☉ Arrigorriaga
Athletic Clubek jolas askeen bidez Psikomotrizitate Eskola ipiniko du martxan Arrigorriagan
Saioak urritik ekainera antolatu dituzte, astean bitan: 2019an jaiotakoak astelehen eta asteazkenetan eta 2018koak astearte eta ostegunetan, Arrigorriaga HLHIn
Athletic Clubek Psikomotrizitate Eskola izeneko proiektua martxan ipiniko du Arrigorriagan datorren ikasturtean. Helburua 2018 eta 2019 urteetan jaiotako gaztetxoak kirolera modu naturalean hurbiltzea da, psikomotrizitatean oinarritutako kirol eskaintzaren bidez. Izena emateko Athletic Clubeko esteka honen bidez egin dezakete interesdunek.
“Astean bi egunetan, Atheltic Clubeko Jolas Eskolak bost eta sei urte bitarteko adingabeak bilduko ditu, beren trebetasun psikomotorra gara dezaten kirol-hastapenean eta umeen prestakuntzan espezializatutako profesionalekin batera”, azaldu du David Jorrin Bilbao (Bilbo, 1975) Athletic Clubeko Psikomotrizitate Eskolako arduradunak. “Dibertimenduan eta bizikidetzan oinarritutako jarduera da, eta ikaskuntzarako eta garapen osasungarrirako estrategiak landuko dituzte haurrek bertan”.
Saioak urritik ekainera antolatu dituzte, astean bitan: 2019an jaiotakoak astelehen eta asteazkenetan eta 2018koak astearte eta ostegunetan, 18:00etatik 19:30ak arte, Arrigorriaga HLHIn (Mikel Alonsotegi kalea 2). Gainera, hilabete eta erdiro, igande goiz batean, Lezamako Athletic Cluben instalazioetara joango dira senideekin.
Arigorriaga eta Guretzako eskolek beren zentroetako psikogelak eta bertako baliabideak eskaini zizkioten Athletic Clubeeri
“Joan den ikasturtean Athletic Clubek esperientzia bat proposatu zuen Bizkaia mailan eta lekua zehazteke zegoen”, azaldu dio GEURIAri Jorrinek. “Orduan Arrigorriaga eta Gurutzeta eskoletako zuzendariekin harremanetan jarri ziren Athletic Clubeko Jolas Eskolako ordezkariak”. Zentroetako psikogelak eta bertako baliabideak eskaini zizkioten klubari eta hezkuntza proiektuari itxura ematen hasi ziren, epe laburrean Bizkaia mailan garatzeko.
“Athletic Clubeko helburuen artean hasierako kirol urratsetan espezializazio goiztiarra ez lantzea ageri da. Bai ordea, bestelako kirol-eskaintza bat lantzeko aukera ematea”, nabarmendu du Jorrinek. “Horregatik abiarazi genuen Psikomotrizitate Eskola: alde batetik saio bat egingo dugu psikomotrizitate gelan eta beste bat kirol anitzeko pistan edo gimnasio batean eta helburu nagusia jolasetik abiatu eta kirolera heltzea da”. Psikolgelan, beraz, betiko jolas askeak praktikatuko dituzte haurrek, gaztetxoek beraiek proposatutako jolasak landuz.
Arrigorriagako jolas saioez gainera, hilabete eta erdiro ekimeneko arduradunak haurrak eta senideekin elkartuko dira domeka goiz batean Athletic Clubeko Lezamako instalazioetan. Bertan Barakaldoko Gurutzeta eskolako ikasleekin elkartuko dira Arrigorriagako gaztetxoak eta herrian landutako jolas horiek landuko dituzte bertan.
