Sareak

☉ Zeberio

Txema Añibarro: «Polita izango litzateke Zeberion neska-mutilen futbol taldea osatzea»

Txikitan herrian futbolean hasi zenetik, ibilbide profesional luzea egin du Txema Añibarro zeberioztarrak.
SD Eibarrekin Lehen Mailan jokatzeaz gain, azken urteotan Athletic-eko gazteen entrenatzaile ibili da.

|

Bizkaiko herriak turismoa egiten baino futbolarekin ezagutu dituela dio Txema Añibarro (Zeberio, 1979) futbolari eta entrenatzaile izandakoak. Nork esango zion Zeberion baloiari ostikoka ibiltzen zen umeari, 20 urtetik gorako ibilbidearen ondoren, Espainiako Lehen Mailan jokatzera helduko zela SD Eibarrekin. Añibarrok 2015eko udan utzi zion jokatzeari, baina, halere, futbolari lotuta jarraitu du orain arte, Athleticeko kategoria txikietan entrenatzaile ibili ondoren. Herrian emandako lehen pausoez, egun futbola ulertzeko dagoen moduaz eta etorkizunerako dituen asmoez hitz egin dugu zeberioztarrarekin.

Zure ibilbidean hainbat futbol taldetatik pasatu zara (Padura, Gernika, Sestao, Eibar). Baina, zelaietatik kanpo, noiz hartu zenuen baloia lehen aldiz?
Herrian txikitatik ibiltzen nintzen baloiarekin. Zeberion futbito taldea egoten zen, eta herriko jendeak jokatzen zuen bertan: polita zen herri mailan horrelako talde bat izatea. Oroitzen naiz frontoian ibiltzen nintzela pilotarekin, eta lagunekin ere bai, eskolan. Futbol taldekoek aste barruan entrenatzen zutenean ere, gazteok haiekin jolasten genuen. Egia esan, txikitatik, futbola baino baloia izan dut buruan, eta hanketan. Denbora guztian.

Familian ez duzu futbolera dedikatu den inor izan?
Anaiak ere gaztetan Zeberion jokatzen zuen futbolera, baina beraz gain, inor ez. Azkenean, egin dudan ibilbidea inork bultzatu edo behartu gabe egin dut. Gustatu egiten zitzaidan, eta nire bidea bilatu nuen. 12 edo 13 urterekin joan nintzen Padurara, Arrigorriagara: Zeberiotik amak eraman behar izaten ninduen astean hirutan edo. Gero, ibilbidea luzea izan da Bizkaiko taldeetan. Baina dena egin dut inork bultzatu gabe. Familian ez dut inor izan aurretik futbolean ibili denik, eta azkenean, presio barik ibili naiz, disfrutatzeko. Agian, egungo gazteek beste modu batean bizi dituzte gauzak orain: lehen gehiago zen futbolaz gozatzea; gaur egun, atzetik dagoen presioa ikusten da.

Futbolarekiko lehen zegoen zaletasuna dago Zeberion gaur egun?
Zaletasuna izugarria da. Athleticen jarraitzaileak asko dira hemen, eta futbolaz ere asko hitz egiten da. Pena da herri mailan ez izatea bere garaian egon zen futbito talderik, baina gizarte moduan ere moldatu egin behar gara: jendeak kirola uzten du, askok ez dute bide horretatik jarraitzen.

Herri txiki batean, gainera, zailtasun gehiago daude taldeak sortzeko.
Bai, askotan esaten da. Ni txikia nintzenean, futbol zelai bat egoten zen Ermitabarrin, eta erreka inguruan aldagelak eta dena zeuden. Bertan jokatzen genuen, goikoak behekoen kontra. Baina, orain zaila da horrelako zerbait egitea eta herriko talde bat sortzea. Jendeak beste herrietatik etorri beharko luke ona jokatzera, eta alderantziz egiten dugu: ondoko herrietara joaten gara beti, Igorrera, Ugaora edo Arrigorriagara. Polita izango litzateke zelaitxo bat egotea eta Zeberion neska-mutilen futbol taldea osatzea. Egia esan, zaila ikusten dut, baina ilusioa eduki behar da. Batek daki, hemendik urte batzuetara, agian, zelai bat egingo dute herrian.

