☉ Usansolo
Usansoloko galdeketa metro geltokiaren inguruan: hauek dira bozkatzeko hiru aukerak
Usansoloko tren-konexiorako hiru aukeren artean bat hautatuko dute herritarrek urriaren 5eko galdeketan
Urriaren 5ean galdeketa egingo dute Usansolon. Metro geltoki berriaren inguruko kontsulta izango da: Geltokia Erdigunean plataformak sustatu du eta Usansoloko Udalak babestu egiten du.
Tren konexiorako hiru aukeretatik bakarra hautatu beharko dute igandean usansolotarrek. Eta aukerak hauek dira: Usansolo erdigunean geltoki propioa; 500 metroko tunel ibiltaria ospitaleko geltokira; eta, autobus-lanzadera bat ospitaleko geltokira eta 250 metroko tunela.
Unkina plazan jarriko duten karpan emango dute herritarrek bozka, 09:00etatik 20:00etara bitartean. Boto-paperak Usansoloko etxebizitzetako postontzietan banatuko dituzte, eta bozketa egunean ere eskuragarri egongo dira.
Galdeketarako bozka 16 urtetik gorako usansolotarrek eman ahalko dute. “Usansolon bizi diren guztiek eman dezakete bozka. NANean Usansoloko kaleren bat dutenek zuzenean bozkatuko dute; ez du axola NANean oraindik Galdakao udalerri bezala agertzea, kalea da garrantzitsua”, diote Geltokia Erdigunean plataformatik.
“Era berean, Usansolora berriki etorri direnek eta NANean oraindik beren kale berria ez dutenek ere bozka eman ahalko dute”, diote. Kasu horietan, errolda-agiria eskatu eta igandean aurkeztu beharko dute.
Urtebete martxan
Duela hiru urte, 2022ko abenduan, Loly de Juan Garraio Azpiegituren zuzendaria eta Julian Ferraz Euskal Trenbide Sareko (ETS) zuzendari ondokoak metroari buruzko hitzaldia eman zuten Galdakaoko Torrezabal Kultur Etxean, eta bertan adierazi zuten Usansoloko geltokia desagertu egingo zela.
Eta duela urtebete Eusko Jaurlaritzak, Bizkaiko Foru Aldundiak eta ETSk erabaki hori baieztatu zuten. Orduan eratu zuten Usansolon Geltokia Erdigunean plataforma.
“Bizkaiko eta Usansoloko ospitalearen kohesioa hobetzeko obra batek, 350 milioitik gorako inbertsio publikoa duenak, Usansoloko bizilagunen trenbide-garraiorako sarbidea kentzen du. Kendu egiten da, gaur egun udalerrian tren-geltoki bat baitago udalerriaren erdigunean”, salatu dute askotan plataformatik.
Urte honetan zehar, plataformak hamaika aldarrikapen-ekimen egin ditu, hala nola, manifestazioak, elkarretaratzeak eta herri asanbladak, eta alderdi politikoekin eta Bizkaiko Foru Aldundiko eta Eusko Jaurlaritzako ordezkariekin hainbat bilera egin dituzte.
“Guztietan argi utzi dugu zein den herritarren jarrera: Usansolok herriaren erdigunean geltoki bat izan behar du, gaur egun duen bezala. Aldarrikapen hori da usansolotarrok garraio publikoan kalitaterik ez galtzeko modu bakarra, zenbait datuk berresten baitute herritarrek defendatzen duten alternatiba dela udalerriaren beharretara ondoen egokitzen dena”, diote.
☉ Usansolo
Argazkiak | Tren geltokia Usansolo erdigunean mantentzearen aldeko manifestazioa egin dute herritarrek
Urriaren 5ean Metro geltokiaren inguruko herri galdeketa egingo dute Usansolon. Herri osoak bozkatzeko deia egin dute Geltokia Erdigunean plataformatik
Usansoloko herritarrek ez dute gaur egun erdigunean duten tren geltokia galdu nahi. Eta horren adibide da azken urteetan egin dituzten mobilizazioak. Azkena irailaren 27an: herritarrak kalera irten ziren beste behin ere eta manifestazioa egin zuten Usansoloko kaleetatik. Gainera, urriaren 5eko herri galdeketan “herri osoak” bozka emateko deia zabaldu zuen Geltokia Erdigunean plataformak.
