☉ Galdakao
Txaranga festak Galdakaoko kaleak girotuko ditu datozen bi asteburuetan
Txaranga Festa antolatu dute Galdakaon apirilaren 26an eta 27an eta maiatzaren 3an eta 4an, 19:00etatik 22:00etara bitartean.
Batukada eta txaranga taldeak izango dira herrian, Santi Brouard plazan, Somera kalea, Iturriondo plazan eta Bilbo kalean. Zuzeneko musikaz gain, hainbat ekintza, zozketa eta sari izango dira.
Maiatzaren 4an, gainera, musikari batek girotuko du Santi Brouard plazaren ingurua 80ko hamarkadako musikaren erritmoan, Kerren jatetxearen, Sorgiñe tabernaren eta Gurutz Berriaren bidegurutzean, hain zuzen.
Txaranga Festa Galdakaoko Udalak eta GuDendari Elkarteak antolatu dute elkarlanean.
☉ Galdakao
Bideoa / Erlauntza handi bat agertu da Galdakaoko herrigunean
Hainbat erle erlauntza bat egiten agertu dira Galdakaon. Inocencio Goikuria Iturriotz galdakoztarrak Lapurdi eta Juan Bautista Uriarte kaleen arteko zuhaitz batean erlauntza egiten zeuden momentuko irudiak publikatu ditu bere sare sozialetan.
Bideoarekin batera honakoa publikatu du Goikuriak: “Udaberriaren amaieran eta udan, erleen koloniak banatu egiten dira erlauntza berriak sortzeko. Jatorrizko erlauntza erle erregina gazte baten ardurapean geratuko da, eta kolonia berriro jendeztatu beharko du. Erle erregina zaharrena, berriz, erle langileen laguntzarekin leku berri baten bila aterako da. Erle erreginak, erle langileek eta zenbait zantarrek osatzen duten talde migratzaile honi erlauntza deitzen diogu”.
☉ Galdakao
Udaberriko Sormenek Amets Arzallus, La Basu, Aiko, Itxaso Paya eta Maria Rivero ekarriko ditu Galdakaora
Maiatzaren 16tik 19ra bitartean izango da Udaberriko Sormene Galdakaon, ‘Sortuz ahaldundu! Zazpi jauzi’ lemapean.
Booktuber ekitaldia, ikastetxeetako eta euskategietako ikasleen irakurtaldi jarraitua, hitzaldiak, mahai-inguruak, tailerrak, musika eta antzerkia antolatu dituzte.
Gainera, Sormene abestiaren aurkezpena ere egingo dute. Hain zuzen ere, apirilean egitasmoari doinu propioa jartzeko lehiaketa abiarazi zuten eta maiatzaren 17an aurkeztuko dute Basoa tabernan.
Egitaraua / Udaberriko Sormene 2024
Maiatzak 16, osteguna
Booktuber ekitaldia
10:00 Maximo Moreno Musika Eskola
Maiatzak 17, ostirala
Ikastetxeen eta euskaltegien irakurtaldi jarraitua: ‘Miñan’ (Amets Arzallus eta Ibrahima Balde)
10:00 Torrezabal Kultur Etxea
Hitzaldia eta mahai-ingurua: ‘Bidasoa 2018-2023’ Fermin Muguruzaren dokumentala. Alaine Aranburu eta Amets Arzallus
10:00 Torrezabal Kultur Etxea
Kontzertua: La Basu + Sormene abestiaren aurkezpena
21:00 Basoa taberna
Maiatzak 18, larunbata
Marta Velascoren instalazioa: Hitzen euria
+ Musika zuzenean: Carmen Santamaria (pianoa) + Natalia Sanchez (flauta)
12:00 Muguru parkea
Helduentzako tailerra eta erromeria: Aiko dantza taldea
18:00 Kurtzeko plaza
Maiatzak 19, igandea
Antzerki musikala: ‘eMcumeak’ (Itxaso Paya eta Maria Rivero)
19:00 Torrezabal Kultur Etxea
☉ Galdakao
Galdakaoko Gazte Egunean gertatutako eraso matxista salatzeko elkarretaratzea deitu dute gaur
Maiatzaren 4an, larunbatez, Galdakaoko XII. Gazte Eguna izan zen, eta antolatzaileek salatu dutenez eraso matxista bat gertatu zen.
Horren aurrean, Udalak protokoloa aktibatu eta Momoak, Erabide, Erlantza, Ninaiz, Mairi eta Basandere talde feministek elkarretaratzea deitu dute gaur, maiatzak 9, 20:00etan Santi Brouard plazan.
“Zuen biolentziaz nazkatuta gaude! Berriz ere kaleak hartzeko momentua da!”, diote.
Galdakaoko Udalak erasoa “irmoki” salatu du eta adierazpen instituzionala publikatu dute udaltalde politiko guztien adostasunarekin. “Udalak babes eta laguntasun osoa adierazi nahi die erasoa jasan duen pertsonari eta haren hurrekoei”, diote.
Era berean, alderdi jeltzaleak gehitu duenez, “erasotzailea jaian parte hartzen zuten gizabanako batzuek babestu zuten, identifikaziorik izan ez zezan, Udaltzaingoaren lana larriki oztopatuz”.
☉ Galdakao
Argazkiak / Sukalki eta tortilla txapelketekin amaiera eman diete Aperribaiko jaiei
Aperribaiko jaiak izan dira aste honetan, apirilaren 30etik maiatzaren 5era bitartean. Gaur, jaien amaieran, sukalki eta tortilla txapelketak izan dira protagonista, eta bertan izan da GEURIA.
☉ Galdakao
Argazkiak / Zapi horiak soinean, Gazte Eguna ospatu dute Galdakaon
XII. Gazte Eguna ospatzen ari dira gaur Galdakaon. Maria Casillas eta Aitor Ibarrondo gazteek ostegunean GEURIAri aurreratu bezala, giroa paregabea da: kuadrilla askok paellak prestatu dituzte goizean zehar eta 600 lagun inguru batu dira herri bazkarian. Arratsaldean musika izango da protagonista: elektrotxaranga eta kontzertuak! Egitaraua hemen!
Hona hemen bidali dizkiguten argazkiak:
Eta hauek Imanol Aguilarren argazkiak, Gazte Eguneko antolakuntzak GEURIAri bidalitakoak: