☉ Basauri
Zurrumurruen aurkako estrategiak: “Bakoitzaren aurreiritziak zeintzuk diren ikasi behar dugu horiek saiheste aldera”
Basauriko Zurrumurruen Aurkako Estrategiak hainbat ekitaldi antolatzen ditu gizartean dauden estigma arrazistak desagerrarazteko. Aida Otxoa, Paula Garcia eta Pedro Agüerorekin izan gara.
[2020ko azaroan 26an paperean argitaratuko elkarrizketa] Zurrumurruen Aurkako Estrategia 2016an sortu zen Basaurin. Udalak bultzatutako ekimena da hau eta bere helburua gizartean erroturik dauden zurrumurru edo pentsamendu arrazistak desagerraraztea da. Aida Otxoa (Bilbo, 1988) sarearen bideratzailea, Paula García (Barakaldo, 1985) LHIEB Lanbide Hastapenerako Ikastegia Etxebarri-Basauriko orientatzailea eta Pedro Agüero (Caracas, Venezuela, 1975) kidea estrategiaren barruan daude. Sarean paper desberdinak jokatzen dituzten arren, hirurek euren onena ematen dute zurrumurru hauekin behin betiko bukatzeko. Oraindik lana egin behar dela iritzi dute hirurek, baina ematen ari diren pausoak norabide onean doazela uste dute.
Labur azalduta, zer da Zurrumurruen Aurkako Estrategia?
Aida Otxoa: Zurrumurruen Aurkako Estrategia, Basauriko Udaletik 2016an sortutako ekimena da, immigrazio sailak bultzatzen duena. Sarearen xedea, jatorria erbestean duten gure bizilagunekiko dauden zurrumurru, aurreiritzi eta estereotipoen aurka egitea da. Horretarako sarea administrazioak zein herritarrek eratzen dute, kultura arteko elkarbizitza plurala eratzeko asmoz. Hasieratik, gure helburua jendeak kolektibo hauekiko dituen pertzepzio negatibo eta faltsuak aldatzea izan da. Basauriko estrategiarekin hasteko, gai hau jorratzen zuten zer nolako entitate eta asoziazioak zeuden ikertu zen, eta zer nolako kolektiboak zeuden herrian. Honela, entitate ezberdinekin jorratu daitezkeen gaiak eta jarduerak prestatu daitezke. Gaur egun, jarduera hauek antolatzen jarraitzen dugu, baina horiei gehitu behar zaizkie gai zehatzen inguruan eskaintzen ditugun ikastaroak, hala nola, islamofobiaren inguruan.
Zurrumurruen aurka zer egin behar da?
A.O.: Abiapuntua gogoeta indibiduala da. Ulertu beharra dago zeintzuk diren bakoitzaren estigmatizazioak eta aurreiritziak eta hauek identifikatzen ikasi, gerora ekidin ahal izateko. Ez da sartu behar amaierarik gabeko eztabaida batean. Guztiok dauzkagu gure aurreiritziak. Zurrumurruen aurkako agente izateko gureak onartu behar ditugu eta aztertu nondik datozen aurreiritzi hauek. Izan ere, askotan, sentimenduetatik datoz. Beraz, estigmen arrazoi hauek identifikatzen ikasitakoan, aurreiritzi hauen aurka egiteko era identifikatzen da: emozio horien arrazoia aztertu eta handik eraiki. Datuak erabilita ez da hainbeste lortzen, beldurra bezalako emozioen inguruan mintzatzen ez bagara, baitago gehienetan aurreiritzi hauen atzean.
Pedro Agüero: Lortu behar dena gizartea sentikortzea da. Gurekin bizi diren bestelako kulturak ezagutzera eman behar dira estigmetan ez jausteko. Duela gutxi umeekin egindako jarduera batean egon nintzen, eta oso nabaria da gaian duten interesa. Hortik josten hasi behar da, hazia landatu behar da etorkizunera begira. Esan beharra daukat, nik pertsonalki, Basaurin ez dudala hainbesteko arazorik ikusten arrazismoa dela medio. Nik lan egiten dudan lekuan ez da ezberdintasunik nabari jaioterriagatik. Oso gizarte irekia daukagu hemen.
