Sareak

☉ Ugao

Arey Seoane Rubio: “Oso etxezaleak gara eta ez dugu gure lana behar bezala promozionatzen”

Ugaoko Susterbaks punk rock taldeko Arey Seoane Rubio (Ugao, 1985) gitarra-jotzaile ugaotarragaz berba egiteko aukera izan dogu Ugaoko lokaletan. Taldekidez inguratuta, bere ibilbideaz, gustuez eta herriagaz duen harremanaz egin dogu berba eta Ugaoko lokalera talde osoagaz hurbiltzeko aukera ere izan dogu

|

Arey, taldeagaz, Ugaoko entsegu lokalean // Geuria

Ugaoko Susterbaks punk rock taldeko Arey Seoane Rubio (Ugao, 1985) gitarra-jotzaile ugaotarragaz berba egiteko aukera izan dogu Ugaoko lokaletan. Taldekidez inguratuta, bere ibilbideaz, gustuez eta herriagaz duen harremanaz egin dogu berba eta Ugaoko lokalera talde osoagaz hurbiltzeko aukera ere izan dogu. Talde-argazkia egitean “serioak ematen dogu” kexatu da Txemi abeslaria eta komentarioak barreak sortu ditu taldekideen artean, bandaren izaera ‘parrandero’ hori azaleratuz. Pandemiaren zenbakiek behera egin ahala, kontzertuak antolatzen hasi dira ugaotarrak eta apirilaren 8an, Gazte Egunaren bezperan, emanaldia eskaini zuten Ugaoko Felipe tabernan.

Arey, taldeagaz Ugaon // Geuria

Nola murgildu zinen musikan? Musikarekin beti harreman estua izan dut. Nire aita oso musikazalea izan da betidanik: gitarra jotzen zuen hark ere eta haren musikarako gustuaren lekuko hori gaztetatik hartu izan dut. Eszenatokira igotzearena, berriz, Feos Pero Majos taldearekin hasi zen. Ugaoko jaietan hirugarren kontzertua prestatzen ari zirela, parte hartzeko aukera eman zidaten, eta handik gutxira Ugaotik kanpo kontzertuak emateko erabakia hartu genuenean, hainbat lekutan jotzen hasi ginen. Egun horietan, koruak egiten eta “abesten” nuen, ez nuen instrumenturik jotzen.

Baina gitarra da zure instrumentua. Nolakoa da zure gustua korden mundu zabal honetan? Gitarra klasikoa bada be, ez nuke alde batera utziko, askotan gitarra klasikoan ateratzen baititut entseguetara eroaten ditudan ideiak. Gitarra edozein estilotan gustatzen zait. Nire gitarra kuttuna Les Paul standard bat da, horia, beti gustatu izan zait kolore eta forma hori eta erosi nuen lehen gitarrak forma berdina zuen. Baliteke kontzertuetan soinu “potoloena” zeukaten taldeek gitarra horiek erabiltzen zituztelako izatea ere. Baina guztira 6-7 bat izango ditut: klasikoa, akustikoa, lehen gitarra elektrikoa, aitarena. Erosi dodan azkenengoa Fender Stratocaster american standard bat izan da, grabaketetan soinu ezberdin bat ateratzeko, entseguetan zein zuzenekoetan.

Zer nolako musika entzuten dozu? Rock taldeak entzuten ditut batez ere. Euskal talde asko: Su ta Gar, Governors, Soziedad Alkoholika, Ekon, EH Sukarra, Etsaiak, Latzen, Cicatriz, Anestesia, Berri Txarrak … Eta kanpoko talde pilo bat ere: Wolfmother, Queens of the Stone age, Muse, AC/DC, Deftones, Motorhead, Royal blood, Judas Priest, Slayer, Queen, Helloween, Ramones… Danetarik apur bat.

