Galdakao-Usansolo ospitaleko aparkalekua handituko du Eusko Jaurlaritzak.

Lanak 2026an hastea aurreikusi dute, “2028an plaza berriak izateko helburuarekin”: “Jarduketa azterketa teknikoekin eta obra-azterketekin hasiko da”, esan du gaur goizean Alberto Martinez Osasun arloko sailburuak.

Aparkaleku berriak ospitalearen inguruko titulartasun publikoko partzeletan eraikiko dituzte, eta partzeletako bat Osakidetzaren jabetzakoa da.

Gainera, sailburuak adierazi du ez dutela baztertzen bigarren eremu batean esku hartzeko aukera.

“Ospitaleetako beste obra handi batzuetan jasotako esperientziak erakutsi digu oso garrantzitsua dela zuhurtasunez planifikatzea, prozesu osoan irisgarritasuna bermatzeko”, esan du Martinezek.

Osasun Sailak 1,6 milioi euro bideratuko ditu aparkalua handitzeko.

Eraikin berri bat, aparkaleku gehiagorekin

Ospitaleko aparkalekua handitu ondoren, Galdakao-Usansolo ospitaleko Kanpo Kontsulten eraikin berriaren eraikuntza hasiko du Eusko Jaurlaritzak.

Duela bi urte iragarri zuen Osakidetzak Kanpo Kontsultetarako eraikin berria.

Orduan aurkeztu zuten proiektuaren arabera, heliportuaren eta Larrialdi zerbitzuan ondoan eraikiko dute, 58.000 metro karratuko azalera izango du eta bederatzi solairu izango ditu: lau solairu lurrazalean eta bost lurrazpian 1.129 aparkalekurekin.

Orduan adierazi zuten inbertsioa 93 milioi eurokoa izango zela, baina gaur 136 milioi euroko inbertsioa izango dela esan du Martinez sailburuak.

Usansoloko metro geltokiari buruzko eztabaida egon da gaur goizean Gernikako Batzar Nagusietan.

EH Bilduk mozioa aurkeztu du, besteak beste, Bizkaiko Foru Aldundiaren eta Geltokia Erdigunean plataformaren arteko lankidetza-esparru bat ezartzeko.

“Plataformaren eta erakunde eskudunen arteko zubiak erraztu eta sortu behar direla uste dugu, egungo egoeraren diagnostikoa egin ahal izateko eta neurri zehatzak eta komunak ezarri ahal izateko”, adierazi du gaurko osoko bilkuran Raul Mendez Urigoitia EH Bilduko bozeramaileak.

Mendezek urriaren 5ean Geltokia Erdigunean plataformak Usansolon antolatu zuen galdeketa izan du oinarri bere hitzaldian: “Kontsulta hori legez loteslea ez izan arren, horrelako ekimenek garrantzia sozial eta politikoa dutela uste dugu. Ezin dugu alde batera utzi sakoneko arazo baten aurrean gaudela eta ezin diogula pasatzen utzi irtenbide bat emateko. Uste dugu Aldundiak herritarren parte hartze prozesuak sustatu beharko lituzkeela Usansoloko geltoki berriari buruzko erabakietan. Erabakiak ezin ditugu irizpide teknikoetan bakarrik utzi, irizpide teknikoek beraiek adierazi dutenean alternatibak egingarriak direla, eta horri buruzko erabaki politiko bat hartzea dagokigula”, esan du Mendezek.

Elkarrekin Podemoseko ordezkariak hitza hartu duenean // Utzitakoa

Richar Vaquero Moreno Elkarrekin Bizkaiko bozeramaileak babesa eman dio EH Bilduren moziari: “Usansolon egin dena ez litzateke salbuespena izan behar, araua izan beharko litzateke: erabaki estrategikoak hartu aurretik herritarrei galdetzea, hain zuzen”.

PPko ordezkari den Pablo Gomez-Guadalupe Garcia-Tejedorrek adierazi du alderdi popularra Usansoloko erdigunean geltoki bat egitearen alde dagoela: “Ez gaude irtenbide periferiko baten alde, herritarrak kanpoaldera mugitzera behartzen dituena metrora sartu ahal izateko”. Aldundia eta Eusko Jaurlaritza “ez entzunarena egiten” ari direla esan du, baina abstentziora jo dute: “Ezin dugu inolako oinarri juridikorik gabe egiten den kontsulta batean oinarritzen den mozio bat babestu”, esan du Gomez-Guadalupek.

EH Bilduren eta Elkarrekin Podemosek aldeko botoekin eta PPren abstentziorekin ez da nahikoa izan mozioa onartzeko. Izan ere, EAJk eta PSEk koordinazio mahai hori sortzearen kontra bozkatu dute.

