Sareak

☉ Basauri

Ludi Viguera / Printzipioetan tinko

Basauriko ikastolan irakasle da. Euskaldun eta Euskararen militante bezala ikusten du bere burua. Euskarabila elkarteko kidea da.

|

basauri ludi viguera 2016 elkarrizketa ale berezia
Ludi Viguera argazkiaren ezkerraldean, Basaurin Be Bagara jaia San Migelen.

Nahiz eta Arrigorriagan bizi, Ludi Viguerak (Basauri, 1964) ordu asko ematen ditu bere jaioterrian. Arizko Ikastolan irakasle lanetan aritzeaz gain, Euskarabila Basauriko Euskaldunon Elkarteko kide ere bada. Horren harira, aurtengo Basaurin Be Bagara herri ekimeneko zenbait aurrerapen eman dizkigu.

Euskararen aldeko eragile zarela esan genezake, baina zuk zeuk nola de nitzen duzu zure burua?

Euskalduna eta euskararen militantea naiz, beste hainbat gizarte mugimendurekin ere guztiz identifikatuta sentitzen dena.

Basauriko Arizko Ikastolan irakasle zara…

Hala da. 21 urte nuela hasi nintzen Ikastolan, 1985. urtera aldera. Garai hartan Ikastola kooperatiba zen 1980tik, eta Baskonia lantegiko bulegoetan zegoen (1981etik). 1993an sare publikoan sartzea erabaki zuten eta 1996an Pozokoetxe ikastetxe publikoko komunitatea Arizko Ikastolan integrarazi zuen Administrazioak. Ikasle izandako asko orain guraso dira, pentsa!

Aldaketarik ba al dago irakasle hasi zinenetik gaur egunera arte?

Aldatu? Egokitu esango nuke nik, baina printzipioetan tinko mantenduz. Gizartearen ezaugarri eta beharrei erantzuten saiatzen den hezkuntza komunitatea izan nahi izan dugu beti. Euskal Herria, euskara eta euskal kultura ardatz hartuta.

Euskal Herriko hiru administrazioek batera egin duten inkesta soziolinguistikoaren arabera, euskararen ezagutza, erabilera eta babesaren gorakada egiaztatu dira azken 25 urteetan…

Inkesta hiru administrazioek egin dute, baina EAEko datuak baino ez dituzte jakitera eman oraindik. Prentsaren bidez emandako datu gutxi batzuk besterik ez ditut ezagutzen, beraz, ezin dut ezer askorik esan. Gainera, azken 25 urteetan gorakada izan dela esatea ez da asko esatea.

Basauriren kasuan, gorakada hori nabaria izan da.

Basaurin gorakada izan dela begi bistakoa da, baina beste kontu bat da igoera hori nolakoa den, datuen zer irakurketa egiten den eta zer neurri hartzen diren horren aurrean. Esate baterako, datu horien arabera gorakada handiena hirigunean -Basaurin, adibidez- nabari da eta batez ere gazteen artean: eskola edota euskaltegietan euskaldundua, beraz euskara bigarren hizkuntza duena eta erdaraz hobeto moldatzen dena.

Eta, nola egin dakioke aurre egoera horri?

Egoera horretatik abiatuta eta erabilera esparruek Basaurin nagusiki erdaldun izaten jarraitzen dutela kontuan izanik (kalea, aisialdia, lana, komunikabideak…), eutsiko diote euskarari? Transmitituko dute? Zer erabiliko dute gehiago euskara ala ingelesa? Horrek guztiak erronka berriak jartzen ditu mahai gainean, eta erabaki berriak hartu beharra eta fokua lekuz aldatzea dakar.

Aurten 20. urteurrena bete du Euskarabila Elkarteak.

Hala da. Euskarabilakidea ere banaiz eta aurten programa berezi bat prestatu dugu ospakizun urte honetan. Azpimarratuko nuke hilabete honetan martxan dagoen erronka dinamika. Basaurin Be Bagara herri ekimenaren aurtengo proposamena guztiz bat dator Euskal Herri mailan ‘Euskarak 365 egun’ kanpainak aldarrikatzen duenarekin. Pauso bat aurrera emateko gonbita egin diegu basauriarrei, norbanako eta eragileei. Euskararen alde egotetik euskaraz egitera jauzia emateko.