Familiekin jolasean // Athetic Clubeko Jolas Eskola
Familiarekin jolasean
“Jolas horietan familiek ere hartuko dute parte: ematen du jolasak soilik ondo pasatzeko direla baina gehiago dago: entretenimenduaren atzean helburu potolo batzuk ageri dira eta horien artean jolasak berak prestijioa lortzearena dago”, azaldu du Psikomotrizitate Eskolako arduradunak. “Gaur egun umeak jolastu eta txapelketetan hartzen dute parte eta gurasoak edo senideak kanpoan geratzen dira eta familiarekin batera jolastu behar dela uste dugu ere”. Daviden arabera, gurasoekin batera landutako jarduera honen bidez ama edo aita “barnean daraman umea askatu egiten da”.
David Jorrin: “Haurren loditasuna, pantailak, internet… bezalako mehatxuak ikusita, haurrek, lehen urteetan bereziki, ez dute jolasean behar besteko denbora ematen”
“Kirolera hurbiltzeko modu naturalagoa da”, onartu du Jorrinek. “Orain arte, kirolarekin lotutako metodologiak eta programa pedagogikoak aplikatu dira era honetako ekimenetan, baina gaur egun gero eta handiagoak diren mehatxuak ikusita (haurren loditasuna, pantailak, internet…) haurrek, lehen urteetan bereziki, ez dute jolasean behar besteko denbora ematen. Sedentarismoak gero eta presentzia handiagoa du”.
Haurrak, familiekin jolasean, Lezaman // Athetic Clubeko Jolas Eskola
Davidek gehitu du mehatxu horiek bizi eta gutxira kirol espezialitateetara jarraian salto egiten dutela haurrek, tartean geratzen diren jolasak galduz. “Athletic Club Bizkaiko futbol talde nagusia da eta argi dauka ez duela futbola adin tarte horretan sustatuko”, dio Davidek. “Klubaren helburua ekimen osasungarriak eta entretenigarriak sustatzea da txikienen artean”.
Ekimen arrakastatsua
David Jorrinek antzeko esperientziak antolatu ditu Athletic Clubetik kanpo eta “oso positibo” bezala definitu dituzte, baina ez ekimeneko arduradunek: haurrek eta beren senideek baizik. “Asebetetze galdetegietan kritika oso positiboak jaso ditugu eta familiekin izandako aurrez aurreko elkarrizketetan inpresio oso onak jaso ditugu. Izan ere, gure metodologia aplikatzerakoan jarraipen zehatza eta integrala egin diegu jarduera horiei”.
Kirolaren esparruan soilik jorratu beharrean, psikomotrizitatearen osotasunean egiten dute lan umeekin: “Arlo akademikotik esan digute ekimen honi esker haurren garapena nabarmena izan dela”. Matrikularen hileroko prezioa 40 eurokoa da eta 30 plaza daude bai 2018an jaiotakoentzat, bain 2019an jaiotakoentzat.
☉ Arrigorriaga
Arrigorriagako Bertsio Gauaren bosgarren edizioan izena emateko epea zabaldu dute
Abenduaren 27an antolatu du Arrigorriagako Soinuarri Elkarteak Bertsio Gauaren bosgarren edizioa, Gaztetxean, 20:00etatik aurrera
Abenduaren 27an antolatu du Arrigorriagako Soinuarri Elkarteak Bertsio Gauaren bosgarren edizioa, Gaztetxean, 20:00etatik aurrera.
Urtero lez, epea zabaldu dute bertan jo nahi duten taldeek izena eman ahal izateko: “Utzi lotsak alde batera eta animau zaitez gauarekin bat egiten, zure musika gogokoena jotzera, ergelkeriak egitera eta esatera, eta zure gurasoak lotsaraztera”, azaldu dute Soinuarritik. Gainera, 2026an 10 urte beteko ditu Arrigorriagako elkarteak eta “gauzatxoak” prestatu dituztela iragarri dute.
Bertsio Gauari dagokionez, elkartetik azaldu dute “aukera ezinhobea” dela bandek zuzenean jotzeko eta “kristoren gauaz gozatzeko”. Parte hartu nahi duten bandek 15 minutuko emanaldia prestatu behar dute abesti propio edo bertsioekin. “Eszenatokian Soinuarri utzitako musika aparailuak egongo dira: bateria, baxua, gitarra bi eta anpliak. Nahi izanez gero, nork bere instrumentuak ekar ditzake”, argitu dute Soinuarritik.
