→Arrigorriaga

Arrigorriagako trantsizio energetikorako plana osatzeko galdeketa egingo diete herritarrei

Herritarren ekarpenak, kezkak eta gomendioak biltzeko saio irekia egingo du Udalak irailean. Plan berriaren helburua energia garbi eta autosufizienteak erabiltzea ahalbidetuko duen modeloa martxan jartzea izango da.

Basauriko Artunduaga kiroldegiko eguzki panelak // Basauriko Udala

“Klima aldaketaren inpaktua murrizteko eta jasangarraitasuna sustatzeko” asmoz, trantsizio energetikorako plan berria diseinatuko du Arrigorriagako Udalak. Helburua energia garbi eta autosufizienteak erabiltzea ahalbidetuko duen modeloa martxan jartzea da. Horretarako, eredu zaharretik berrira modu ordenatuan igarotzeko aldaketak eta jarduerak zehaztuko dituzte planean.

Nerbioi-Ibaizabal mankomunitateak eskualderako prestatu duen ibilbide-orri orokorra izango da diseinuaren oinarri. Halere, Arrigorriagarentzako plana “indibidualizatua” izango dela iragarri dute: beren beharrizanetara egokitzeko, Udalak herritarren ekarpenak, gomendioak eta kezkak biltzeko saio irekia egingo du irailean (data aurrerago zehaztuko dute). Herri galdeketaren ondoren, diagnostiko-prozesua hilabete horretan itxiko dute.

2023ko apirila

Trantsizio energetikorako neurriak onartzea gobernu-taldearen Arrigorriagan hobeto bizitzeko 100 neurrien planaren 72. puntuan biltzen da. Herritarren saio irekia eta gero, aurreikusten da plan osoa 2023ko apirilerako egongo dela prest.

Gora

Geuria Laguntzaileak Geuria Laguntzaileak