☉ Usansolo
Manifestazioa deitu dute larunbatean Usansolon, urriaren 5eko galdeketari begira
Urriaren 5ean Metroari buruzko galdeketa egingo dute Usansolon, baina aurretik, irailaren 27an manifestazioa deitu du Geltokia Erdigunean plataformak
Urriaren 5ean, igandez, herri galdeketa egingo dute Usansolon. Metro geltokiaren inguruko kontsulta izango da, eta bertan usansolotarrek adierazi ahal izango dute zein den euren nahia.
Horretarako hiru aukera izango dituzte bozkatzeko: bi geltoki eraikitzea (bat Usansolo erdigunean eta bestea ospitalean); 500 metroko tunela ospitaleko geltokia Usansolo erdigunearekin lotzeko; edo lanzadera baten bitartez lotzea ospitaleko geltokia eta herrigunea.
Kontsulta ez da loteslea izango, baina Geltokia Erdigunean plataformatik honakoa adierazi dute: “Eskura ditugun berme guztiak izango ditu, hala nola, erroldaren egiaztatzea eta kanpoko egiaztatzaileak. Bada garaia Usansolok botoa eman eta bozkatutakoa baliarazteko”, diote.
Galdeketa egin aurretik, ordea, plataforma eta usansolotarrak ez daude geldirik. Irailaren 18an asanblada irekia egin zuten eta irailaren 27an, larunbatez, manifestazioa deitu dute.
Unkina plazatik abiatuko da martxa 12:30ean. Plataformatik herri osoa deitu dute mobilizaziora eta zapi horia eramateko eskatu diete herritarrei.
☉ Usansolo
Bideoa | Usansolon 250 lagunek egin dute bat Palestinako genozidioa salatzeko kazeroladarekin
Usansolon 250 lagun inguruk egin dute bat Gernika-Palestina Herri Ekimenaren burrunbarekin.
Usansolotik GEURIAra bidali dizkiguten irudiekin sortu dugu bideo laburra.
‘Genozidioa stop!’ lelopean burrunbak antolatu ditu Gernika-Palestina Herri Ekimenak, Gazako genozidioa salatzeko.
Irailaren 5ean egingo dituzte protesta zaratatsuak, 19:00etan. Usansolon, Arlo Baltza plazan izango da.
Horrela dio Gernika-Palestina ekimenak bere webgunean: “Sarraski horren aurrean ezin dugu isilik egon, ezin besoak gurutzaturik geratu. Beste ezeren gainetik, gaur eta hemen premiazkoa da ondorio latzak izaten ari den eskalada belikoa gelditzea, bakea, justizia eta itxaropenezko etorkizuna eskaintzea”.
☉ Usansolo
Patri Espinar usansolotarra entrenatzaile, Euskal Pilota Selekzioak zazpi domina irabazi ditu Munduko Wallball Txapelketan
Besteak beste, urrea irabazi dute banakako emakumezkoetan eta bikote mistoetan, eta zilarra banakako emakumezkoetan eta bikote emakumezkoetan
Wallball-eko Munduko Txapelketa jokatu du Euskal Pilota Selekzioak Herbehereetan, Leeuwarden hirian, abuztuaren 27tik 30era bitartean.
Eta, Euskadiko Euskal Pilota Federakuntzatik (EEPF) adierazi dutenez, txapelketako azken jardunaldiak berretsi du Euskal Pilota Selekzioaren “lorpen historikoa”.
Euskal Selekzioko pilotariek guztira zazpi domina irabazi dituzte jokatu dituzten bost finaletan: urrezko lau eta zilarrezko hiru.
“Euskadiko Euskal Pilota Federazioak gure pilotari guztiak zoriondu nahi ditu, baita lan bikaina egin duten teknikariak ere”, adierazi dute. Patri Espinar usansolotarra emakumezkoen hautatzaile izan da.
Zaratamoko Gutiolo eta Urdinbide auzoetan aste bi daramatzate edateko urik gabe
La Basconiako nabeak gertutik bisitatzeko aukera izango dute herritarrek Ondarearen Europako Jardunaldien barruan, Basaurin
Arrigorriagarren laguntza eskatu dute Adikzioen Prebentziorako Tokiko Plana egiteko
Argazkiak | Kuadrillen arteko XIX. Olinpiadak San Migeleko jaietan: tranpak, algarak eta… larrugorritan!
Argazkiak | Playback lehiaketak giro aparta sortu du San Migeleko jaietan