Plataforma digitalen zalea zara? Bai, gaur egun ezingo nintzateke bizi kotxean Spotify jarriko ez banu. Gainera, faboritoen zerrenda zabala dudan arren, beti agertzen da gomendatutako artista berriren bat harritzen eta erakartzen nauena.

Nola hasi zen zure ibilera Susterbaksen? ‘Txapa Ta Pintura’ taldeko ibilbidea amaitutzat eman genuenean (jaiotza-hileta baten ostean eta lan kontuak medio), taldean geunden hiru lagunek entseguak egiten jarraitu genuen musika egiteko eta kontzertuak emateko gogoz geundelako. Hortaz, talde berri bat egitea erabaki genuen, baina bertsioak jo beharrean, gure letra eta musika egiten hasteko ideia argiarekin. Ez zen eztabaida askorik egon: horretarako, taldea osatzeko behar genituen lagunen bila aritu ginen denbora baten, eta denbora gutxiren ostean bueltan ginen izen eta ideia berri horrekin. Gainera, ikuskizuna egiteko nahia ez genuen deuseztatu eta hori egiten saiatzen gara: musikaz gain, show-a, harridura edo barre batzuk ateratzea be.

Nolakoak dira taldeko partaideak? Gaur egungo taldea Arrigorriagako Xabik (gitarra), Aretako Ortzik (bateria) eta Ugaoko Aitorrek (baxua), Txemik (ahotsa) eta ni (gitarra) osatzen dugu. Nire ustez oso talde kuriosoa gara: adin, pentsakera, jarrera eta gustu musikal oso ezberdinak bateratzen ditugulako eta abestietan igartzen da. Horregatik, ezingo nuke taldea rock musika estilo baten barruan sartu abesti guztiak ezberdinak direlako.

Susterbakseko kideak, udal lokaletatik gertu // Geuria

Nola ezagutu zenuten elkar? Aitor eta biok betidanik ezagutu dugu elkar. Ugaotarrak gara biok eta elkarren artean urtebeteko aldea besterik ez dugunez, eskolan zein kalean elkarrekin egondakoak gara. Hala ere, harreman estuagoa dugu Pulmon Negro taldean batera egon ginenetik. Handik aurrera, jo dodan talde guztietan Aitor egon da beti, lehenago edo geroago. Txemi Galdakaotik datorren ugaotarra da. Ainhoa eta Janire Etxaberekin bertsio talde proiektu bat sortzen ari ginela, nork abestuko zuen ez genekien eta Ainhoak Unai eta Txemi ekarri zituen entsegu batera (‘Txapa ta Pintura’ko abeslariak bilakatuko zirenak).

Handik denbora batera neskek taldea utzi zuten eta ‘Txapa ta Pintura’ ofizialki sortu zan. Xabik eta Txemik kontzerturen bat ikusten ezagutu zuten elkar. Susterbaks taldea osatzeko kideen bila genbiltzala, entsegu batera gonbidatu zituen Txemik Xabi eta Gorka. Azken honek aspaldi utzi zuen taldea, baina Xabi gurekin geratu da orain arte. Soloak gehienbat hark egiten ditu. Ortzi eta biok hainbat lekutan egin dugu topo, batez be Laudioko tabernetan gazteagoak ginenean.

Lagun amankomunak ditugu eta gure taldeen kontzertuak ikusten aurkitu gara askotan. Behin alkarregaz jo gendun laudioko gaztetxean Atxurre (bere taldea) eta Txapa ta Pintura. Atxurre taldea jotzeari utzi ziotenean, eta Susterbaksen batería baten falta genuenean, berarengan pentsatu eta entsegu batera gonbidatu nuen.

Zein lekutan egiten dituzue entseguak? Ugaoko musika lokaletan entsaiatu izan dugu beti, baina kanpora egin behar izan dugu eta momento hontan Laudion gabiltza udaletxeak hartutako covid neurrien ondorioz. Izan ere covid-a agertu zenetik, lokalen funtzionamendua bertan behera geratu zen. Neurriak arintzen joan diren heinean lokalen inguruan ez da aurrerapausorik eman azkenengo bi hilabetera arte eta momentu honetan bueltatzeko prozesuan gaude. Normalean, astean behin lotzen gara zarata ateratzeko.