Paula García: Norbanakoek parte hartze aktiboa izatea da zurrumurruekin bukatzeko era. Adibidez, Whatsapp talde batean norbaitek komentario arrazista bat egiten badu ez utzi ezer gertatuko ez balitz bezala, atentzioa deitu behar da horrelako komentarioak ez errepikatzeko. Izan ere, ez bada ezer egiten horren parte zara, nahi ez izan arren. Hala ere, jakin behar da non egin hau. Sare sozialetan debate bat hasteak ez du pena merezi.
Lanbide Hastapenerako Ikastegian hainbat jarduera eramaten dituzue aurrera.
P.G.: Duela lau urte hasi ginen ikastegian Zurrumurruen Aurkako Estrategiarekin batera lan egiten. Lehenengo urtean zurrumurruen aurkako pintxo lehiaketa egin zen sukaldaritza taldearekin. Jarduera honek jadanik hiru edizio izan ditu, baina, tamalez, momentuz ezin izan da laugarrena ospatu bizi dugun egoera dela eta. Iaz, arte grafikoen tailerrean Zurrumurruen Aurkako Estrategiak duen logoarekin lan egin genuen. Aurten, musukoak egingo dira gai berdinarekin eta herriko saltokietan banatuko dira. Tailerra aurrera eraman baino lehen, formakuntza teoriko bat ematen zaie ikasleei jorratuko den gaiaren inguruan. Nire ustez herrian sortzen den sare komunitariora gazteak heltzea zaila da. Kosta egiten zaie horrelako ekimenetan parte hartzea. Beraz, ikastetxetik bertatik aurrera eramaten badira jarduerak, errazagoa da beraiek parte hartzea eta gaia ulertu eta barneratzea; gero, beraien ingurugiroan zurrumurruen aurkako agente izan daitezen.
Ezkerretik eskumara, Paula Garcia, Pedro Agüero eta Aida Otxoa / Geuria
Herri mailan hainbat jarduera antolatzen dituzue. Nola eragiten dute hauek gizartean?
P.A.: Jarduera hauei esker gauzak hautemateko era aldatzen da, nolabait. Nire kasuan, esaterako, noizbait gertatu izan zait norbaitek, min egiteko asmorik gabe, txisteren bat egitea. Ni orain konturatu egiten naiz horretaz eta moztu egiten dut. Duela gutxi, itzulpen lanetan egon nintzen Arrigorriagan errefuxiatu batzuei laguntzeko, frantsesa zekien norbait behar baitzuten. Goiz heldu nintzen eta gazte hauek ordubete geroago heldu ziren. Arrigorriagan gizon bat dago errefuxiatuei laguntza itzela ematen diena, beraien aitona izango balitz bezalakoa da, beti laguntzeko prest. Gizon honek txiste bat egin zuen esanez: “Afrikako orduarekin bizi dira gazte hauek”. Nik badakit ez zuela fede txarrez egin, baina, batzuetan esaten ditugun gauzak dira, eta baztertu egin behar ditugu.
Zein da zabalduen dagoen zurrumurrua?
A.O.: Sarean ez dugu uste zurrumurru bakar bat denik, baizik eta eremuen araberakoak dira. Zurrumurruak beti daude han, denok entzun ditugu noizbait. Gainera, konturatu gara oso ziklikoak direla: hedabideetan zerbaiten inguruan hitz egiten bada sasoi batean, aurreiritzi hori puztu egiten da gizartean.
P.G.: Nik berdin pentsatzen dut. Eraso bat jasotzen denean edo arazo bat dagoenean beti nazionalitatea esaten dizute. Hortik aurreiritzi bat sortzen da. Hau oso argi ikusten da diru-laguntzen gaiarekin. Pertsona batek iruzur egin duela plazaratzen denean estigma hori nazionalitate berdineko pertsona guztiei esleitzen zaie.
