☉ Zaratamo
Izaskun Soto: «Herriko espazioak pertsonen eguneroko jarduerak errazteko pentsatu behar ditugu»
Lurralde “burujabeago eta bizigarriago” baten alde lan egiten du Izaskun Soto arkitekto zaratamarrak, eta ikuspegi hori zelan lantzen duten azaldu digu
Hirigintzari eta herrien antolamenduari lotutako gaiak herritarrei helaraztea ez da erraza. Ikusten ditugu etxebizitzak, errepideak, parkeak, zerbitzuak etabar, baina kosta egiten zaigu horren atzean dagoen antolaketa ulertzea, eta gure bizitzetan duen eraginaz ohartzea. Izaskun Soto Lopez (Zaratamo, 1995) arkitektoa da ikasketaz, eta Hiritik At estudioan egiten du lan.
“Lurralde burujabeagoa eta bizigarriagoa lortzea” dute helburu, eta hari horretatik tiraka aritu gara berarekin hirigintza inklusiboaz eta feministaz, edota Hego Uribeko herrien egungo errealitate urbanistikoaz. Marko teorikoetaz harago, hainbat adibide praktiko ere aipatu dizkigu Sotok, Zaratamori begira proposamen zehatzak luzatuz: “hiriek eta herriek denontzako zerbait eskaintzeko gaitasuna izango dute, soilik denontzako diseinatzen direnean”. Bere egiten dituen hitzak dira, Jane Jacobsenak izan arren.
Izaskun Soto // Geuria
Zelan daude antolatuta egun gure eskualdeko herriak(Kontutan hartuta errealitate ezberdinak daudela, hala-nola Zaratamo edo Arrigorriaga, kasurako)? Hirigintzak edo hiri antolamenduak planifikazio-tresna ezberdinen bitartez etxebizitzak non eraikiko diren, plazak eta parkeak non sortuko diren eta eskola, osasun-zentroa edo kiroldegia bezalako zerbitzuak non kokatuko diren erabakitzen du.
Eta beste eskala zehatzago batean, zuhaitza, bankua edo iturria non jarri. Herriaren diseinu horrek gure eguneroko bizitza baldintzatuko du; horren arabera mugituko garelako gure herrietan zehar. Esate baterako, Arrigorriagako osasun-zentroa herri erdian dago, horrek ahalbidetzen du jende asko oinez hurbildu ahal izatea, jarraian erosketak egin ahal izatea, kiroldegira joatea, eta bidean auzokideekin topo egitea. Aldiz, institutua dagoen lekuan egongo balitz, berdin jokatuko genuke? Berdin mugituko ginateke? Ziurrenik jende gehiago hurbilduko litzateke kotxean, eta behin kotxean egonda, erosketak egiteko aprobetxatuko luke bidaia. Eta agian, herritik kanpo. Hipotesiak dira, baina argi dago herriaren antolamenduak eragina duela gure egunerokoan.
Zentzu horretan, zein da Hiritik at-en egiten duzuen lana, eta ze ikuspegirekin? Lurraldegintzan dihardugu. Lurraldea eskala ezberdinetan antolatzeko prozesu eta estrategiak garatzen ditugu. Prozesu horietan herritarrak edo erbiltzaileak dira protagonista, eta elkar-sorkuntza espazioen bidez beharrak eta erronkak identifikatzen ditugu.
Lurralde burujabeagoa eta bizigarriagoa lortzea dugu helburu, ahal dela lankidetza publiko-komunitario-kooperatiboaren bidez. Prozesu horien adibideak izan daitezke, herriko espazio ezberdinen (eskolako jolastokien, plazen…) berrantolaketarako oinarriak zehaztea, mugikortasuna edo etxebizitza gaiak ikertzea, auzo planak diseinatzea…
Badaude denontzat ulergarriak diren eta egun maiz erabiltzen diren lelo edo helburuak: ibilgailuei lekua kendu, oinezkoei emateko, adibidez. Posible da egun hori egitea gure herrietan? Zelan? Posiblea bada, baina ez gaude prest. Ez gaude prest ibilgailua gutxiago erabiltzeko. Ez gaude prest gure etxe ondoan ez aparkatzeko. Esku-hartzeak egin izan dira eta hori positiboa da. Urteak dira Arrigorriagan edo Basaurin kaleak oinezkotu zituztela. Arkotxan ere oinezkoen mugikortasuna hobetzeko esku-hartzeak egin dira.