Izena emateko soinuarrielkartea@gmail.com helbidera idatzi behar dute interesdunek. Bertan, taldearen izena, kide kopurua eta bakoitzaren rola eta jo beharreko abestien zerrenda idatzi beharko da.
☉ Arrigorriaga
Arrigorriagak 17,6 milioi euroko udal aurrekontua aurkeztu du 2026rako, aurtengoa baino % 6,8 handiagoa
Proposamena hurrengo egunetan aurkeztuko dela azaldu dute udal ordezkariek eta asmoa “urte berria onartutako udal aurrekontuarekin hastea” dela, ondo bidean
Maite Ibarra Arrigorriagako alkateak, Peio Garmendia Ogasun eta Kontu zinegotziarekin batera 2026ko aurrekontu-proposamena egin du. 17.646.735 milioi eurokoa izango da, 2025eko baino % 6,8 handiagoa.
“Aurrekontu hauek Arrigorriaga kohesionatuagoa, inklusiboagoa eta jasangarriagoa eraikitzeko borondatez diseinatu ditugu. Herri gisa aurrera egiteko eta gure auzokide guztien bizi-kalitatea hobetzeko funtsezko tresna dira”, nabarmendu du Arrigorriagako alkateak.
Aurkezpena egin ostean, proposamenaren lerro nagusiak aurkeztu dituzte komunikabideen aurrean.
Arrigorriagako udal-aurrekontuaren proposamena 2026
– Hirigintza eta Auzoak: Arlo honetara milioi bat euro baino gehiago bideratuko ditu gobernu-taldeak eta hiru ekintza nabarmendu dituzte: Osasun eta Higiene auzoko espazio publikoen irisgarritasuna eta kalitatea hobetzeko obrak egitea; eskolako patioa gune inklusiboagoa eta birnaturalizatuagoa bihurtzea, eta hirugarrenik, kiroldegi berriaren lehen fasea eraikitzeko
proiektuaren idazketa martxan jartzea.
– Politika Feministak: Arlo honek 155.450 euroko partida jasoko du. 2019 urtearekin alderatuta diru kopurua bikoiztu dutela iragarri du Garmendiak.
– Gizarte Politikak: zaintza komunitarioen aldeko apustu irmoa egin dute, eta Zaindu Arrigorriaga izena izango duen proiektu bat jarriko da abian. Proiektu honek ‘Zainduz’, ‘Herri Lagunkoia’, ‘Zu Nagusi!’ eta ‘GEUna’ lan-programa batuko ditu. “Horri esker, programa guztien arteko lotura eta koherentzia lortu ahal izango da, udalerri solidarioago eta zainduago baterantz urrats garrantzitsua eginez”.
– Ekonomia eta Enplegua: esparru honetara 45.500 euro bideratuko dute enplegu-prestakuntzarako eta laneratzeko ikastaroak egiten dituztenentzako laguntza ekonomikoetarako. Bestalde, ArrigoBono kanpaina egiten jarraituko dutela iragarri dute, “tokiko merkataritzari bultzada emateko”.
2026rako udal-aurrekontuaren proposamenak Ingurumenera, Euskarara, Kulturara, Kirolera eta
udalerriaren garapenerako funtsezkoak diren beste arlo batzuetara bideratutako partidak ere
jasotzen dituela gehitu du Maite Ibarrak.
Peio eta Maite, Arrigorriagan // Geuria
Aurkezpena, laster
Gobernu taldea joan den irailean hasi zen udal aurrekontua prestatzen eta urrian lehen zirriborroa bidali zioten oposizioko alderdiei, horiek aztertzeko bilera batera gonbidapena eginez.
