José Gómez 16 urteko petanka jokalari murtziarrak “ikasketetara itzuliko naiz, ezin da petankatik bizi” esaldia bota zuen 2010ean eta adierazpen horiek Espainian famatu bilakatu zuten. Horren haritik jendeak milaka meme sortu zituen. Gutxik ahaztuko dute argitalpen hura, umore klabean beti ere.

Sara Díazek (Nazaret, 1997) aurre egin dio 2010eko 16 urteko mutil horren erabakiari, Galdakaoko Mozoilo Petanka Klubeko kide sortzaileak zazpigarren aldiz irabazi duelako Espainiako petanka txapelketa. Eta ez hori bakarrik, Europako eta munduko txapelduna izandakoa da ere. Joan den asteburuan Bartzelonan antolatutako Petankako Espainiako Banakako Txapelketako garaile bilakatu zen Galdakaoko klubekoa eta gaur egun Euskadiko Federaziorako lehiatzen ari den jokalari kanariarra da. “Espainiako txapeldun izatean sentitzen dudana harrotasuna eta poza da, txapelketen aurretik ezarritako helburuak emaitza onekin bete direla ikusten baitut”, aitortu dio kirolariak GEURIA komunikabideari. “Irabazi arren, txapelketan egindako hutsegiteetan gogor egin behar dut lan”.

“Espainiako txapeldun izatean sentitzen dudana harrotasuna eta poza da”

Kanariarraren arabera, Espainiako txapelketa “gogorra da mentalki joko-estrategiagatik”: aurkari bakoitzak ezberdin jarduten du jokoaren arabera: askok jaurtiketan jokatzen dute eta beste batzuek hurbilketara jokatzen dute. “Nik jaurtitzaile perfila daukat, baina Espainiako txapelketako kasu zehatzean, eta jokalekua nolakoa zen ikusita, nire jokatzeko modua hurbilketakoa izan zen”, azaldu du Mozoilo klubekoak.

Sara, joan den asteburuan Bartzelonan jokatutako txapelketan // Sara Díaz

Sistema suitzarra

Txapelketa 5 partidako sistema suitzar batean garatzen da. Honek esan nahi du partida bakoitzaren iraupena 45 minutukoa dela eta bi esku estrak kontrolatzen dutela. Sistema hori amaitu ondoren zuzeneko kanporaketara jokatzen hasten dira jokalariak denborarik gabe: “Jokatzeko modua erabat aldatzen da, partida bakoitza jokatzeko nahi beste denbora duelako kirolariak, baina beti ere jokalari bakoitzari 60 segundoko bola bat jokatzeko dagokion denbora kontrolatuz”, zehaztu du txapeldunak.

“Munduko txapeldun izateko faktore asko hartu behar dira kontuan”, aitortu dio txapeldunak GEURIA komunikabideari. “Nire kasuan urte asko izan dira entrenatzen, txapelketak egiten eta mentalki hobetzen munduko txapelketa baten mailara iristeko. Bestetik, Selekzio Nazionaleko teknikariak konfidantza osoa izan du nigan txapelketa honetan parte hartzeko, munduan dauden zailenen artekoa, hain zuzen ere”.

Euskal Komunitatean fitxatu duen lehen aldia da Sararentzat, eta Galdakaoko klubean urte hasieratik darama: “Taldea jokalari onek osatzen dute eta gehien gustatzen zaidana da horietako bakoitzak ezaugarri propioak dituela da”, azaldu du kanariarrak. “Horrek talde ona osatzen du eta pozik nago bertako jokalariekin egoteaz, oso harrera ona egin baitidate. Aurten geratzen den guztia nola gauzatuko den jakiteko gogo handia dut eta ilusio handia daukat”.

“Dena ez da soilik petanka entrenatzera mugatzen; baita gimnasiora joatea, dieta orekatua egitea eta burua profesional baten laguntzarekin lantzea ere”

Entrenamenduez galdetzean goizez, arratsaldez eta gauez gustura arituko litzatekeela aitortu du Díazek baina astean zehar 1 eta 3 egun ematen ditu petankan, eguraldiak hala uzten badio: “Nabarmendu behar dut dena ez dela soilik petanka entrenatzera mugatzen; baita gimnasiora joatea, dieta orekatua egitea eta burua profesional baten laguntzarekin lantzea ere. Hori guztia txapelketetara joateko erraztasuna ematen didaten lanarekin uztartzen dut, eta txapelketa egunak oporretatik ateratzen ditut”.

Sarari betidanik gustatu izan zaio kirola, oro har, eta zaletasun hori aitak transmititu zion Kanarietako Bolaren bidez: “Txapelketetara joaten zenean berarekin joan ohi nintzen eta nire kabuz botatzen nituen bolak. Petankarekin hasi zenean gauza bera egiten nuen. Aitak kirol biak uztartzen zituen”. Denborak aurrera egin ahala, petankak irteera gehiago zituela ikusi zuen Sarak: txapelketak, Estatu mailako, Europako eta mundu mailako txapelketak… “Petanka Kanariar Bola baino askoz ezagunagoa da, azken hau kanariar uharteetan praktikatzen delako soilik”, argitu du Sarak.

“Nire ametsa, kirolari guztiek bezala, praktikatzen duen kirolean % 100 aritzea da. Nire kasuan, kirol honetatik bizi ahal izateko ametsa bete nahiko nuke, ez soilik jokalari gisa, baizik eta petanka eskola bat sortuz, gaztaroan petankaren mundua sustatu ahal izateko, ez baita soilik Petankan jokatzea: kirol honek ere diziplina landu behar du”.