Non ibilitakoak zarete? Egia esan, ez dugu gure burua behar bezala promozionatzen, oso etxezaleak gara eta gure eskualdean mugitzen gara batez ere (Laudio, Ugao, Arrigorriaga…). Horrek ez du esan nahi eskualdetik kanpo jotzeko gogorik ez dugunik: noizean behin kanpoan kontzerturen bat eman izan dugu (Bilbo, Balmaseda, Leioa…) baina ez da ohikoena.

Ba al dago jotzea gustatuko litzaizukeen lekurik? Pertsonalki ez dut halako ametsik izan, gustura jotzeko edozein leku iruditzen zait aproposa. Hala ere, taldeko baten bati galdetzen badiozu, Azkena Rock Festivalean jotzea gustatuko litzaiokeela erantzungo dizula uste dut, hainbeste aldiz publiko bezala egon ostean… Neu ere prest egongo nintzateke.

Nolakoa da Ugaogaz dozuen harremana? Ugaoko herriarekin harreman bikaina dugu, kontzertuetara jende ugari hurbildu da, herrikoa zein inguruetakoa, eta hori beti benetan eskertzekoa da.

Udalagaz, ostera… Gatazkatxo bat izan genuen, aspaldi. 2018ko ekainaren 16ko Sarea Fest jaialdian, beste leku askotan egin dogun bezala, “arde arde el puto alcalde” dioen abesti bat jo genuen.
Orduan, 2019ko Jai Batzordean Ugaoko gazteek gure taldea proposatu zutenean, garai hartako kultura zinegotziak proposamen horren kontra egin zuen aurreko kontzertu horretan, aipatutako abestiarekin, Ugaoko alkatea iraindu genuela argudiatuz. Ondorioz, jai horietan jotzeko aukera bertan-behera geratu zen. Azalpen bila jo genuenean, alkatea ez genuela iraindu argi utzi genuen.
Horregatik, Sarea elkarteak 2019ko Sarea Festen errepikatzeko aukera eman zigunean komunikatu bat irakurri genuen, gertatutakoa azaltzeko. Hau da: Ugaoko kultura zinegotziak jai batzordean, herriko musika talde baten kontra egin zuela Jai Batzordearen iritzia aldatuz, eta ondorioz batzordearen erabakian eraginez. Gure ustez, hori beto ala “kazikada” bat izan zen argi eta garbi eta horrela salatu genuen. Udalaren esanetan berriz ez zen betoa izan, “erabaki puntuala” baizik. Gaur egun ahaztutzat emango dute, baina gure taldeari egin zioten bezala, beste talde bati egin ahal izango diote eta hori penagarria iruditzen zait.

Nolako musika eskaintza dago herrian? Herri oso musikazale eta parranderoa dugu Ugao eta aukera ematen danean dana emateko gogoarekin gaude beti. Esanguratsuak dira Sarea Sound Systemeko Sarea Fest jaialdietan biltzen den jende piloa, musikari zein talde mota ezberdinekin (rocka, jazz, rap, …) Argi dago ugaon jendeari musika gustatzen jakola eta musika taldeak ikusteko mugitzen garela. Taldekoek ere halako zaletasuna eskertzen dugu.

Joan den urtarrilean Herri Txiki Infernu Handi saioan izan zen Txemi. Zer sentitzen da herria nolabait ordezkatzea telebista kate autonomikoaren bidez? Oso harro sentitzen gara gure abeslariaz, ta barre batzuk egin genituen Txemiren kontura. Hala ere gure taldearen eta herriko beste taldeen izenean pairatu dugun musika lokalen etenaldi luze hori salatzea eta programan agertzea falta zela uste dut.

