Arrigorriaga Harrerak Israelgo estatuak 40.000 palestinar baino gehiago erail izana salatu du Arrigorriagako udaletxe aurrean egindako elkarretaratzean.

Karlos Molinuevo Arrigorriaga Harrerako kideak GEURIAri azaldu bezala, Israelgo estatuak 40.000 palestinar baino gehiago hil egin ditu Gazako sarraskia hasi zenetik: “Urtebete igaro da Gernika Palestina ekimenak elkarretaratzea deitu zuenetik eta hura gogora ekarri nahian, gaur Euskal Herriko plaza guztietan elkarretaratzeak deitu dituzte”, azaldu du Molinuevok.

Arrigorriagaren kasuan ez dago Gernika-Palestina ekimena antolatuta eta ondorioz Arrigorriaga Harrerak hartu zuen deialdiaren ardura: “Elkarretaratzearen helburua herri palestinarrari elkartasuna helaraztea da”, zehaztu du Karlosek. “Bide batez, Israel estatu sionistari boikota egiteko deia luzatu dugu gaurko elkarretaratzean”.

Hego Uribe eskualdean ere elkarretaratze gehiago deitu dituzte, hala nola, Galdakaon, Basaurin eta Usansolon.

AHTaren kontrako mugimenduak ’30 urte AHT Oztopatzen batu lurraren alde’ erakusketa antolatu du gaur Arrigorriagan Pintxopoarekin batera, 19:00etatik aurrera.

“30 urte bete dira jada abiadura handiko trena inguruan genuela konturatu ginenetik. 30 urte bere ezaugarriak bertatik bertara ikusten, bizitzen, eta pairatzen”, azaldu dute mugimendutik.

“Eraikuntza lanak hasi diren lekuetan bizi ingurune kuttunen, beharrezkoen kaltetzea, apurtzea edota desagertzea ekartzen ari da, baina orohar ilunkeria handiz, informazio partzial, interesatu edota gezurren bidez, bizi-ingurune hurbilarekiko, zaintza, parte hartze eta erabakitzea ezeztatzen ari dira, diru publikoaren erabilerari buruzko herritarren esku hartzea eragozten, bizi aukera aniztasuna ukatzen eta bertako zein mundu mailako antolaketa eta zapalketekin, AHTak zein lotura eta eragin dituen ezkutatzen ari dira, dela bioaniztasunean, lan baldintzetan, hizkuntza-aniztasunean, jendarte zerbitzuetan, lurraren artifizializazioan, neokolonialismoan, ekonomian, klase arrakalan eta abar”.

Gaurtik hasita urriaren 27ra arte Asteklimaren, Klimaren eta Energiaren Astearen, bosgarren edizioa prestatu dute herritarrak klima eta energia-trantsizioaren aurrean kontzientziatu eta mobilizatzeko.

Horren haritik Energia komunitateen inguruko tailerra antolatu dute Arrigorriagako Edurne Garitazelaia kultur etxean datorren urriaren 21ean, 18:00etan. Prestakuntza tailer honen helburua eskualdeko udalerrietan tokiko energia-komunitateak sortzea da herritarren partehartzea sustatzeko. Bertan, energia-komunitateak zer diren, onura nagusiak zein diren eta horiek sortzeko lehen urratsak zein diren jakinaraziko da.

Saioaren iraupena ordubete eta erdikoa izango da eta herritar guztiei parte hartzeko gonbidapena luzatu diete: “Energia-komunitateak tresna eraginkorrak eta jasangarriak dira toki-erakundeetan, eta herritarrek energia-trantsizio baterako motor bihur ditzakete”, azaldu dute Asteklimatik.

ATX Teatroak Marmarra: Beldurrak gobernatzen gaitu antzezlana estreinatuko du euskara hutsean Arrigorriagan, datorren urriaren 18an, Lonbo aretoan, 19:30ean.

Jon Gerediagak idatzi eta zuzendutako obra berri honen iraupena 90 minutukoa da eta euskara hutsean prestatu dute 15 urtetik gorakoko publikoarentzat.

Bertara hurbilduko direnek aparteko ikuskizun baten lekuko izango dira: zazpi antzezle, abeslari liriko bat, dantzari bat, laserrak, bideoproiekzioak, plataforma mugikorrak… “Istorioa kontatzeaz gainera geruza espektakularra lortzen duen ikuskizun integrala sortuko dugu”, azaldu dute ATX Teatroatik.

Marmarra

Gizakia zer astakeria egiteko kapaz da beldurragaitik? edota zer ez dau sekula egingo bildurragaitik? Mundua zoratuta dago, itsasontzi hau lemazain barik doa, eta gu… horren barruan gaude.

Jendartearen ahots, desira eta ametsen artean, marmar beldurgarri baten mehatxua heldu zaigu, oharkabean piztuz eta handituz doa gure bihotzetan izenik gabeko ezinegona. Gure erantzuna bizitzaren aldeko garrasi mingarria da, maite dugun guztiaren aldeko aldarri basatia.