutara joaten ginenean beti zegoen musika jarrita. Azken finean, bizitzako beste parte bat izan da niretzat musika. Egun, nire bizitzaren parte oso garrantzitsua da: musika egiteaz gain, kontzertuetara joaten naiz eta musika asko entzuten saiatzen naiz.

Noiz hasi zinen musikaren munduan murgiltzen?
Apur bat trastetzen hasi nintzen institutuko bigarren edo hirugarren mailan, aitak gitarra jotzen zuelako. Eta, hasieran, betikoa, etxean daukazu eta ez diozu kasu handirik egiten. Gero, poliki-poliki hasi ginen trastetzen anaia eta biok, baina ez oso serio. Serioskiago unibertsitateko lehenengo edo bigarren urtean hasi nintzen gitarrarekin.

Beste euskal-taldeen bertsioak abesten hasi zinen. Zeintzuk dira zure erreferenteak?
Erreferenteak baino, gustukoak. Estilo ezberdinak entzuten ditut, baina euskal musikan oso presente egon dira nire gaztaroan Su Ta Gar baita Berri Txarrak ere. Talde asko aipatu ditzaket. Kerobia ere oso gustuko izan dut, baina zerrenda oso luzea da egia esan.
Horrez gain, Aitor Gorosabel (Su Ta Gar), kriston gitarjole ona dela iruditzen zait. Oso-oso ona. Agian ez da erreferente bat niretzat bere musika estiloa egiten ez dudalako, baina gitarjole moduan asko gustatzen zait.

Zure lehenengo kontzertuaz galdetuko banizu.
Unibertsitateko lehenengo urteetan talde bat sortu nuen nire anaiarekin eta institutuko beste lagun batzuekin. “Maldan” deitzen zen taldea eta hiru urte inguru egon ginen jardunean. Maketa bat atera genuen, lokalean grabatutakoa eta hogei bat kontzertu egin genituen. Nire lehenengo kontzertua Maldan taldearekin izan zen, Bilborocken.

Bilboko Aste Nagusian edo Bira kultur gunean jo duzu, besteak beste. Zein izan da zuretzat kontzerturik bereziena?
Larrabetzuko Gaztetxean emandakoa adibidez oso polita izan zen. Ugaoko Jane Jauregian egindakoa ere ederra izan zen.

// Geuria

Maldan desegin eta gero, kontzertu parte-hartzaileak eta bertsioak egiten hasi zinen. Gero, Gurutze Etxebarriarekin egin zenuen topo eta elkarrekin abesten egon zineten.
Asla bezala nik bakarrik eman nuen lehen kontzertua 2016an, baina berehala Gurutze Etxebarria elkartu zen nirekin eta biok batera kontzertu ugari eman ditugu 2020ra arte. Gurutzek asko eman dit, dudarik gabe. Azken batean hasieran ni bakarrik nengoen gitarrarekin eta niretzat ahotsa oso inportantea da. Gurutzek oso ahots ona du, eta berarekin beste maila batera pasa ginen.

Gaur egun bost kidek osatzen duzue Asla taldea, eta horrek ere hobetuko zuen taldea bera, ezta?
Hala da. Danel Marinek (bateria eta perkusioa), Asier Bardezik (baxua), Andres Tejok (gitarra), Gurutze Etxebarriak (ahotsa) eta nik neuk (ahotsa eta gitarra) osatzen dugu Asla taldea. 2020an Danel batu zen taldera eta berarekin hasi ginen abesti berriak lantzen. Gero etorri ziren Asier eta Andres. Boskote izateak ere hobetu egin du taldea bera, noski.

Taldekide gehienak Etxebarrikoak zarete.
Bai. Danel, Andres eta hirurok Etxebarrikoak gara, Gurutze Zeanurikoa da eta Asier Zallakoa. Etxebarrin entsaiatzen dugu, bertan daukagun lokal batean.

Bertsioak eta bakarrik abestetik, taldean abestera. Nola izan zen salto hori?
Nik abestiak konposatzen nituen, eta Maldan taldea desegin eta urte batzuetara bertsioak egiten hasi nintzen. Urte asko eman nituen bertsioak egiten, baina nire abestiak berriro azaleratzeko gogoa sortu zitzaidan. Orduan, 2016an ausartu nintzen eta nire kantak abesten hasi nintzen berriro, nire gitarraz lagunduta. Gustura nengoen eta erabaki nuen aurrera egitea ibilbide horretan.