Niretzat, esaterako, oso positiboa litzateke umeak Zaratamoko eskolara autobusean, oinez, bizikletan edo patinetean soilik iritsi ahal izatea; eta horretarako eskolako sarrera eta irteera orduetan eskola eremuan kotxeak debekatuta egotea. Kontziente naiz pertsona batzuei umeak eskolara kotxean eramateak gero lanera zuzenean joatea erraztu diezaiekela, baina espazioak zaindu behar dira; eta gaur egun, eskola eremua goizeko 9.00etan eta arratsaldeko 16.15etan ez da espazio segurua haurrentzat, kotxeetan pilatzen garelako.
Horrez gain, plazatik eskolara joateko bidea ez da aproposa, ez baitago oinezkoentzako bide seguru jarrairik, eta ez da irisgarria. Espaloi jarrai horrek, umeek eskolara bidea oinez edo bizikletan egitea ahalbidetzeaz gain, edozein herritar erraz mugitzea ahalbidetuko luke: gurpildun aulkiak, umeen orgak, mugikortasun urria duten pertsonak… Hain zuzen ere, kontu hauek eta gehiago zehazten ditu hiri antolamenduak. Eta antolamenduak gure ohiturak baldintzatzen ditu. Hala ere, horrek ez du esan nahi gure hautu propioak hartzeko gaitasuna ez dugunik.
Izaskun Soto // Geuria
Aipatu ditugun elementu horietaz aparte zertan hezurmamitzen da hirigintza inklusiboa? Eta zelan txertatu hor ikuspegi feminista? Urteetan zehar hirien eraikuntzan gainjartzen joan diren hirigintza-paradigma ezberdinak ikuspegi androzentrikotik egin dira, gizon zuri produktibo kotxedunaren ikuspegitik, alegia. Hiri handiak funtzioaren arabera antolatu dira, eta non erosi, non ikasi, non bizi eta non lan egin arautu dute. Hirigintza funtzionalistaren aurrean, hirigintza feministak eguneroko bizitza hiriko erabakien erdigunean jartzea du helburu. Herriko espazioak pertsonen eguneroko jarduerak errazteko pentsatzea eta diseinatzea da erronka, zaintzei eta harreman komunitarioei atentzio berezia jarriz. Jane Jacobs da, bere The Death and Life of Great American Cities (1961) lanean, hiriarekiko begirada unibertsal eta homogeneoarekin kritikoa izan zen lehenengotarikoa. Hiriaren ulermenerako egunerokotasunaren begiradaren garrantzia aldarrikatu zuen, eta funtzio ezberdinen hurbiltasunaren eta nahasketaren garrantzia ere bai.
Liburuan aipatzen duen bezala, hiriek denontzako zerbait eskaintzeko gaitasuna izango dute, soilik denontzako diseinatzen direnean. Horretan oinarrituta, hamarkada batzuk beranduago, hirigintza feminista bezala ezagutzen dugun mugimenduak ere mahai gaineratzen du gure hiriak bizigarriagoak direla, gizartearen aniztasuna kontuan hartzen denean.
Ze eragin izango du aldaketa klimatikoak egungo hirien antolamenduan? Bagaude prest? Nik galdera alderantziz egingo nuke lehenik: ze eragin izan du hirien antolamenduak aldaketa klimatikoan? Zenbat eraiki dugu? Nola? Zer ekarri digu horrek? Eta orain zure galderari erantzunez, esatea ni ez naizela gai honetan aditua, eta badaudela aldaketa klimatikoa hirietan espezifikoki lantzen dutenak.