Zeberiotik kanpo, bai, baina Euskal Herritik kanpoko taldeetan ez zara ibili. Inoiz pentsatu duzu atzerrira joatea?
Aukerak sortu zaizkit, baina beti geratu izan zait zintzilik. Gero, futboleko ibilbidea bukatzerakoan, pentsatzen hasten zara ondo egongo litzatekeela atzerrian esperientzia hori bizitzea. Baina, askotan, kanpora begiratzen dugu gauza onen bila, eta ez gara konturatzen etxean ere ondo gaudela. Ni gustura egon naiz egon naizen talde guztietan. Eibarrera joan baino lehen, Bizkaia mailan mugitu naiz, eta oso esperientzia ona izan da: jende asko ezagutu dut, jende ona, eta pertsona moduan ere asko eman dit hainbeste urtetako ibilbideak.

Euskal Herriko futbola eta zaleak desberdinak al dira atzerriarekin alderatuta?
Bereziak, azkenean, bagara. Desberdinak. Kalitate handiko taldeak ditugu, Espainiako Lehenengo Mailan jokatzen dutenak, eta nazioartean euskaldunak “talde gogor” moduan ikusten dituzte; zaleak “familia” bezala. Baina uste dut hori ere asko aldatu dela azkenaldian, bereziki, zaleei dagokionez. Gaur egun, gero eta zorrotzagoak gara taldeekin: guztiaz kexu gara eta ez gaude inoiz konforme. Asko aldatu gara. Desberdinak? Bai, baina lehen baino gutxiago. Garai batean gehiago animatzen zen, eta gauzak zailtzen zirenean, ez ginen hain pesimistak. Etxeko taldeak gutxiago errespetatzen ditugu kanpokoak baino, etxekoekin pazientzia gutxiago izaten dugulako, normalean, eta aldaketak eskatzen ditugu etengabe. Adibidez, hogeitik gora jokalari, ez, baina entrenatzailea aldatzea, pertsona bakarra, oso erraza izan ohi da.

Zu bi aldeetan aritu zara: jokalari gisa, baina baita entrenatzaile bezala ere. Zein aldaketa dago bata eta bestearen artean? Zein ikuspuntu eman dizu bakoitzak?
Guztiz desberdina da. Jokalari moduan, azkenean, norberak bere buruan pentsatzen du. Talde moduan ere bai, baina beti dago egoista puntu bat. Entrenatzailea zarenean, berriz, hogei jokalari baino gehiagorengan pentsatu behar duzu, gauzak modu globalean ikusi: kide bakoitzak zer daukan hobetzeko, zein trebetasun dituen, eta talde bezala hori nola aprobetxatu daitekeen. Jokalarien kasuan, egoismoak norbera ondo ikustera eramaten du, gauzak norberarentzat bakarrik ondo egin nahi izatera, eta horrela, batak besteen gainetik jarri nahi duenean, taldeko giroa ez da potentziatzen. Jokalari batek jokatzen ez duenean, adibidez, aurpegi txarrak ikusten dituzu entrenatzaile moduan, eta jende horri azaldu egin behar izaten diozu hori ez dela bidea. Guztien gainean egon behar duzu, baina baita denei aukera berdinak eman ere.