Eta orduan Gurutze eta gainontzekoak batu zitzaizkizun.
Bai. Abesti propioak banituen, baina nire abestiek eskatzen zuten banda formatuan jotzea. Eta hori beti izan da nire ametsa: jendea bilatu, banda osatu eta beste eremu batera eramatea abestiak. Betidanik izan dut helburu hori eta gaur egun betetzen ari dela esan dezaket, poz-pozik.

Zeintzuk dira zuen erronkak 2023rako?
‘Nire eguzkia’ diskoa azaroa bukaeran argitaratu dugu. Diskoaren aurkezpen bira txiki bat prestatu nahi dugu eta kontzertuak lotu. Gero, ahalik eta leku gehienetan diskoa aurkeztea, eta kontzertuetan disfrutatzea. Apurka-apurka erronka berriak joango dira azaleratzen. Adibidez, ez dugu astirik izan bideoklip bat lantzeko eta beste erronka bat izan daiteke hori.

☉ Etxebarri

Etxebarriko Pumptrack zirkuituan herritarrentzako erronkak prestatu dituzte

Erronkak Wellk aplikazioan daude zehaztuta. Erabiltzaileen artean hainbat sari banatuko dituzte

|

Etxebarriko Pumptrack pista 2018an zabaldu zuten eta Euskadiko handienetarikoa da // Geuria

Pumptrack Bizkaia ekimenarekin bat egin du Etxebarrik. Asmoa da lurraldeko pumptrack zirkuituak erabiltzea eta erabiltzaileek beren trebetasunak probatzea eta erakustea.

“Parkearen inguruan hainbat erronka sortu dira eta parte-hartzaileek gainditu egin beharko dituzte”, diote udal ordezkariek.

Erronkak Wellk aplikazioan daude zehaztuta (Aritz Guinea galdakoztarra da Wellk app-aren sortzaileetako bat).

Aplikazio honek aukeratutako udalerriko kirol eskaintza osoa erakusten dio erabiltzaileari, eta jarduera eta erronka bereziak proposatzen ditu, gazteengan jarduera fisikoa sustatzeko hainbat sari eskainiz. Proiektua uztailaren 31ra arte egongo da martxan.

Aritz Guinea Paños: «Ekintzailetzan maila handia dago Euskal Herrian, bai berrikuntzak hemen sortzeko eta bai talentua erakartzeko»

Bizkaiko Foru Aldundiak abiarazi du proiektua GovTech programaren barruan, hainbat udalerrirekin lankidetzan. Proiektu horren helburua da kirol-instalazioak espazio irekietan erabiltzeko informazioaren kudeaketa hobetzea, bereziki Pumptrackak.

Ildo horretan, egitasmoaren helburua da herritarren parte-hartzea sustatzea, komunitatea sortzea eta gazteen artean kirola sustatzea.

Hego Uribe eskualdean hiru pumptrack zirkuitu daude: Etxebarrin, Ugaon eta Zeberion. Etxebarrikoa 2018an ireki zuten eta asfalto gaineko Euskadiko lehen pista izan zen; 900 metro karratuko azalera eta 170 metroko luzera du eta Euskadiko handienetarikoa da.

Osorik irakurri

☉ Etxebarri

Aida López Valvarce: «Bigarren mailan jokatzea esperientzia ikaragarria izango litzateke, eta asko gustatuko litzaiguke hori bizitzea»

Etxebarritarrak hamar urte baino gehiago darama areto futbolari eta Kukuiagari lotutam senior talde jokalaria eta klubeko entrenatzailea baita

|

Emakumezko seniorren Kukuiaga Areto Futbola zorioneko dago: Ligako txapeldun dira. Etxebarritarren zenbakiak ikusgarriak izan dira, garaipen gehien eta porrot gutxien pilatu dituen taldea ere izan baitira. Fran Rodriguez entrenatzailearen arabera “poz izugarria” eta “aurrerapauso handia” da klubarentzat aurten lortu dutena. Lortutako uzta ez da hor bukatzen Kukuiagarentzat, ordea, oraindik beste bi sari potolo lortzeko aukera baitute: Gipuzkoako eta Arabako txapeldunen kontra jokatu beharko dute, estatu mailako faserako txartela lortu nahian. Helburu hori erdietsiz gero, estatu mailako fasean bigarren mailarako igoera legoke jokoan. Rodriguezen ustez, baina, “egindakoaz gozatzeko eta pausoz pauso” joateko momentua da.