Susterbaks // Geuria

Gatazkaren inguruan…Udalak, ostera, taldearekin harremanik izan ez duela dio. “Jai Batzordeak askatasun osoz hartutako erabaki baten kontra egiten ari dela musika taldea, eta Udala horren erantzunle egiten duela”, azaldu zuen Udalak. Ordutik, beste bi aldiz kontratatu du Udalak Susterbaks: 2019an Sarea Festen, eta 2021eko irailean Jai Batzordeak berak kontratatu zuen. Azken honetan, kontzertua baino apur bat lehenago ez jotzea erabaki zuen taldeak bere kabuz, “agian Udalaren, eta azken batean, Jai Batzordearen eta herriaren beraren errenbatxa gisa. Hortaz, badirudi arazoa taldearena dela Udalarekin, eta ez, alderantziz”, azaldu du udal gobernu taldeak.
Elkarrizketa bukatzeko hizka-mizka ederra eskaini digute batetik eta bestetik. Herri txiki, infernu handi!

☉ Ugao

Momiak filma aire zabalean, euskaraz eta doan proiektatuko dute Ugaon

Filma ekainaren 21ean proiektatuko dute Herriaren enparantzan, 22:00etan

|

Krispetak // Corina Rainer, Unsplash

Ikasturtearen amaiera heldu da eta udako oporrekin batera urtaro berriko ekintzak. Datorren ekainaren 21ean, ostirala, Momiak filma proiektatuko dute 22:00etan Ugaoko Herriaren enparantzan Ugaoko Merkatari Elkartearen eskutik eta Udalaren babesarekin. Euria egitekotan proiekzioa frontoira eramango lukete.

Juan Jesús García Galochak zuzendutako filma da Momiak eta publiko orokorrari zuzenduta dago. Zineuskadik sustatutako Zinema Euskaraz programaren barruan aurten estreinatu den bigarren film da, ‘Yuku eta Himalaiako lorea’ lanaren ostean. Filmak joan den otsailaren 23an hasi zuen ibilera EAEko zinema aretoetan.

Momiak (2023)

Lurraren erraietan momien hiria dago! Inperioaren aginduz, Nefer printzesak Thurtekin ezkondu behar du, gurdien auriga ohi batekin. Ez batak ez besteak ez dute ezkondu nahi; Neferrek askatasuna irrikatzen duelako, eta Thutek ezkontzeari alergia diolako.

Filmaren fotograma bat // Momiak

Baina jainkoen asmoak ezeztaezinak dira: Thutek Neferrekin ezkondu eta faraoiak eman dion errege eraztuna zaindu beharko du. Horri zerbait gertatuko balitzaio, Thutek begiak eta mihia galduko lituzke. Bitartean, gure munduan, Lord Carnabyk indusketa arkeologiko bat egin eta gauza berezi bat aurkitzen du: Egiptoko errege-ezkontzako eraztun bat! Thut gizakien mundura joan behar da hura berreskuratzera. Ondoan Sekhem, 12 urteko anaia, bere krokodilo maskotarekin, eta Nefer ditu.

Elkarrekin abentura handi bat biziko dute Londres modernoan, eta beren asmoetan sartzen ez zen zerbait deskubrituko dute: maitemintzea zer den.

Osorik irakurri

☉ Ugao

Ugaoko Markio auzoko jaietako paella lehiaketan izena emateko azken eguna da gaur

Larunbat honetan ospatuko dituzte Markioko jaiak. Hurrengo egunean San Juan sua piztuko dute Herriaren Enparantzan

|

Paella bat // Geuria

San Juan jaiarekin batera Markioko jaiak ekainaren 22an ospatuko dituzte Auzolagunen Elkartearen eskutik. Festak Markioko Donibane baselizan eguerdiko 12:00etan hasiko dira, ordu horretan meza antolatu dute eta ondoren luntxa prestatuko dute.

