La Basconia berriaren proiektuak aurrerapauso garrantzitsua eman zuen joan den uztailaren 24an: SEPESek (Espainiako Garraio, Mugikortasun eta Hiri Agendako ministerioari atxikitako Lurzoruaren Enpresa Erakunde Publikoak) Basauriko Udalari bertako lurzoruetan edozein proiektu garatu ahal izateko funtsezkoak diren bi Plan Bereziak aurkeztu zizkion. Plan horietan proiektuak bete beharreko xehetasun urbanistiko, tekniko eta ekonomikoak jasotzen dira.

SEPESek 35 milioi euro baino gehiago inbertituko ditu La Basconiako lursailetan, eta bi eremutan esku-hartuko du: Basconia ipar-mendebaldean eta Basconia ipar-ekialdian. Guztira, 137.300 metro kuadro. Basconia ipar-mendebaldea ibaiertzean dagoen lursaila da, Basconiako aparkalekutik gertuen dagoena, eta bertan hirugarren sektorea eta industria ezarriko dute (74.845 metro kuadro), eta Basconia ipar-ekialdea Sarratutik eta Etxebarrirako bidetik gertuen dagoen eremua da eta bertan 392 etxebizitza eraikiko dituzte (64.455 metro kuadro).

Etxebizitzak Espainiako Gobernuak sustatzen duen Etxebizitza Eskuragarrien Planari atxikita egongo dira, Garraio, Mugikortasun eta Hiri Agendaren bitartez.

Bestetik, jarduera ekonomikoa garatzeari dagokionez, enplegua Basaurira ekartzea “lehentasunezkoa” dela adierazi zuen iaz Asier Iragorri alkateak: “Ez da duela urteetako industria ezarriko La Basconiako lursailetan. Gaur egungo industria eraldatu da, eta teknologia, digitalizazioa eta I+D+i bezalako kontzeptuak dira egungo industria. Horrelakorik ekartzea onuragarria litzateteke Basaurirentzat eta herritarrentzat”.

Bidea azkartu nahian

Planen aurrerapenak jaso ondoren, Basauriko Udalak aztertu eta tramitazioa azkartuko du, ahalik eta azkarren onar daitezen.

2022an, Basauriko Udalak eta SEPESek hitzarmen baten gehigarria sinatu zuten. Jatorrizko hitzarmena 2009an sinatu zuten bi erakundeek, baina bertan etxebizitzen aukera soilik aurreikusten zen, eta horri jarduera ekonomikoa helburu duten proiektuak jasotzeko bidea zabaldu zen.

Asteburu ederra pasa dute Basauriko Bidebieta Pilota Eskolako kideek Katalunian. Uztailaren 20an eta 21ean izan dira XI. Eskolarteko Esku Pilota Txapelketan. Nafarrak, Soriatik etorritakoak, Madrildik, Zaragozatik, Katalaniatik… Euskaditik bi klubek parte hartu dute: Bidebieta Pilota Eskola eta Santurtziko Itsaslade.

“Orain dela 11 urte jaio zen honako topaketa. Helburua klub desberdinen artean elkartzea, esku pilotan jokatzea eta giro eta harreman onak sortzea da”, azaldu digu Mikel Karrillo arduradunak: “Casa de los Navarros – Nafarren etxea da Bartzelonako pilota eskola nagusia. 60 pilotarirekin sortu zuten kluba eta orain 150 inguru dituzte, Katalunia osokoak. Aurten eurek hartu dute antolakuntzaren ardura”.

Izan ere, Eskolarteko Topaketa Txapelketa urtero herri ezberdin batean antolatzen da. “Aurten izan da parte hartzen dugun lehen urtea, modu ofizialean, eta esperientzia polita izan da. Asteburu bateko kontua da eta urtetik urtera gehiago batzen gara. Aurten, klubeko 15 bat pertsona etorri gara Bartzelonara”.

Txapelketa formatuan egindako topaketa bat bada ere, lagunarteko giroa da nagusi. “Olinpiar jokoetan erabilitako Vall d’Hebron-eko frontoian izan gara, Nafarren etxeak klubak berak duen frontoi urdinean, txikia baina aire librean, oso berezia. Bertan euren instalazioak ikusi ditugu. Eta Bac de Rodan beste pare bat frontoietan ere egon gara”. Pilotariek ere sariak izan dituzte, hala nola, esku pilotarako materiala, arropa eta bazkari ederra.

Basauriko Mecanizados Inde enpresako langileek greba hasi dute, enpresak martxan jarri duen lan-erregulazio espedientearen kontra. ELA sindikatuak salatu duenez, enpresak bost langile ditu eta guztiak kaleratu nahi ditu zuzendaritzak.

Lan-baldintzak hobetuko dituen hitzarmen propioa negoziatzeko eskaera egin zioten langileek zuzendaritzari, eta ostean jaso dute enplegu erregulazioko espedientea. “Errepresalia argia eta askatasun sindikalaren aurkako erasoa da”, salatu dute ELAtik. Uztailean zehar protesta gehiago egingo dituzte.

Mecanizados Inde Basauriko metalurgia enpresa bat da, Cervantes hiribidean kokatuta, eta Lantegi Batuakentzat lan esklusiboak egiten ditu.

Azken urteotan ohitura bihurtu da uztailean Basauriko sanfaustoen kontzertuen zerrenda osoa herritarrei jakinaraztea. Hala egiten du Herriko Taldeakek.

Jakina da Herriko Taldeak osatzen duten hamasei kuadrillek musika taldeekin osatutako pack ezberdinen artean erabaki behar dutela eta hala egin dute. Honakoak dira aurtengo sanfaustoen kontzertu nagusiak:

Sanfaustoak 2024. Kontzertuak

• Urriak 11, ostirala: La Regadera
• Urriak 12, larunbata: Gozategi
• Urriak 15, asteartea: Mi Gran Noche
• Urriak 16, asteazkena: Urrats Erromeria
• Urriak 17, osteguna: Cherry & The Ladies
• Urriak 19, larunbata: Kaotiko

Igor Oca futbol entrenatzaile basauriarraren Ekuadorko hirugarren esperientzia uste eta nahi baino lehenago bukatu da. Liga Proko (bertako lehen maila) Deportivo Cuenca taldean zebilen Oca, eta atzo klubak berak jakinarazi zuen ez zuela taldean jarraituko.

Ekuadorko futbol txapelketa bi txanpa ezberdinetan banatzen da, eta 43 urteko basauriarra apirilaren 22an heldu zen Deportivo Cuenca taldera, herrialde bereko Unibertsitate Katolikotik irten ostean. LigaPro mailan sei partida gidatu ditu, hiru garaipen, bi berdinketa eta porrot bat pilatuz.

Taldearen egoera nabarmen hobetu da Oca heldu zenetik, jaitsiera postuetan hartu eta 10.postuan utzi baitu. Egun txapelketako bigarren fasea prestatzen ari ziren, baina jabetza eta klubeko arduradunen arteko arazoek ez dute etenik izan.

Bere erabakia azaltzeko prentsaurrekoan aho bizarrik gabe aritu da Oca: “Argi eta argi identifikatu dugu ezin genuela baldintza hauetan jarraitu”. Ideia horretan sakonduz azaldu du “entrenamenduan eta lehiaketan eragina duten hainbat kontu gure kontroletik at zeuden, hala nola jokalarien fitxaketa edo irteerak, edo eguneroko beste hainbat kontu”