Hala ere, ingurura begiratuta (beharbada Zaratamon ez horrenbeste) ikus dezakegu gure herrietako zer azalera dagoen asfaltua eta zer asfaltatu gabe, zein den iragazkorra eta zein iragazgaitza. Horrek eragina du uraren zikloan, ura berreskuratzeko erraztasunean, edota tenperatura altuko egunetan sentitzen dugun beroan, esaterako. Egokituz joan beharko gara.
Izaskun Soto // Geuria
Herri handien beharrez aritu gara, baina Zaratamo bezalako herri txiki baten beharrak ezberdinak izango dira, ezta? Zeintzuk dira? Herriak, herri txikiak, izan daitezke utopia hori, non komunitateak funtzionatzen duen; bizilaguna, dendaria,… ezagunak diren, eta zaintza-sarea propio existitzen den; zerbitzu minimoak dauden eta oinez mugitu gaitezkeen; naturarekin harreman zuzenagoa dugun, beharbada ortuaren bitartez; baina orturik ez duenak ere hurbilago dituen eremu naturalak, eremu urbanizatua eta naturala ez daudelako horren bereizita…
Zaratamok badu berez funtzionatzen duen komunitatea, eta zaintza-sarea propio existitzen dela esango nuke, izan ere, gehienok ezagutzen dugu elkar. Hala ere, Zaratamon errealitate ezberdinak daude, eta ezin dut orokorrean hitz egin: Arkotxa auzoak, Moiordinek, Elexaldeko herriguneak, edo landa eremuko auzoek dituzten beharrak oso ezberdinak dira.
Moiordineko bizilagunak oinez joan daitezke Arrigorriagara, eta Arrigorriaga bada oinarrizko zerbitzuak dituen herria, bertakoek bi herrien arteko konexioan jarriko dute arreta ziurrenik.
Arkotxako auzoan bertan baduzu fruta non erosi, edo haragia, ileapaindegira joan zaitezke, medikuarenera zein farmaziara, baina zenbat denbora behar du adineko pertsona batek ibilbide hori egiteko? Erosoa al da auzokideentzako?
Elexaldeko herriguneak bere xarma dauka eta herri bizitza dago bertan, eskolaren bueltan antolatzen diren familiek sortzen dutena askotan, baina era berean, kotxe-dependienteak gara askotan, denda bat egoteak hori aldatuko luke?
Landa eremuko auzoetan bizi direnek ere kotxea hartu behar dute ia edozertarako, herriko plazara jeisteko, adibidez, eta eurentzat garrantzitsua izango da bideak garbi eta ondo egotea.
☉ Zaratamo
Zaratamon lantegia duen Pekos enpresako langileek greba egingo dute lan-hitzarmen berria aldarrikatzeko
ELA sindikatuaren arabera, PekosGroupeko enpresak “onura handiak” izan ditu azken urteetan “baina horiek, ordea, ez dira neurri berean islatu langileen soldatetan”. Gaurtik hasita urriaren 8ra bitartean egingo dute greba
Pekos Fabricacion enpresako Zaratamo eta Arteako langileek greba hasiko dute gaurtik urriaren 8ra arte. “Grebaren helburua da irabazi handiak dituen enpresa batean soldata igoera nabarmenak ekarriko dituen hitzarmena adostea”, azaldu dute ELA sindikatutik.
Pekos Fabricacion balbulak sortzen dituen PekosGroup taldeko enpresa da. Bizkaian lantoki bi ditu: Zaratamon eta Artean. Guztira 80 pertsonek egiten dute lan bertan eta ELAren arabera “onura handiak” izan ditu azken urteetan: “Onura horiek, ordea, ez dira neurri berean islatu langileen soldatetan”.