Egun horretan paella lehiaketa prestatu dute eta izena emateko azken eguna gaur da (ekainak 20). Parte hartu nahi duten interesdunek Jane jauregian egin dezakete aurrez aurre edota 946 480 704 telefono zenbakira deituz edo kultur-etxea@ugao-miraballes.eus helbidera idatziz.

Guztira 220 euro banatuko dituzte sarietan: Lehen saria 100 eurokoa izango da, bigarrena 70ekoa eta hirugarrena 50ekoa. Sari guztiek produktu sorta bat izango dute opari lez.

Parte hartzeko honako hauek kontuan hartu beharko dira:
– Parte-hartzaileek sua egiteko tresnak eta erabili beharrekoak ekarriko dituzte
– Parte-hartzaileek paellak egiteko osagarri guztiak ekarri behar dituzte
– Parte-hartzaile bakoitzak paella bi aurkeztu ditzake gehienez
– Paellak 14:00etan aurkeztu beharko dira
– Epaileen erabakia aldaezina izango da

“Arratsaldean txikien txanda helduko da”, azaldu dute Ugaoko udal ordezkariek. “Buruhandien kalejira eta jokuak antolatuko ditugu 16:00etarik aurrera”. Zapatuko azken ekintza erromeria izango da eta 17:30ean hasiko da.

San Juanak, herrigunean

Hurrengo egunean, ekainaren 23an, hainbat ekintza antolatu dituzte Ugaoko herrigunean. 18:00etan Etorki Dantza Taldearen emanaldia antolatu dute Herriaren enparantzan eta 19:00etan buruhandiek herriko kaleak hartuko dituzte.

20:00etan Motociclones Elektrotxarangak kale animazioa eskainiko du eta 22:00etan San Juan sua piztuko dute, San Juan Koplak bota ostean. Udal ordezkariek iragarri dute, urtero bezala txokolatea banatuko dietela bertara hurbilduko diren herritarrei.

Osorik irakurri

☉ Ugao

Masterclass bi antolatu dituzte Ugaoko Pump Track pistan, kirolean murgiltzeko

Ekainaren 22an izango dira saioak, jarraian, Ugaoko Pump Track pistan

|

Skater bat, Ugaoko Pump Tracka inauguratu zutenean // Geuria

Asteburu honetan, ekainaren 22an, Pump Track inguruko ezagutzak eskuratzeko materclass bi antolatu ditu Foru Aldundiak Ugaoko pistan, 10:00etatik 14:00ak arte. Parte hartzeko gutxieneko adina 10 urtekoa izango da eta izen emateak webgune honen bidez egin beharko dira.

Masteclass bi izango dira: lehena, 10:00etatik 11:55etara prestatutakoa, oinarrizko ezagutzak bereganatzeko izango da eta kirol hau inoiz egin ez duten edo oso modu puntualean egin duten pertsonei zuzenduta dagoela azaldu dute Ugaoko udal ordezkariek. Bigarrenak Hobekuntza izena du eta diziplina honetan entrenatzen denbora daramatenei zuzenduta dago. 12:00etatik 14:00ak arteko iraupena izango du: “Mugimendu konplexuagoak ikasi nahi dituztenei, txanda kronometratuak egin nahi dituztenei… Kasu honetan derrigorrezkoa izango da kasko integrala eramatea”.

Haur bat, Pump Track pista batean, Galdakaoko Ongietourri egunean // Geuria

Gainera, Ugaoko pistan QR kodeak daramatzaten totem edo plaka interaktiboak ipiniko dituzte eta bertan praktika seguruari eta haren oinarri teknikoei buruzko azalpenak ematen dituzten bideo- tutorialak kontsultatzeko aukera izango dute interesdunek: “Euskarri hori zirkuituan instalatuta geratuko da, eta, beraz, bizikleta-modalitate hori praktikatzeko interesa duten pertsonak tutorial horiek biltzen dituen Aldundiaren webgunean sartu ahal izango dira.”.