Aida López Valcarce (Etxebarri, 1995) taldeko kapitaina da. Etxebarritarrak hamar urte baino gehiago darama areto futbolari eta Kukuiagari lotuta: senior taldeko jokalaria izateaz gain, haur mailako emakumezkoak eta kadete B mailako jokalari federatuak entrenatzen ditu, eta klubeko fisioterapeuta ere bada. Berarekin solasaldia izan dugu.

Lehenik eta behin, zorionak! Ligako txapeldunak zarete!
Eskerrik asko! Egia esan zirraragarria izan da, ez genuen sinesten, batzuek urte asko daramatzagu areto futbolean jokatzen eta inoiz ez dugu horrelakorik bizi izan. Eta talde honekin bizitzea ikaragarria izan da! Pertsonalki sinestezina izan zen, eta are gehiago etxean, gure jendearen aurrean. Senideak eta lagunak etorri ziren pankarta handi batzuekin gu animatzera. Oso polita izan zen. Beti gogoratuko dugun eguna izango da, baita gure aurreko jokalari guztiei eskerrak emateko eguna ere, zuzendaritzaren babesarekin Kukuiaga FS taldean emakumezkoen talde bat egon zedin borrokatu baitzuten.

Nolakoa izan da denboraldia pertsonalki eta taldearentzat?
Pertsonalki hasieran pixka bat kostatu zitzaidan, lau urtez beste entrenatzaile batekin egon ginelako, Hurrekin, eta joko eta anbizio aldetik erabateko aldaketa ekarri zuen horrek. Eta, azkenean, beti daude desberdinak diren gauzak, eta horiek barneratzea kosta egiten da. Baina denboraldiak aurrera egin ahala, dena hobera joan da, eta entrenatzailea zein jokalariok ondo egokitu gara. Oso talde ona dugu, eta izan ditugun lesio guztien ondorioz gorabeherak izan ditugun arren, beti eman dugu gure onena. Daukagun taldea, egia esan, gakoa izan da, jende beteranoaren eta jende gaztearen arteko nahasteko baita. Gazteak dira belaunaldi-erreleborako klubaren itxaropena, emakumezkoen haur-taldearekin batera.

Gol gehien sartu duen taldea izan zarete, golegile gehien dituena eta gol gutxien jaso duena. Emaitza bikainak, ezta?
Egia esan, beti kostatu izan zaigu golak sartzea, baina aurtengo errefortzuekin hori askoz errazagoa izan da. Eta gol gutxien jaso dituen taldea izateari dagokionez, Franek ezarri duen aurtengo joko-sistemak hori posible egiten lagundu du, taldean ditugun bi atezain zoragarriak ahaztu gabe, noski.

Denboraldia martxoan bukatu duzue. Zergatik hain goiz? Konta iezaguzu nola garatzen den areto futboleko denboraldi bat.
Aurtengoa da hain goiz amaitu den lehen aldia. Lehen fasea egiteko liga bi multzotan banatu zenez, beste denboraldi batzuekin alderatuta jokatzen ez dituzun 7-8 partida daude, eta partida horiek eragin dute hain goiz amaitu izana. Beste urte batzuetan, aldiz, fase erregular eta azkarra izan zen. Baina aurten hasierako bi taldetan banatu da lehen fasea, eta hortik multzo bakoitzeko lehen lau taldeek jokatu dugu txapelketako azken fasea.