Atheticeko haurren taldea, kadeteena, eta azken denboraldian, gazteen B taldea zuzendu dituzu. Entrenatzaile moduan jarraitu nahiko zenuke?
2015eko udan futbola utzi nuenetik egon naiz Lezaman, 7 urtez. Txikiekin hasi nintzen, eta hortik egin nuen ibilbidea entrenatzaile moduan. Gustatzen zaidana egiten ibili naiz orain arte, eta ez dut jarraitzea baztertzen. Gauzak asko aldatzen dira egun batetik bestera, eta hemendik hilabetera edo urte erdira proiektu on bat ikusten badut eta joateko aukera badaukat, prest nengoke. Halere, inoiz ezin da pentsatu “entrenatzaile izan nahi dut”, eta helburu hori jarri. Futbolean, gutxienez, zaila da, jende on asko baitago. Dena den, ilusioa eta esperantza badauzkat. Futbolean hasi nintzenean ere ez nuen pentsatzen halako ibilbidea egingo nuenik! Bizitzan, etorri behar dana, etorriko da.

Jokalari moduan 35 urterekin egin zenuen debuta Lehen Mailan, SD Eibarrekin. Beranduegi izan al zen?
Denoi gustatuko litzaiguke debuta Lehen Mailan egitea, eta 20 urterekin izatea. Baina inoiz ez nuen pentsatuko gertatuko zenik. Egia esan, bere momentuan ez duzu behar bezala baloratzen. Gauza onak azkar pasatzen dira, eta egunean egunean, ez dira behar bezala kontutan hartzen. Alde negatiboarekin gelditu ohi gara, gehienetan. Baina orain pentsatuz gero, harro nago horretaz. Batzuei aukera ez zaie inoiz heltzen, eta alde horretatik, ni pribilegiatua izan naiz: berandu baino, agian, goiz heldu zitzaidan aukera.

☉ Zeberio

Zeberioko ikasleek bertoko bazterrak erakutsiko dizkiete Siziliako umeei

“Gure ikasleek Euskal Herriko naturguneak landu dituzte eta Siziliako umeak bertara datozenean leku horiek ezagutzeko bisita antolatu dute”

|

Zubialde eskolako ikasleak, Sizilian// Zubialde Eskola

Zubialde eskolako 6. mailako 15 ikasle apirilaren 19an itzuliko dira Siziliako Kataniako Guglielmo Marconi zentroan (Lentini, Katania, Sizilia) egiten ari diren egonalditik. Bertako ikasleekin zazpi egunez elkartrukea egiten ari dira egun hauetan. Nuria Korta Zubialde eskolako zuzendariak GEURIAri azaldu moduan, Siziliakoak hilaren 28an etorriko dira Zeberiora bueltan eta harrera egiteko eskola komunitate osoa egongo da herrian: “Gainera, herri afaria antolatu diegu Siziliakoei apirilaren 30ean, igandea”.

“Eskolako hirugarren zikloko ikasleak, seigarren mailakoak bereziki izan ohi dira elkartruke hauetan parte hartzen duten umeak”. Joan den apirilaren 13an abiatu ziren Zubialdeko umeak Siziliara. Bestalde, Kortak ingelesa ikastearen balioa azpimarratu du eta haurrak urtero atzerrira doazenean horixe lantzen dutela gehitu du: “Bidaia prestatzerakoan, harremanetan ipintzen gara atzerriko zentroarekin eta proiektu bat diseinatzen da. Bertako egoera esanguratsu horretan lantzen dute ingelesa”.

Zubialde eskolako ikasleak, Loiuko aireportuan // Zubialde Eskola

Aurtengo gaia naturagaz lotura duen bisita programa bat sortzea izan da: “Gure ikasleek Euskal Herriko naturguneak landu dituzte eta Siziliako umeak bertara datozenean leku horiek ezagutzeko bisita antolatu dute eta zeberioztar gazteak izango dira bisita horien gidariak”. Kortak adibide bat ipini du: “Zumaiako Flyscha bisitatzeko lanketa bat egin dute inglesez, eta egun hauetan gauza bera egiten ari dira Italiako ikasleak, bertako naturguneekin”.