Aditu batzuen arabera, gure gizartean etorkinen irudi utilitarista bat daukagu.
P.G.: Egia da gure gizartean rol finko batean egongo balira bezala baloratzen ditugula etorkinak. Gure onerako lan egiteko egongo balira bezala.
A.O.: Sarean sentsibilizaturik gauden pertsonak egon arren, horrelako pentsamenduetan jausi gaitezke. Etorkinak justifikatzeko orduan, ekonomia suspertzeko beharrezkoak direla bezalako argudioek kutsu utilitarista dute, dudarik gabe. Eraiki behar dena ez da intereserako sortutako erlazio bat, baizik eta, berdintasunean erroa duena. Guztiok zerbait eskaintzen diogu herriari, era batean edo bestean.
Zer aldatu beharko litzateke gizartean ekintza arrazistak amaitu daitezen?
P.A.: Nire ustez arrazismoa ez da inoiz guztiz amaituko. Pertsonak gara eta gure izateko eran dago txertaturik. Beti egongo da alborapen bat eta talderen batek pairatu beharko du. Hobe hau ez balitz gertatuko. Horretarako daude horrelako ekimenak, hau gutxitzeko.
☉ Basauri
Ariz auzoan esku-hartze txikiak egiteko herritarren iradokizunak jasoko ditu Basauriko Udalak
Auzoetan esku-hartze edo obra txikiak egiteko prozesu parte-hartzailea abirazi du Basauriko Udalak. Arizen hasiko dute lehen esperientzia
Basauriko Udalak herritarren parte-hartze prozesu berria jarriko du martxan: Auzoegin. Auzoetan esku-hartze edo obra txikiak egiteko proposamenak egingo dituzte herritarrek.
Hasteko, lehen prozesu parte-hartzailea Arizen egingo du Udalak, baina udal ordezkarien asmoa da gainerako auzoetara zabaltzea: “Auzo batetatik hasi behar genuen eta Arizen izango da lehen esperientzia hau. Prozesuak herritarren onarpen ona badu, beste auzo batzuetara zabalduko dugu”, dio Asier Iragorri alkateak.
“Proposamenek Ariz auzoko hobekuntza zehatzei buruzkoak izan behar dute, neurri txikikoak, udal-langileek, hau da, obretako brigadakoek egiteko modukoak”, dio Iragorrik.
Hala nola, espaloiak konpontzea eta beheratzea, bankuak jartzea eta margotzea, loreontziak jartzea edo kentzea, argiztapena… “Gauza txikiak izan behar dira, herritarren egunerokotasuna errazten dutenak”, dio alkateak.
Parte-hartze prozesua zabalik dago maiatzaren 5era arte // Geuria
Errepide bat asfaltatzea proposatzea, esaterako, ez lukete onartuko udal teknikariek: “Prozesua ez da obra edo ekipamendu handiak proposatzeko. Garrantzia txikiagoko hobekuntzez ari gara, Udalak egin ditzakeen obra handiagoekin batera, gure kaleak erosoagoak eta atseginagoak izan daitezen”, zehaztu du Iragorrik.
Zelan parte hartu?
Herritarrek proposamenak egiteko epea zabalik dago maiatzaren 5era arte, eta prozesuan 16 urtetik gorako basauriarrek parte har dezakete. Udalak galdetegia bidaliko du Arizko etxeetara.
