☉ Ugao
Ludoteka, Mirabatxo Kluba eta Gaztelekua irailetik aurrera Ugaon
Zerbitzu batzuk irailean hasiko dira eta beste batzuk urrian. Parte hartu nahi duenak Jane Jauregira gerturatu beharko du irailaren 13tik aurrera
Ugaoko Kultur Etxeak urtero eskaintzen dituen zerbitzuek hasiera eman diote ikasturte berriari. Zerbitzu hauei esker udalerriak adin guztietako herritarrentzako aisialdi aukerak areagotzen ditu.
Irailean hasiko dira Gaztelekua eta Ludoteka zerbitzua. Hilaren 16tik aurrera, 12 eta 18 urte bitarteko gazte ugaotarrek futbolina, pin-pon mahaiak, diana, mahai jolasak eta bideojokoak erabiltzeko aukera izango dute, besteak beste. Jarduera horiek guztiak Gaztelekuan aurkituko dituzte ostiraletan 17:30etik 21:00etara eta larunbat eta igandetan 18:00etatik 20:00etara. Era berean, Ludoteka zerbitzua irailaren 20an hasiko da eta astearte, asteazken eta ostegunetan egongo da zabalik 17:00etatik 19:00etara. Beste alde batetik, aisialdi ikastaroak eta Mirabatxo Klubak urrian izango dute hasiera.
Zerbitzu hauetan izena emateko epea irailaren 13an irekiko da. Interesdunak Jane Jauregira gerturatu ahal izango dira edo bestela, 946 480 704 telefonora deitu edo kultura.ugao@ortzadar.es helbide elektronikora idatzi eta bertan adierazi zein zerbitzu interesatzen zaien.
☉ Ugao
Musikak Ugaoko kaleak hartuko ditu 'Sareak 20 urte' astean, urrian
Urteurren borobil hau behar bezala ospatzeko askotariko jarduerak prestatu dituzte urriaren 16tik 22ra Ugaoko bihotzean

Urriaren 16tik 22ra 'Sareak 20 Urte' astea antolatu du Sarea Sound System Ugaoko musikazaleen Elkarteak, Ugaoko Udalaren babesarekin. Urteurren borobil hau behar bezala ospatzeko askotariko jarduerak prestatu dituzte: argazki-erakusketa, hitzaldi musikatua, tailerra, bazkaria herrikoia… eta nola ez, zuzeneko musika.
Jarduera gehienak, salbuespenak salbuespen, Ugaoko Jane jauregiko ganbaran antolatu dituzte.

The Smoke Dealers taldeko Ibai Aranguren, 2021ean // Geuria
Egitaraua | Sareak 20 Urte 2023
Urriak 16, astelehena
20 urte, 20 argazki erakusketa, Jane Jauregia
Urriak 18, asteazkena
20:00 Hitzaren ahairean hitzaldi musikatua, Gotzon Barandiaran eta Rafa Ruedarekin, Jane jauregia
Urriak 19, osteguna
18:00 Do It Yourself. Etxeko grabazio-estudioa: oinarriak tailerra, Beñat Ramosen eskutik, Jane jauregia
Urriak 20, larunbata
20:00 Petti, kontzertu akustikoa, Jane jauregia
Urriak 21, igandea
15:00 Bazkari herrikoia eta kontzertu parte-hartzailea Oier Aslarekin, Herriaren enparantza
Urriak 22, igandea
12:00 Musika-azoka herrikoia eta bermut musika-saioa, The Smoke Dealersekin, Udiarraga kalea
☉ Ugao
'Bizkaia Begira' erakusketak Arte Ederretako 36 koadro ekarriko ditu Ugaora urrian
Lan horiek gertutik ezagutzeko bisita gidatuak antolatu dituzte urriaren 12an, 14an eta 15ean