Osorik irakurri

☉ Ugao

Ugaoko 60 pentsiodunek 750 sinadura bildu dituzte gaurko Renfeko geltokiko mobilizazioan

Ugaoko pentsiodun talde bat Herriaren plazatik abiatu da gaur eguerdian Renfeko geltokira, trenetako irisgarritasuna aldarrikatuz

|

Ugaoko pentsiodunak, Renfeko geltokian // Ugaoko Pentsiodunak

Ekainaren 17an mobilizazioak deitu ditu Basauri, Arrigorriaga, Ollargan, Ugao, Aiaraldea, Urduña eta Bilboko Pentsiodunen Mugimenduak Abando Indalecio Prieto geltokia eta Urduña kubritzen duen Renfeko C3 lineako zerbitzuaren egoeraren haritik. Ugaoko 60 pentsiodun Herriaren plazatik abiatu eta Renfeko geltokiraino joan dira “Ugaoko pentsionistak aurrea!” eta “Tren irisgarriak orain” zioten pankartekin.

Bizkaiko Pentsiodunen Mugimenduak azaldu moduan, eskaera horren alde mozioak aurkeztu dira trena igarotzen den eta geltokiak dituzten herrietako hainbat udaletan. “Orain arte, mozio hori Laudio, Ugao eta Arrigorriagako udaletan onartu dute. Bidebieta-Basaurikoan osoko bilkuran eztabaidatu ere ez zen egin, argudiatuz gaia udalerriz kanpokoa zela, eta horrek osoko bilkuran egon zen pentsiodunen taldearen haserrea eta protestak eragin zituen. Urduñako, Amurrioko eta Arrankudiagako udaletan ere aurkeztu da, baita Bilbokoan ere, ziurrenik ekainaren 27ko osoko bilkuran aztertuko da”.

“Prentsan iragarri denez, 500 tren berri ipiniko dituzte Renfen, horietako 33 C3 linean. Aurreikuspenen arabera, azken oztopo horiek desagertuko omen dira. Baina momentuz ez dute data jakinik iragarri, eta badirudi ez dela epe laburrekoa batzuk 2025erako espero dituztelako eta beste batzuk 2027rako”, azaldu zuen duela egun batzuk Rufi Rubio Ugaoko Pentsiodunen mugimenduko kideak. “Tren berriak C3 lineara heldu baino lehen aldiriakeko konboi bakoitzean plataformadun bagoi bat ipintzea eskatzen diogu Renferi, mugikortasun arazoak dituzten pertsonak trenera igo ahal izateko”.

Bizkaiko Pentsiodunen Mugimendua: “Orain arte, mozio hori Laudio, Ugao eta Arrigorriagako udaletan onartu dute. Bidebieta-Basaurikoan osoko bilkuran eztabaidatu ere ez zen egin”

Ugaoko mobilizazioaz gainera Basaurin 60 lagunek martxa egin dute udaletxetik Bidebieta tren geltokira. Bizkaiko Pentsiodunen Mugimenduak azaldu moduan, eskaera horren alde mozioak aurkeztu dira trena igarotzen den eta geltokiak dituzten herrietako hainbat udaletan. “Orain arte, mozio hori Laudio, Ugao eta Arrigorriagako udaletan onartu dute. Bidebieta-Basaurikoan osoko bilkuran eztabaidatu ere ez zen egin, argudiatuz gaia udalerriz kanpokoa zela, eta horrek osoko bilkuran egon zen pentsiodunen taldearen haserrea eta protestak eragin zituen. Urduñako, Amurrioko eta Arrankudiagako udaletan ere aurkeztu da, baita Bilbokoan ere, ziurrenik ekainaren 27ko osoko bilkuran aztertuko da”.

Bilbon elkarretaratzea egin dute Plaza Biribilan gaur eta ostean talde-erreklamazioak aurkeztu dituzte Abando geltokian.