Denboraldia amaitu bada ere, ez zaudete oporretan: Arabako eta Gipuzkoako txapeldunen aurka jokatu beharko duzue estatuko faserako txartela bilatzeko.
Oraindik ez dugu informaziorik orain datorrenari buruz, ezta noren aurka edo noiz jokatuko dugun ere. Guretzat hori amets bat da, eta zailtasunaz jabetzen bagara ere, une hori iristeko irrikan gaude. Momentuz entrenamenduekin jarraitzen dugu.

Estatuko faserako txartela irabaziz gero, bigarren mailara igotzea izango zenukete jokoan.
Esperientzia ikaragarria izango litzateke, eta asko gustatuko litzaiguke hori bizitzea. Badakigu oso sakrifikatua eta gogorra izango litzatekeela, baina gogo handiz gaude, eta are gehiago gure ahaleginarekin guk irabazi dugun zerbait bada.

Fran Rodriguezen arabera, zuen entrenatzailea izatea “esperientzia aberasgarria izan da”. Nolakoa izan da Franekin eta gainerako talde teknikoarekin lan egitea?
Lehen esan dudan bezala, lau urte eman genituen aurretik talde tekniko berarekin. Oso giro ona genuen, eta ez genekien nola eramango genuen aldaketa. Askotan, zoritxarrez, emakumezkoen areto futbolean entrenatzaile ez hain trebatuak jartzen dituzte, eta hori ez zen guk nahi genuena. Baina Franek zuzenduko gintuela esan zigunean, bagenekien horrek aldaketa ekarriko zuela. Hasieran pixka bat kostatu zitzaigun egokitzea, baina egia esan, gero sinestezina izan da, oso ondo egokitu gara gu haiengana eta haiek guregana, eta familia handi bat sortu dugu.

Nola eta noiz hasi zinen areto futbolean?
15 urte nituenetik jokatzen dut areto futbolean. Kasualitatez hasi nintzen, nahiz eta beti ibili naizen baloi bat besapean parkeko umeekin jolasean. Nire lehen asmoa futbol 11n jokatzea zen, telebistan gehien ikusten dena, baina egun batean kiroldegiko kanpoko zelaian jokatzen ari nintzela, klubeko kide batek areto futboleko emakumezko talde bat zegoela esan zidan eta izena ematera gonbidatu ninduen. Eta etxe ondoan nengoenez, apuntatu egi nintzen. Eta erabat asmatu nuen!

Kukuiagaz gain, izan al zara beste klub batzuetan?
Bi klubetan bakarrik jokatu dut: Kukuiagan eta Galdakaoko Peña Kalimotxon. Garai batean, Kukuiagako emakumezkoen taldea desagertu zen jokalaririk ez zegoelako, eta orduan beste talde bat bilatu behar izan nuen, eta beste taldekide batekin Peña Kalimotxora joan ginen jokatzera. Garai hartan gauza asko ikasi nituen kirol honi buruz.

Nola definituko zenuke Kukuiaga FS? Zein dira bere balioak?
Herriko klub bat da: jokalari eta entrenatzaile gehienak Etxebarrin bizi gara eta elkar ezagutzen dugu. Sakrifizioa eta laguntasuna izango lirateke klubak ordezkatzen dituen balioetako bi. Eta oinarrizko kategorietan ere jokalari asko entrenatzaileak garenez, errazagoa da balio horiek irakastea. Eta kirolaren bidez ekitatea, talde-lana, inklusioa, errespetua eta diziplina transmititzen saiatzen gara.

Senior taldeko jokalaria izateaz gain, haur mailako neskak eta kadete mailako B federatua entrenatzen dituzu, eta, gainera, klubeko fisioterapeuta zara.
Egia esan ez dakit nola ateratzen dudan denbora taldearekin entrenatzeko, besteak entrenatzeko eta, gainera, klub osoaren fisioa izateko. Nahiko sakrifikatua da, denbora asko eskatzen duelako eta azkenean nire denbora libretik kentzen dudalako. Baina egiten dudana gustatzen zait. Asko gustatzen zait. Eta ahalegina bada ere, pozarren egiten dut. Eta ahal dudan guztietan partidak ikustera joaten naiz, asko gustatzen zaidalako eta ikasten dudalako.