Urriaren 9tik 15era 'Bizkaia Begira' artearen ibilbidea ekarriko du Ugaoko Udalak Herriaren plazara, BBKren eta Bilboko Arte Ederren Museoaren eskutik. Erakusketak Mari Puri Herrero, Adolfo Giard, Anselmo Guinea, Antonio de Guezala, Alberto y Jose Arrue, Agustin Ibarrola… eta beste hainbeste artisten lanak egongo dira ikusgai eta guztira Bilboko Arte Ederretako museoko 36 margolan ipiniko dituzte bertan: "'Bizkaiari begira' erakusketak lurraldearen "erretratu" bat marrazten du adierazpen artistikoen bidez (32 margolan, hiru kartel, bi argazki eta collage bat), kronologia zabal batean zehar, XVIII. mendeko azken hamarkadetatik XXI. mendeko lehen hamarkadara arte", azaldu dute Ugaoko Udaletik
Lan horiek gertutik ezagutzeko bisita gidatuak antolatu dituzte urriaren 12an, 14an eta 15ean, 12:00etan eta 13:00etan. Bertan parte hartzeko Jane Jauregian izena ematea beharrezkoa izango da. Azken eguna datorren urriaren 6an izango da.
☉ Ugao
Jasangarritasunaren aldeko Scape Rooma antolatu dute asteburuan, Ugaon
Jarduera honetan, parte-hartzaileak "jasangarritasunaren aldeko scout talde" bihurtuko dira eta adimen joko jakin batzuekin lan egin beharko dute

Datorren irailaren 23an GJH Scape Rooma antolatu du Ugaoko Mirabatxo klubak Jane jauregian. Ugaoko Udalak babestutako jarduera hau 2013 eta 2015 urteen bitartean jaiotako gaztetxoei zuzenduta dago eta bertan, parte-hartzaileak "jasangarritasunaren aldeko scout talde" bihurtuko dira.
Escape room honen helburua 2030 Agendaren bereizgarriak biltzea izango da, eta horretarako logika eta dimen proba jakin batzuk gainditu beharko dituzte jokalariek.
Parteide kopuru handiena izateko asmoz, hiru txanda antolatu dituzte: 17:00etan, 18:00etan eta 19:00etan. Jardueran izena emateko azken eguna irailaren 20a izango da eta bi modutan egin daiteke: 946 480 704 telefono zenbakira deituz edo Jane jauregian, aurrez aurre.
Bestalde, ikasturteak ateak zabalduko dizkio Ugaoko Gaztelekuari ere: irailaren 21ean hasiko du zerbitzua (datorren ostiralean) 17:30etatik 21:00ak arte larunbatero eta 18:00etatik 21:00ak arte, igandero.
☉ Ugao
Aritz Irazabal ugaotarrak Euskal Pentatloiko finala jokatuko du Azpeitian
Irazabalek 13:37 denborarekin lortu zuen sailkapena eta hilaren 23an Aimar Irazabal anaia laguntzaile izango du Azpeitian

Ugaotarrak lehen mailako pentatloi sariko finala jokatuko du irailaren 23an Azpeitiko zezen plazan, joan den hilaren 9an jokatutako kanporaketan bosgarren postua eskuratu ostean: "12 kirolari izan ginen eta bosgarren postua eginda lortu nuen finalerako sailkapena", azaldu dio GEURIAri ugaokoak. Irazabalek 13:37 denborarekin lortu zuen sailkapena eta hilaren 23an Aimar Irazabal anaia laguntzaile izango du beste bost kirolarirekin batera.
☉ Ugao
Argazkiak | 320 lagunek hartu dute parte Ugaoko jaietako Herri Indaba Janean
Ugaoko frontoian eta alboko karpan ez zen leku gehiagorik izan bazkaltiar gehiagorentzat, Harile Kultur Elkartetik azaldu digutenez

Harile Kultur Elkarteak, urtero bezala, Herri Indaba Jana prestatu zuen atzo Ugaoko jaietan eta jarduerako utzitako momentu batzuk bidali dizkigute erredakziora. Urteroko jarduera honek 320 lagun batu zituen atzo eta frontoia zein alboko karpa goraino egon ziren bazkalorduan.