Ariz auzoko herritarrek edo auzoarekin harreman zuzena daukatenek egin ahal izango dituzte proposamenak // Basauriko Udala
Iradokizunak helarazteko hainbat bide erraztu ditu Udalak:
- Arizen jarriko dituzte postontzien bidez. Postontziak egongo dira: Arizko Dorretxean, Agirre Lehendakaria kaleko Arizko autobus geltokian, Valencia kaleko metro geltokiaren sarreran, Katalunia kaleko 52. zenbakian, Leon kalean (metroko igogailuaren ondoan) eta udaletxeko Herritaren Arretarako Gunean
- Karpa informatiboan. Apirilaren 29an, astelehenez, jarriko dute Arizko eliza aurreko plazan, 11:00etatik 14:00etara eta 16:00etatik 19:00etara
- Ados Basauri online plataformaren bidez
“Proposamenak jaso ondoren, Udalak adostutako jarduerak baloratu, zehaztu eta gauzatuko ditu. Onartutako esku-hartzeak ahalik eta arinen gauzatuko ditugu. Balorazioa egin eta lanari ekin”, dio Berta Montes Partaidetza arloko zinegotziak.
Azkenik, egin diren ekintzen laburpen bat bidaliko du Udalak auzokoen etxeetara: “Zer egin dugun jakinaraziko diegu bizilagunei, bi helbururekin: Udala gardena izateko eta herritarrek ikusteko euren proposamenak ez direla alferrik galtzen”, dio Montesek.
“Gobernu taldeak oso argi du basauriarren parte-hartzea sustatzen bada, herritarrek gaitasuna sentituko dute Udalaren ekintzetan eragiteko. Horrek udal gaietan inplikatzea bultzatzen du eta komunitate sentimendua indartzen du”, dio Montesek.
Auzoegin: 20 urte
2013an aktibatu zuen Basauriko Udalak Auzoegin Auzoetako Ekintza Plana. “Plan horren helburua udalerriko hainbat puntutan hirigintza hobetzeko, modernizatzeko eta berroneratzeko ekintzak gauzatzea da, auzotarrek, elkarteek eta kolektiboek hainbat partaidetza-kanalen bidez egindako eskaerei erantzuteko”, dio Iragorrik.
“Orain, plan honek ekimen berri bat jarri du abian auzoetan edo udalerriko ingurune jakin batzuetan herritarren parte-hartze prozesu espezifikoak bultzatzeko, auzotarren lankidetza aktiboaren bidez”, dio Iragorrik.
☉ Basauri
Basaurik 2024ko Itzulia Women lasterketako bigarren etaparen irteera eta helmuga hartuko ditu
Maiatzaren 11n izango da Itzulia Women 2024ko Basauri-Basauri bigarren etapa. Hego Uribe eskualdetik igaroko dira txirrindulariak
Gaur, apirilak 23, Itzulia Women 2024 lasterketaren ibilbide ofiziala aurkeztu dute Gasteizen. Lasterketa maiatzaren 10ean hasi eta 12an bukatuko da.
Lasterketak hiru etapa izango ditu, eta bigarrena Hego Uribe eskualdetik igaroko da. Zehazki, Basauritik irten eta amaituko da bigarren etapa, maiatzaren 11n, larunbatez.
Guztira 104 kilometro egingo dituzte emakume txirrindulariek Basauri-Basauri etapan.
“Ziurrenik edizio honetako etaparik urduriena izango da. 104 kilometro izango dira, hiru mendate puntuagarri eta amaieran hainbat igoera eta jaitsiera etorriko dira, ziurrenik etapa nork irabaziko duen ebatziko dutenak”, diote Itzulia Women lasterketako arduradunek.
Lehenego etapa da Gasteiz-Elgoibar (140 kilometro, maiatzak 10) eta hirugarrena Donostia-Donostia (114,9 kilometro, maiatzak 12).
Basauri-Basauri: ibilbidea
Itzulia Women 2024 lasterketaren bigarren etapa maiatzaren 11n, larunbatez, izango da. Irteera 10:45ean izan da eta lehen txirrindulariak 13:21etik 13:39ra bitartean iritsiko dira helmugara. Oraindik zehaztu barik dago non hasi eta non bukatuko den etapa.
Basauri-Basauri bigarren etaparen ibilbidea // Itzulia Women 2024
Basauritik eta San Migeletik itzuli bat egin ostean, Arrigorriagatik, Ugaotik eta Zeberiotik igaroko dira txirrindulariak. Ondoren, Sarasola Gainara helduko dira (hirugarren mailako mendatea), eta handik Igorrera eta Lemoara egingo dute.