Osorik irakurri

☉ Zeberio

Umeen herri kirolak antolatu ditu Zeberioko Txubelasu elkarteak Zubialden

Txapelketa 10:00etan izango da eta herritarrak deitu dituzte umeak animatzeko

|

Haur bat, Etxebarriko Euskal Jaian, 2028an // Geuria

Datorren apirilaren 14an umeentzako herri kirolak antolatu ditu Txubelasu Guraso Elkarteak Zubialdeko frontoian. Txapelketa 10:00etan izango da eta herritarrak deitu dituzte umeak animatzeko.

Kirol probak amaituta, indaba jana prestatu dute frontoiaren alboko aterpean, 14:30ak eta 15:00ak aldera eta indaba platerrak ura, postrea eta kafea izango du ere.

Helduek 13 euro ordaindu beharko dituzte eta sei urtetik gorako umeek, 10 euro. Txartelak Herriko Tabernan, Amañen, Maribiren dendan eta Taberna Zaharrean lortu ahal direla iragarri dute Txubelasu Guraso Elkartetik.

Osorik irakurri

☉ Zeberio

Arantza Perez Etxebarria: «Denok gara bat Mandoia Pelota Klubean; presidenterik ez dago»

Zeberioko pilota eskolak gaur egungoen eta datozen umeen etorkizunean izango duen aztarnaz hitz egin digu, aurten Zubialde auzoan konpondu behar duten pilotalekuan bertan

|

Arantza eta Esku Pilota eskolako kirolari bat / Geuria

Arantza Perez Etxebarria (Zeberio, 1979) Zeberioko Mandoia Pelota Klubeko presidentea da “paperetan”. Zaila egiten zaio bere burua “zuzendari” moduan definitzea eta are gehiago kamera baten aurrean ipintzea. Zeberioztarrak klubaren atzean lan egiten duten herritarren ahalegina azpimarratu du, tartean Beñat García zaratamarraren lan bikaina goraipatu du.

Zeberioko pilota eskolak gaur egungoen eta datozen umeen etorkizunean izango duen aztarnaz hitz egin digu, aurten Zubialde auzoan konpondu behar duten pilotalekuan bertan. Izan ere, neguko hezetasunak eta euriteek umeen entrenamenduak baldintzatu dituzte eta frontoian egin beharreko obra horien garrantzia azpimarratu du.

Klubeko paperetan zuzendari lez agertzen zara, Arantza. Badakigu, hala ere, zuzendari moduan aurkeztea ez duzula gogoko.
‘Presidente’ hitza ez zait batere gustatzen baina egia da esparru administratiboan klubeko zuzendari lez agertzen naizela. Hala da.

Eta nolako erronka da zuretzat, eta klubaren atzean dagoen lantaldearentzat, noski, Zeberioko pilota eskola kudeatzea?
Nik ez nuke erronka lez definituko; zirkunstantziek egoera honetara ekarri ninduten eta presidente lanak egitea proposatu zidaten. Hala ere, klub honen atzean ez dago arduradun bakarra; denok gara bat Zeberioko Mandoia Pelota Klubean. Gauza da klub bezala sortu ahal izateko izenak behar zirela, taldearen egitura modu legalean sortzeko, beste hitz batzuetan azalduta.

2023an hartu zenuen kargu honen ardura zure lantaldearekin. Nolako esperientzia izaten ari da erantzukizun hain handia duen klub honen norabidea zehaztearena?
Pozik nago, egia esateko. Azken batean, esperientzia honen bidez erakusten ari gara emakumeok ere era honetako beharrak egiteko gai garela.

Zeberioko Mandoia Pelota Klubak eskola ugari eta partida dezente antolatu izan ditu. Herritarrek ba al dakite nolako lana dagoen Mandoia bezalako pilota klub baten atzean? Lantaldeak bloke baten modura egiten du lan: Whatsapp talde bat dugu gure artean lana antolatu ahal izateko. Lan gogorrena ikasturte hasieran izan ohi da guretzat. Abuztuko eta iraileko aste horietan Bizkaiko Pilota Federazioarekin harremanetan ipintzen gara haurren izen-emateak, kategorien sailkapena, fitxak eta behar bestekoak burutzeko. Ikasturtea antolatzeko, alegia. Arlo ekonomikotik, gure aurrekontua antolatu eta klubeko dirua zertara bideratuko dugun ere erabaki behar da, eta horrek ere lan handia eta buruhausteak ematen ditu.