Horiek horrrela, urte hasieran negoziazioak hasi zituen enpresako zuzendaritzarekin aurreneko enpresa hitzarmena adosteko: “Hitzarmen horrek soldata igoera garrantzitsuak eta lanaldi murrizketekin, eskubide sozialen hobekuntzekin, baimenen eta lizentzien hobekuntzekin eta prekarietatearen aurkako neurriekin lotutako beste hobekuntza batzuk jasoko lituzke”, zehaztu dute sindikatutik.
Aurten hainbat bilera egin dituzte sindikatuko ordezkariek enpresa zuzendaritzarekin eta azken hauek “soldaten hobekuntza eskasa” negoziatu izan duela azaldu dute ELAtik. “Ondorioz, ELAk greba deitu du urriaren 6, 7 eta 8rako, plantillaren lan baldintzetan hobekuntza nabarmenak ekarriko dituen hitzarmen bat adosteko”.
☉ Zaratamo
Zaratamoko Gutiolo eta Urdinbide auzoetan aste bi daramatzate edateko urik gabe
Zaratamo eta Usansoloko Udalek Ur hornidura sistema berria ipiniko dute Lekuetik Urdinbide eta Gutioloraino. Aurrekontua 1,3 milioi eurokoa da eta eman beharreko hurrengo urratsa Udaletako ordezkariek proiektu horri forma ematea da
Zaratamoko Gutiolo eta Urdinbide auzoetako bizilagunak joan den irailaren 19tik daude edateko urik gabe. “Txorrotako ura ezin da erabili. Ez edateko ezta sukaldatzeko”, horrela dio Iciarren etxetik metro batzura kokatuta dauden postontzietan ipini duen kartel batek.
“Aste bi daramatzagu ur edangarririk gabe Gutiolon”, azaldu du Iciarrek. Arazoak dirauen bitartean, Ur Partzuergoko kamioi batek zortzi litroko botila edo txanbil bi eramaten dizkie bi auzoetako bizilagunei, eguneroko beharrizanei aurre egin ahal izateko.
“Txorrotako ura ezin dugu edan edo sukaldatzeko zein fruta garbitzeko erabili”, gehitu du Gutioloko auzotarrak. Uraren kalitatearen zergatia aztertu arte iraungo du ez edatearen debekuak. Hala azaldu dute Zaratamoko Udaletik.
Arazoa ez da berria, auzotarren eta udal ordezkarien arabera: “Orain arte, arazoak egon direnean Udalera deitu dugu eta Udala Ur Partzuergoarekin harremanetan ipini ohi izan da. Irtenbiderik aurkitu izan ez denez, Gutioloko auzotar batek Bizkaiko Foru Aldundira deitu eta egun berean Foru Aldundiko zein Osasun saileko ordezkariak agertu ziren auzoan. Ordutik botiletan ekarritako ur hau edaten ari gara”, dio Gutiolokoak zortzi litroko botila bat erakutsiz.
“Irtenbiderik aurkitu izan ez denez, Gutioloko auzotar batek Bizkaiko Foru Aldundira deitu eta egun berean Foru Aldundiko eta Osasun saileko ordezkariak agertu ziren auzoan”
Aurreko urteetan, behin baino gehiagotan, ura uherra iristsi izan da etxeko txorrotara baina Partzuergoko ordezkariek “ezer gutxi” egin dutela dio Iciarrek. Udalak GEURIAri azaldu lez, lau urte daramatza arazo honen konponbidearen bila. Izan ere, Otzagarain airean dagoen ur biltegi bat dago, eta bertatik irteten da Gutiolo eta Urdinbide auzoak eta baita Arteta hornitzen dituen ur sistema.
Udalak Gutiolo eta Urdinbiden ipini dituen informazio-kartelak // Geuria
“Lau urte daramatzagu gur egungo ur hornidura sistema aldatzeko prozesuan”, azaldu du Alberto Ugarriza Zaratamoko alkateak. “Ur hornidurak arazoak ematen ditu urtero: ez da edangarria, zikin heltzen da etxera, behin baino gehiagotan egin izan diren analisi mikrobiologikoen emaitzak ez dira egokiak izan…”.