Baina, ekitaldi publikorik izango al da aurten ere?

Nola ez, bada? Kalea hartuko dugu abenduaren 2an, ‘Euskarak 365 egun’ kanpainarekin bat egingo dugulako, Euskal Herriko beste hainbat herritan bezala. Jai giroan egingo dugu ekimena, Nafarroa Kanta Taldeak lagunduta. Eta abenduaren 11n Social Antzokian egingo dugu ekitaldi jendetsua, hainbat eta hainbat sorpresa tarteko (18:30ean hasita). Esate baterako, Antzart Dantza Taldeak ‘Nortasunaren bila’ ikuskizuna aurkeztuko du. Bi hitzordu erakargarri dira euskaldun eta euskaltzale guztiontzat, zalantzarik gabe.

☉ Basauri

Etxebarria aita-seme trikitilariek ‘Familia gara’ disko berria aurkeztu dute Social Antzokian

Gaur aurkeztu dute disko berria Basauriko antzokian. Inaxio Perurena harrijasotzailea gondidatu izan dute aurkezpenean

|

Unai eta Koldo Etxebarria Inaxio Perurenarekin Social Antzokiko oholtzan // Geuria

Etxebarria aita-seme trikitilariek disko berria kaleratuko dute: ‘Familia gara’. Lan berria Durangoko Azokan abenduaren 6an kaleratu aurretik, diskoaren aurre-aurkezpena Basaurin egin nahi izan dute bi basauriarrek.

Gaur, azaroak 29, 13:00etan Social Antzokian egin dute aurkezpena. Bertan Inaxio Perurena harrijasotzailea eta laguna izan dute gonbidatu. Besaulkietan etxebarritarren lagunak, senideak eta ezagunak egon dira.

Sorpresak, bertsioak eta abesti propioak

Diskoak 12 abesti ditu, euskarazko, gaztelerazko eta ingelesezko kantekin. ‘Familia gara’ lan berrian oinarrizko euskal estiloari heldu diote: “estilo dantzagarriak, baladak, koplak, rantxerak eta rock doinuak entzun daitezke, eta baita indar handiko bertsioak ere”, diote.

“Sorpresak, bertsioak eta abesti propioak ere ez dira faltako! Esaterako, ‘Sorioneku familia gara’, Euskal Herria eta gure kulturaren batasuna elkartzen dituen abestia”. Abesti horren bideoklipa 2023ko martxoan argitaratu zuten, eta bertan agertzen da, besteak beste, JJ Vaquero bakarrizketagilea.

‘Loretxoa’, ‘Ikusi mendizaleak’ eta ‘Let it be’ abestien bertsioak ere jasoko ditu lan berriak. Trikitixa eta panderoa dira instrumentu nagusiak eta horiekin batera akordeoia, kitarra, baxua, teklatua, sintetizadoreak eta bateria ere entzun daitezke.

Diskoa salgai egongo da Durangoko Azokan 15 euroan.

Osorik irakurri

☉ Basauri

Sinadura bilketa hasi dute Kareagan pediatria zerbitzuan murrizketarik ez egiteko

|

Kareagako anbulatorioan hasi dute sinadura bilketa gaur // Geuria

Kareagako eta San Migeleko pediatria zerbitzuetan Osakidetzak murrizketak egin dituela salatu dute hainbatetan auzotarrek. Zehazki, San Migeleko pediatrak irailean erretiroa hartu ondoren ez dutela beste pediatrarik kontratatu eta Kareagako bi haur-medikuetatik batek lanaldia erdibitu beharko duela bi anbulatorioetan salatu dute.

Abenduaren 1etik aurrera formalizatuko da neurri hori. Kareaga, El Maño-Basozelai eta Bidebieta auzo elkarteak eta Kareagako eta Gazteluko ikastetxeetako guraso elkarteak euren “kezka” azaldu dute: “Neurri horrek zerbitzuaren kalitatea larriki okertzea dakar”.

Gauzka horrela, sinadura bilketa hasi dute Kareagako osasun zentroan, eta aurreratu dute ekintza gehiago egingo dituztela.