“Etxebarrin zaletasun handia dago areto futbolean, eta hori klubak urteetan zehar egin duen lanari esker izan da”

Entrenatzaile bezala nolakoa zaren galdetuko banizu.
Jokatzen ari naizenean ez bezala, nahiko lasaia naiz besteak entrenatzen ditudanean. Gertukoa izaten saiatzen naiz, jokalariek lotsaraz ditzaketen gauzak edo zalantzak niri esateko konfiantza izan dezaten.

Jokatzeko orduan, ahaleginaren eta, batez ere, laguntasunaren garrantzia irakastea gustatzen zait; izan ere, oso kirol dinamikoa denez, korrika egiten ez badugu, kalte handia egiten diogu taldeari. Partidaren aurretik beti eskatzen diedana esfortzua eta sakrifizioa da, eta nire lagunak korrika egiten badu korrika egingo dut eta ez naiz begira egongo zer egiten duen ikusteko. Talde gisa ahalegintzen eta funtzionatzen badute pozik nago, eta emaitzak laguntzen badu, hobeto. Eta ez da ahaztu behar beste taldeekiko errespetua, irabazten jakitea eta galtzen jakitea. Eta mundu guztia dela baliozkoa eta denok garela desberdinak baina berdinak aldi berean, eta horrek aberasten duela taldea. Beste talde batzuk ikustera joatera ere animatzen ditut nire jokalariak, hor ere gauzak ikasten baitira. 

Zein da zure ametsa areto futbolean?
Ez dut amets berezirik. Beti nahi izan dut tituluren bat irabazi zer sentitzen den ikusteko. Eta, gainera, mailaz igo eta urtebete goragoko maila batean joka badezakegu, sekulako saria izango litzateke.

Estatu mailako fasea jokatuko dute orain / Geuria

Non ikusten duzu zeure burua etorkizunean areto-futbolaren barruan: entrenatzaile edo fisioterapeuta gisa?
Entrenatzaile gisa ikusten dut gehien nire burua. Asko gustatzen zait jendeari irakastea, eta gero ikasi duten hori zelaian islatzea. Oso aberasgarria da maila pertsonalean, eta primeran pasatzen dut. Baina fisioterapia alde batera utzi gabe, pertsona bat behar duen edozein unetan laguntzea ere oso aberasgarria baita.

Zertan bereizten dira areto futbola eta futbol 11?
Areto futbola askoz dinamikoagoa eta biziagoa da. Korrika eta presaka zabiltza etengabe, baloia askoz gehiago ukitzen duzu, eta hori asko baloratzen dut nik. Futbolean baino gehiago esku hartzen duzu jokoan. Arauei dagokienez, futbolaren arauen oso bestelakoak dira.

Zerk egiten du areto futbola futbol 11 baino zirraragarriagoa?
Bada, horrexek: hain bizia eta dinamikoa izateak. Beti daude edozein atetan arriskua sor dezaketen ekintza asko. Tentsioa beti dago eta edozer gerta daiteke. Jokoa azkarragoa da eta aurkariaren ate ingurura gehiagotan iristen da. Ezin zara inoiz erlaxatu, minutu batean markagailua irauli daitekeelako talde baten edo bestearen alde edo kontra.

Ba al dago areto futbolarekiko zaletasunik Etxebarrin eta inguruetan?
Etxebarrin kirol honekiko zaletasun handia dago, eta hori klubak egin duen lanari esker da. Beheko maila guztietan eta kategoria bakoitzaren barruan talde bat edo bi ditu Kukiagak; eta horrek haur asko egotea dakar eta hori klubaren ahaleginari esker da. Gero, futbolaren handicap-a dago eta ume asko joaten dira, baina, hala ere, maila federatuetan talde bat egotea lortu dute, eta hori asko da. Partidak daudenean gero eta jende gehiago ikusten da harmailetan eta gero eta jende gehiagori interesatzen zaio partidak noiz dauden eta partiden emaitza zein izan den. Emakumezkoen partidak ikustera jende gehiago joan dadin lortzea falta da, horixe landu beharko litzateke.