“Heldu diren iruzkinak aztertu ondoren egin dugu behin betiko proposamena”, azaldu du Ibarrak. “Argi utzi nahi dugu udal gobernu irekia garela eta negoziatzeko prest gaudela”.
Proposamena hurrengo egunetan aurkeztuko dela azaldu dute udal ordezkariek eta asmoa “urte berria onartutako udal aurrekontuarekin hastea” dela, ondo bidean.
☉ Arrigorriaga
Emakumeak eta arrisku kardiobaskularraren inguruko hitzaldia eskainiko dute Arrigorriagan
Saioa Aitziber Olabarrieta Kareaga kardiologiako erizainak eskainiko du Lamiaena emakumeen etxean, 18:00etatik 20:00ak bitartean
Astearte honetan, hilaren 18an, emakumeak eta arrisku kardiobaskularraren inguruko hitzaldia eskainiko du euskara hutsean Aitziber Olabarrieta Kareaga kardiologiako erizainak Lamiaena emakumeen etxean, 18:00etatik 20:00ak bitartean.
“Gaixotasun kardiobaskularra da emakumeen heriotzaren arrazoi nagusia, baina oraindik berandu diagnostikatzen da eta gutxiago tratatzen da gizonen aldean”, azaldu dute antolaketa taldetik. “Emakume-elkarte lokalek antolatutako hitzaldiei esker, errealitate hau gero eta gehiago ikusarazten da eta prebentzioa sustatzen da. Ezjakintasunak eta arriskuaren pertzepzio txikiak oztopo handienak dira, baina ezagutzarekin aldaketa posible da”.
Hitzaldian bihotza modu egokian zaintzeko gomendioak emango dituzte. Era berean, emakumeen kardiobaskular arriskua murrizteko ohitura osasungarriak eskainiko dituzte. Deialdia herritar guztientzat zabaldu dute.
☉ Arrigorriaga
Arrigorriagak zaintza eredua sendotu du: lau programa bateratu ditu bakarrean, “Zaindu Arrigorriaga” izenekoa
Proiektu hau aurrera eramateko udalak esleipena egin du, eta Aurrerantz eta Bizitzen erakundeek osaturiko aldei baterako enpresek hartuko dute ardura hori
Zaindu Arrigorriaga programa abian jarri dute Arrigorriagan. Udalak ostiral goizean aurkeztu zuen egitasmoa, herriko zaintza- eta adinekoen arretarako lau programa nagusi bateratu eta koordinatuko dituena: Zainduz, Herri Lagunkoia, Zu Nagusi! eta GEUna.
Maite Ibarra alkateak berak programa honen garrantzia azpimarratu nahi izan zuen, “udalerri solidarioagoa eta zainduagoa lortzeko urrats garrantzitsu” gisa definitu baitzuen.
Joana Etxeberriak, Gizarte eta Feminismo Politiketako zinegotziak, bere aldetik, orain arte “eta bakoitza bere kabuz” landu dituzten 4 programa horiek bakarrean bateratzeko beharraz aritu zen: “euren arteko loturak eta erabiltzaileen profil antzekoak ikusita, Udalak proiektu bakarrean bateratzeko aukera aztertu eta onetsi du, zaintza komunitarioa helburu”. Hasiera batean lau programa hauek kudeatuko dituzten arren, ez dute baztertzen programa berriak sortzea, “beharrizanen arabera”.
Proiektu hau aurrera eramateko udalak esleipena egin du, eta Aurrerantz eta Bizitzen erakundeek osaturiko alde baterako enpresek hartuko dute ardura hori. Etxeberriak nabarmendu duenaren arabera bi erakundeak “oso espezializatuak” dira, eta “Arrigorriagako errealitate soziala oso ondo ezagutzen” dute.