Alderdi jeltzaleko Irene Edesa Gomez batzarkideak adierazi duenez, “EH Bilduk hausnarketa bat egin behar du: ekuaziotik kendu ditu bi eragile garrantzitsu: ETS eta Usansoloko Udala. Usansolo Galdakaoko parte zenean, Galdakaoko Udalak berak, EH Bilduren gidaritzapean, eskatu zion ETSri Usansoloko geltokia ospitaletik ahalik eta gertuen egon zedin”.

“Gaur ere berriro esango dugu: Usansoloko Udalak lan egin beharko luke ETSrekin batera, herrirako konexio formularik onenak bilatzeko”, esan du Edesak. Hain zuzen ere, jeltzaleak adierazi duen moduan, ETSk erabakitzen du geltokiak non jarri, “eta ez Aldundiak”.

Eta, EH Bilduko bozeramaileak erantzun dio: “Usansoloko Udalak askotan esan du zein den bere jarrera: geltokiak erdigunean egon behar duela. Eta guk eskatzen duguna da Aldundiak gainerako erakundeekin trakzionatzea”.

Ignacio Jeronimo Moreno PSEko ordezkariak “beharrak eta itxaropenak desberdinak” direla esan du bere agerraldian, eta beharrak “beteta” daudela adierazi du: “Alder sozialistan ez gaude itxaropen faltsuak sortzeko, beharrak kalitatez betetzeko eta jendearen kezkei irtenbideak bilatzeko gaude. Eta zorroztasun- eta erantzukizun-irizpideak jarraitu ditugu, errentagarritasun sozial eta ekonomikoan eta irizpide teknikoetan oinarrituta, komenigarriena denari dagokionez”.

Usansoloko ikasle talde batek salatu duenez, Galdakaoko Elexalde Institutura joateko autobus-zerbitzurik gabe daude ikasturte hasieratik, GEURIAn aurreratu bezala.

Zehazki, zortzi dira autobus-zerbitzurik gabe geratu diren ikasleak, euren bizilekuaren eta ikastetxearen artean lau kilometro baino gutxiago daudelako, eta autobusean lekurik ez dagoelako.

Irizpide hori Eusko Jaurlaritzak jarri du, eta horregatik irailetik oinez egin behar dute ibilbidea. Ikasleek salatu dutenez, bidea ez da segurua eta autobusa aldarrikatu dute.

Jaurlaritzatik adierazi dutenez, Usansoloko ikasle horiek eskola-garraioa izango dute “laster, egun gutxiren buruan”.

Elexaldeko DBHko 4. mailako zortzi ikasle, Usansolokoak, institutura joateko autobus zerbitzurik gabe geratu direla salatu dute.

“Ez dagoenez eserleku nahikoa denontzat autobusean, institututik 4 kilometro baino gutxiagora bizi garen Usansoloko zortzi ikasle garraio zerbitzurik gabe geratu gara”, adierazi dute sare sozialetan.

Hain zuzen ere, Eusko Jaurlaritzaren arabera, ikastetxea bizilekutik lau kilometrora edo gehiagora duten ikasleek erabil dezakete autobus zerbitzua.

Oinez joateko erabili behar duten biderik zuzenena segurua ez dela esan dute: “Gorosibaikoentzat errepide bazterra da biderik zuzenena institutura joateko, baina ez da segurua ez dagoelako espaloirik eta ibilgailu, kamioi eta autobus asko igariotzen direlako. Orduan, Bekeatik joan behar dugu”, diote. Eta ibilbide hori lau kilometro baino gehiagokoa dela adierazi dute.

 

Ver esta publicación en Instagram

 

Una publicación compartida de Buzkentza (@buzkentza_oficial)

Usansoloko ikasleekiko elkartasuna adierazteko, ikasle talde batek oinez egin du bidea Elexaldeko Instituturaino: 08:10ean atera dira oinez tren geltokiaren ondotik eta 09:10ean heldu dira.

Palestinaren aldeko greba eguna izan da gaurkoa Hego Euskal Herrian. Lanuzteak deitu dituzte lantoki eta ikastetxetxeetan, eta manifestazioa jendetsua egin da eguerdian Bilboko kaleetan zehar.

Arratsalderako, ostera, kontzentrazioak egin dira herri gehienetan, baita Hego Uriben ere. Usansoloren kasuan, “Genozidioari Stop, Palestinarekin konpromisoa” lelopean batu dira herritarrak.

“Israeli zilegitasuna kentzea eta mendebaldeko estatuen interesen kontra egitea da gure ekarpenik onena palestinarrek indar-harreman hobea izan dezaten erabakiak hartu ahal izateko”, azaldu dute Palestinarekin Elkartasunatik.

“Horregatik atera ginen hamarnaka milaka pertsona Iruñean joan den urriaren 4ean palestinar erresistentzia babestu eta sionismoa suntsitu behar dela aldarrikatzeko eta horregatik aterako gara urriaren 15ean palestinarren aldarri historikoekin”.