Zaratamoko Udala: “Ur hornidurak arazoak ematen ditu urtero: ez da edangarria, zikin heltzen da etxera, behin baino gehiagotan egin izan diren analisi mikrobiologikoen emaitzak ez dira egokiak izan…”
Azken bilera joan den irailaren 23an deitu zuen Osasun sailak. Bertan Zaratamoko eta Usansoloko udal ordezkariek eta Bizkaiko Ur Partzuergoko arduradunek hartu zuten parte. “Duela hiru urte konpromiso batzuk hartu zituen Zaratamoko Udalak kontu honetan Galdakaoko udal ordezkariekin batera, ur horniduraren sistemari azpiegitura berri bat egiteko helburuarekin”, azaldu du Zaratamoko alkateak.
Usansolotik Zaratamora
“Ur Partzuergoak hiru proposamen egin zituen 2022ko bilera hartan eta Zaratamo zein Galdakaoko Udaletako ordezkariek horietako bat aukeratu genuen. Orain exekuzio proiektu hura diseinatzen egon dira eta Ur Partzuergoko ordezkariek joan den maiatzean aurkeztu zuten. Baina, jakina denez, proiektu honetan Usansolo dago Galdakao beharrean”, argitu du Ugarrizak.
Martxan ipini beharreko proiektu berri honek gaur egungo sistema prekarioa gainditu beharko lukeela adierazi du Zaratamoko alkateak: “Proiektu berri honen ondorioz, uraren hornidura sarea Ur partzuergoarena izango litzateke % 100ean eta ibilbidea honakoa litzateke: Usansoloko Lekue partetik Artetara joango litzateke ura eta bertatik Zaratamoko Otzagaraira helduko litzateke hodi baten eta ur-ponpa sistema baten bidez. Bertan biltegi berria ipiniko lukete eta biltegi horretatik iritsiko litzateke ura Urdinbide eta Gutiolo auzoetara”.
“Proiektu berri honen ondorioz, uraren hornidura sarea Ur partzuergoarena izango litzateke % 100ean”
Ur hornidura sistema berriaren aurrekontua 1,3 milioi eurokoa da (1.343.751 euro, zehazki, BEZa barne). “Eman beharreko hurrengo urratsa hauxe da: Usansolo eta Zaratamoko ordezkariok proiektu horri forma ematea. Obra handia baino luzeera handiko kontua da. Azken batean, hodia errepide ondotik ipintzea da asmoa biltegietara heltzeko, eta bertatik herriko auzoetara”.
☉ Zaratamo
Mikel Atxa zaratamarrak Euskadiko ur-azpiko arrantza txapelketa irabazi du
Irailean, joan den asteburuan, motokroseko Mundu mailako txapelketan hartu zuen parte Atxak Hispanian, Agilar de Camponen eta sentsazio oso onekin itzuli da etxera
Zaratamokoak Kobaronen antolatutako Euskadiko ur-azpiko Arrantza Txapelketa irabazi du, joan den irailaren 6an.
‘Kobarongo basamortua’ bezala ezagutua, Atxak hiru ordu eman zituen bertan arrantzan.
“Zonalde bereziki zaila da arrantza egiteko, arrain gutxi baitago bertan”, azaldu du Zaratamokoak. “Harrapa zitezkeen Korrokoi guztiak hartu nituen, baita hiru musarra, aker bat eta baita krabarroka bat ere”.