Bi erakundeetako ordezkariak, Karmele Acedo (Aurrerantz) eta Nuria Pousa (Bizitzen), aurkezpenean izan ziren. Haien esanetan, orain arteko programak bere horretan jarraituko dute, baina Zaindu Arrigorriagak “programen arteko bateratzea eta erabiltzaileen ezagutza orokorra” ahalbidetuko du. Gogorarazi dute interesdun guztiek gizarte zerbitzuetara jo behar dutela laguntza edo informazioa eskatzeko.
Aurkezpenean Zainduz, Herri Lagunkoia, Zu Nagusi! eta GEUna programetako erabiltzaileak ere izan ziren, proiektu berriak haien egunerokoan izango duen eragina bertatik bertara ezagutzeko.
☉ Arrigorriaga
Jardueraz betetako programa prestatu dute azaroan Arrigorriagan, A25eko testuinguruan
Hitzaldiak, tailerrak, Indarkeria matxistaren kontrako martxa eta lore eskaintza bezalako jarduerak prestatu dituzte datozen egunetan
Azaroaren 28ra bitartean jardueraz betetako programa antolatu dute Arrigorriagan, Emakumeen Indarkeriaren Kontrako Nazioarteko Egunaren testuinguruan.
Jarduerak Arrigorriagako Udalak eta Lamiaena emakumeen etxeak antolatu dituzte herrigunean: hitzaldiak, tailerrak, Indarkeria matxistaren kontrako martxa eta lore eskaintza, A-25eko elkarretaratzea, Garrasidromoa, argazki erakusketa…
Egitaraua | A-25a Arrigorriagan
Azaroak 10, asteazkena
17:00 Indarkeria matxistaren aurkako erakusketa (Carolina Zuluaga), Lamiaena.
Inaugurazioa, azaroaren 12an, 18:00etan
Azaroak 11, astelehena
18:30 Zineforuma: La Virgen Roja
Azaroak 18, asteartea
18:00 Solasaldia: Emakumeak eta arrisku kardiobaskularra, Lamiaena
Azaroak 21, ostirala
Mural ibiltaria: ‘Elkarrekin isiltasuna hausten dugu’
Azaroak 23, igandea
12:00 Indarkeria matxistaren kontrako martxa eta lore eskaintza, udaletxetik hasita
Azaroak 25, asteartea
19:30 Elkarretaratzea, udaletxeko plaza
20:00 Garrasidromoa: “Oihukatu indarkeria matxistaren aurka!”
Panel informatiboa: 2010-2015 bitartean eraildako emakumeak
Azaroak 26, asteazkena
18:00 Tailerrak: Erresistentziaren Ahotsak “Eta zure ahotsa irudietan kontatu ahal izango balitz?”
Azaroak 27, osteguna
18:00 Solasaldia: ‘Indarkeria matxista eta negazionismoa: erantzun feminista eta juridikoak atzerapausu legalen aurrean’, Lamiaena
Abenduak 12 – urtarrilak 30
17:00 Argazki-erakusketa: ‘Irregulartasuna indarkeri anizkoitza eta desentralizatua da’, Lamiaena
Inaugurazioa: abenduak 12, 17:30
GEURIA finalista izan da Tokikom Sarietan, Eduki onenaren atalean
Basauriko Basozelai-Gaztelu ikastetxeko bazkariko babarrun platerean zizare bat aurkitu dutela salatu dute
Basauri osoa eremu tentsionatu izendatzeko eskaera egingo dio Udalak Eusko Jaurlaritzari
Argazkiak | Basauriko bi bizilagunen etxegabetzea eta herritarren elkarretaratzea, argazkitan
Argazkiak | Mozorroak jantzi eta kalera irten dira zeberioztarrak Gau Beltzan
Argazkiak | Antzerkia, tailerrak eta edabe magikoa prestatu dituzte Galdakaon Gau Beltza ospatzeko
Bideoa | Joserra Ortiz de Vallejuelo: «Gure elkarteak Estatu mailan eta nazioartean kokatuko du Zeberio»
Bideoa | “Euskal selekzioa-Palestina partida aitzaki, gure kaleak aldarriz bete ditugu”