Lemoa atzean utzita, Usansolotik igaroko da tropela eta handik Larrabetzurantz egingo du. Bertan Aretxabalgane Gaina (hirugarren mailakoa) egingo dute, eta Gamiz-Fika barruan Urruztigaina (bigarren mailako) egingo dute.
Larrabetzutik igaroko dira berriro txirrindulariak, eta Erletxetik Galdakaorako bidea hartuko dute. Galdakaon esprint berezi bat egongomda, 81,7. kilometroan.
Eta azkenik, Galdakaotik Basaurira helduko dira. Basaurin, 90. kilometroan bigarren eta azken esprinta egingo dute txirrindulariek eta hamar kilometro ondoren bukatuko da bigarren etapa.
Basauri Kirolaren Europako Hiri da aurten, eta horren barruan hartuko du herriajk 2024ko Itzulia Women lasterketa, urte hasieran GEURIAn adierazi genuen bezala.
☉ Basauri
Alex Garcia Galas basauriarrak errekuperazio aldi “oso luzea” izango du Gurutzetako Ospitalean
Igandean bertan, Thailandiatik aberriratu zutenean, kendu zioten kaltetutako pankrea zatia Gurutzetako Ospitalean
Alex Garcia Galas basauriarra indarberritzen ari da Gurutzetako Ospitalean. Igandean aberriratu zuten Thailandiatik pankreatitisak jota eta egunean bertan kendu zioten kaltetutako pankrea zatia.
Zaintza Intentsiboetako Unitatean (ZIU) dago eta errekuperazio aldi “oso luzea” izango duela iragarri dute Gurutzetako medikuek.
Medikuek jakinarazi dute Alex kontziente eta egoera egonkorrean dagoela, duela bi hilabetetik jasaten ari den abdomen-prozesuaren larritasunaren barruan, eta Medikuntza Intentsiboko taldearen ardurapean jarraitzen du bere tratamenduarekin.
Asteburu solidarioa
Apirilaren 27an eta 28an antolatu du asteburu solidarioa Basozelaiko El Maño Auzo Elkarteak, Alexen familiari laguntzeko.
Besteak beste, haurrentzako parkea, urdaiazpiko moztailea, paella solidarioa, bingo solidarioa, barra solidarioa eta zozketak antolatu dituzte. Egitaraua osorik hemen.
Bilduko duten dirua Alexen familiari emango diote. Izan ere, basauriarra Thailandian ospitalean egon zen bitartean (bi hilabete) egunero 3.000 eta 4.000 euro artean gastatu zituen familiak Alexi mediku probak egiteko.
Bestetik, itsulapikoak ere jarri ditu Basozelaiko Auzo Elkarteak Basauriko saltokietan.
☉ Basauri
‘Udaberriko Kontzertuak’ ekimenak musika klasikoko sei emanaldi hartuko ditu 25. urteurrenean
‘Udaberriko Kontzertuak’ programak 25 urte beteko ditu. Musika klasikoa herritar gehiagorengana hurbiltzeko asmoz sortu zuen Udalak ekimena 1998an.
Aurten sei kontzertu antolatu dituzte, eta emanaldi guztiak maiatzean zehar izango dira. Besteak beste, Eresma Guitar Duo, Lorena Ferreiro, Basauri Koral Elkartea, Ugaoko Sarea Abesbatza, Edna boskotea (Musikene), Ellas eta Puccini entzun ahal izango dituzte herritarrek.
Kontzertuak San Migeleko Taberna Nagusian eta San Migeleko elizan izango dira, “eraikin horietan sortu baitziren duela 500 urte baino gehiago Basauriko lehen udaletxea eta lehen eliza”, diote udal ordezkariek. Social Antzokian ere kontzertu bat programatu dute.