Nola animatuko zenituzke neskak eta mutilak areto futbolean aritzeko izena ematera?
Kirol honetan oso ongi pasatuko dute, eta hori da garrantzitsuena. Laguntasuna bezalako balioak ikasiko dituzte, taldeko kirola baita, eta zuk onerako zein txarrerako egiten duzunak eragin zuzena izango du taldean. Horrez gain, auzoko klubean izena emateak herrian integratzen zaitu, zure herriko jendearekin harremana izatea eta bizitza osorako lagunak sortzea eragiten dizu. Hori oso garrantzitsua iruditzen zait. 

Osorik irakurri

☉ Etxebarri

XX. mende erdialdeko Etxebarriren “itxura eta bizitza” islatzen dituen argazkien bila dabil Udala

|

Bereziki Errepide Nagusia eta San Antonio auzoa lotzen zituen Harribide zaharraren argazkien bila dabil Udala // Etxebarriko Udala

Ondarearen Europako Jardunaldiak urrian izango dira beste urte batez. Aurten gaia izango da ‘Ibilbide kulturalak, sareak eta elkarguneak’, eta dagoeneko Bizkaiko udalerriak lanean hasi dira herri bakoitzeko egitarauak zehazteko.

Etxebarriren kasuan martxoaren 26an lehen bilera egin zuten eta Udalak laguntza eskatu die herritarrei. Zehazki, XX. mendearen azken erdian udalerriaren bizitza eta itxura islatzen duten argazkiak bildu nahi ditu Udalak, “bereziki Errepide Nagusia eta San Antonio auzoa lotzen zituen Harribide zaharrarekin lotutakoak”, diote.

Herritarren batek partekatu nahi duen argazkirik badu, komunikazioa@etxebarri.eus helbide elektronikora eskaneatuta bidaltzea eskatu du Udalak. Bestela, apirilaren 8an eta 9an 10:00etatik 12:00etara eta 17:00etatik 19:00etara bitartean CIMEra eramatea eta bertan eskaneatzeko aukera eman du Udalak.

Osorik irakurri

☉ Etxebarri

Areto futboleko emakumezkoen Kukuiagak liga txapelketa irabazi du lehen aldiz

17 taldek parte hartu dute Ligan, eta bi fasetan jokatu da. Etxebarritarren zenbakiak ikusgarriak dira, garaipen gehien eta porrot gutxien pilatu dituen taldea izan baita

|

Kukuiaga areto futboleko emakumezkoen taldea / Kukuiaga FS

Azken jardunaldiaren faltan garaikurra ziurtatu zuen Kukuiagaren emakumezkoen senior taldeak Bilboko Otxartabe taldeari 5-0 irabazi ondoren. Ez da halako emaitza ikusgarria lortzen duten lehen aldia, inondik inora, gol gehien sartu eta gutxien jaso dituen taldea izan baita etxebarritarra. 17 taldek parte hartu dute Ligan, eta bi fasetan jokatu da. Etxebarritarren zenbakiak ikusgarriak dira, garaipen gehien eta porrot gutxien pilatu dituen taldea ere izan baitira.

Fran Rodriguez entrenatzailearen arabera “poz izugarria” eta “aurrerapauso handia” da klubarentzat aurten lortu dutena. Eskarmentu handiko entrenatzailea den arren, klubean hamarkada luzea darama, bere lehen esperientzia izan da emakumezkoen taldearekin, eta “oso aberasgarria” izan dela nabarmendu du basauriarrak.

Lortutako uzta ez da hor bukatzen Kukuiagarentzat, ordea, oraindik beste bi sari potolo lortzeko aukera baitute: Gipuzkoa eta Arabako txapeldunen kontra jokatu beharko dute, estatuko mailako faserako txartela lortu nahian. Helburu hori erdietsiz gero, estatu mailako fasean bigarren mailarako igoera legoke jokoan. Rodriguezen ustez, baina, “egindakoaz gozatzeko eta pausoz pauso” joateko momentua da.

Osorik irakurri

☉ Etxebarri

Etxebarri / Korrika 23 / 2024

|

Aperribai atzean utzi eta 23. Korrikako lekukoa Etxebarrira heldu da. San Antoniotik aldapan gora eta aldapan behera, Etxebarri herrigunetik ibili da Korrika. Ikusi furgonetatik atera dituzten argazkiak:

Osorik irakurri