Osorik irakurri

☉ Basauri

Bideoa / ‘Azaroak 25 plaza’ zabaldu dute gaur Basaurin

|

Azaroak 25 dituen honetan Emakumeen kontrako indarkeria ezabatzeko nazioarteko eguna ospatzen da. Basaurin goizean ekitaldia egin dute hemendik aurrera ‘Azaroak 25’ plaza deituko den lekuan, San Pedro elizaren ondoan.

Plazari ‘Azaroak 25’ jartzeko erabakia Udaleko osoko bilkurak aho batez hartu zuen urrian, eta gaur, eguna aprobetxatuta egin dute ekitaldia 12:00etan. Askoa Etxebarrieta Lasherasek, La Pulga Flamencok ikuskizuna eskaini ondoren, Paz Diaz Gonzalez Basauriko mugimendu feministako kide mitikoak plazaren plaka desestali du.

Osorik irakurri

☉ Basauri

Merkatu solidarioa antolatu dute Basaurin, Bielorrusako umeen alde

|

Merkatu solidario bat // Artxiboko irudia, Geuria

Merkatu solidarioa antolatu du Basaurin Acobi elkarteak Bielorrusiako umeentzat dirua biltzeko. Merkatua zabalik dago abenduaren 3ra bitartean Agirre Lehendakaria kaleko 57. zenbakiko lokalean, Herriko Taldeaken ondoan.

Liburuak, jostailuak, tresneria, apaingarriak edota imitaziozko bitxiak bildu eta salduko dituzte lokalean. “Espazioa dela eta, ezin dugu arroparik jaso edo saldu”, diote antolatzaileek.

Merkatu solidarioa zabalik dago astelehenetik larunbatera 18:00etatik 20:30era, eta igandetan 12:00etatik 14:00etara.

“Gerra kontuengatik etortzerik ez dutenez, dirua bidaliko diegi han behar dutena eros dezaten”, diote sustatzaileek.

Osorik irakurri

☉ Basauri

Etxez etxeko laguntza zerbitzuan arreta ordu gehiago eskainiko ditu Basauriko Udalak

|

ELZren erabiltzaileen autonomia pertsonala sustatu nahi du Udalak // Geuria

Etxez etxeko laguntza zerbitzuaren (ELZ) araudia berrituko du Basauriko Udalak. Besteak beste hobekuntza hauek onartuko dituzte azaroko osoko bilkuran: mendekotasun-mailaren bat onartua duten erabiltzaileei arreta emateko ordu gehiago eskainiko dituzte, “nahi izanez gero eta egoerak ahalbidetuz gero, etxean denbora gehiago egon ahal izan daitezen”, dio Maria Larrinaga Gizarte Politikako zinegotziak.

Zehazki, bizikidetza-unitatean kide batek baino gehiagok baldin badute mendekotasun-balorazioa, maila handiena duenari dagozkion orduez gain, mendekotasun egoeran dagoen beste pertsonari dagokion ordu kopurua % 50 handituko dute.

Era berean, desgaitasuna onartuta duten 60 urtetik gorako pertsonek eta mendetasunik onartua ez duten 65 urtetik gorakoek ere gehienez 20 zerbitzu-ordu jaso ahal izango dituzte hilean, aldez aurretik balorazio teknikoa eginda.

“Azpimarratu behar da 85 urtetik gorako pertsonek, bakarrik bizi badira eta familian nahiz gizartean laguntza-sare nahikorik ez badute, erregelamendua onartu ostean, etxez etxeko laguntza eskatu ahal izango dutela hilean gehienez 30 orduz, bestelako baloraziorik egin behar izan barik”, dio Larrinagak.

Arau-testu berrian jasotako hobekuntzen artean, balorazio teknikoaren arabera babesgabetasun-egoeran edo arriskuan, bazterketa-egoeran edo abandonu-egoeran dauden edo tratu txarrak jasaten ari diren pertsonek hilean gehienez 30 zerbitzu-ordu jaso ahal izango dituzte, “betiere etxez etxeko laguntza-zerbitzuak eman ditzakeen prestazioak behar badituzte”, dio.

“Oro har, neurri horien bitartez, ELZren erabiltzaileen autonomia pertsonala sustatu gura dugu eta, horretarako, zerbitzuaren intentsitatea eta malgutasuna areagotzeaz gain, prestazioak konbinatzeko aukera ere handiagoa izango da”, dio Larrinagak.

Osorik irakurri