Antzinako arazoa

Gatazka hau ez da berria: Ludi Viguera Arrigorriagako auzotar ohiak GEURIAko #087 Monografikoan argitaratutako erreportaje batean azaldu lez Urduñako Maria Luisa Goikoetxea izan zen C3 lineako irisgarritasun arazoa azalerazi zuen herritarra.

Maria Luisaren kexa horietatik abiatuz, Hego Uribe zeharkatzen duen C3 lineako geltokietako irisgarritasun arazoa ibilbideko geltoki guztietara hedatu zen. Gaur egun, Urduña, Amurrio, Laudio, Arrankudiaga, Ugao, Arrigorriaga, Basauri eta Ollargan geltokietako irisgarritasun arazoak, orokorrean, “konponduta” daude: “Geltokietarako sarbideak nola edo hala konpondu ditu Renfek eta nasara heltzea posible da, Bidebieta-Basauri geltokian izan ezik: gaur egun, mugikortasun arazoak dituzten pertsonak ezin dira geltokira sartu”.

Hala ere, eta GEURIAn iragarri lez, 14 milioi euroko lizitazioa martxan ipini du Espainiako Gobernuak bertan tren geltoki berria eraikitzeko. Proiektuak hiru jarduera biltzen ditu: eraikin berria egitea, geltokiaren trenbideak eta nasak birmoldatzea eta trenbideak estaltzeko lauzak iparraldera luzatzea, tarteko solairu berri batekin.

Ugaoko geltokia // Geuria

 

Osorik irakurri

☉ Ugao

Larunbatean zabalduko dituzte Ugaoko estali gabeko igerilekuak, etenik gabeko ordutegiarekin

Instalazioak 11:00etatik 20:30ak arte egongo dira zabalik etenik gabe irailaren 15era arte. Abonuak ekainaren 14ra arte eskuratu daitezke El Jaron eta hilaren 15etik aurrera Arandiako instalazioetan

|

Arandiakoestali gabeko igerilekuak // Geuria

Arandiako estali gabeko igerilekuak datorren ekainaren 15ean zabalduko dituzte, udako denboraldiari hasiera emanez. Udalak azaldu lez, instalazioak 11:00etatik 20:30ak arte egongo dira zabalik etenik gabe. Abonuak ekainaren 14ra arte eskuratu daitezke El Jaron eta hilaren 15etik aurrera Arandiako instalazioetan.

Estali gabeko igerilekuak irailaren 15era arte egongo dira zabalik eta 500 lagunentzako edukiera izango dute. “Egunero erosi ahal izango dira sarrerak, bai erroldatutakoek, baita ez erroldatutakoek ere (4 euro adingabeentzat eta erretiratuentzat; 5 euro 18 urtetik gorakoentzat)”, azaldu dute udal ordezkariek. “Abonuei dagokienez, prezioa desberdina izango da erroldatutako eta erroldatu gabeko pertsonentzat”. Prezioak Ugaoko Udalaren webgunean kontsultatu daitezke.

El Jaro, zabalik

Ugaoko kiroldegiak ere udako ordutegia hasiko du asteburutik aurrera: astelehenetik ostiralera zabalik egongo da 09:00etatik 13:00ak arte eta 17:00etatik 20:00ak arte. Larunbateko ordutegia 09:00etatik 14:00ak artekoa izango da eta igande zein jaiegunetan itxita egongo dela iragarri dute. Igerilekua kiroldegia itxi baino 30 minutu lehenago itxiko dute ordutegi berriarekin.

“Igerilekua irekita egongo da uztaila osoan zehar, kiroldegiaren gainerako guneak bezala (gimnasioa, kiroldegiko kantxa, padel pista, etab.). Abuztuan, kiroldegia erabat itxiko da, dagozkion mantentze-lanak egiteko”, iragarri dute Udaletik.

Osorik irakurri