Eskualdeko esku-pilotaz berba egiten denean Zaratamo izan ohi da erreferentziazko herria, askotan. Nolako pisua dauka pilotak Zeberion?
Zaratamoren ospea bertatik irten diren pilotari famatuengatik izango da ziurrenik, baina Zeberion ere betidanik izan dugu frontoia eta herritarrek betidanik jokatu dute kirol honetan. Arraroa bada ere eta esku-pilotarekiko pasio handia egon bada ere, esku-pilota taldea izan da faltan izan dugun gauza bakarra.

Arraroa da, gero! Eta zer egiten zuen pilota gustuko zuen Zeberioko jendeak, orduan?
Duela urte asko Zeberiok pilota eskola bazuen, baina desagertu egin zen, eta duela hiruzpalau urte esku-pilota taldea sortu zuten herrian. Ordura arte inguruko herrietara joaten zen jendea esku-pilotan jokatzen ikastera eta praktikatzera: Zaratamora, Igorreko esku-pilota taldera… Orain, aldiz, Zeberion daukagu esku-pilotan jokatzeko aukera.

Arraroa bada ere eta esku-pilotarekiko pasio handia egon bada ere, esku-pilota taldea izan da faltan izan dugun gauza bakarra.

 

Zenbat umek osatzen dute Mandoia Pelota Kluba?
30 inguruk. Egia da badirela noizean behin fitxarik gabe jokatzera datozen umeak, baina kasu puntualak izan ohi dira, normalean kirolarekin lehen kontaktua egitera datozelako, proba modura. 

30 neska-mutil, beraz. Horietatik zenbat neska eta zenbat mutil?
Mutilak dira nagusi Zeberion. Gure eskolan lau neska baino ez ditugu. 

Momentuz kopurua oso urria da, baina historian atzera begiratuta eta feminismoaren ikuspuntutik ikusita betiere, garapenik izan dela esango zenuke nesken partaidetzaren esparruari dagokionez?
Lehen pentsaezina zen emakumeak pilotan jokatzen ikustea. Baina esan beharrekoa da futbola bezalako kirol nagusiek ere emakume asko eraman dituztela, bai Zeberion, baita Euskal Herrian ere. Honekin esan nahi dudana da Zeberion esku-pilotan aritzen ez ziren emakumeak futbolean aritzen zirela, herrian emakumezkoen futbol taldea egon bazegoelako. Esku-pilotak ez zuen zorte hori izan, tamalez, eta ez dakit zein izan zitekeen horren arrazoia, egia esateko. 

Eta pilotan emakume gehiago izateko formula zein izan liteke? Denbora kontua, agian?
Gero eta emakume gehiago dago esku-pilotan: bai entrenatzen, bai modu profesionalean jokatzen. Hori horrela da. Egoerak hobera egingo du, ziur, baina apurka-apurka. Ez da egun batetik bestera gertatuko den egoera izango.

Zu berez zeberioztarra zara, emakumea eta Mandoia Pelota Klubeko zuzendaria. Esku-pilota praktikatu ahal izan duzu inoiz?
Praktikatu berez ez, baina betidanik gustuko izan dut. Herretako eta profesionalen partidak ikustera joan izan naiz beti, baita herriko jaietan ere. Bi seme ditut eta esku-pilotan jo eta su dihardute biek. Azken batean horixe da asmoa, gazteek eta atzetik datozen umeek klub bat izatea maite duten kirol hau praktikatu ahal izateko.