“Kontzertu-zikloaz gain, Udaberriko Kontzertuak dibulgazio-programa bat ere bada, jarduera ugari antolatzen dituena haurrentzat eta familientzat. Gainera, ahalegin berezia egiten da emakumeek konposatutako lanak ezagutarazteko, oso gutxitan entzun baitaitezke ohiko programazioetan”, diote udal arduradunek.
Haurrentzako jarduerak euskaraz izango dira Basozelai Gizarte Etxean, Pozokoetxe Kultur Etxean eta Kareaga Gizarte Etxean.
Egitaraua / Udaberriko Kontzertuak 2024
Maiatzak 3, ostirala
‘Las dos caras de la guitarra’, Eresma Guitar Duo: Eva Calvo eta Alvaro Peón
20:00 Taberna Nagusia
Maiatzak 10, ostirala
‘Al son de la Belle Epoque’. Lorena Ferreiro (sopranoa) eta Iñaki Velasco (pianoa)
20:00 Taberna Nagusia
Maiatzak 18, larunbata
‘Acercándonos a los clásicos’. Jose Angel Robles (zuzendaria), Esther Garcia (sopranoa), Miriam Cepeda (pianoa), Basauri Koral Elkartea, Ugaoko Sarea Abesbatza eta Cuarteto Diverdi
20:00 San Migeleko eliza
Maiatzak 24, ostirala
Edna boskotea (Musikene)
20:00 Taberna Nagusia
Maiatzak 26, igandea
‘Ellas: mujeres compositoras del s. XIX francés’. Andrea Jimenez (soprano), Nestor Sutil (flauta) eta Marion Desjacques (arpa)
‘Puccini & Verdi’. Cuarteto de cuerda de BOS
19:00 Social Antzokia
Ibai Magdaleno Basauriko Bertako-Javi Conde Klub Paralinpikoko atleta Munduko Virtus txapelduna da 10 kilometroko lasterketan.
Txapelketa Kazakhstaneko Almaty hirian (Asia) jokatu da pasa den asteburuan. “Lehiaketa zirkuitu bihurgunetsu batean egin da, 700 metrotik gorako altueran, eta zaila izan da proba egitea”, adierazi dute Javi Conde klubeko ordezkariek.
Magdalenok 33 minutu eta 15 segunduan egin zuen 10 kilometroko proba, eta mendean hartu zituen Daniel Bosy poloniarra eta Victor Karadzhov bulgariarra.
“Denboraldi bikaina egin du Ibaik. Laredon 10 kilometroko ibilbideko lasterketan errekorra egin zuen (33’05”) eta Reimseko (Frantzia) munduko txapelketetan pista estaliko 3.000 metroetako proban laugarren postuan bukatu zuen”, diote.
Magdalenoz gain, Javi Conde klubeko Raul Martinez atletak Maratoi Erdian parte hartu zuen Almaty Munduko Txapelketan eta laugarren bukatu zuen.
“Datorren astean, Ibaik eta Raulek gainerako taldekideekin batera lehiatuko dira FEDDI Espainiako Txapelketan, Valentzian”, diote Javi Conde klubetik.
Programa / Bekeako jaiak 2024
‘Kortxoaren Dilema’ ikuskizuna eta lodifobiari aurre egiteko tailerra ekarriko dute Zaratamora
Programa / Usansoloko jaiak 2024 maiatza
Hego Uribeko dozenaka pentsiodun Gasteizen batu dira 1080 euroko gutxieneko pentsioa aldarrikatzeko
⚪️🔴 GABARRA | Argazkiak | Aupa Aitor Paredes! Talde zuri gorria Kopako txapelketa ospatzen!
Argazkiak / Hego Uribe zurigorriz jantzi da Kopako finalaren atarian
Bideoa / Lau greba egun deitu dituzte Basauriko Grafo enpresan, “hitzarmen duin baten alde”
“Gure Zirkua” Hego Uribera etorriko da lehen aldiz, Arrigorriagan zortzi saio eskainiz