Motorrean ere, fin
Mikelek txapelketa ugaritan hartu du parte azken hilabeteetan. Izan ere, joan den apirilean Ourenseko A Peroxan antolatutako ‘Hard Enduro A Peroxa’ Txapelketan hartu zuen parte: “Txapelketa zoragarria izan zen eta Espainiako Txapelketako bost lasterketa egin zituzten bertan”. Yamaha YZ125 kros motor batekin lehiatu zen Zaratamokoa: “Gainontzekoekin alderatuta maila baxukoa izan zen, enduro motako 300cc-koekin aritu zirelako. Baina tira, lehenengo egunean “fin” aritu nintzen. Bigarrenean hutsegite batzuk izan nituen baina hala ere Junior kategoriako hirugarren postua eskuratu nuen”.
Mikel, Zaratamon // Geuria
Irailean, joan den asteburuan, Mundu mailako txapelketan hartu zuen parte Atxak Hispanian, Agilar de Campónen (Palentzia): “Azken lasterketa hau askoz garrantzitsuagoa izan zen, munduko motor-gidari onenekin”. Txapelketa honetan Yamaha YZ 250cc batekin batekin lehiatu da eta bere burua “eroso” ikusi duela azaldu dio GEURIAri. “Kronoan hirugarren parrillan irten nintzen eta 29. postua eskuratu nuen eta 5. postua Junior kategorian”.
Zaratamoko motozaleak azaldu du zonalde harritsua eta gune zail ugarikoa izan dela: “Zorionez, ura emanda bazegoen ere, ez zen lokatzik egon eta lasterketa polita egin nuen”.
Duela urte bi elkarrizketa egin genion Atxari Zaratamon. Hemen irakur dezakezu.
☉ Zaratamo
Argazkiak | Mikel Urrutikoetxea zaratamarrak azken esku pilota partida hunkigarria jokatu du Bizkaia frontoian
Gaurko behin betiko agurrean momentu hunkigarriak utzi ditu Zaratamokoak Bizkaia frontoian: senide eta lagunen maitasuna, zaleen berotasuna eta beste hainbeste sorpresa bizi izan dira bertan
Mikel Urrutikoetxea zaratamarrak azken partida jokatu du esku pilotari profesional lez, Bilboko Bizkaia frontoian.
Urte asko izan dira eta bidean oztopo ugariri aurre egin die Zaratamoko pilotariak: entrenamendu saio ugari, txapelketa garrantzitsu asko… eta baita Urrutikoetxearen bizitzan eragin handia izan duten egoera pertsonal latzak ere.
“Arin batean, ibilbide polit honekin harro nagoela esango nuke”, laburbildu zuen Urrutikoetxeak bere ibilbide profesionalaren amaiera iragarri zuenean, joan den martxoan. “Baina dena ez da beti hain polita izaten. Momentu txarrak ere bizi izan ditut”. Gaurkoan, ostera, momentu politak ekarri ditu Bizkaia frontoira: senide eta lagunen maitasuna, zaleen berotasuna eta beste hainbeste sorpresa.
Martxoan aurreratu lez, “zuriz jantzitako azken partida” izan da, eta ikuskizun paregabea utzi du Zaratamokoak pilotalekuan. Bere argazkia beste pilotari zaratamar batenaren ondoan eskegi dute Bizkaia Frontoiaren sarreran: Danel Elezkanorenarekin, hain zuzen ere.
Horra hor GEURIAk egindako argazki erreportajea.
☉ Zaratamo
Arkotxako segurtasuna bermatzeko helburuei helduko die Zaratamoko Udalak irailean
Udako oporretatik bueltan, Zaratamoko Udalak joan den ekainean planteatutako lan lerroak martxan jarriko ditu auzoko bizikidetza arazoei irtenbidea eman ahal izateko
Zaratamoko Arkotxa auzoan azken hilabetean izan diren bizikidetza arazoak direla eta, Udalak azaldu du uda baino lehen iragarritako lau lan lerroak martxan ipiniko dituela.
“Alde batetik, elkarlana berrartuko dugu Ertzaintzarekin”, azaldu du Alberto Ugarriza herriko alkateak. “Udatik bueltan programa bat ipiniko dute martxan ekintza deliktiboak saihesteko. Programa hori beste herri batzuetan garatu dute, emaitza nahiko positiboekin”.