Mandoia Pelota Klubak hiruzpalau urte besterik ez ditu. Nola ikusten duzu hemendik urte batzuetara? Herriko umeek maila profesionalean jokatzera iristeko erreminta modura erabili ahal izango dute?
Hori umeen esku dago. Nabarmendu nahi nuke entrenatzailerik onena dugula Zeberion: Beñat Garcia. Haurrak primeran entrenatzeaz gainera, psikologo modura lan izugarria egiten du haiekin eta umeak zein herritarrak benetan pozik daude berarekin.

Zer esan dezakezu Zubialdeko frontoiaz?
Leku oso onean kokatuta dago eta polita bezain handia da Zeberiokoa. Aukera asko ematen ditu jarduera ezberdinak antolatu ahal izateko: partidak jokatzeko, entrenamendu saioetarako… Frontoi asko laburtxoak dira eta jarduera ezberdinak antolatzeko arazoak izan ohi dituzte.

Hala ere Zeberioko frontoi honek konponketa garrantzitsu batzuk baditu faltan.
Itxura batean ondo dago, baina negu aldera, euria eta hotza datozenean, arazoak izaten hasi gara hezetasunarekin, entrenamendu saio asko bertan behera utzi behar izateraino. Astean zehar euri asko egiten duenean, asteburuko federazioko partidetan eragina du horrek guztiak eta ezin izan dira jokatu; “partxeak” ipini baditugu ere, zorua urez betetzen da. 

Zer dio Udalak honen inguruan?
Udala laguntzeko prest agertu da lehen momentutik eta egoeraren jakitun da. Etengabeko harremanetan gaude udal ordezkariekin eta aurtengo obra nagusia frontoian egingo dutela esan digute. Berez, obrari argi berdea eman diote. Hala ere, era honetako jarduketek denbora behar izaten dute eta guk ez dakigu noiz hasiko diren, ezta zer nolako jarduketa egingo duten ere.

Osorik irakurri

☉ Zeberio

Zeberiora ekarriko dituzte Bizkaia Cupeko finaleko esku pilota partidak asteburuan

Partidak apirilaren 13an jokatuko dituzte, 10:00etatik aurrera, Zubialdeko frontoian

|

Asier Ruiz de Infante eta Zuhaitz Etxebarria // Mandoia Pelota Kluba

Bizkaia Cupeko esku pilotako partidak Lemoan antolatu behar zituzten asteburu honetan, baina bertako kiroldegiko langileen grebaren ondorioz Zeberioko Zubialde auzoko pilotalekuan jokatuko dituzte datorren apirilaren 13an, 10:00etan.

Gazteak C mailan Mandoiatik Zuhaitz Etxebarria eta Asier Ruiz de Infante Olaburu 6ren aurka lehiatuko dira. Bizkaiko banakako txapelketa Mandoiako Zuhaitz Etxebarriak irabazi zuen Adiskideko Aritz Ojedaren aurkako norgehiagokan, joan den urtarrilaren 12an, Zeanuriko frontoian.

Bizkaia Cup | Zeberioko partidak

Apirilak 13, zapatua

10:00
Eskuz binaka emakumezkoak
Lagun Artea EM – Durango

Eskuz binaka Kadeteak C
Lemoa – Durango

Eskuz binaka Gazteak C
Mandoia – Olaburu 6

Eskuz binaka Kadeteak A
Lemoa – Markina 1

Osorik irakurri

☉ Zeberio

Argazkiak / Zeberioko Ermitabarrin bukatu da Korrikako 23. edizioa Hego Uribe eskualdean

Eskualdeko azken argazkiak egin ditugu Zeberioko Ermitabarri auzoan. Bertatik herritar ugari igaro dira, Arratiara bidean, eguzkipean

|

Eskualdeko azken argazkiak egin ditugu Zeberioko Ermitabarri auzoan. Bertatik herritar ausart ugari igaro dira aldapan gora, Arratiara bidean, eguzkipean.

Osorik irakurri