Bigarren lan lerroari dagokionez, Galdakaoko Gizarte Zerbitzuetako migrazio teknikariekin harremanetan jarri ziren Zaratamoko udal ordezkariak, eta hilabete honetan bi udalerrien arteko elkarlan bat abiaraziko zutela adostu zuten, kronograma baten jarraipenarekin, nabeetan bizi diren pertsonak integratzea xede.
Hirugarren lan lerroa hirigintzaren ingurukoa da, egoerari irtenbidea emateko: “Arkotxako nabe horien jabeei 2019tik lursailak mantentzeko eskaera egin zien Udalak. Enpresek ez dute jaramonik egin eta joan den uztailean salaketa ipini zuen Zaratamoko Udalak Eusko Jaurlaritzako Ingurumen eta Osasun sailetan”. Ingurumen sailak interbentzioa hasi du dagoeneko eta enpresari errekerimenduak egin dizkio: “Zaratamoko Udalak aurkeztutako txostenekin ingurumen delitu aukerak egon daitezke eta Ingurumen sailak esku hartzeko aukera izango luke”.
Pertsonak bizi diren nabeen inguruak, Arkotxan // Geuria
Sutea, abuztuan
Tartean, joan den abuztuaren 7an sute bat egon zen Arkotxako 4. zenbakian: “Bertan behera utzitako eta hustutako eraikin batean izan da sutea”, azaldu dute Bizkaia Suhiltzaileen ordezkariek joan den irailaren 2an Zaratamoko Udalera helaraziko txosten batean. “Barruan etxerik gabeko pertsonak bizi dira. Aurreko batean bertan izandakoak gara eta barrualdea oso egoera txarrean dago, benetan arriskutsuak diren azpiko maila baterako jauziekin. Benetan arriskutsua bertan diren pertsonentzat zein bertatik igaro daitekeen edonorentzat”. Txostenaren amaieran suhiltzaileek lursailen jabeek “dagozkion neurriak hartzea” eskatzen dute, balizko kalteak saihesteko.
Laugarren lan lerroa EAJk planteatu zuen. Helburua batzorde bat sortzea da, Arkotxako egoerari buruzko diagnostikoa eta irtenbideak planteatzeko. Batzordean alderdi politikoek zein udan zehar sortutako auzo elkarteak parte hartuko lukete.
Udako oporrak igarota, Zaratamoko Udaletik “urratsak ematen arin direla” azaldu dute. “Ez da gertaera berezirik gertatu datu objektiboei begira, baina auzoko segurtasun faltaren sentsazioa hor dago”. Segurtasun faltaren sentsazio horri buelta ematea zaila izango dela azpimarratu du Zaratamoko alkateak eta horretarako denbora beharko dela gehitu du: “Hartu ditugun ildo horietatik jarraituz gero lortuko dugu arazoa bideratzea”.
Zaratamon lantegia duen Pekos enpresako langileek greba egingo dute lan-hitzarmen berria aldarrikatzeko
Usansolo erdigunerako geltoki propioa aldarrikatu dute galdeketan parte hartu duten herritarren % 94,7ak
Argazkiak | Galdeketa Usansolon: zein tren-konexio nahi duten bozkatzen ari dira herritarrak
Argazkiak | Galdeketa Usansolon: zein tren-konexio nahi duten bozkatzen ari dira herritarrak
Argazkiak | Kuadrillen arteko XIX. Olinpiadak San Migeleko jaietan: tranpak, algarak eta… larrugorritan!
Argazkiak | Playback lehiaketak giro aparta sortu du San Migeleko jaietan
Usansolo erdigunerako geltoki propioa aldarrikatu dute galdeketan parte hartu duten herritarren % 94,7ak
Bideoa | Jon Atxutegi, Geltokia Erdigunean plataforma: “Oso pozik gaude herritarren erantzunarekin”
